ކިޔަނީ 'ތިމާ'ވެއްޓެވެ. ނަމަވެސް ތިމާ މީހާގެ އަމިއްލަ އެއްޗަކަށް ކަންތައް ކުރާ ބީދައިން ތިމާވެއްޓާމެދު ކަންތައް ކުރެވޭ ހެއްޔެވެ؟ ބަވަނަވަމުން އަންނަ މި ދުނިޔޭގައި ތިމާވެއްޓަށް އެއްވެސް އަޅާލުމެއް ލިބޭ ހެއްޔެވެ؟ ދުވަހުން ދުވަހަށް ތިމާވެށި ހަލާކުވަމުން ދާއިރު އެކަން ކުރަމުންދަނީ ޚުދު އިންސާނުންގެ އަތްތަކުންނެވެ. އެޢަމަލުތަކުގެ ނަތީޖާ ނުހަނު ސާފުކޮށް ފެންނަށް އެބައޮތެވެ. ދުނިޔެ ހޫނުވުމާއެކު ޖައްވު ނުސާފުވަނީއެވެ. ކަނޑުފަރުގެ ދިރުންތައް ނެތިގެން ދަނީއެވެ. ރަށް ގިރާ، ރަށް އަޑިއަށް ދިއުމުގެ ބިރުވެސް ކުޑައެއް ނޫނެވެ. ހައްތަހާވެސް އިންސާނުންގެ ނޭދެވޭ ޢަމަލުތަކުގެ ސަބަބުން ތިމާވެއްޓަށް ލިބޭ ގެއްލުންތަކެވެ.

ކުރިއަރާފައިވާ މި ޒަމާނުގައި ތިމާވެއްޓަށް އޮތް އެންމެ ބޮޑު ގޮންޖެހުމަކީ ޖައްވަށްދާ އެކިކަހަލަ ވިހަ ގޭސްތަކެވެ. ކާރާއި، ޕެޓްރޯލް ބޭނުންކުރާ އެތަކެއް އުޅަނދުތަކެވެ. ފެކްޓްރީތަކުން ބޭރުވާ އެކިކަހަލަ ވިހަ މާއްދާތަކެވެ. މި ވިހަ ގޭސްތަކުގެ ސަބަބުން ދުނިޔެ ހޫނުވަނީއެވެ. ކަނޑުގެ ލޮނުގަނޑު އުފުލި، ރާއްޖެ ކަހަލަ ކުދި ޤަައުމުތައް އަޑިޔަށް ދިއުމުގެ ބިރު ބޮޑުވަނީއެވެ. ހަމަމިއާއެކު، އިންސާނުންގެ ހަންގަނޑަށް ވާސިލުވާ އަލްޓްރާވައިލެޓް ރޭސްއަކީ ހަންގަނޑަށް ނުރައްކާތެރި، ހަމުގެ ބަލިތައް ޖައްސާ އަދި ހަމުގެ ކެންސަރަށް މަގުފަހިކުރުވާ އެއްޗެކެވެ. މީގެއިތުރުން، އެކިކަހަލަ ވިހަ މާއްދާތަކުން އަހަރުމެންގެ ޖައްވު މިވަނީ ތަޣައްޔަރުވެފައެވެ. ސަލްފާ ޑައި-އޮކްސައިޑާއި، ނައިޓްރޮޖެން ޑައި-އޮކްސައިޑް ފަދަ މާއްދާތައް ޖައްވައް ދިއުމުގެ ނަތީޖާއަކީ، ވާރޭގެ ގޮތުގައި ވެހެން ތައްޔާރުވެފައި ހުންނަ ފެނާއި އެތަކެތި އެއްވެ، އެ ފެން އެސިޑަށްވުމެވެ. މިއަށް ކިޔަނީ އެސިޑްރެއިންއެވެ. ހަމައެހެންމެ، ޖައްވުގައި ހަރުލާފައި ހުންނަ ގޭސްތަކުގެ ސަބަބުން ނޭވާލާ ނިޒާމުގެ ބަލިތައް ޖެހުމުގެ ފުރުސަތު ބޮޑުވެ، ވައިގެ އުޅަނދުތަކުގެ އެކްސިޑެންޓުތައް ގިނަކުރެއެވެ. ޖައްވު ނުސާފުވެ، ތަނެއް ދޮރެއް ނުފެންނަ ވަރުވީމާ ވާނީ މިހެން ނޫން ހެއްޔެވެ؟

ރާއްޖެ ފަދަ ޤައުމެއްގެ މައިގަނޑު ކާނާއަކީ ކަނޑުފަރުގެ މަސްތަކެވެ. ދަތުރުފަތުރުގެ މައިގަނޑު މަގަކީވެސް ކަނޑެވެ. ތިމާވެއްޓަށް ލިބޭ ގެއްލުންތަކުގެ އަސަރު، ކަނޑުފަރުތަކަށްވެސް ކުރާނެއެވެ. ޕްލާސްޓިކާއި، ކުނިތައް މޫދަށް އެޅުމުގެ ސަބަބުން ކަނޑުގެ ދިރުންތައް ނެތިދަނީއެވެ. މީގެ ސަބަބުން، ގިނަ އަދަދެއްގެ ދިރުންތަކުގެ 'ފުޑް ޗެއިން'އަށް އަސަރު ކުރެއެވެ. އެކިކަހަލަ ދިރުންތައް ބަނޑުހައިހޫނުކަމުގައި މަރުވެ ދިއުން އޮތީ ދުރަކު ނޫނެވެ. މިި ލިސްޓުގެ އެންމެ ކުރީގައި ޚުދު އިންސާނުން ހިމެނެއެވެ. މިފަދަ އެތައް ގެއްލުންތަކެއް ހުއްޓުވެން އޮތީ ތިމާވެއްޓަށް އިންސާނުން ކުރާ އަނިޔާތައް ހުއްޓުވައިގެންނެވެ. ތިމާވެއްޓަށް ގެއްލުން ދިނުމަކީ ފޭހުނު އިލޮށި އަމިއްލަ ލޮލަށް ހެރުންފަދަ ކަމެކެވެ.