އިންސާނުންގެ ތެރޭގައި އެކި ވައްތަރުގެ އެކި މިޒާޖުގެ މީހުން އުޅެއެވެ. އޭގެ ތެރޭގައި އަމިއްލަ ނަފްސަށް އިންސާފުވެރިވެ، ކުރާ ކަންކަމުގައި ރަނގަޅާއި ގޯސް ވަކިކޮށް، އިސްލާހުވުމަށް މަސައްކަތްކުރާ މީހުން ވެސް އުޅެއެވެ. އަދި އަމިއްލަ ނަފްސަށް އަބަދުވެސް އިންސާފުވެރި ނުވެ، ކުރާ ހުރިހާ ކަމެއް ރަނގަޅު ކަމަށް ދެކޭ މީހުންވެސް އުޅެއެވެ. މި ދެވަނަ ބާވަތުގެ މީހުންނަކީ ދުވަހަކުވެސް އަމިއްލައަށް ކަމެއް ގޯސްކޮށް ނުކުރެވޭނެ ކަމަށް ޤަބޫލުކުރާ މީހުންނެވެ.
މިފަދަ މީހުންގެ ކިބައިގައި ހުންނަ އެއް ސިފައަކީ އަބަދުވެސް އަމިއްލައަށް ކުރެވޭ ކަންކަން ދިފާއުކޮށް، އެހެން މީހުން ގޯސްކޮށް ކަންކަންކުރާ ކަމަށް ދެކުމެވެ. މިއީ ވަރަށް ނުރައްކާތެރި ސިފައެކެވެ. އެއީ މިފަދަ މީހުން އަމިއްލަ ނަފްސު އިސްލާހު ކުރުމުގެ ބަދަލުގައި އަބަދުވެސް އެހެން މީހުން ކުށްވެރިކޮށް، އެ މީހުންގެ އަބުރަށް ހުތުރުވާ ގޮތަށް ވާހަކަ ދައްކާތީއެވެ. މިފަދަ މީހުންގެ ހިތުގައި އަމިއްލަ ނަފްސަށް ވަފާތެރިވުމެއް ނުހުރެއެވެ. އެހެންކަމުން، އަމިއްލައަށް ކުރެވޭ ގޯސް ކަންތައްތައް ވެސް އެއީ ރަނގަޅު ކަންތައްތަކެއްގެ ގޮތުގައި ދެކެއެވެ.
މިފަދަ ނޭދެވޭ ސިފަތައް ގިނައިން ފެންނަމުންދަނީ މުޖުތަމަޢުގެ މަތީ މަޤާމުތަކާއި ވަޒީފާތަކުގައި ތިބޭ މީހުންގެ ކިބައިންނެވެ. މިއީ ވަރަށް ހިތާމަހުރި ކަމެކެވެ. އެހެނީ މިފަދަ މަޤާމުތަކުގައި ތިބޭ މީހުންނަކީ އެހެން މީހުންނަށް ނަމޫނާއަކަށް ވާންޖެހޭ ބައެކެވެ. އެހެންނަމަވެސް، އަމިއްލަ ނަފްސު އިސްލާހު ނުކޮށް، އަބަދުވެސް އެހެން މީހުން، ހާއްސަކޮށް އެމީހެއްގެ ދަށުގައި މަސައްކަތްކުރާ މީހުން ކުށްވެރިކުރުމަކީ ރަނގަޅު ނަމޫނާއެއް ނޫނެވެ.
ކޮންމެ އިންސާނަކީ ވެސް ގޯސް ކަންތައްތައް ކުރެވިދާނެ މީހެކެވެ. އެހެންކަމުން، އަމިއްލަ ނަފްސަށް އިންސާފުވެރިވެ، ކުރެވޭ ގޯސް ކަންތައްތައް ބަލައިގަނެ، އިސްލާހުވުމަށް މަސައްކަތްކުރުމަކީ ވަރަށް މުހިންމު ކަމެކެވެ. އަދި އެހެން މީހުންގެ ކުށްތައް ބަލައި، އެ މީހުންގެ އަބުރަށް ހުތުރުވާ ގޮތަށް ވާހަކަ ދެއްކުމުގެ ބަދަލުގައި އަމިއްލަ ނަފްސު އިސްލާހުކުރުމަށް މަސައްކަތްކުރުމަކީ ކޮންމެ މީހަކު ވެސް ކުރަންޖެހޭނެ ކަމެކެވެ.
ނިންމާލަމުން ދަންނަވާނީ، ދުވަހަކު ވެސް ތިމާއަށް ކަމެއް ގޯސްކޮށް ނުކުރެވޭނެ ކަމަށް ދެކުމަކީ ވަރަށް ބޮޑު އޮޅުމެކެވެ. ކޮންމެ މީހަކަށް ވެސް ގޯސްކޮށް ކަންތައްތައް ކުރެވިދާނެއެވެ. މުހިންމީ އެ ކަންކަން ބަލައިގަނެ، އިސްލާހު ކުރަން މަސައްކަތް ކުރުމެވެ. މާ ބޮޑާވެ، އަބަދުމެ އަނެކާ ބަދުނާމު ކުރަން އުޅުމުން ފެންނަނީ ތިބާގެ ފިނޑިކަމެވެ. ހަގީގަތާ ކުރިމަތިލާން ޖެހިލުންވާ ކަމެވެ. ބިރުގަންނަކަމެވެ. ހަރުދަނާކަމެއް ސާބިތުކަމެއް ކެރުންތެރިކަމެއް ނެތްކަމެވެ!
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން