ދަރިންގެ ކަންކަން އެންމެ ކުރިޔާލާ އެންމެ ގާތުން ފެންނަމުން ދާނީ މައިންބަފައިންނަށެވެ. އެކި ދަރިންގެ މިޒާޖުގައި ހުންނަ ތަފާތުތައް އެންމެ ރަނގަޅަށް ފާހަގަވާނެ އެއްބަޔަކީވެސް މައިންބަފައިންނެވެ. ކުދިންގެ އުޅުމުގައި ހުންނަ ފަރަގުތައް އެންމެ ފުރިހަމައަށް ދެނެގަނެވޭނެ ބަޔަކީވެސް އެއީއެވެެ. ނަމަވެސް ބައެއް ފަހަރު ދަރިންގެ މެދުގައި ތަފާތުކޮށް، އެއް ދަރިފުޅާއި އަނެއް ދަރިފުޅު އަޅާ ކިޔާކަމީ ފެންނަމުންދާ ހިތި ހަޤީޤަތެކެވެ.
ދަރިފުޅު ދެރަކުރުމުގެ ނިޔަތެއް ނެތިވެސް ބުނެވޭ ބައެއް ޖުމުލަތަކާއި އެ ޖުމުލަތައް އިބާރާތްކުރެވޭ ގޮތުން، ކުދިންގެ ހިތަށް ނޭދެވޭ އަސަރުތަކެއް ކުރެއެވެ. ކުއްޖާއަށް ރަނގަޅު ނަމޫނާއެއްގެ މިސާލުދެއްކުމުގެ ނިޔަތުގައި އެއް ދަރިފުޅުގެ ހުންނަ ރަނގަޅު ސިފައެއް ނުވަތަ ހުނަރެއްގެ ވާހަކަ ދެއްކުމުންވެސް، ދެން ހުންނަ ދަރިފުޅަށް އަސަރުތަކެއް ކޮށްފާނެއެވެ. އެކި ކަންކަމުގައި އެއްކުއްޖަކާއި އަނެއް ކުއްޖަކާ އަޅާކިޔެއެވެ. ކިޔެވުމުގެ މައިދާނުގައި މޮޅެތި ކުދިންނާ އަޅާކިޔެއެވެ. ހަމަމިއާއެކު، ގޭތެރޭގައި ކުރާ މަސައްކަތްތަކުގައިވެސް އަޅާކިޔެއެވެ. އެއް ކުއްޖަކު ގިނަ މަސައްކަތް ކުރާތީ އަނެއް ދަރިފުޅުގެ ގާތުގައި އެވާހަކަ ދައްކާ، އެކުއްޖާއަށް ތަޢުރީފުކުރެވެއެވެ. ނުވަތަ އެއް ކުއްޖަކު ކިރިޔާ ކަމެއްކޮށްލިޔަސް އެކަން ފާހަގަކޮށް އެވާހަކަ ތަކުރާރުކޮށް ދައްކާ، ގިނައިން މަސައްކަތް ކުރާ ކުއްޖާގެ މަސައްކަތްތައް ނަޒަރުއަންދާޒްކުރެވެއެވެ. އެކަން ބަލައިގަތުމުގެ ބަދަލުގައި، ނުކުރާ ކަންތައްތައް ފާހަގަކުރެވެއެވެ. މިހެން ކަންތައް ކުރުމުގެ ސަބަބުން ދަރިންގެ މެދުގައި އެކުރެވެނީ ތަފާތެވެ. މީގެއިތުރުން، ކުއްޖާއަށް ގޯސްކޮށް ކަމެއް ކުރެވޭ ކޮންމެ ފަހަރަކު އަނެއް ދަރިފުޅުގެ ރަނގަޅުކަމާއި، އެ ދަރިފުޅާމެދު ފަޚުރުވެރިވާ ކަމުގެ ވާހަކަތައް ދެކެވެއެވެ. ކޮންމެ ކުއްޖަކަށްވެސް ކުއްކުރެވޭނެއެވެ. އެކޮންމެ ފަހަރަކު ދަރިންގެ މެދުގައި އަޅާކިޔުމުން ކުދިންގެ ހިތުގައި ނަފުރަތު އުފެދުމަކީ ވެދާނޭކަމެކެވެ.
