ފެންމަތިވެފައި މިވަނީ އެޗް.އެމް.ޕީ ވައިރަސްގެ ނަން ދެވިފައިވާ ވައިރަހެކެވެ. އެޗް.އެމް.ޕީ ވައިރަހަކީ މީހާގެ ނޭވާލާ ނިޒާމަށް އަސަރުކުރުވާ ވައިރަހެކެވެ. ނޭފަތާއި، ކަރުގެ އިތުރުން ފުއްޕާމެއަށް އަސަރު ކުރުވައެވެ. ޗައިނާއިން ފެނުނު އެޗް.އެމް.ޕީ ވައިރަސް މިހާރުވަނީ އިންޑިއާގެ އެކި ކަންކޮޅުތަކުން ފެންނަން ފަށާފައެވެ. ޖުމުލަ 8 މީހަކަށް މި ވައިރަހުގެ އަސަރުކޮށްފައިވާކަމަށް ރިޕޯޓު ކުރެވިފައިވާއިރު، ބެންގަލޫރާއި، ގުޖުރާތުގެ އިތުރުން ޗެންނާއީގައާއި ކޮލްކަތާއިން މި ވައިރަހުގެ އަސަރުތައްވަނީ ފެނިފައެވެ.

މި ވައިރަހުގައި ފެންނަނީ އާދައިގެ ރޯގާ ޖެހުމުން ފެންނަ އަލާމާތްތަކެވެ. ހުންއައުމާއި، ކެއްސުމާއި ނޭވާލުމަށް އުނދަގޫވުން ފަދަ އަލާމާތްތަކެވެ. މި ވައިރަހުގެ ވާހަކަ ގިނަ ބަޔަކު ދައްކަމުންދާ އަދި ވައިގައިހިފާފައިވާ މައިގަނޑު ސަބަބަކީ، މި ވައިރަހުގެ ސަބަބުން ޗައިނާގެ ހޮސްޕިޓަލްތަކުގައި މީހުން އެނދުމަތި ކުރެވިފައިވާތީއެވެ. ހަމައެހެންމެ، 14 އަހަރުން ދަށުގެ ކުޑަކުދިންނާއި، ދުވަސްވީ މީހުންގެ އިތުރުން، 'އަސްތަމާ' ހުންނަ މީހުންނާއި، ދިފާޢީ ނިޒާމު ބަލިކަށި މީހުންނަށް މި ވައިރަސް ނުރައްކާތެރިވުމުގެ ފުރުސަތު އޮތީމައެވެ. ނަމަވެސް މި ވައިރަހާ މެދު ފިކުރުބޮޑުވެ ހާސްވާނެކަމެއް ނެތެވެ. އެކަމާ މާބޮޑަށް ވިސްނާ، މީހާގެ ސިކުނޑި ވަރުބަލި ނުކޮށްލާށެވެ. ވައިރަހުން ރައްކާތެރިވެ ސަލާމަތްވުމަށްޓަކައި ކުރެވެނޭ ބައެއް ކަންތައްތައް އެބަހުއްޓެވެ.  

މި ވައިރަހުން ރައްކާތެރިވުމަށްޓަކައި 20 ސިކުންތަށްވުރެ ގިނައިރު ވަންދެން ރަނގަޅަށް އަތްދޮވުމަށް ޑަކްޓަރުން އިރުޝާދު ދެއެވެ. އަތް ނުދޮވެ ހުރިނަމަ ލޮލާއި، ނޭފަތާއި އަނގައިގައި އަތް ނުލުމަށް ސަމާލުވާންޖެހެއެވެ. ހަމަމިއާއެކު، ސެނެޓައިޒާއެއް ހިފައިގެން އުޅުމަށާއި މާސްކު އަޅައިން އުޅުމަށްވެސް ޑަކްޓަރުން ބާރު އަޅައެވެ. ހަމައެހެންމެ، މީހުންނާ 6 ފޫޓުގެ ދުރުމިން ބެހެއްޓުން މުހިންމެވެ. އެއީ މި ވައިރަސް ފެތުރެނީ ކުޅު ތިކިތަކުންކަމުގައި ވާތީއެވެ. އެެހެންކަމުން، ކިނބިހި އަޅާއިރު އަތްތިލައިން އަނގަމަތި ނިވާކުރުމުގެ ބަދަލުގައި، އަތުގެ އުޅަބޯށިއާ ވީ ދިމާލުން ލަނބާލުމަށްފަހު އަނގަމަތި ނިވާކުރުމަށް ސަމާލުކަން ދޭންޖެހެއެވެ. ގިނައިން ފެން ބުއިމަށްފަހު، ރަނގަޅަށް ކެއުމަށް އަހައްމިއްޔަތުކަން ދޭންވާނެއެވެ. ވައިރަހުގެ އަލާމާތްތައް ފެންނަނަމަ، ހޮސްޕިޓަލަށް ގޮސް، ޓެސްޓުތައް ހެދުން ބުއްދިވެރިއެވެ.

ސިއްޙީ މާހިރުން ބުނާ ގޮތުގައި، އެޗް.އެމް.ޕީ ވައިރަހަކީ އައު ވައިރަހެއް ނޫންކަމާއި، އެންމެ ފުރަތަމަ މި ވައިރަސް ފެނިފައިވަނީ 2001ވަނަ އަހަރުގައި ކަމަށް، އިންޑިއާގެ ހެލްތް މިނިސްޓަރ ވަނީ ހާމަކޮށްފައެވެ. ބުއްދިވެރި ގޮތަކީ މި ވައިރަސް ފެތުރުމުގެ މަގުތައް ބަންދުކުރުމަށްޓަކައި ފަރުދީ ގޮތުން ކުރެވެން ހުރި ކަންތައްތައް ކުރުމެވެ. ވައިރަސް ފެތުރުމުގެ ކުރިން އެކަމަށް ރައްކާތެރިވެ، ސަމާލުވެ ތިބުމެވެ. ރައްކާވެ ތިބިއްޔާ ދަތުރެވެ. ފަރުދީ ޒިންމާ އަދާކުރުމުން އޭގެ ފައިދާ މުޅި މުޖުތަމަޢުގެ އެންމެނަށް ކުރާނެއެވެ.