ޔޫނުސް ޢަލައިހިއްސަލާމްގެ ދުޢާފުޅާއި ގުޅޭގޮތުން ވަރަށް ގިނަ ބުނުންތައް ފެންނަމުން ދިޔައެވެ. މީހުންގެ އަމިއްލަ ތަޖުރިބާއަށް ބިނާކޮށް އެ ތަޖުރިބާތައް ހިއްސާކޮށްފައިވެއެވެ. އެ ދުޢާއިން އެމީހުންގެ ޙާލަތްތަކަށް އައި ބަދަލާއި، ދިރިއުޅުމަށް ގެނުވި ޙެޔޮ ބަދަލުތައް ބުނެދީފައިވެއެވެ. ސޯޝަލް މީޑިއާގެ އެކި މަންސަތަކުގައި ހިއްސާކޮށްފައިވާ، ހިތަށް ހަމަޖެހުން ގެނެސްދޭ ވާހަކަތަކެވެ. 

ކަމަކާމެދު ވަރަށް އުނދަގޫވެފައި، ނުތަނަވަސްވެފައިވީ ޙާލަތެއްގައި، ޔޫނުސް ޢަލައިހިއްސަލާމްގެ ދުޢާ ކިޔަން ފެށުމުން، އެ ކުރިމަތިވެފައިވީ އުނދަގޫ ޙާލަތް ނުވަތަ މައްސަލަ، ލޯ ކުރިމަތިން ފިލައިދިޔަކަމަށް މީހަކު ހާމަކޮށްފައިވެއެވެ. އެހެންމީހަކުވެސް އެ ފަރާތުގެ ތަޖުރިބާ ހިއްސާކޮށްފައިވެއެވެ. ނަފްސާނީގޮތުން އުނދަގޫ ދުވަސްވަރެއްގައި ތަކުރާރުކޮށް އެ ދުޢާ ކިޔުމުން، މާތް ﷲ ކަންކަން ފަހިކޮށްދެއްވި ގޮތާމެދު، އަދިއަދަށްވެސް ހައިރާންވާކަމަށް އެ ފަރާތުން ސޯޝަލް މީޑިއާގައި ލިޔެފައިވެއެވެ. ޔޫނުސް ޢަލައިހިއްސަލާމްގެ ދުޢާގެ ސަބަބުން ޙަޔާތަށާއި ޙާލަތަށް އަންނަ ހެޔޮ ބަދަލުތަކުގެ ޙަޤީޤީ ވާހަކަތައް މީހުންގެ ތަޖުރިބާއިން އެނގެން ހުރުމަކީ ކިހާ ބޮޑު ހިތްހަމަޖެހުމެއް ހެއްޔެެވެ؟ ތަސައްލީއާއި ހަމަޖެހުން ލިއްބައިދޭ އިޙްސާސްއެކެވެ. އެކަމުން އުއްމީދު ލިއްބައިދެއެވެ. ޙަޔާތުގައި ކަށިކުނބުރު ޖަންގަލިތެރޭގައި ބައެއްފަހަރު އުޅެން ޖެހުނަސް، އަލި މަގެއް ފެންނާނެކަމުގެ އުއްމީދު އެބަ އޮތެވެ. މީހުން އެކަން ތަޖުރިބާވެސް ކޮށްފައި ހުރީތީއެވެ. 

ކީރިތި ޤުރުޢާނުން ހާމަވާ، ޔޫނުސް ޢަލައިހިއްސަލާމް ކުރެއްވި ދުޢާ ތިރީގައި އެވަނީއެވެ. 

 لَّاۤ إِلَـٰهَ إِلَّاۤ أَنتَ سُبۡحَـٰنَكَ إِنِّی كُنتُ مِنَ ٱلظَّـٰلِمِینَ﴿ ٨٧ ﴾‬ (21:87)

"އިބަރަސްކަލާނގެ މެނުވީ، އިލާހަކު ނެތެވެ. އިބަރަސްކަލާނގެ ހުސްޠާހިރުވަންތަކަމާއެވެ! ހަމަކަށަވަރުން، އަނިޔާވެރިންގެ ތެރެއިން މި އަޅާވީމެވެ."

[ ‫وَذَا ٱلنُّونِ إِذ ذَّهَبَ مُغَـٰضِبࣰا فَظَنَّ أَن لَّن نَّقۡدِرَ عَلَیۡهِ فَنَادَىٰ فِی ٱلظُّلُمَـٰتِ أَن لَّاۤ إِلَـٰهَ إِلَّاۤ أَنتَ سُبۡحَـٰنَكَ إِنِّی كُنتُ مِنَ ٱلظَّـٰلِمِینَ﴿ ٨٧ ﴾‬ (21:87) "އަދި ޛުއްނޫނު (އެބަހީ: ޔޫނުސްގެފާނު) ހަނދުމަކުރާށެވެ! އެކަލޭގެފާނު (ޤައުމުގެ މީހުންދެކެ) ކޯފާވެގެން ވަޑައިގަތް ހިނދެވެ. ފަހެ، އެކަލޭގެފާނަށް ތިމަންރަސްކަލާނގެ ޢުޤޫބާތެއް ނުދެއްވާނެކަމަށް ހީކުރެއްވިއެވެ. ފަހެ، އެކަލޭގެފާނު އަނދިރިތަކުގެ ތެރޭގައި (މަހުގެ ބަނޑުގައި) ދުޢާ ކުރެއްވިއެވެ. އިބަރަސްކަލާނގެ މެނުވީ، އިލާހަކު ނެތެވެ. އިބަރަސްކަލާނގެ ހުސްޠާހިރުވަންތަކަމާއެވެ! ހަމަކަށަވަރުން، އަނިޔާވެރިންގެ ތެރެއިން މި އަޅާވީމެވެ."] 

ހިތާމަޔާ ހިތްދަތިކަމާއި އިމްތިޙާނުތަކަކީ ދިރިއުޅުމުގެ ހިއްސާއެކެވެ. އިންސާނުންނަށް އޮންނަނީ ކެތްތެރިވުމެވެ. މާތް ﷲގެ ހަޟުރަތަށް ދުޢާކޮށް ދެންނެވުމެވެ. ގިނަގިނައިން ތަޢުބާވެ، ހެޔޮ ޢަމަލުތައް ގިނަކުރުމެވެ. ކުރިމަތިވާ ދަތި އުނދަގޫ ޙާލަތްތަކާއި ޢިމްތިޙާނުތަކާ ކުރިމަތިލަމުން، ކެތްތެރިކަމާއި އުއްމީދާއެކު ކުރިއަށްދިއުމެވެ. ޔޫނުސް ޢަލައިހިއްސަލާމްގެ ދުޢާއަކީވެސް މިފަދަ ދަތި ޙާލަތްތަކުގައި ކުރެވޭނެ ވަރަށް ރަނގަޅު ދުޢާއެކެވެ. އުއްމީދާއި އަލިކަމަށް އޮތް މަގެކެވެ.