ދަރިންނަކީ ﷲ ސުބުޙާނަހޫ ވަތަޢާލާ، މަޔަކާއި ބަފަޔަކަށް ދެއްވާ އަގުހުރި އަމާނާތެކެވެ. އެ އަމާނާތް ރައްކާތެރިކަމާއެކު ބެލެހެއްޓުމަކީ ކޮންމެ މަޔަކާއި ބަފައެއްގެ މައްޗަށްވެސް ވާޖިބުވެގެންވާ ކަމެކެވެ. ނަމަވެސް، ގިނަ ފަހަރަށް ދަރިން ބެލެހެއްޓުމުގެ މަސްއޫލިއްޔަތު އުފުލަނީ މައިންނެވެ. ބައެއް ބައްޕައިން، ބައްޕައިންގެ ދައުރަށް އިހުމާލުވާކަމީ މިއަދު ފެންނަމުންދާ ހިތާމަވެރި މަންޒަރެކެވެ. ހާއްސަކޮށް، ރޫޅިފައިވާ އާއިލާތަކުގެ ބައްޕައިންނެވެ. ކުއްޖާގެ މަންމައާއި ވަރިވެފައިވީނަމަވެސް އެއީ ހަމަ ތިބާގެވެސް ދަރިންނެވެ. މި މަޒުމޫނުގައި އަލިއަޅުވާލާނީ ދަރިންގެ ހައްގުގައި ބައްޕަގެ ބޮޑު ޒިންމާގެ މައްޗަށެވެ.

އިސްލާމްދީނުގައި ކަނޑައަޅުއްވާފައިވާ ބައްޕައިންގެ ޒިންމާ ވަރަށްވެސް ބޮޑެވެ. އިސްލާމްދީނުގައި ބައްޕައިންނަށް އިޝާރާތް ކުރެވެނީ، "ތިޔަބައިމީހުން، އެންމެނީ ބަލަދުވެރިންނެވެ. އަދި ތިޔަބައިމީހުންގެ ބެލުމުގެ ދަށުގައިވާ މީހުންނާއި ތަކެއްޗާއިމެދު ސުވާލު ކުރެވޭނެއެވެ." މިފަދައިންނެވެ. މި ކަމުންވެސް އެނގެނީ ބައްޕައިންނަށްވެސް އެމީހުންގެ ދަރިންނާ މެދު ޒިންމާ އުފުލަން ޖެހޭނެކަމެވެ.

ދަރިއެއްގެ މައްޗަށް، ބައްޕައިންގެ އެންމެ މުހިންމު ޒިންމާތަކުގެ ތެރޭގައި ހިމެނެނީ:

. ދީނީ ތަރުބިއްޔަތު: ދަރިންނަށް އިސްލާމްދީނުގެ އަސާސްތައް އުނގަންނައިދިނުމާއި، ހެޔޮ އަޚްލާޤު އަށަގެންނެވުން.

. ހިމާޔަތާއި ރައްކާތެރިކަން: ދަރިންގެ ހިމާޔަތަކީ ބައްޕައިންގެ ފުރާނައެވެ. އަދި އެ ދަރިންގެ ރައްކާތެރިކަން ކަށަވަރުކޮށްދިނުމީ ބައްޕައިންގެ މައްޗަށް ވާޖިބެކެވެ.

. ތަޢުލީމު: ދަރިންނަށް ރަނގަޅު ތަޢުލީމެއް ހޯދައިދިނުމާއި، އެކަމަށް ބާރުއެޅުން.

. އިޤްތިޞާދީ ޒިންމާ: ދަރިންގެ ޚަރަދުތައް ބެލެހެއްޓުމާއި، އެކަށީގެންވާ ދިރިއުޅުމެއް ފޯރުކޮށްދިނުން.

. ލޯބި އާއި އަޅާލުން: ދަރިންނަށް ވަގުތު ދިނުމާއި، އެމީހުންގެ ޖަޒުބާތުތަކަށް އިޙްތިރާމްކުރުން.

. ނަމޫނާ ދެއްކުން: ހެޔޮ ނަމޫނާއަކަށްވުމާއި، ރަނގަޅު އާދަތައް ދަރިންނަށް ދަސްކޮށްދިނުން.

ބައްޕައިންގެ ދައުރު މުހިންމުވާ އެތައް ސަބަބުތަކެއް ވެއެވެ. ދިރާސާތަކުން ދައްކާގޮތުގައި ބައްޕައިންގެ ޝާމިލްވުން އޮންނަ ކުދިން ތަޢުލީމީ ގޮތުން ކުރިއަރައެވެ. އަދި އިޖްތިމާޢީ ގޮތުން ހަރުދަނާވެ، ނަފްސާނީ ދުޅަހެޔޮކަން އިތުރުވެއެވެ. މީގެ އިތުރުން، ބައްޕައިންގެ ލޯތްބާއި އަޅާލުން ލިބޭ ކުދިން ފަހުން ދިމާވާ ދަތިތަކާ ކުރިމަތިލުމުގައި ހަރުދަނާކަން ބޮޑުވެއެވެ.

ނަމަވެސް، މިހާރުގެ މުޖުތަމަޢުގައި ގިނަ ބައްޕައިން މި ޒިންމާތައް އަދާކުރުމުގައި އިހުމާލުވާކަން ފާހަގަކުރެވެއެވެ. މީގެ ސަބަބުތަކުގެ ތެރޭގައި މަސައްކަތުގެ ބުރަކަމާއި، ވަގުތު ނެތުމާއި، އަދި ބައެއް ފަހަރު ޒިންމާ ނެގުމަށް ޖެހިލުންވުން ހިމެނެއެވެ. މީގެ އިތުރުން ކުއްޖާގެ މަންމަ ވަރިކޮށްފައި ހުރުމުން، ދަރިންނަށް އަޅާނުލުމުގެ އިތުރުން، ހަރަދުވެސް ނުދީ އުޅޭ ބައްޕައިންނެއް އުޅެއެވެ.

ހިތާމައިގެ ކޮޅެއްވެސް ނެތެވެ! ދުޢާ އަކީ މިފަދަ ބައްޕައިންނަށް ހެޔޮވިސްނުން ދެއްވާ، އެ ދަރިންނަށް އުފާވެރި، ފާގަތި އަދި ތިޔާގި ދިރިއުޅުމެއް މިންވަރުކުރެއްވުން، އާމީން!