ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް) އަދި މޯލްޑިވްސް ޓްރޭޑްޔޫނިއަން ކޮންގްރެސް (އެމްޓީޔޫސީ) އާއި ގުޅިފައިވާ ޖަމުއިއްޔާތަކުން މަސައްކަތްތެރިންގެ ދުވަސް ފާހަގަ ކުރުމަށް ކަނޑުމަތީގައި ރެލީއެއް ބާއްވައިފިއެވެ.
މި ރެލީ ގައި 8 ކަންނެލި އޮޑި ބައިވެރިވެފައި ވެއެވެ. ރައީސްއޮފީހާ ދިމާލުން، ކަނޑުގައި ބޭއްވި މި ރެލީގައި ގިނަ މަސައްކަތްތެރިން ވަނީ ބައިވެރިވެފައެވެ. މި ރެލީގައި ދިވެހި މަސައްކަތްތެރިންގެ ގިނަ ޝަކުވާތަކެއް ވަނީ ފާހަގަ ކުރައްވާފައެވެ. އަދި މަސައްކަތްތެރިންނަށް އިންސާފު ހޯދައިދިނުމަށްވެސް ވަނީ ގޮވާލާފައެވެ. ހާއްސަކޮށް ކޮވިޑް19 ގެ މި ހާލަތުގައި މަސައްކަތްތެރިންގެ ގިނަ ހައްގުތަކެއް ގެއްލިފައިވާކަމަށްވެސް ފާހަގަކުރައްފައިވެއެވެ. އަދި މިނިމަމް ވޭޖު އަވަސްކުރުމަށާއި، ޓުރޭޑް ޔޫނިޔަން އާއި ބެހޭ ގާނޫނު ފާސްކުރުމަށާއި، މަސައްކަތުގެ މާހައުލުގެ ރައްކާތެރިކަން ކަށަވަރުކޮށްދިނުމަށާއި، ވަޒީއާއި ބެހޭ ގާނޫނުގެ 21 ވަނަ މާއްދާއަަށް ގެނެސްފައިވާ އިސްލާހު އުވާލުމަށްވެސް ވަނީ ގޮވާލާފައެވެ.
ކޮވިޑް19 ގެ މި ނުރައްކާތެރި ހާލަތުގައި ކުރީސަފުގައި މަސައްކަތްކުރި އެންމެހާ މަސައްކަތްތެރިންނަށް މިރެލީގައި ވަނީ ޝުކުރު އަދާކޮށްފައެވެ. އެގޮތުން ރިސޯޓު މުވައްޒަފުންނާއި ސިއްހީދާއިރާގެ މުވައްޒަފުންނާއި ޓީޗަރުން އަދި މަސްވެރިން ހިމެނެއެވެ. މީގެ އިތުރުން ބަނދަރުތަކުގައި މަސައްކަތްކުރާ ހުރިހާ މަސައްކަތްތެރިންނަށް ވަނީ ޝުކުރުއަދާކޮށްފައެވެ.
ކޮވިޑް19 ގެ މި ހިތްދަތި ހާލުގައި ދިވެހި އެތަކެއް މަސައްކަތްތެރިންނެއް ވަނީ އެތަކެއް ގުރުބާނީއެއް ވެފައެވެ. އަނބިދަރިންނާއި ލޯބިވާ އާއިލާ އާއި ދުރުގައި އެތަކެއް ދުވަސްތަކެއް ވަނީ ހޭދަކޮށްފައެވެ.
މީގެ އިތުރުން ވަޒީފާގެ މާހައުލުގައި ދިމާވާ ޖިންސީ ފުރައްސާރައާއި ދެކޮޅަށް މާލޭގައި ކުރި މުޒާހަރާގެ ތެރެއިން ހަތަރު ކުއްޖަކު ހައްޔަރުކޮށް އެކުދިންނަށް ވަރަށް ބޮޑަށް އަނިޔާކޮށްފައިވާ ކަމަށް ތީރަށް ވަނީ މައުލޫމާތު ލިބިފައެވެ.