އެކި މޭވާތަކަށް ނަން ކިއުމުގައި އެކި އެކި ހާލަތްތަަށް މެދުވެރިވެފައި ވޭ. އެގޮތުން ވިލާތު ބަށި، ކަޅުހުއްތުމޭވާ އަދި ޖުމްހޫރީ މޭވާފަދަ ނަންނަން ހިމެނޭ. ޖުމްހޫރީ މޭވާއަށް ޖުމްހޫރީ ގެ ނަން ދެވުނީ ކީއްވެ؟ މި މޭވާގެ އިނގިރޭސި ނަމުގައިވާ ބަސްތަކުގެ ތަރުޖަމާއަށް ބަލާލާނަމަ މި މޭވާއަށް ކިޔޭނީ ހަމަ އިނގިރޭސިބަހުން ކިޔާގޮތާ ދާދި އެއްގޮތަކަށް. އެއީ ފެޝަން މޭވާ. ނަމަވެސް ދިވެހިން މި މޭވާއަށް ކިޔާ އުޅެނީ ޖުމްހޫރީ މޭވާ. ޖުމްހޫރީ މޭވާ ދިވެހި ރާއްޖެއަށް ތައާރަފުވީ ރާއްޖޭގެ ޒަމާންވީ ވިރާސީ ވެރިކަން ނިމުނު ދުވަސްވަރު. އެއީ ޖުމްހޫރީ ވެރިކަމެއް މި ރާއްޖޭއަށް ތައާރަފުވި ދުވަސްވަރު. އެހެންކަމުން މި މޭވާގެ ނަމެއްގެ ގޮތުގައި ދިވެހިން ކިޔައި އުޅެންފެށީ ޖުމްހޫރީ މޭވާ. އޭގެ ފަހުން އެނަން މުޅި ރާއްޖެއަށް ތައާރަފުވެ ވައިގައިހިފި.ޖުމްހޫރީ މޭވާ ދިވެހި ޖުމްހޫރިއްޔަތާއި ގުޅެނީ މިފަދަ ގޮތަކަށް. އެއީ އެއްވެސްހާލެއްގައި ޖުމްހޫރީ ވެރިކަމެއްގައި ވެރިކަން ކުރެއްވި ބޭފުޅަކަށް ނިސްބަތްކޮށް، ނުވަތަ އެއިން ބޭފުޅެއްގެ ފަރާތްޕުޅުން ފެނުނު ކަމެއްގެ ސަބަބުން ދެވުނު ނަމެއް ނޫން. ޖުމްހޫރީ މޭވާއަކީ ދިވެހިންގެ ތެރޭގައި މިއަދު ވަރަށް މަގުބޫލު މޭވާއެއް. އަދި ދިވެހި ފަސްގަނޑުގައި ގިނަ އަދަދަކަށް ހައްދާވެސް އުޅޭ މޭވާއެއް.