އިނގިރޭސި ޕްރިމިއާ ލީގުގައި ރޭ ކުޅުނު މެޗުގައި އިޕްސްވިޗް ޓައުން 1-0 އިން ބަލިކޮށް، އާސެނަލުން ތާވަލްގެ ދެވަނަ އަށް ޖެހިލައިފިއެވެ.

އާސެނަލްގެ އެމިރޭޓްސް ސްޓޭޑިއަމްގައި ކުޅުނު މި މެޗުގައި އެ ޓީމުގެ ހަމައެކަނި ލަނޑު، 23 ވަނަ މިނެޓުގައި ކާމިޔާބުކޮށްދިނީ ޖަރުމަނުގެ މިޑްފީލްޑަރު، ކައި ހަވާޓްޒް އެވެ. އޭނާ މި ލަނޑުޖެހީ އެ ޓީމުގެ ބެލްޖިއަމް ފޯވާޑް، ލެއަންޑްރޯ ޓްރޮސާޑް ދިން ބޯޅައަކުންނެވެ.

މި މެޗުގައި އާސެނަލްގެ ލީޑު ފުޅާކޮށްދޭން ޑެކްލަން ރައިސް، ގެބްރިއެލް މަގަލޭޝް އާއި ހަވާޓްޒް އަށް ލިބުނު ފުރުޞަތުތަކުގެ ބޭނުމެއްނުހިފުނެވެ.

މި ނަތީޖާއާއެކު އާސެނަލް ވަނީ 18 މެޗުން 36 ޕޮއިންޓް ހަމަކޮށްފައެވެ. މިއާއެކު، އާސެނަލް ވަނީ އެއްވަނައިގައި އުޅޭ ލިވަޕޫލާ ދެމެދު އޮތް ފަރަގު ހަ ޕޮއިންޓަށް ކުޑަކޮށްފައެވެ. ލިވަޕޫލް އެއްވަނައިގައި އޮތީ އެއް މެޗު މަދުން ކުޅެގެން 42 ޕޮއިންޓް ހޯދައިގެންނެވެ. ތިންވަނައިގައި އުޅެނީ ޗެލްސީ އެވެ. ޗެލްސީ އަށް 18 މެޗުން ލިބިފައިވަނީ 35 ޕޮއިންޓެވެ. ހަތަރުވަނައިގައި އޮތް ނޮޓިންގހަމް ފޮރެސްޓަށް ލިބިފައިވަނީ 18 މެޗުން 34 ޕޮއިންޓެވެ.

މި މުބާރާތުގައި ރޭ ކުޅުނު އަނެއް މެޗުގައި ބްރައިޓަންގެ ދަނޑުގައި އެ ޓީމުން ވަނީ ބްރެންޓްފޯޑާ ލަނޑެއްނުޖެހި އެއްވަރުވެފައެވެ.