އަލިފާންކޮޅަކަށް 'ސްޓްރީކް'ގެ ނަމުން ނަން ދީފައި، ސްކޯ ކުރާ އުސްލޫބަކުން ޑިޒައިން ކޮށްފައި އިންނަ ސްނެޕްޗެޓަކީ ވަރަށް ގިނަ ބަޔަކު ބޭނުންކުރާ އެޕްލިކޭޝަނެކެވެ. ޖެހިޖެހިގެން 3 ދުވަސް ވަންދެން ސްނެޕްކޮށް ނުވަތަ ސްނެޕްޗެޓުން ވާހަކަ ދައްކައިފިނަމަ ސްޓްރީކެއް އުފެދެއެވެ. އެ ސްޓްރީކަކީ ސްނެޕް ކުރެވޭ މީހާގެ ނަން ކައިރިއަށް އަރާ އަލިފާން ކޮޅެކެވެ. އަލިފާން 'އިމޯޖީ'އެކެވެ. އެއްވެސް ދުވަހެއް ދޫކޮށްނުލާ ސްނެޕްކުރަމުން ދާނަމަ ސްކޯ މަތިވަމުންދެއެވެ. މިއީ ބައެއް މީހުން ވަރަށް 'ސީރިއަސްކޮށް' ކުރާކަމެކެވެ. ސްނެޕް އައިޑީ ހޯދުމުގެ ކުރިން، ސްޓްރީކް ކުރޭތޯ ޔަޤީންކުރާނެއެވެ. ސްޓްރީކް ގެއްލެން ކައިރިވުމުން މެސެޖެއް ކޮށްގެންވެސް ސްޓްރީކް ގެއްލެން އުޅޭކަން ހަނދާން ކޮށްދެއެވެ. ބައެއް މީހުން މިކަން ކުރަނީ ވާދައަށެވެ. އެކަކަށްވުރެ، އަނެއް މީހާގެ ސްޓްރީކް ސްކޯ މަތިކުރުމަށެވެ. ހަމަމިއާއެކު، ބައެއް މީހުން ސްޓްރީކް ކުރަނީ ގިނަ ބަޔަކު ކުރާ ކަމެއް ވީމައެވެ. މީހުންގެ ތެރެއަށް 'ފިޓު'ވާށެވެ. ވާކަމަކީ ހަމައެކަނި އެ އަލިފާންކޮޅު އިތުރުވުމެވެ. އިތުރު އެއްކަމެއްވެސް ވަނީއެއް ނޫނެވެ. އެހެންގޮތަކަށް ބުނާނަމަ، އަލިފާންކޮޅު ކައިރިއަށް އަރާ ބޭކާރު އަދަދުތަކެކެވެ. 

ސްނެޕް ސްޓްރީކަށް މިހާބޮޑު އަހައްމިއްޔަތުކަމާއި ސަމާލުކަން ދޭ މިންވަރަށް ނަމާދަށް ސަމާލުކަން ދެވޭ ހެއްޔެވެ؟ ނަމާދެއް އެޅިދާނެތީ ނުވަތަ ނަމާދެއް ވައްޓާލެވިދާނެތީ ބިރުގަނެ ހާސްވޭ ހެއްޔެވެ؟ ނަމާދަށް ދިއުމަށް މީހަކަށް ހަނދާންކޮށްދެވޭ ހެއްޔެވެ؟ ވަގުތު ފާއިތުވުމުގެ ކުރިން ނަމާދު ޤާއިމްކުރުމަށް އަވަސްވެ ގަނެވޭ ހެއްޔެވެ؟ ނަމާދަކީ ދީނުގެ ތަނބެވެ. އިސްލާމުކަމުގެ 2ވަނަ ރުކުނެވެ. އަޅާއާއި މާތް ﷲއާ ކައިރި ކޮށްދޭ އަޅުކަމެކެވެ. ކޮންމެ ދުވަހަކު 5 ވަގުތުގައި ހަމައެކަނި ޚާލިޤުވަންތަ މާތް ﷲއަށް ހުސްކުރެވޭ ވަގުތުކޮޅެކެވެ. އެއީ ވަގުތު ކަނޑައެޅިގެންވާ ފަރުޟެކެވެ. ކޮންމެ މުކައްލިފެއްގެ މައްޗަށް ވާޖިބެކެވެ. ނަމާދުގެ މުހިންމުކަމުގެ ވާހަކަ ކީރިތި ޤުރުޢާނުގެ އެތައް އާޔަތެއްގައި ބަޔާންވެގެންވެއެވެ. 

‫۞ فَخَلَفَ مِنۢ بَعۡدِهِمۡ خَلۡفٌ أَضَاعُوا۟ ٱلصَّلَوٰةَ وَٱتَّبَعُوا۟ ٱلشَّهَوَ ٰتِۖ فَسَوۡفَ یَلۡقَوۡنَ غَیًّا﴿ ٥٩ ﴾‬ ‫إِلَّا مَن تَابَ وَءَامَنَ وَعَمِلَ صَـٰلِحࣰا فَأُو۟لَـٰۤىِٕكَ یَدۡخُلُونَ ٱلۡجَنَّةَ وَلَا یُظۡلَمُونَ شَیۡـࣰٔا﴿ ٦٠ ﴾‬ (19:59-60)

"ފަހެ، އެބޭކަލުންނަށްފަހު، އެހެންބަޔަކު އައޫއެވެ. އެއުރެން ނަމާދު ދޫކޮށްލޫއެވެ. އަދި ހަވާ ނަފުސުގެ އެދުންތަކަށް ތަބަޢަވޫއެވެ. ފަހެ، ނިކަންހުރެ އެއުރެން ހަލާކާ ކުރިމަތިލާހުއްޓެވެ! ތައުބާވެ، އަދި، އީމާންވެ، އަދި ޞާލިޙު ޢަމަލުކުޅަ މީހުން މެނުވީއެވެ. ފަހެ، އެއުރެން ސުވަރުގެއަށް ވަންނާނެތެވެ. އަދި އެއުރެންނަށް އެއްވެސް ކަމަކުން ބޭއިންސާފެއް ނުކުރައްވާހުށްޓެވެ."

