އަދުގެ މި ދުނިޔޭގައި މޯބައިލް ފޯނަކީ އިންސާނުންގެ ދިރިއުޅުމުގެ މުހިންމު ބައެއްކަމުގައި މި ވަނީ ވެފައެވެ. އަސާސީ ހިދުމަތަކަށް މޯބައިލްފޯނު މި ވަނީ ވެފައެވެ. ނަމަވެސް، މި ކުޑަކުޑަ އާލާތް އަޅުގަނޑުމެންގެ މުޖުތަމަޢުއަށް ގެނެސްދޭ ގެއްލުންތަކަކީ ވަރަށް ބޮޑެތި ކަންތައްތަކެކެވެ. ޚާއްޞަކޮށް ޒުވާން ޖީލަށާއި ކިޔަވާކުދިންނަށް މީގެ ނޭދެވޭ އަސަރުތައް ކުރަމުންދާކަން ފާހަގަކުރެވެއެވެ.
މޯބައިލް ފޯނުގެ ބޭނުން އިތުރުވުމާއެކު، ޒުވާނުންގެ މެދުގައި އިޖްތިމާޢީ ގުޅުންތައް ކުޑަވަމުން ދިއުމަކީ ކަންބޮޑުވާންޖެހޭ ކަމެކެވެ. އެކަކު އަނެކަކާއި ދިމާވެ ވާހަކަދެއްކުމުގެ ބަދަލުގައި، ފޯނުގެ ސްކްރީނަށް ބަލައިގެން އެ ދައްކާ މަންޒަރުތައް ބެލުމަކީ އަދުގެ އިޖުތިމާއީ ގުޅުން ކަމުގައި ވެއްޖެއެވެ. މިކަމުގެ ސަބަބުން އާއިލީ ގުޅުންތަކަށާއި، ރަޙްމަތްތެރިކަމުގެ ގުޅުންތަކަށް ނޭދެވޭ އަސަރުތަކެއް ކުރަމުންދެއެވެ.
މޯބައިލް ފޯނުގެ ސަބަބުން ކިޔަވާކުދިންނާއި ޒުވާނުންގެ ތަޢުލީމީ ފެންވަރު ދަށްވަމުން ދިއުމަކީވެސް ވަރަށް ބޮޑު މައްސަލައެކެވެ. ގިނަ ދަރިވަރުން ކިޔެވުމަށް ވަގުތު ހޭދަކުރުމުގެ ބަދަލުގައި، ސޯޝަލް މީޑިއާގައި ވަގުތު ހޭދަކުރާ މިންވަރު މި ވަނީ އިތުރުވެފައެވެ. މީގެ ސަބަބުން އިމްތިޙާނުތަކުގެ ނަތީޖާ ދަށްވެ، މުސްތަޤުބަލުގައި ހަރުދަނާ މީހަކަށް ވުމަކީ ބޮޑު ގޮންޖެހުމަކަށް ވެދާނެއެވެ.
މާ މޮޅު އެއްޗެއް ކަމަށް ހިތާ ގާތްކޮށް، އާއިލާ މެންބަރަކަށް ހަދައިގެން ތިޔަ ގެންގުޅޭ މޯބައިލް ފޯނުގެ ސަބަބުން އިންސާނުންގެ ޞިއްޙަތަށް ކުރާ ނޭދެވޭ އަސަރުތަކަކީ ވަކި ކުޑަ އަސަރުތަކެއް ނޫނެވެ. ގިނަ ވަގުތު ފޯނު ބޭނުންކުރުމުގެ ސަބަބުން ލޮލަށް ގެއްލުންވެ، ބުރަކަށީގެ ވޭންތައް އުފެދެއެވެ. މީގެ އިތުރުން، ރޭގަނޑު ނިދާ ވަގުތު ފޯނު ބޭނުންކުރުމުގެ ސަބަބުން ނިދުމުގެ ވައްޓަފާޅިއަށް ބަދަލު އައިސް، ޖިސްމާނީ އަދި ނަފްސާނީ ދުޅަހެޔޮކަމަށް އަސަރުކުރެއެވެ. އަދި ފޯނުން ބަލާ އަޑު އަހާ އެއްޗެހީގެ ސަބަބުން އިންސާނާގެ ނަފްސާނީ ދުޅަހެޔޮކަމަށް ނޭދެވޭ އެތައް އަސަރެއް ކުރަމުންދާކަމީ ދުނިޔެ ދަންނަ ހަގީގަތެކެވެ.
އަގުބޮޑެތި މޯބައިލް ފޯނުތަކުގެ ސަބަބުން އަޚްލާޤީ މިންގަނޑުތައް ދަށްވަމުން ދެއެވެ. އިންޓަރނެޓް މެދުވެރިކޮށް ނުރަނގަޅު މަޢުލޫމާތާއި، އިސްލާމްދީނާ ޚިލާފު ކަންތައްތަކަށް ލޯތަކާއި ސިކުނޑިތައް ހުޅުވިގެން ދިއުމުގެ ސަބަބުން ޒުވާނުންގެ އަޚްލާޤަށް ނޭދެވޭ އަސަރުކުރަމުންދެއެވެ. މީގެ ސަބަބުން މުޖުތަމަޢުގެ އަމަންއަމާންކަމަށް ނުރައްކާވެ، ކުށްކުރުން އިތުރުވުމަކީ އެކަށީގެންވާ ކަންކަމެކެވެ.
މޯބައިލް ފޯނަކީ ރަނގަޅު ގޮތުގައި ބޭނުންކުރެވިއްޖެނަމަ ވަރަށް ބޭނުންތެރި އެއްޗެއް ނަމަވެސް، މިހާރު މި ދަނީ ޒުވާނުންނާއި ކިޔަވާކުދިން މީގެ ދަންޖާލުގައި ޖެހި ހަލާކުވަމުންނެވެ. ދުންފަތާއި މަސްތުވާތަކެއްޗަށް ސުންޕާއެއްޗެއްސޭ ކިޔާއިރު، މޯބައިލް ފޯނުތަކަށްވެސް ސުންޕާ އެއްޗެހިތަކެކޭ ނުބުނެވެންނީ ސަބަބެއް ނެތެވެ. ހިތުން ރަނގަޅު ނިޔަތެއްގައި ކިޔަވާކުދިންނަށް ފޯނު ދިނެއްކަމަކު، އޭގެން އެކުދިން ހިފާ ބޭނުންތަކަށް ބެލެނިވެރިޔާ ފަރުވާލެއް ނުބަހައްޓައެވެ. ބަސް އަހައިގެން ކުއްޖަކާ ނުތޮޅި ގޭގައި އެ ބަލަން އެއަށް ލޯ ޖަހައިގެން އިންނާތީއެވެ. ނަމަވެސް އެކަމުން އެކުދިންނަށް ޖިސްމާނީ ގޮތުންނާއި ނަފްސާނީގޮތުން ލިބޭ ގެންލުންތަކަށް ސަމާލުކަމެއް ނުދެވެއެވެ.
ގުޅުންތައް ގޯސްވުމާއި، ތައުލީމީ ފެންވަރު ބޮޑުތަނުން ދަށްވުމާއި، އަދަބު އަހުލާގު ނެތި ދިޔުމާއި ހުނަރެއް ފަންނެއް ކުރިނޭރުމާއި މީހާ ޅޮސްވެ، ރަނޑާލިވެ، ބޭކާރު ބޮލަކަށް ވެގެންދާއިރުވެސް، އެ ފޯނަށް ޖެހިފައި އެ ހުންނަނީ ސުންޕާ ލޯތްބެކެވެ! އެއީ އިންސާނާ ހްލާކުކޮށް، ޖީލެއް ހަލާކުކުރަމުންދާ ސުންޕާ އެއްޗެކެވެ! ހާއްސަކޮށް ކިޔަވާކުދިންނާއި ޅަފުރައިގެ ކުދިންނެވެ!
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން