ހަލަބޮލިވެފައިވާ ފަލަސްޠީނުގެ މާހައުލުން މިހާރު ފެންނަމުންދަނީ ގަދަ ފިނީގެ ސަބަބުން ތުއްތުކުދިންގެ މަރުތަކެވެ. ގެތަކަށް ބޮންއަޅާ، އަމިއްލަ ވަޒަނުން ބޭރުކޮށްލުމުގެ ސަބަބުން ޣާޒާގެ އެތައް ސަތޭކަ އާއިލާއެއް އުޅެން ޖެހިފައިވަނީ ޓެންޓުތަކުގައެވެ. ރެފިއުޖީ ކޭމްޕުތަކުގައެވެ. ދޭހާ އަތްވަކާއި ވެހޭހާ ވާރެޔަކުން އެންމެ ރަނގަޅަށް ސަލާމަތްނުވެވިއެވެ. ވާރެވެހޭނަމަ ޓެންޓުތަކުގައި ފެން ބޮޑުވެއެވެ. ނިދަން ގެންގުޅޭ ރަޖާއާއި ބާލިސްއެކީ ތެމިފޯވެއެވެ. ވިިއްސާރައިގެ މި މޫސުމުގައި އެންމެ އެކަށޭނެ ބޯހިޔާވަހިކަން ނެތުމުގެ ސަބަބުން، ތުއްތު ފުރާނަތައް މި ދުނިޔެއާއި ވަކިވެގެންދަނީއެވެ. ގަދަ ފިންޏަށް، އެނާޒުކު ހަށިތަކަށް ކެތްނުވެގެންނެވެ.

ޔޫ.އެން.އާރް.ޑަބްލިޔު.އޭ ގެ ސީނިއަރ އެމަޖެންސީ އޮފިސަރެއް ހާމަކުރި ގޮތުގައި، ކުޑަކުދިން ދަނީ ގަދަ ފިނީގައި އެންމެ އެދެވޭނެ ބޯހިޔާވަހިކަން އެކުދިންނަށް ނުލިބުމުގެ ސަބަބުން، މި ދުނިޔެ ދޫކުރަމުންނެވެ. އެންމެ ކުޑަމިނުން ބޭނުންވާ ކާބޯތަކެއްޗާއި، ސާފު ބޯފެނާއި، ބޯހިޔާވަހިކަމުގެ އިތުރުން ބޭސްފަދަ ޒަރޫރީ ވަސީލަތްތަކުންވެސް ފަލަސްތީނުގެ ރައްޔިތުންވަނީ މަޙުރޫމު ކުރެވިފައެވެ. 

7 ކުޑަކުދިންނާއި ބޮޑެތިމީހުންގެ ތެރެއިން އެކަކު، ގަދަ ފިނީގެ ސަބަބުން ނިޔާވެފައިވާކަމަށް ފަލަސްތީނުގެ މަސްދަރަކުންވަނީ ހާމަކޮށްފައެވެ. އެކުދިންގެ ނަންތައްވެސް ވަނީ އާއްމުކޮށްފައެވެ. އެއީ ހަމައެކަނި ނަމްބަރެއް ނޫނެވެ. އެކޮންމެ ކުއްޖަކީ ފުރާނައެކެވެ. އައިޝާ އަލްޤައްސާސް (21 ދުވަސް)، ޢަލީ ހުއްސާމް އައްޒާމް (4 ދުވަސް)، ސިލާ މަހުމޫދު އަލް-ފަސީޙް (14 ދުވަސް)، ކަރީމް އަލް-މުއްތައްވަޤް (3 މަސް)، އެއްމާބަނޑު ދެކުދިން ކަމަށްވާ ޖުމާ ޔަޙްޔާ އަލް-ބަތުރާން އާއި ޢަލީ ޔަޙްޔާ އަލް-ބަތުރާން (5 ހަފްތާ)، ގެ އިތުރުން އިސްލާމް ހައިތަމް އަބޫ މޫރްއަކީ ގަދަ ފިނީގެ ސަބަބުން ދުނިޔެ ދޫކޮށްފައިވާ ޣާޒާގެ ތުއްތު ފުރާނަތަކެވެ. ދުނިޔެއަށް ނޭވާލީތާ މާކަ ގިނަ ދުވަސްތަކެއް ނުވެއެވެ. އެންމެ އަހަރެއްވެސް ނުވެއެވެ. ދުވަސްކޮޅެކެވެ. ހަފްތާއެކެވެ. ދެތިން މަހެވެ. އެހާމެ ކުރު މުއްދަތެކެވެ. ހަމަމިއާއެކު، ސިއްޚީ ދާއިރާގައިި ހަރަކާތްތެރިވި ފަރާތެއްކަަމަށްވާ އަޙްމަދު އަލް-ޒަޙަރްނާވެސް ވަނީ ގަދަ ފިނީގެ ސަބަބުން ދުނިޔެ ދޫކޮށްފައިވާ ފަރާތްތަކުގެ ލިސްޓަށް އިތުރުވެފައެވެ. 

ފިނި މޫސުމުގައި ބޭނުންވާ އަންނައުނެއް ޣާޒާގެ ކުދިންގެ އަތުގައެއް ނެތެވެ. ހީގަނެ، ހަށިގަނޑު ރޫރޫ އަޅާއިރުވެސް އެ ފިނިން ސަލާމަތްވާނެ ގޮތެއް އެކުދިންނަކަށް ފަހިވެފައެއް ނެތެވެ. ގަދަ ފިންޏާއި ދެކޮޅަށް އެކުދިން ކުރާ ހަނގުރާމައާއި، އެހަށިތަކުގައި އަޅާ ވޭނަށް ކޮށްދެވޭނެ ކަމެއް ނެތިފައި، މައިންބަފައިން ތިބެން ޖެހެނީ ބަލާށެވެ. ފިނި މޫސުމަށް ބޭނުންވާނެ ވަސީލަތްތައް އެތެރެކުރުމަށް އިސްރާއިލުން ހުރަސްއަޅާފައިވާތިއެވެ. ގަދަ ފިނީގައި މަރުވާ ކުދިންގެ އަދަދު އިތުރުވުމުގެ ބިރު އޮތީ ނުހަނު ބޮޑުވެފައެވެ.