ފަރުޟު 5 ނަމާދަކީ ކޮންމެ ކޮންމެ ވަގުތެއްގައި ކުރަން އޮންނަ އަޅުކަމެއް ނޫނެވެ. އެމީހަކަށް ވަގުތު ވީމާ، އެމީހަކު ބޭނުން ވަގުތެއްގައި ކުރަން އޮންނަ ކަމެއް ނޫނެވެ. އުޛުރަކާނުލާ ނަމާދު ފަސްކޮށްގެން ނުވާނެއެވެ. ނަމާދު ޤާއިމްކުރަންވާނީ ކޮންމެ ނަމާދަކަށް ކަނޑައެޅިފައި އޮންނަ ވަގުތުގައެވެ. ނިސާ ސޫރަތުގެ 103ވަނަ އާޔަތުގައިވެއެވެ.

‫فَإِذَا قَضَیۡتُمُ ٱلصَّلَوٰةَ فَٱذۡكُرُوا۟ ٱللَّهَ قِیَـٰمࣰا وَقُعُودࣰا وَعَلَىٰ جُنُوبِكُمۡۚ فَإِذَا ٱطۡمَأۡنَنتُمۡ فَأَقِیمُوا۟ ٱلصَّلَوٰةَۚ إِنَّ ٱلصَّلَوٰةَ كَانَتۡ عَلَى ٱلۡمُؤۡمِنِینَ كِتَـٰبࣰا مَّوۡقُوتࣰا﴿ ١٠٣ ﴾‬ (4:103)

"އަދި، ތިޔަބައިމީހުން ނަމާދުކޮށް އަވަދިވެއްޖިއްޔާ، ތިޔަބައިމީހުން ﷲ ހަނދުމަކޮށް އުޅޭށެވެ! ކޮޅަށްތިބޭ ޙާލުގައްޔާއި، އިށީނދެތިބޭ ޙާލުގައްޔާއި، އޮށޯވެތިބޭ ޙާލުގައެވެ. އަދި، ތިޔަބައިމީހުންނަށް އަމާންކަން ލިބިއްޖެ ހިނދަކު، ނަމާދު (ފުރިހަމަކޮށް) ޤާއިމްކުރާށެވެ! ހަމަކަށަވަރުން، ނަމާދަކީ މުއުމިނު ތަކުންގެ މައްޗަށް ވަގުތު ކަނޑައެޅިގެންއޮތް ފަރުޟެއްކަމުގައި ވެއެވެ."

އުޛުރަކާ ނުލާ ގަސްތުގައި ނަމާދު އެޅުމަކީ ފާފައެކެވެ. ސްނެޕް ސްޓްރީކުގައި އިންނަ އަލިފާންކޮޅަށް އަހަށްމިއްޔަތުކަންދޭ ބީދައިން، ނަމާދު އަޅާ، ނަމާދަށް ފަރުވާކުޑަކުރުމުގެ ސަބަބުން ނަރަކައިގެ އަލިފާނުން ލިބިދާނެ އަޛާބަށްވެސް ސަމާލުވާންޖެހެއެވެ. އެއީ އޭގެ އަސަރު ހަށިގަނޑަށްކުރާނެ، ވޭންދެނިވި ކަމެކެވެ. ތަސައްވަރުވެސް ކުރަން އުނދަގޫ ވޭނެކެވެ. ސްނެޕް ސްޓްރީކުގައި އިންނަ އަލިފާންކޮޅު ގެއްލުނަސް މީހާއަށް ގެއްލުމެއް ނުވާނެއެވެ. ނަމަވެސް ނަމާދުގެ ސްޓްރީކް ގެއްލިއްޖެނަމަ، ތަހައްމަލު ކުރަން ޖެހިދާނެ ނަރަކައިގެ އަލިފާނުން ލިބޭނެ ވޭނާއި ގެއްލުމަކީ ޚިޔާލަށްވެސް ގެންނަން އުނދަގޫކަމެކެވެ. ސްނެޕް ސްޓްރީކް ގެއްލުމުން 'ރީސްޓޯ' ކުރުމުގެ (އަލުން އަނބުރާ ސްޓްރީކް ގެނައުމުގެ) ފުރުސަތު ލިބެއެވެ. ދިރި ދުނިޔޭގައި ހުންނަ ކޮންމެ ވަގުތަކީ ނަމާދުތަކަށް ފަރުވާކުޑަކުރެވިފައިވާނަމަ ތައުބާވާން ލިބޭ ފުރުސަތެކެވެ. ނަމާދުގެ ސްޓްރީކުވެސް ރީސްޓޯކޮށް، ނަމާދަށް ފަރުވާތެރިވާ ބަޔަކަށް އަހަރުމެން އެންމެން ވާންވާނެއެވެ.