ގޮތެއް ފޮތެއް ނެތް ނުބައިވި ޔަހޫދީ އިސްރާއީލުން، މައުސޫމު، ފަލަސްތީނުގެ މުސްލިމުންނަށް ދެމުންދާ ލާއިންސާނީ އަނިޔާތަކަށް ނިމުމެއް ނާދެއެވެ. ކޮންމެ ދުވަހަކީ އެތައް ބިރުވެރި، އެތައް ހިތްދަތި ލާއިންސާނީ އަމަލުތަކެއް ހިންގާ ދުވަހެކެވެ. އެތައް ފުރާނައެއް މި ދުނިޔެއާއި ވަކިވެދާ ދުވަހެވެ. މިއީ އެފަދަ ހާދިސާ އެކެވެ.

އިއްޔެގެ ކުރީ ދުވަހުގެ ވަގުތެއްގައި ފަލަސްތީނުގެ ހަބަރުތައް ގެނެސްދޭ އެކްސް އެކައުންޓަކުން އާއްމުކުރި ވީޑިއޯއެއްގައި ފެންނަނީ ހިތްދަތި ލާއިންސާނީ މަންޒަރެކެވެ. އުމުރުން 56 އަހަރުގެ ފަލަސްތީނު ފިރިހެނެއްގެ ގަޔަށް ބަޑި ޖަހާ ބިންމައްޗަށް ވައްޓާލައެވެ. މި ކަން ހިނގައި ގޮސްފައިވަނީ ކަމާލް އަދްވަން ހޮސްޕިޓަލު ދޮރުމަތީގައެވެ. ހަތިޔާރު އެޅި އިސްރާއީލުގެ ހަނގުރާމަވެރިން އެ ސަރަހައްދުގައި ފޯރިމަރަމުން ގޮސް، އަބޫ އަރަފާތު އަބޫ ސައިފް (56އ) ގެ ގަޔަށް ބަޑިޖަހާ ބިންމައްޗަށް ވައްޓާލިއެވެ.

އޭގެ ފަހުން އިސްރާއީލިގެ މި ނުބައި ނުލަފާ ޝައިޠާނުން އައިސް، އަބޫ އަރަފާތުގެ ހަށިގަނޑުގައި އަލިފާން ރޯކޮށްލިއެވެ. ބަޑީގެ ވަޒަނުން ޒަހަމްވެ، ބިންމައްޗަށް ވެއްޓިފައި އޮތް އަބޫ އަރްފާތުގެ ގައިގާ ހުޅުޖަހާ އިސްރާއީލު ސިފައިން ދުރުގައި ފޯރިމަރަމުން ދިޔައީ އޭނާ ސަލާމަތްކުރަން ނުކުންނަ މީހުންނަށް ބަޑިން ހަމަލާދެމުންނެވެ. އަބޫ އަރަފާތު، ހޮސްލިޓަލުގެ ދޮރުމަތީ، އަންދާލީ އެއްވެސް ރަހުމެއް ކުލުނެއް ނެތިއެވެ. ދިރިދިރި ހުއްޓާ ގައިގާ އަލިފާން ޖަހާ ރޯކޮށްލީއެވެ. ހިތާމައިގެ ބޮޑުކަމާއެވެ. 

މިފެންނަނީ ޔަހޫދީންގެ ލާއިންސާނީ އަނިޔާތަކެވެ. ނުބައި ނުލަފާކަމުގައި މިންނެއް ސުމާރަށް މި ޖާހިލުންގެ ސުންޕާކަން ވިމަނީ ގޮސްފައެވެ. މާތް ﷲ އަޅަމެން މުސްލިމުންނާއި ފަލަސްތީނުގެ ލޮބުވެތި މުސްލިމު އަޚުން، އިސްރާއީލުގެ އަނިޔާވެރިކަމުން ސަލާމަތްކުރައްވާ މުސްލިމުންނަށް ނަޞްރު ދެއްވާންދޭވެ!