ފުރާނަނެތް ހަށިގަނޑުތައް ރައްކާކޮށްފައިވާ ތަނެއްގެ ބޭރުގައި ހުރެ، ޣާޒާގެ ޒުވާނަކު ގިސްލަމުން އާދޭސް ކުރަމުން ދިޔައެވެ. މަންމައަށް ގޮވަމުން ދިޔައެވެ. އަޑުގައި އަޅާ ތުރުތުރުން ހާމަވެގެންދަނީ އެ ހިތުގައި އަޅަމުންދާ ވޭނާއި ހިތްދަތިކަމުގެ ބޮޑުކަމެވެ. މަންމަގެ ޖަވާބެއް އަޑުއިވުމަށް ކެތްމަދުވެފައިވާ މިންވަރެވެ. އަނެއްކާވެސް އިސްރާއީލުގެ ލާއިންސާނީ ހަމަލާތަކާއި، ހުއްޓުމެއް ނެތް އަނިޔާތަކުގެ ނަތީޖާއެކެވެ. ބޮންތަކާއި، މެސައިލްތަކުގެ ޝިކާރައަކަށް ވަމުންދާ މައުސޫމު ފުރާނަތަކެވެ. 

އެތައްހާސް ރައްޔިތުންގެ ތެރެއިން މިފަަހަރު ފިރިހެން ދަރިއެކެވެ. ޒުވާނެކެވެ. މަންމަގެ ފުރާނަނެތް ހަށިގަނޑު ބޭއްވިފައިވާ ތަނުގެ ދޮރުމަތީ ހުރެ ގިސްލަމުން ދިއައެވެ. ރޮމުން އާދޭސް ކުރަމުން ދިޔައެވެ. ދޮރުގައި މަޑުމަޑުން ޖަހަމުން، ކިޔަމުން ދިޔައެވެ. "މަންމާ. އަހަރެންނަށް ޖަވާބު ދީބަލަ! މަންމާ. މަންމާ. ޖަވާބު ދީބަލަ. އެއްވެސް ހަރަކާތެއް ތި ނުކުރަނީ ކީއްވެތަ؟ ކީއްވެގެންތަ ތި ދިޔައީ؟ ކީއްވެތަ؟" މިފަދައިން އެތައް ފަހަރަކު މަންމައަށް ގޮވަމުން، ސުވާލުތައް ތަކުރާރު ކުރަމުން ދިޔައެވެ. ލޯބިވާ މަންމަަ ވަކިވުމުން ހިތަށް ކުރަމުންދިޔަ އަސަރެއްގެ ބޮޑުކަމުންނެވެ. ކަކޫ މައްޗަށް ތިރިވެ، މޫނުގައި އަތްއަޅައިން އިނުމުންވެސް، އެ ޒުވާނާގެ ހިތުގައި އަޅަމުންދަނީ އަންދާޒާ ކުރެވޭ ވަރަށްވުރެވެސް ބޮޑު ތަކުލީފެއްކަން ހާމަވެއެވެ. 

މިއީ ފަލަސްތީނުގެ އެތައް ސަތޭކަ ޒުވާނުންގެ ތެރެއިން އެއް ޒުވާނެއްގެ ވާހަކައެވެ. އެފަދަ އެތައް ރައްޔިތުންނެއް މުޅި ފަލަސްތީނުގައިވެއެވެ. މުޅި ޣާޒާގައިވެސް އެފަދަ ލޭގެ ކޯރުތަކާއި ކަރުނައިގެ ޢާހެވެ. ލޯބިވާ މީހަކު ޝަހީދުވުމުގެ ފުން ހިތާމައެވެ. ކީއްވެ ހެއްޔެވެ؟ އަނިޔާވެރި އިސްރާއީލުގެ ހަމަލާތަކަށް ކުޑަވެސް ހުއްޓުމެއް ނާންނާތީއެވެ. މުސްލިމު ވެރިންނާއި ޤައުމުތައް ފުން ނިދިން ނިދާފައި ތިބީތީއެވެ. ދުނިޔޭގެ ލޯތަށް ކަނުވެފައިވާތީއެވެ. އިންސާނުންގެ ކިބައިން އިންސާނިއްޔަތުކަން ނެތިގެން ގޮސްފައިވާތީއެވެ. އެ މާތް، މުޤައްދިސް ބިމުގައި ހިންގާ ޤަތުލުޢާއްމަށް މަޑުޖެހުމެއް ނާންނާތީއެވެ. 75 އަހަރަށްވުރެވެސް ގިނަ ދުވަސްތައް ފާއިތުވެގެންް ދިޔައިރުވެސް، އެ ބިމުގައި ލޭގެ ކޯރުތައް ނުހިކެއެވެ. ފަލަސްތީނާއި ބެހޭ ގޮތުން ދެކެވޭ ވާހަކަ މަދުވެއްޖެއެވެ. އަޑުތައް މަޑު ވެއްޖެއެވެ. ނަމަވެސް އިސްރާއީލުންގެ ހަމަލާތައް މަދެއް ނުވެއެވެ.