ދަރިންގެ މެދުގައި އަޅާކިޔާ ތަފާތުކުރުމުގެ ސަބަބުން ނޭދެވޭ އެތައް އަސަރެއްކުރެއެވެ. އަޅާ ކިޔާތީ އެކަމާ ވިސްނާ، އެފަދަ ދަރިއަކަށް ވެވުނު ނަމައޭ ހިތަށް އަރާ، އަމިއްލަ ނަފުސާމެދު ސުވާލު އުފެއްދެއެވެ. އަމިއްލަ ނަފުސުގެ އުނިކަމާއި ނާޤާބިލިއްޔަތުކަން އިޙުސާސްވާން ފަށާފާނެއެވެ. ތިމާ މީހާއަށް އެއްވެސް ކަމެއް ރަނގަޅަށް ނުކުރެވޭނެކަން ވިސްނެންފަށައެވެ. ކިތަށްމެ ވަރަށް މަސައްކަތް ކުރިޔަސް، މައިންބަފައިން ހިތްހަމަޖެހޭނެ ވަރަށް އެއްވެސްކަމެއް ނުކުރެވޭނެކަން ޤަބޫލުކުރެވެންފަށައެވެ. ކަމެއް ހާސިލުކުރުމަށް މަސައްކަތް ކުރަން ބޭނުމެއް ނުވެއެވެ. ގަދައަޅާ މަސައްކަތް ކުރާ ހިތެއް ނުވެއެވެ. ޢަޒުމާއި ހިތްވަރު ނެތިގެންދެއެވެ. ދެރަވެ، ހިތުގައި ޖެހޭ ފަހަރުތައް އާދެއެވެ. ރުޅިއައިސް، އަޅާ ކިޔުނު ކުއްޖާއާއި މެދު ހިތުގައި ނަފުރަތު އުފެދޭ ފަހަރުތައްވެސް މަދެއް ނޫނެވެ. ކޮންމެ ކަމެއްގައި އަޅާކިޔާ ހެދުމުން އަނެއް ކުއްޖާދެކެ ފޫހިވެއެވެ. ހިތްހަމަނުޖެހެވެއެވެ. ގަސްތަކާނުލާ ކުރެވޭ ކަންކަމަށްވެސް، އަޅާކިޔުމުގެ އުސްލޫބަށް އިބާރާތްތަށް ބައްޓަން ކުރެވުމުން، ކުއްޖާގެ ހިތުގައި ރުޅިވެރިކަން އުފެދެނީއެވެ. ނަތީޖާއެއްގެ ގޮތުން، ކުދިންގެ މެދުގައި އޮންނަންޖެހޭ ލޯބީގެ ބަދަލުގައި އުފަންވަނީ ރުޅިއާއި ނަފުރަތެވެ. ދިރިއުޅުމުގައި ކުރާ ކޮންމެ ކަމެއް ވާދަވެރި މުބާރާތަކަށް ވެގެންދެއެވެ. އެކަކަށްވުރެ އަނެއް ކުއްޖަކު މޮޅުވުމަށް އޮންނަނީ ވާދަވެރި ރޫޙެކެވެ. އޮންނަންޖެހޭ އެއްބަނޑުއެއްބަފާކަމުގެ ގުޅުން އޮންނަނީ ހީނަރުވެފައެވެ.
އަޅާކިޔާ ތަފާތުކުރުމުގެ ބަދަލުގައި ކުއްޖާއަށް ކުރެވޭ ކުއްތަކަށް އޮތް ހައްލު ބުނެދީ، އެކަން ތަކުރާރު ނުކުރުމަށް ނަސޭހަތްތެރިވެވޭނެއެވެ. ކުއްޖާކުރާ ރަނގަޅު ކަންކަން އެއްހަމައެއްގެ މަތިން ބަލައިގަނެ، އެކަން ފާހަގަ ކުރެވޭނެއެވެ. ކުއްޖާގެ ހުރި ހުނަރާއި ޤާބިލިއްޔަތަށް ތަޢުރީފުކޮށް، އިތުރަށް ހިތްވަރުދެވޭނެއެވެ. އެއްފަހަރަކު ނުވަތަ ދެފަހަރަކު ނަމޫނާ ނެގުމަށް މިސާލެއް ގޮތުގައި ކުއްޖެއްގެ ރަނގަޅު ސިފައެއް ދެއްކި ކަމުގައިވިޔަސް، އެއީ ތަކުރާރުކުރާ އާދައެއްކަމުގައި ހެދުން ބުއްދިވެރިއެއް ނޫނެވެ. އަޅާކިޔުމާއި ތަފާތުކުރުންތަކުން ދުރުވެ، ކޮންމެ ކުއްޖެއްގެވެސް ހުރި ހުނަރާއި ޤާބިލިއްޔަތު ބަލައިގަނެ، ހިތްހަމަ ނުޖެހޭ ގޮތަށް ކަމެއް ކުރާއިރަށް ރިވެތި ގޮތުގައި ނަސޭޙަތްތެރިވުން މުހިންމެވެ. ކުދިންގެ މެދުގައި ރުޅިވެރިކަމާއި ނަފުރަތު އުފެދުނަ ނުދިނުމަށް އެއީ މުހިންމު ފިޔަވަޅެކެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން