ވަޒީފާއެއް ހޯދުމަށް އޮންނަ ދަތިތަކާއި ހުރަސްތަކަކީ އަދު، ގިނަ ބައެއްގެ ހިތުގައިވާ ޝަކުވާއެކެވެ. ތަޢުލީމު އުނގެނުމަށް ގިނަ ދުވަސްތަކެއް ހޭދަކުރުމުންވެސް ވަޒީފާގެ މާހައުލުން ވަޒީފާއެއް ކަށަވަރު ނުވާތީއެވެ. ޑިގްރީއާއި މާސްޓާރސްފަދަ އެތަކެއް ސަނަދުތަކެއް ހޯދާފައިވީނަމަވެސް، ވަޒީފާއެއް ލިބޭނެކަމުގެ ޔަޤީންކަން ނޯންނާތީއެވެ. ތޮފި އެޅުމަށްފަހު ގަޔަށް މަހާލި ގައުންއާއެކުވެސް ވަޒީފާއެއްގެ ދޮރުތައް ހުޅުވުމަށް އުނދަގޫތަކެއް ހުންނާތީއެވެ.

ސޯޝަލް މީޑިއާގެ އެކި މަންސަތަކުގައި އެކި މީހުން އެމީހުންގެ ޝުޢޫރުތައް ފާޅުކުރެއެވެ. ވަޒީފާގެ ދަތިކަމާއި، އުނގެނޭ ތަޢުލީމުން ވަޒީފާއެއް ކަށަވަރު ނުކުރެވޭ ވާހަކައަކީ އެފަދަ އެތައް ޝޫޢުރެއް ތެރެއިން މީހުން ހިއްސާކުރާ އިޙުސާސެކެވެ. އެގޮތުން ބައެއް ޒުވާނުންނަށް އަމާޒު ކުރެވެނު ސުވާލުތަކުން އެނގި ހާމަވެގެން ދިޔައީ، އެ ޒުވާނުން ދެކޭ ގޮތުގައި، މަތީ ތަޢުލީމު ހާސިލު ކުރިޔަސް ވަޒީފާއެއް ކަށަވަރު ނުވާކަމުގައެވެ. މައިގަނޑު ސަބަބުކަމަށް އެ ފަރާތްތަކުން ފާހަގަކުރަނީ މަތީ ތަޢުލީމު ހާސިލުކޮށް، ކިޔެވުމުގެ މައިދާނުގައި އިތުރުވެފައިވާ ވާދަވެރިކަމެވެ. ގިނަ ބަޔަކު މަތީ ތަޢުލީމު ހާސިލްކޮށް، ގިނަ ބަޔަކު ކިޔެވުމުގެ މާހައުލަށް ނުކުމެފައިވާތީއެވެ. އެހެންކަމުން، ވަޒީފާއެއް ހޯދާ އަދި ވަޒީފާތައް ބޭނުންވެގެން އެކަމަށް މަސައްކަތްކުރާ މީހުންވެސް ގިނަވާނެއެވެ. ވަޒީފާ އަދާކުރާނެ މީހުން އިތުރުވަމުން ދިޔަނަމަވެސް، އެ މީހުންގެ އަދަދާއި އެކަށޭނެ މިންވަރަށް ވަޒީފާތައް އިތުރުނުވާ ނަމަ ވަޒީފާތަކެއް ނުލިބޭނެއެވެ. މީހުން އިތުރުވީ ނަމަވެސް ވަޒީފާ ލިބުމުގެ މަގުތައް ހަނިވެފައި އޮންނާތީއެވެ. މީގެ އިތުރުން، އެފަރާތްތަކުން ދެން ފާހަގަކުރާ އެންމެ ބޮޑު އެއް ސަބަބަކީ ތަގައްޔަރުވެ، ކިލަނބުވެފައިވާ ސިޔާސީ ނުފޫޒުތަކެވެ. ވަކި ބަޔަކަށް ލާބަޔާއި މަންފާ ލިއްބައިދޭނެ ފަދަ ގޮތްތަކަށް ވަޒީފާތައް ދިނުމެވެ. މީގެ ސަބަބުން އިޤުތިސާދަށާއި ވަޒީފާގެ ފުރުސަތުތަކަށް ނޭދެވޭ އަސަރުތައް ކުރާކަމަށްވެސް ވަނީ ހާމަކޮށްފައެވެ. ސުވާލު ކުރެވުނު ޒުވާނުން މިސާލެއްގެ ގޮތުގައި ފާހަގަ ކުރަނީ، ތަޢުލީމީ ފެންވަރު ދަށް މީހުންނަށް، މާސްޓާރސް ނިންމާފައި ތިބޭ ކުދިންގެ މަޤާމުތަކަށްވުރެ މަތީ މަޤާމާއި ބޮޑެތި މުސާރަ ލިބޭ ވަޒީފާތައް ދޭކަމެކެވެ. ނުހައްޤުން ވަޒީފާތައް ދޫކުރުމެވެ. މިކަމުގެ ސަބަބުން ކިޔަވަމުންދާ މީހުންނަށް ދެވެނީ ނުރަނގަޅު މެސެޖެއްކަމަށްވެސް އެ ފަރާތްތަކުން ބުނެއެވެ. ކިތަށްމެ މަސައްކަތް ކުރިޔަސް ވަޒީފާ ނުލިބިދާނެކަމުގެ އިޙްސާސްތަކެވެ. ކިޔެވުމަކީ ބޭކާރުކަމެއް ގޮތުގައި ޤަބޫލުކުރެވުމުގެ އިޙްސާސްތަކެވެ.

ވަޒީފާއެއް އަދާކުރަން މުހިންމީ ހަމައެކަނި ތަޢުލީމެއް ނޫނެވެ. ހުނަރާއި ތަޖުރިބާވެސް ނުހަނު މުހިންމެވެ. ތަޖުރިބާއަކީ ވަޒީފާއެއް އަދާކުރުމުން ލިބޭނެ އެއްޗެކެވެ. ބަޔަކާއެކީ މަސައްކަތްތަކެއް ކުރެވުނީމަ ލިބޭނެ އެއްޗެކެވެ. މުހިންމީ ޢިލްމު އެކަންޏެއް ނޫނެވެ. ޙިލްމެއް ނެތް ޢިލްމަކުން ކުރާނެ ފައިދާއެއް އޮންނާނެ ހެއްޔެވެ؟ ހޯދާ ޢިލްމެއްގެ ބޭނުން ހިފުމަށާއި، އެކަން ހަޤީޤީ ދިރިއުޅުމުގައި ހަރުލެއްވޭނީ ކިހިނެއްކަން އެނގެން ވާނެއެވެ. ހަމައެހެންމެ، ސިޔާސީ މައިދާނުގައި އުޅޭ ކޮންމެ މީހަކީ ނުކިޔަވާ ހުންނަ މީހެއް ނޫނެވެ. ސިޔާސީ ނުފޫޒުން ވަޒީފާ ލިބޭ ކޮންމެ މީހަކީވެސް ތަޢުލީމެއް ނެތް މީހަކަށް ނުވެދާނެއެވެ. އެ މައިދާނުގައިވެސް ކިޔަވައިގެން، އެކަމުގެ ރޮނގުން ތަޢުލީމު ހާސިލުކޮށްފައި ތިބޭ މީހުން އުޅެއެވެ. ނަމަވެސް ވަޒީފާތައް ހޯދަން އުޅޭ ފަރާތްތަކުން އެ ފާހަގަކުރަނީ ގިނަ ފަހަރަށް ކަންތައްތައް އޮންނަ ގޮތެވެ. މުޖުތަމަޢުގައި ކަންކަން ޢާއްމުވަމުން އަންނަ ގޮތެވެ. އެއީ ދެބަސްވެވެން ނެތް ހަޤީޤަތެވެ. އެ ފަރާތްތަކުން ބޭނުންވަނީ ހަމަހަމަ ފުރުސަތެވެ. އިންސާފުވެރި ފުރުސަތުތަކެވެ. ޢަދުލުވެރި ނިންމުންތަކެވެ. ބޮޑު ޚަރަދެއް ކޮށްގެން، ކޮލެޖާއި ޔުނިވަރސިޓީގެ ފީތައް ދައްކައިގެން ހޯދާ ތަޢުލީމާއި، ހާސިލްކުރާ ސަނަދަކީ ބޭކާރު އެއްޗެއް ކަމަށް މީހަކަށް އިޙްސާސްވުމަކީ ދެރަކަމެކެވެ. ތޮފި އެޅިޔަސް ވަޒީފާއެއް ނުލިބޭކަމުގެ ޝަކުވާތައް އުތުރިއަރަމުންދާ ދަނޑިވަޅުގައި ޢިލްމާއި ޙިލްމުގެ މުހިންމުކަން އެންމެންވެސް ދަންނަން ޖެހެއެވެ.