ފިނިފެންމަލުގެ އިއްޒަތް ގުޅިފައިވަނީ ފިނިފެންމަލުގެ ގަހުގައި ހުންނަ ކަށިތަކާއެވެ. އެކަށިތަކަކީ ފިނިފެންމަލުގެ ރައްކަލެކެވެ. ފިނިފެންމަލަށް ހުރި ހިމާޔަތެކެވެ. ހަށިފާރަވެރިއެއް ފަދައެވެ. އައުރަ ނިވާކުރުމަކީވެސް މިފަދަ ކަމެކެވެ. އައުރަ ނިވާވާފަދަ އަންނައުނާއި، ބުރުގާއަކީ ކުއްޖާގެ ހިމާޔަތެވެ. ރައްކަލެކެވެ. އައްޑަނައެކެވެ. އެއީ ރީތިކަން ގެއްލޭކަމެއް ނޫންކަން ދަރިފުޅަށް ވިސްނައިދޭން ޖެހެއެވެ. ރީތިކަމަކީ މުޅި ދުނިޔެއަށް ހާމަކުރަން އޮތް އެއްޗެއް ނޫންކަމެވެ. ރީތިކަމާއި ޒީނަތްތެރިކަން ފޮރުވަންޖެހޭކަމެވެ. އައުރަ ނިވާކުރުމަކީ ކޮންމެހެންވެސް ކުރަންޖެހޭ ކަމެއްކަން ބުނެދޭން ޖެހެއެވެ. އެކަމުގެ މުހިންމުކަން ދަރިފުޅަށް ތިލަކޮށްދޭން ޖެހެއެވެ. އޭގެ އަގު ވަޒަންކުރެވޭނީ އޭރުންނެވެ.

އަންހެން ދަރިފުޅުގެ އައުރައަކީ ކޮބާކަން ދަރިފުޅަށް ޅަފަތުގައި ބުނެދޭންވާނެއެވެ. އައުރަ ނިވާކުރާނެ ގޮތާއި އެކަމުގެ މުހިންމުކަން ދަރިފުޅަށް ބުނެދިނުމުން، އެކަމާމެދުގައި ދަރިފުޅުގެ ހިތް ޖެހޭނެއެވެ. އައުރަ ނިވާކުރާ ހިތްވާނެއެވެ. އަމިއްލައަށް ފެނިގެން ކުރާ ކަމެއްގެ ގޮތުގައި އެކަން ކުރާނެއެވެ. ފިރިހެން ދަރިފުޅުގެ އައުރައަށް އަހަށްމިއްޔަތުކަން ނުދޭށެކޭ ނޫނެވެ. ފިރިހެން ދަރިފުޅުގެ އައުރައަކީ ކޮބާކަމާއި، އައުރަ ނިވާކުރަން ޖެހޭނެކަން، ފިރިހެން ދަރިފުޅަށްވެސް ބުނެދޭން ޖެހޭނެއެވެ. އެއީ ކޮންމެހެން ކުރަން ޖެހޭ، މުހިންމުކަމެއްކަން ވިސްނައިދޭން ޖެހޭނެއެވެ. ނަމަވެސް ފިރިހެނުންނާއި އަންހެނުން ތަފާތުވާނެއެވެ. އަންހެން ދަރިފުޅު ނިވާ ވާންޖެހޭ މިންވަރު ބޮޑެވެ. އަންހެން ދަރިފުޅުގެ އައުރައަށް ޚާއްސަ ސަމާލުކަމެއް ދޭން ޖެހެނީ މިހެންވެއެވެ.

