މީހުންގެ ހަށިގަނޑަށް އައިސްފައި ހުންނަ ބަދަލުތައް ފާހަގަނުކޮށް ހަމަ ހިތްހަމަނުޖެހެނީ ކަންނޭނގެއެވެ. ސަލާން ގަލާން ކުރުމުގެ ތެރެއިންވެސް ފުރަތަމަ ބުނާ އިބާރަތް ރައްދުވަނީ މީހާގެ ހަށިގަނޑަށް އައިސްފައި ހުންނަ ކޮންމެވެސް ބަދަލަކާއެވެ. "މިހާރު ހާދަ ފަލަވެޖެޔޭ ދޯ" ފަދަ ޖުމުލަތަކަކީ އާއްމު ޖުމުލަތަކެވެ. "މިހާރު ދެން ހީވަނީ ކަށިގަނޑެއްހެން" ފަދަ އިބާރާތްތައްވެސް ރައްދުކުރާލެއް މަދެއް ނޫނެވެ. މީގެ އިތުރުން، "މޫނުގައި ހާދަ ބިހި ގިނަވެއްޖޭ" އަދި "ކުރިޔަށްވުރެ ކަޅުހެން ހީވެ މިހާރު" ފަދަ ކިތަށްމެ އިބާރާތެއް ބޭނުން ކުރަނީ، ޙާލުއަހުވާލުވެސް އެހުމުގެ ކުރިންނެވެ. ކިތަށްމެ އާދައިގެ އުސްލޫބަކަށް ބުންޏަސް، އެ ރައްދުވާ މީހަކަށް ކުރާނެ އަސަރެއް ވިސްނާލުމަކާ ނުލައެވެ.

މީހެއްގެ ހަށިގަނޑާމެދު އެމީހަކު ވިސްނާ ވަރެއް ނުވަތަ، 'އިންސެކްޔަރ' ވާނެ މިންވަރެއް އެހެން މީހަކަށް އަންދާޒާއެއް ނުކުރެވޭނެއެވެ. ފަލަކޮށް ހުންނާތީ އެކަމާ ވިސްނާވަރެއް ނޭނގޭނެއެވެ. ހިކިކޮށް ހުންނާތީ، އާދައިގެ މިންވަރަށް ސިއްޙަތަށް ފައިދާވާނެހެން، ހަށިގަނޑު ބައްޓަންކުރަން ކުރަމުންދާ މަސައްކަތެއްވެސް އެހެން މީހުންނަކަށް ނޭނގޭނެއެވެ. މޫނުގައި އޮށާޅައާއި ބިހި ނަގާތީ އެކަން ހައްލުކުރުމަށްޓަކައި އުނގުޅީ ކިތަށް ކިތަށް ބޭސް ކަމެއް އެހެން މީހުން ދެނެއެއް ނުހުންނާނެއެވެ. މިފަދަ ކަންކަމާއި ގުޅިގެން ކޮންމެ މީހަކުވެސް އަމިއްލަ ނަފުސާ ކުރަމުންދާ ހަނގުރާމަތައް އިތުރަށް ގޯސް ކުރުވަނީ އެކަމަށް ފާޑުކިޔާ، އެކަމަށް ބަސްބުނާ މީހުންގެ އެފަދަ އިބާރާތްތަކެވެ. ކުރިން ވިސްނާވަރަށްވުރެ ދެގުނަ އިތުރަށް ވިސްނަންފަށައެވެ. އަވަހަށް ނަތީޖާއެއް ނެރުމަށްޓަކައި، ސިއްޙަތަށް ބެލުމެއް ނެތި، ހަށިގަނޑަށް ގެއްލުންވާފަދަ ގޮތްތަށް އިޙްތިޔާރުކުރެއެވެ. ފެންނައިރަށް 'ފަލައޭ' ބުނާތީ ބަނޑަށް ހުރެދާނެއެވެ. އެއްވެސް އެއްޗެއް ނުކައި ނުބޮއެ، ބަނޑުހައިކަންމަތީ ހުރެދާނެއެވެ. ހަމައެހެންމެ، ކަށިގަނޑަކާ އެއްފަދަކޮށް، ހާދަ ހިއްކޭ ބުނާތީ، ގަދަކަމުންވެސް މާގިނައިން ކާން ފަށާފާނެއެވެ. އެވެސް ސިއްޙަތަށް ފައިދާ ނުވާ ފަދަ ގޮތަށެވެ. މީގެ އިތުރުން، މޫނުގައި ނަގާ ބިހިތަކަށް ނިސްބަތްވާ 'ކޮމެންޓުތަކުގެ' ސަބަބުން މީހަކު ބުނާހާ ވައްތަރެއްގެ ކްރީމާއި އެކި ވައްތަރު ވައްތަރުގެ ބޭސް އުނގުޅުންފަދަ ކަންތައްތައް ކޮށްފާނެއެވެ. މީހުންގެ ޖުމުލަތަކާއި އަމިއްލަ މީހާގެ ހާލަތް މާބޮޑަށް އަސަރުކުރަން ފެށުމުން ނެގޭނީ މިފަދަ ފިޔަވަޅުތަކެވެ.

މީހުންގެ ސިފައާއި ހަށިގަނޑަށް އަންނަ ބަދަލުތަކަށް ބަސްބުނެ ކަންތައް ކުރުމަކީ އެމީހެއްގެ 'ކޮންފިޑެންސް' އެކީ ފުނޑުކޮށްލާ، އަމިއްލަ ނަފުސަށް އޮންނަ އިތުބާރު ގެއްލުވާލާ ކަމެކެވެ. އަމިއްލަ ނަފުސުދެކެ ލޯބިވާން އޮންނަ ހުރަހެކެވެ. ބުއްދިވެރި ގޮތަކީ މީހުންގެ ހަށިގަނޑަށް އައިސް ހުންނަ ބަދަލުތައް ފާހަގަ ނުކުރުމެވެ. އެކަމަށް ބަސްބުނުމުން އެއްކިބާވުމެވެ. ލޯގަނޑު އެ މީހުންގެ ގޭގައިވެސް ހުރެއެވެ. ހަށިގަނޑާއި ސިފަޔަށް އަންނަ ބަދަލުތައް މީހަކު ނުބުންޏަސް އެމީހުންނަށްވެސް އެނގެއެވެ.