އިންސާނާގެ ހަށިގަނޑު އުފެދިފައިވަނީ އެތަކެއް ބައިވަރު މަސްތަކެއްގެ މައްޗަށް. ކޮންމެ މަސްތަކަކަށްވެސް އެ މަސްތަކަކަށް، ހާއްސަ މަސައްކަތްތަކެއްވޭ. އެގޮތުން އެމަސްތަކުގެ މަސައްކަތުގެ އަވަސްކަމާއި ލަސްވުން ބިނާވަނީ އެ މަސްތަކެއް ކުރާ މަސައްކަތަކަށް. އިންސާނާގެ ހަށިގަނޑުގައިވާ އެންމެ ހަލުވި އަދި އެންމެ މަސައްކަތް އަވަސް މަސްތަކަކީ އިންސާނާގެ ލޮލުގެ މަސްތައް. އެގޮތުން 0.1 ސިކުންތުގެ ތެރޭގައި ނުވަތަ އެއަށްވުރެވެސް އަވަހަށް ލޮލުގެ މަސްތައް ހަރަކާތްކުރޭ. އެހެން ގުނަވަންތަކުގައި ހުންނަ މަސްތަކަށްވުރެ ލޮލުގެ މަސްތަކުގެ މަސައްކަތް ހަލުއިވެފާ އަވަސް. މީގެ އިތުރުން ލޮލުގެ މަސަތަކަކީ އެހެން ބައެއް ގުނަވަންތަކުގެ މަސްތައް ހަރަކާތްތެރި ކުރުމަށް އެހީވެދޭ މަސްތަކެއް. އެގޮތުން އިންސާނާއާއި ދިމާލަށް ނުރައްކަލެއް އަންނަތަން ލޮލަށް ފެނުމުން އެކަމުން ދިފާއުވުމަށް އެހެން ގުނަވަނެއް ބޭނުން ކުރުމުގެ ހަބަރު ސިކުނޑިއަށް ފޯރުކޮށްދިނުމުގައި ލޮލުގެ މަސްތަކުގެ ހަރަކާތްތައް ވަރަށްވެސް ހަލުއިވެފާ ފުރިހަމަ. ލޮލުގައި ވެސް އެކި މަސްތައް ހުންނައިރު އޭގެ ތެރެއިން އެންމެ ހަލުއި މަސްތަކަކީ ލޯ އެކި ދިމަ ދިމާލަށް ގެންދިއުމަށް އެހީވެދޭ މަސްތައް. ލޮލުގެ މަސްތަކުގެ ތެރެއިން ދެވަނައަށް ހަލުއި މަސްތައް ހުންނަނީ ލޮލުގެ ކޮއި ބޮޑުކޮށް ދިނުމަށާ ކުޑަކޮށް ދިނުމަށް. މިއީ ލޮލަށް އަލި އެޅޭ މިންވަރަކުން ވާ ކަމެއް. ލޮލުގެ މަސްތަކަކީ އެންމެ ހަލުއި މަސްތައް ކަމަށް ބުނެވޭ އަނެއް ސަބަބަކީ ލޮލުގެ މަސްތަކުން އިހްތިޔާރަކާނުލާ މަސައްކަތްތަކެއް ކުރާތީ. ބޭއިހްތިޔާރުގައި ހިނގާ މި މަސައްކަތްތަކުގެ ސަބަބުން އިންސާނާ އެތަކެއް އަނިޔާއަކުން ނުވަތަ ގެއްލުމަކުން ސަލާމަތްކޮށްދޭ.