ޞިއްޙަތަކީ އިންސާނުންގެ އެންމެ މުހިންމު އެއް އަމާނާތެވެ. އަޅުގަނޑުމެންގެ ދުޅަހެޔޮކަމާއި އުފާވެރިކަން ބިނާވެގެންވަނީ ރަނގަޅު ޞިއްޙަތެއްގެ މައްޗަށެވެ. ނަމަވެސް، އަދުގެ ދުނިޔޭގައި ގިނަ މީހުންގެ ކިބައިގައި އަވަސް އަވަހަށް ޑަކްޓަރީ ބޭސް ބޭނުންކުރުމުގެ އާދަ އަށަގަންނަމުންދާކަން ފާހަގަކުރެވެއެވެ. މިއީ ވަރަށް އާދައެއްގެ ގޮތުން އެހާ ރަނގަޅު އާދައެއް ނޫނެވެ.

ކޮންމެ ކުޑަ ބައްޔަކަށް ނުވަތަ ތަދަކަށް ނުވަތަ އުނދަގުލަކަށް ޑަކްޓަރީ ބޭސް ބޭނުންކުރުމަކީ ހަށިގަނޑުގެ ޤުދުރަތީ ދިފާޢީ ނިޒާމު ދެރަވެ ނިކަމެތިވުމަށް މަގުފަހިވާނެ ކަމެކެވެ. އަޅުގަނޑުމެންގެ ހަށިގަނޑަށް އަމިއްލައަށް ބައްޔާ ދެކޮޅަށް ހަނގުރާމަ ކުރުމުގެ ޤާބިލުކަން ލިބިގެންވެއެވެ. ނަމަވެސް، އަބަދުވެސް ޑަކްޓަރީ ބޭސް ބޭނުންކުރަމުން ދިޔުމުން މި ޤުދުރަތީ ނިޒާމު ބަލިކަށިވެގެން ހިނގައިދާނެއެވެ.

ގިނަގިނައިން ޑަކްޓަރީ ބޭސް ބޭނުންކުރުމުގެ ސަބަބުން ބޭހަށް ދެވިހިފުމުގެ ނުރައްކާ އޮވެއެވެ. މިކަމުގެ ސަބަބުން ބޭހުގެ ނޭދެވޭ އަސަރުތަކާ ކުރިމަތިލާން ޖެހުމަކީވެސް އެކަށީގެންވާ ކަމެކެވެ. އަދި ބައެއް ފަހަރު ބޭސް ބޭނުންކުރުމުގެ ސަބަބުން އިތުރު ޞިއްޙީ މައްސަލަތަކާ ކުރިމަތިލާން ޖެހިދާނެއެވެ. އަދި ބަލި، ބޭހަށް ހޭނި، ބޭހުން ކުރާ އަސަރު ކުޑަވެ، ބާރުގަދަ ބޭސްތައް ކާންޖެހިވެސް ދެއެވެ.

އަބަދުހެންމެ ޑަކްޓަރީ ބޭސް ބޭނުންކުރުމުގެ ބަދަލުގައި ދިރިއުޅުމުގެ ވައްޓަފާޅި ބަދަލުކޮށް، ރަނގަޅު ކާނާ ކެއުމާއި، ގަވާއިދުން ކަސްރަތުކުރުމާއި، ފުރިހަމައަށް ނިދުން ފަދަ ކަންކަމަށް އިސްކަންދިނުމަކީ މުހިންމު ކަމެކެވެ. މިފަދަ ދުޅަހެޔޮ އާދަތަކުގެ ސަބަބުން ގިނަ ބަލިތަކުން ރައްކާތެރިވެވޭނެއެވެ. ކުދި އުނދަގޫތަކާ ރިހުންތަކުން މީހާ ސަލާމަތް ވެދާނެއެވެ.

ބައެއް ފަހަރު ޑަކްޓަރީ ބޭސް ބޭނުންކުރުމުގެ ބަދަލުގައި ޤުދުރަތީ ފަރުވާތަކަށް އިސްކަންދިނުމަކީވެސް ރަނގަޅު ކަމެކެވެ. މިސާލަކަށް، ހުންއައުމުން ގިނަގިނައިން ފެންވަރައިގެން ހުރުމާއި، ގިނައިން ފެންބުއިމާއި، އަރާމުކުރުން ފަދަ ކަންކަން ކުރެވިދާނެއެވެ. މީގެ އިތުރުން ޑަކްޓްރީ ބޭސް ބޭނުންކުރަން ޖެހިއްޖެ ހާލަތެއްގައި، އަބަދުވެސް ޑަކްޓަރެއްގެ ލަފާގެ މަތިން ބޭސް ބޭނުންކުރުމަކީ މުހިންމު ކަމެކެވެ. އަމިއްލައަށް ބޭސް ނަގައި ބޭނުންކުރުމަކީ ރައްކާތެރި ކަމަކަށް ނުވެދާނެއެވެ.

ނިންމާލަމުން ދަންނަވާނީ، އަޅުގަނޑުމެންގެ ޞިއްޙަތަކީ އަގުހުރި އަމާނާތެކެވެ. އެހެންކަމުން، އެހާ އަވަހަށް ޑަކްޓަރީ ބޭސް ބޭނުންކުރަން ނުހަދާށެވެ! ޑަކްޓަރީ ބޭހަކީ އެކިވައްތަރުގެ އެކި އެކި މާއްދާތަކާއި ޗެމިކަލްސް ބޭނުންކޮށްގެން ތައްޔާރުކޮށްފައިވާ އެކި ދަރަޖަ ދަރަޖައިގެ "ޑްރަގް" ތަކެކެވެ. އޭގެ ބަދަލުގައި ޤުދުރަތީ އެކި އެކި ވަސީލަތްތަކުގެ އެހީގައި ލުޔެއް ލިބޭތޯ ބެލުން މާ ބުއްދިވެރިއެވެ. އިންސާނާގެ ހަށިގަނޑާ އެއްމެ ގުޅޭ ފަރުވާއަކީ އެއީއެވެ.