ޓެކްނޮލޮޖީގެ ތެރެއިން މުޅި ދުނިޔޭގެ މާހައުލަށް ކުއްޖާ ހޭނިގެންދާ ހިސާބުން ކުއްޖާއަށް އެތައް މަންޒަރެއް ފެންނާނެއެވެ. އެކި މީހުންގެ ވައްޓަފާޅިއާއި ދިރިއުޅުމުގެ ގޮތްތަކެވެ. އެމީހުންގެ އާދަކާދައާއި ފެޝަންތަކެވެ. އަންނައުނަށް އައިސް ހުންނަ ބަދަލުތަކާއި ކުރިއެރުންތަކެވެ. ޒަމާނީ ގޮތްގަނޑާއި އެންމެ ފަހުގެ ޑިޒައިންތަކެވެ. މިފަދަ ކަންތައްތަކުގެ ސަބަބުން، ކުއްޖާގެ ސިކުނޑިއަށް އަސަރުތަކެއް ކުރާނެއެވެ. ފެންނަމުންދާ ގޮތްތަކަށް އަމިއްލަ އުޅުން ބައްޓަން ކުރަން ބޭނުން ވެދާނެއެވެ. ހެދުންއަޅާ ގޮތްތަށް ނަކަލުކުރަން ބޭނުން ވެދާނެއެވެ. ނަމަވެސް، ކުރިޔާލާ ދަރިފުޅުގެ ނަފަތުގައި އިސްލާމީ ފޭރާމުން ނިވާވެ، ދީނުގައި އަންގަވާފައިވާ ގޮތަށް ޒީނަތްތެރިވާން ދަސްކޮށްދީފައިވާނަމަ، ހެޔޮ ނުބައި ވަކިކުރަން ދަރިފުޅަށް އެނގޭނެއެވެ. ރަނގަޅު ގޮތާއި ގޯސްގޮތް ފާހަގަކުރަން ފަސޭހަވާނެއެވެ. ސޯޝަލް މީޑިޔާއިން ކިތަށްމެ ގިނައިން އެކި ކަހަލަ އަންނައުނާއި ފެޝަންތައް ފެނުނަސް، އެކަމުން އެއްކިބާވެ ހުރުމަށް ދަރިފުޅު އަމިއްލަޔަށްވެސް މަސައްކަތް ކުރާނެއެވެ. އެ އަންނައުނުތަކުން އައުރަ ނިވާ ނުވާނެކަމާއި، އައުރަ ކަޝްފުވާފަދަ ހެދުމާއި ހިޖާބް 'ސްޓައިލް'ތަކުން ދުރުވާން ދަރިފުޅަށް އެނގޭނެއެވެ.

ދަރިފުޅުގެ އުޅުމާއި ދިރިއުޅުމުގެ ވައްޓަފާޅި ބިނާކުރުމުގެ ފުރުސަތު ކުއްޖާގެ ޅަފަތުގައި އޮވެއެވެ. ތުއްތުއިރުއްސުރެ އިސްލާމި ފޭރާމަށް ދަރިފުޅުގެ ހިތްޖެއްސުމުން، ބާލިޣުވުމަށްފަހުވެސް ދަރިފުޅުގެ ހިތުގައި އިސްލާމީ ފޭރާމަށް ޤަދަރާއި ޢިއްޒަތް ދެވިފައި އޮންނާނެއެވެ. އައުރަ ނިވާވާނެ ބޮޑެތި ހެދުމާއި ބުރުގާއަކީ 'ކަޓު' އެއްޗެހި ކަމުގައި އެދަރިފުޅެއް ނުދެކޭނެއެވެ. އަންހެނުންނަކީ ރައްކާތެރިކަން ކަށަވަރުކޮށްދޭންޖެހޭ، އެބައެއެއްގެ ޙިމާޔަތާއި ރައްކާތެރިކަމަށް މަހުރަމުން އައްޔަންވެފައިވާ ބައެކެވެ. އިސްލާމްދީނުގައި އަންހެނުންނަށް އެތައް ހައްޤުތަކެއް ކަށަވަރުކޮށްދީފައިވެއެވެ. އަންހެނާއަކީ އިތާގައި އޮންނަ މުތީއެއްފަދައެވެ. ފިނިފެންމަލެއްފަދައެވެ. ނަމަވެސް އަގު ހުންނާނީ ރައްކާތެރިވެގެންވާނަމައެވެ. ކޮންމެ މީހަކަށް ލިބޭ އެއްޗެއްގެ އަގެއް ހުންނާނެ ހެއްޔެވެ؟ ނީލަމެއްގައި އޮންނަ ފިނިފެންމަލެއްގެ އިއްޒަތެއް އޮންނާނެ ހެއްޔެވެ؟ ފީނަމުން ނެގުމުންވެސް އަގު ނާރާނެ ރަންމުތުގެ ބޭނުމެއް އެބައޮތް ހެއްޔެވެ؟