ފޯނުގައި އިންނަ ބެޓަރީ އައިކޮން ރަތްކުލަޔަށް ބަދަލުވުމުން ފޯނު ޗާޖަށް ޖެހުމަށް ވަރަށް އަވަސްވެގަނެއެވެ. ފޯނުއެކީ ނިވިދާނެތީއެވެ. ފޯނުގެ މައްޗަށް ކަޅު އަނދިރިކަން ވެރިވެދާނެތީއެވެ. އެބީދައިން، އަހަރުމެންގެ އީމާންތެރިކަން ބަލިކަށިވާ ވަގުތުތަކުގައި އަހަރުމެންގެ ހިތާއި އީމާންކަން ޗާޖުުރުން މުހިންމެވެ. އީމާންތެރިކަން އަލުން އިޔާދަކޮށް ވަރުގަދަކުރުން މުހިންމެވެ. 

ފާފަތަކާއި އުރެދުންތަކުގެ ސަބަބުން ކަޅުވެފައިވާ ހިތްތައް އަލިކޮށް، އަލުން އުޖާލާކުރުމަކީ ނުހަނު ބޭނުންތެރި ކަމެކެވެ. އީމާންތެރިކަން ބަލިކަށިވާ ވަގުތުތަކުގައި އެކަމުން އަރައިގަނެ، މާތް ﷲ ސުބުޙާނަހޫ ވަތަޢާލާގެ ހަޟުރަތަށް ކުއްތަންވެ ތަޢުބާވާން ޖެހޭނެއެވެ. އެކަމުގެ މުހިންމުކަން ކީރިތި ޤުރުއާނުން ހާމަވެގެންދެއެވެ.

‫إِنَّمَا ٱلۡمُؤۡمِنُونَ ٱلَّذِینَ إِذَا ذُكِرَ ٱللَّهُ وَجِلَتۡ قُلُوبُهُمۡ وَإِذَا تُلِیَتۡ عَلَیۡهِمۡ ءَایَـٰتُهُۥ زَادَتۡهُمۡ إِیمَـٰنࣰا وَعَلَىٰ رَبِّهِمۡ یَتَوَكَّلُونَ﴿ ٢ ﴾ (8:2)

"މުއުމިނުން ވާކަން ކަށަވަރީ، ﷲ ހަނދުމަކުރާހިނދު އެއުރެންގެ ހިތްތައް ބިރުވެތިވާ މީހުން ކަމުގައެވެ. އަދި އެކަލާނގެ (ބާވައިލެއްވި) އާޔަތްތައް އެއުރެންނަށް ކިޔައިދޭހިނދު، އެއުރެންގެ އީމާންކަން އިތުރުވާ މީހުން ކަމުގައެވެ. އަދި އެއުރެންގެ ވެރިރަސްކަލާނގެއަށް ވަކީލުކުރާ މީހުން ކަމުގައެވެ."

 

‫۞ أَلَمۡ یَأۡنِ لِلَّذِینَ ءَامَنُوۤا۟ أَن تَخۡشَعَ قُلُوبُهُمۡ لِذِكۡرِ ٱللَّهِ وَمَا نَزَلَ مِنَ ٱلۡحَقِّ وَلَا یَكُونُوا۟ كَٱلَّذِینَ أُوتُوا۟ ٱلۡكِتَـٰبَ مِن قَبۡلُ فَطَالَ عَلَیۡهِمُ ٱلۡأَمَدُ فَقَسَتۡ قُلُوبُهُمۡۖ وَكَثِیرࣱ مِّنۡهُمۡ فَـٰسِقُونَ﴿ ١٦ ﴾ (57:16)

"ﷲ ހަނދުމަކުރުމަށާއި، ޙައްޤު ބަސްފުޅުގެ ތެރެއިން ބާވައިލެއްވި ފޮތަށް އެއުރެންގެ ހިތްތައް މަޑުމައިތިރިވުމަށާއި، މީގެކުރިން ފޮތް ލިބުނު މީހުން ފަދައިން ނުވުމަށް، އީމާންވި މީހުންނަށް އަދިވެސް ވަގުތު ނާންނަނީހެއްޔެވެ؟ ފަހެ، އެއުރެންނަށް ޒަމާން ދިގުވެގެންދިޔައެވެ. ދެން (އެކަމުގެ ސަބަބުން) އެއުރެންގެ ހިތްތައް ހަރުކަށިވިއެވެ. އަދި އެއުރެންކުރެ ގިނަމީހުންނީ ފާސިޤުންނެވެ."

ﷲ ސުބުޙާނަހޫ ވަތަޢާލާއާއި އިސްލާމް ދީނުގެ ކަންކަމުން ދުރުވެވޭ ކަމުގެ އިޙުސާސް ކުރެވި، އީމާންތެރިކަން ފަނޑުވަމުންދާހެން ހީވާ ވަގުތުތަކުގައި މާތް ﷲގެ މަތިން ގިނަގިނައިން ހަދުމަކުރުން މުހިންމެވެ. ނަމާދު ޤާއިމްކޮށް ކީރިތި ޤުރުއާން ކިޔެވުން އިތުރުކުރަންވާނެއެވެ. ފާފަތަކަށް ތަޢުބާވެ، އެކަމާ ދެރަވެ ހިތާމަކުރުމަށް ވަގުތުކޮޅެއް ހުސްކޮށްލަންވާނެއެވެ. ސުންނަތް ނަމާދުތައްކޮށް، ދުޢާކުރުން ގިނަކުރުން މުހިންމެވެ. އީމާންތެރިކަން ވަރުގަދަކޮށްދެއްވާ، ދީނުގައި ސާބިތުވެ ހުރުމުގެ ހެޔޮ ތަޢުފީގު ދެއްވުން އެދި، އެކަލާނގެ ހަޟުރަތަށް ދަންނަވަންވާނެއެވެ. އީމާންކަން ބަލިކަށިވާހެން ހީވާނަމަ، އެ އީމާންތެރިކަން އިތުރުކޮށް އަލުން އިޔާދަކުރުމަށް މަސައްކަތް ކުރަންވާނެއެވެ. ފޯނުގެ ބެޓަރީ ޗާޖުކުރާ ބީދައިން، ހިތާއި އީމާންތެރިކަންވެސް ބަރާބަރަށް ޗާޖުކުރަން ވާނެއެވެ.