ބޮޑުވެގެން ކުއްޖާވާނީ އެވެނި މިވެނި މީހަކަށޭ ބުނާ އަޑު، އެންމެ ތުއްތުއިރުއްސުރެ އެކުދިންގެ ކަންފަތްތަށް އިވެމުންދެއެވެ. ބޮޑުވެގެން ވާންބޭނުންވަނީ ކޮންކަހަލަ މީހަކަށްތޯ ކުދިންނާ ވަރަށް ގިނައިން ސުވާލުވެސް ކުރެވެއެވެ. ތުއްތު ހިތްތަކުން ދެކެމުން އަންނަ ހުވަފެންތައް ޅަފަތުގައި ނުހަނު ބޮޑެވެ. ވާންބޭނުންވަނީ ޑަކްޓަރަކަށެވެ. ސިފައިންގެ މީހަކަށެވެ. ޓީޗަރަކަށެވެ. ނަރުހަކަށް ނުވަތަ ޕައިލެޓަކަށެވެ. ޕޮލިހަކަށް ނުވަތަ އިންޖިނިއަރަކަށެވެ. ނަމަވެސް، ހެދިބޮޑުވަމުން އަންނައިރު އުޅެންޖެހެނީ އޮޅުންބޮޅުންގަނޑެއްގެ ތެރޭގައެވެ. އިޙްތިޔާރުކުރާނެ ދާއިރާއެއް ނޭނގިގެންނެވެ. ކުރިޔަށްދާނެ 'ޕްލެޓްފޯމެއް' ފަހުމު ނުވެގެންނެވެ. އެތައް ބައެއްގެ ޚިޔާލާއި ރައުޔު، ކުއްޖާގެ ސިކުނޑީގައި ބިންވަޅު ނެގޭތީކަމަށްވެސް ވެދާނެއެވެ.

ކޮންމެ ބެލެނިވެރިއެއްވެސް އެމީހެއްގެ ދަރިފުޅާމެދު ހުވަފެންތަކެއް ދެކޭނެއެވެ. ހަރުދަނާ މީހަކަށްވެ، އަމިއްލަ ފައި މައްޗަށް ތެދުވާނެ ވަރުގެ ޤާބިލުކަން ހުންނަ ދަރިޔަކަށް، އެ ދަރިފުޅު ހަދަން ބޭނުންވެއެވެ. ވަޒީފާގެ މައިދާނުގައި ކާމިޔާބު ކުއްޖެއްގެ ގޮތުގައި ފެންނަން ބޭނުންވެއެވެ. ބައެއްފަހަރަށް، މައިންބަފައިން ނުވަތަ އާއިލާގެ ގިނަ ބައެއްގެ ޚިޔާލާއި ރައުޔުގެ ސަބަބުން، ކުއްޖާ ކުރިމަތިލާން ޖެހެނީ އޮޅުންބޮޅުމަކާއެވެ. ބޮޑު 'ކޮންފިޔުޝަން'އަކާއެވެ. އެކަކު ބުނަނީި ޑަކްޓަރަކަށްވާށެއެވެ. ގިނައިން ކިޔަވަން ޖެހުނަސް، އެއީ ޤަދަރުހުރި ވަޒީފާއަކަށްވީތީއޭ ބުނެއެވެ. ދެން މީހަކު ބުނަނީ ނަރުހަކަށް ނުވަތަ ޓީޗަރަކަށް ވާށޭއެވެ. ކިތަށްމެ ބުރަޔަސް، ބޮޑު މުސާރައެއް ލިބޭނެޔޭ ކިޔާފައެވެ. އަނެއްކާވެސް އިތުރު ޚިޔާލެއްދެއެވެ. ސިޔާސީ މައިދާނަށް ނުކުތުމަށެވެ. މެމްބަރަކަށްވާށެއެވެ. އެއީ މާ ފަސޭހަގޮތެކޭ ކިޔާފައެވެ. ހަމައެކަނި ޚިޔާލު ދިނުމެއްވެސް ނޫނެވެ. ބައެއްފަހަރުތަކުގައި، ކުއްޖާ ދެކެމުންދާ ހުވަފެނަށް ފާޑުކިޔާތަން ފެނެއެވެ. ކުއްޖާ ޕައިލެޓަކަށްވާން ބޭނުންނަމަ އެކަމަށް ނުރުހުން ފާޅުކުރެއެވެ. މާ 'ރިސްކު' ބޮޑު ކަމެކޭ ބުނެއެވެ. ނުވަތަ އެއީ މާ އުނދަގޫކަމެކޭ ބުނެފާނެއެވެ. ހަމައެހެންމެ، ފާމަސިސްޓަކަށް ވާންބޭނުންނަމަ، އެއީ މާ 'ފައްކާ' ވަޒީފާއެއް ނޫނޭ ބުނެފާނެއެވެ. 

މިކަހަލަ ރައުޔުތަކުގެ ސަބަބުން، ޚިޔާރުކުރަންވީ ދާއިރާއެއް ކުއްޖާއަކަށް ނޭނގެއެވެ. ވަޒީފާއެއް އިޚްތިޔާރުކުރަން، ކުއްޖާއަށް ނުހަނު އުނދަގޫވެގެންދެއެވެ. އިޙްތިޔާރުކުރަންވީ، ބޮޑު މުސާރަ ލިބޭ ދާއިރާއެއްތޯ ނުވަތަ އަމިއްލަ މީހާ ބޭނުންވާ ދާއިރާތޯ ސުވާލު އުފެދެއެވެ. ޤަދަރުވެރި ވަޒީފާއަކުން ކުރިޔަށްދާންވީ ހެއްޔެވެ؟ ނުވަތަ ކުޑައިރުއްސުރެ ކުއްޖާ ވާންބޭނުންވި މީހާއަށް ވާންވީ ހެެއްޔެވެ؟ ކުޑައިރުއްސުރެ ދެކެމުން އައި ހުވަފެނުގައި ކުލަޖައްސަންވީ ހެއްޔެވެ؟ ނުވަތަ، މީހުންނަށް ކަމުދާ ކަހަލަ ދާއިރާއަކުން ކުރިޔަށް ދާންވީ ހެއްޔެވެ؟ ދާއިރާއަށް ޝައުގެއް ނެތަސް، އެވެނި މިވެނި މީހަކު ބުނީތީ، ވަކި ދާއިރާއެއް އިޚްތިޔާރުކުރަންވީ ހެއްޔެވެ؟ އަމިއްލަ ނިންމުމަށްވުރެ، އެހެން މީހުންގެ ޚިޔާލާއި ނިންމުން ރަނގަޅުވެދާނެ ނޫން ހެއްޔެވެ؟ މިއީ ވަޒީފާގެ މައިދާނަށް ނުކުންނަން ވިސްނާއިރު އަރާފައިބާ ސުވާލުތަކެވެ. އޮޅުންބޮޅުންވެފައިވާ ސިކުނޑިއަށް، އިތުރު ހާސްކަމާއި ނުތަނަވަސްކަން ގެނުވާ ސުވާލުތަކެކެވެ. ދާންވީ ރާސްތާ ގިނަފަހަރަށް ފަހުމުނުވެއެވެ. ތޮއްޖެހިފައިވާ ރައުޔުގެ ދާސްތާނުތައް އުތުރި އަރާފައިވާތީއެވެ.