ކީރިތި ޤުރުޢާނުގެ މޫރިތި އާޔަތްތަކުން ހިތަށް ހަމަޖެހުން ލިބެއެވެ. އެއީ ހިތްތަކަށްވާ ފަރުވާއެކެވެ. ޝިފާއެކެވެ. ޤުރުޢާނަކީ ހަނދާންކޮށްދިނުމެކެވެ. ދިރިއުޅުމުގެ އެކި ޙާލަތްތަކުގައި ދިމާވާ އެކި ކަންތައްތަކާ ގުޅޭ އެންމެ ރަނގަޅު ލަފަޔާއި އިރުޝާދު ބުނެދީފައިވާ މާތް ﷲގެ ކަލާމްފުޅެވެ. ޤުރުޢާން ކިޔެވުމަކީ ވަރަށް ގިނަ މީހުންގެ ފަރާތުން ފެންނަ ހެޔޮ ޢަމަލެކެވެ. ޤުރުޢާން ކިޔަވާ ބީދައިން، ޤުރުޢާނުގެ ތަރުޖަމާ ކިޔާލުމަކީ ކުރެވިދާނެ ކަމެކެވެ. އެއީ ތަފާތު އީޙުސާސެކެވެ.
ޤުރުޢާނުގެ ތަރުޖަމާ ކިޔާލުމުން އެ އާޔަތެއްގައި ބަޔާންވެގެންވާ އެއްޗެއް އެނގިގެންދެއެވެ. އާޔަތުން މުޚާތަބު ކުރެވެނީ ސީދާ ތިމާ މީހާއަށްކަން ދޭހަވާ އިޙުސާސެއްކުރެވެއެވެ. އެއާޔަތެއްގައި ބަޔާންވެގެންވާ ކަމަކާއި ގުޅޭ އިޙުސާސްތައް ކުރެވެއެވެ. ޢަޛާބާއި މާތް ﷲގެ ކޯފާ ބަޔާންވެގެންވާ އާޔަތެއްނަމަ ބިރުވެރިކަމުގެ އިޙުސާސެވެ. މާތްﷲގެ ރަޙުމަތާއި ފުއްސެވުމުގެ ވާހަކަ އައިސްފައިވާނަމަ، އުއްމީދާއި އުފާވެރިކަމުގެ އިޙުސާސެވެ. މާތް ﷲގެ ދީލަތިވަންތަކަމުން ފުރިގެންވާ ނިޢުމަތްތަކަށް އިންސާނުން ހަރާންކޯރުވާ މިންވަރާއި އެކަމަށް ޝުކުރުވެރިނުވުމާ ގުޅޭގޮތުން އައިސްފައިވާނަމަ، ހިތާމަޔާއި މޮޅިވެރިކަމުގެ ކަރުނަ އަންނަ އިޙުސާސެވެ. މި ކޮންމެ އިޙުސާސެއްވެސް މީހާ އިސްލާހުވުމަށް ކައިރި ކޮށްދޭނެއެވެ. ކޮންމެ އިޙުސާސެއްވެސް ބާރުއަޅާނީ އިސްލާމްދީނާ މީހާ ކައިރިވުމަށެވެ. އެއްޗެއް ކިޔުމާއި އެކިޔާ އެއްޗެއް އެނގި ފަހުމުވުމާ ދެމެދުގައި ވަރަށް ބޮޑު ތަފާތެއްވާނެއެވެ. ޤުރުޢާނުގައި ބަޔާންވެގެންވާ އާޔަތްތަކުން ބުނާ އެއްޗެއް އެނގުމުން، އެންމެ ސާފު ގޮތުގައި އެ އާޔަތުން ބުނެދޭ ވާހަކަ ފަހުމުވާނެއެވެ. އެ އާޔަތުގެ މާނަ ތިލަވާނެއެވެ. ބުނާ އެއްޗެއް އެނގުމުން އެޔާމެދު ވިސްނާ ފިކުރު ކުރެވޭނެއެވެ. އެކަމާމެދު ވިސްނާލަން ފަސޭހަވާނެއެވެ. މީގެ އިތުރުން، ތަރުޖަމާ ކިޔާލުމުން ޤުރުޢާނުގައި ބަޔާންވެގެންވާ ކަންތައްތައް އަމިއްލަ ދިރިއުޅުމަށް ގެންނަން ފަސޭހަވާނެއެވެ. އަންގަވާފައިވާ ކަންތައްތަކާ އެއްގޮތަށް ޢަމަލުކުރަން ފަސޭހަވާނެއެވެ. ހަމައެހެންމެ، ޤުރުޢާނުގެ އާޔަތްތަކުން ލިބިދޭ 'މެސެޖް'ތަކާއި ބަޔާންވެގެންވާ ވާހަކަތައް އަމިއްލަ ބަހުން ނުވަތަ 'ލެންގުއޭޖުން' ފެންނަން އޮތުމުން، އަމިއްލަ ނަފުސު ހިސާބުކުރަން ހިތްވަރުލިބޭނެއެވެ. އަމިއްލަ ނަފުސުން އިސްލާޙު ކުރަންޖެހޭ ކަންތައްތަކާއި އިތުރަށް މަސައްކަތް ކުރަންޖެހޭ ކަންތައްތައް އެނގިގެންދާނެއެވެ. ހަމަމިއާއެކު، ތަރުޖަމާގެ އަލީގައި އެނގިހާމަވެގެން ދާނީ ޤުުރުޢާނުގައި ދެކެވޭ ވާހަކަތައް ގުޅުފައިވާ ކަންތައްތަކެވެ. ޢިބުރަތްތެރި އެކި ވާހަކަތަކާއި ފިލާވަޅުތައް އެނގޭނަމަ، އެ ފިލާވަޅެއް ގުޅިފައިވަނީ ކޮން ހާދިސާއަކާކަންވެސް އެނގޭނެއެވެ. މިގޮތަށް މިކަން އޮތުމުން، އިތުރަށް ތަރުޖަމާ ކިޔުމަށް ޝައުގުވެރިކަން އުފެދޭނެއެވެ.
ޤުރުޢާނަށް ޢަމަލުކުރެވޭނީ ޤުރުޢާނުގައި ބަޔާންވެގެންވާ ކަންތައްތައް އެނގިގެންނެވެ. ޢަރަބި ބަހަކީ އަހަރުމެންގެ މާދަރީ ބަސްކަމުގައި ނުވާތީ، ސީދާ އާޔަތްތައް ކިޔާލުމުން އެއާޔަތްތަކުގައި ބަޔާންވާ ވާހަކައެއް ނޭނގެއެވެ. ނަމަވެސް ތަރުޖަމާ ކިޔާލުމުން މަންޒަރު ސާފުވެގެންދެއެވެ. ބަޔާންވެގެންވާ ވާހަކަ ވަރަށް ރަނގަޅަށް އެނގި، ފަހުމުވެގެންދެއެވެ. ތަފާތު އިޙުސާސްތަކާއި ހިތްހަމަޖެހުމާއެކީ މީހާގެ ޢަމަލުތައް އިސްލާޙުކުރުމަށް އެޅޭނެ އެއް ފިޔަވަޅަކީ ޤުރުޢާން ތަރުޖަމާއާއެކު ކިޔާލުމެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން