ހުސްވަގުތުގެ 'ހޮބީ'އެއް ގޮތުގައި އެކި މީހުން ކުރަނީ އެކިކަހަލަ ކަންތައްތަކެވެ. އޭގެތެރެއިން 'ޖާނަލިންގ'އަކީ އެފަދަ ހޮބީއެއް ގޮތުގައި ކުރުން ވަރަށް 'ފައްކާ' ކަމެކެވެ. ޖާނަލިންގއަކީ ލިޔުންތެރިކަމާއި، ކުރެހުންތަކުގެ އިތުރުން އެކި ކަހަލަ ފަންނުވެރިކަމުން، ފޮތެއްގައި ކުރެވޭ މަސައްކަތްތަކެކެވެ.
ޖާނަލިންގ ގައި އާއްމުކޮށް ހިމަނަނީ ކުުރު ނުކުތާތައް ނުވަތަ ނޯޓްސްއެވެ. އެއަށްފަހު ރީތި ފޮންޓުތަކަށް ލިޔުންތައް ފަރުމާކޮށްފައި، އެކި ކަހަލަ ޑިޒައިންތަކުން ސަފްޙާ ފަރުމާކުރެއެވެ. ބޮޑަށް ޖާނަލިންގ ގެ ސިފަ ޖެއްސުމަށް ސްޓިކާތައް ބޭނުންކުރެއެވެ. އެމީހެއްގެ ދުވަހީ ދިރިއުޅުމުގައި ހިނގާ ކަންތައްތައް ކުރުކޮށް ނުވަތަ ތަފްސީލުކޮށްވެސް ޖާނަލިންގ ގައި ހިމެނޭނެއެވެ. އެކި ކަހަލަ ތަޖުރިބާތަކާއި، ތިމާއަށް ކުރެވޭ އިޙްސާސްތައް ހިއްސާ ކުރާ ބައިވެރިޔަކަށް އެފޮތުގެ ސަފްޙާތައް ހެދޭނެއެވެ. އޭގެ ސަބަބުން އިޙުސާސްތައް ހިތު ތެރޭގައި ފުނިޖައްސާފައި ބެހެއްޓުމުން އެވާ އުނދަގޫތަކުން މިހާ ދުރުވާނެއެވެ.
އަމިއްލަ ނަފުސަށް ހިތްވަރުދިނުމަށްޓަކައި، ޢިބުރަތްތެރި އިބާރާތްތައް ނުވަތަ 'މޯޓިވޭޝަނަލް ކްއޮޓްސް' ވެސް ޖާނަލިންގ ގެތެރޭގައި ހިމެނޭނެއެވެ. އަދި ތިމާ ހާސިލްކުރަން ބޭނުންވާ ލަނޑުދަނޑިތަކާއި އުސްއަލިތައްވެސް ފޮތުގައި ހިމެނުމަކީ ކުރެވޭނެ ކަމެކެވެ. އޭގެ ސަބަބުން ތިމާ ކުރަންޖެހޭ ކަންތައްތަކާއި، ހާސިލްކުރުމަށް ޢަޒުމް ކަނޑައަޅާފައިވާ ހުވަފެންތައް އަބަދުވެ ހަނދާނުގައި ހަރުލާ، އެކަންތައް ހާސިލް ކުރުމަށްޓަކައި ބޭނުންވާ ހިތްވަރު ލިބެއެވެ. ހަމަމިއާއެކު، ގިނަަ މީހުން އެކިކަލަހަ 'ޓްރެކަރސް' ޖާނަލިންގ ގައި ހިމަނައެވެ. އެއީ ކަމެއް ކުރެވޭ މިންވަރު ދެނެގަތުމަށް ހަދާފައި އޮންނަ އެއްޗެކެވެ. ގިނަފަހަރަށް، އެ ޓްރެކަރގައި ހިމަނާ ކަމެއް ކުރެވިއްޖެނަމަ، އެތަނެއްގައި ކުލަ ޖައްސައެވެ. ނުވަތަ ކޮންމެވެސް ގޮތަކަށް އެކަން ކުރެވުނުކަން ފާހަގަކޮށްލައެވެ. އެގޮތުން އާދަތައް ހަރުލައްވާ، ރަނގަޅު އާދަތަކެއްގެ މައްޗަށް މީހާ ބައްޓަން ވުމަށް 'ހެބިޓް ޓްރެކަރސް' ހަދައެވެ. އޭގެތެރޭގައި ކަސްރަތުކުރުމާއި، ކިޔެވުމާއި، ފޮތް ކިޔުމާއި، ގޭތެރެ ފޮޅާ ސާފުކުރުން ފަދަ ކަންތައްތަކުން ގޮސް، ފެން ބޮއެވޭ މިންވަރު ރަނގަޅު ކުރުމަށް 'ވޯޓަރ ޓްރެކަރސް' ހަދައެވެ. ހަމަ މިބީދައިން، ފަރުޟު 5 ނަމާދު އޭގެ ވަގުތުގައި އަދާކުރުމަށް ހިތްވަރު ލިބިގަތުމަށް ނަމާދު ޓްރެކަރއެއް ހެދިދާނެއެވެ. ހުކުރު ދުވަހު ކަހަފް ސޫރަތް ކިޔެވުމަށްވެސް އެފަދަ ޓްރެކަރއެއް ހެދޭނެއެވެ.
ޤުރުޢާން ޖާނަލިންގ އަކީވެސް ޖާނަލިންގ ތެރޭގައި ހިމެނޭނެ ވައްތަރެކެވެ. އެގޮތުން ސޫރަތްތައް ލިޔެ، އޭގެ ތަރުޖަމާވެސް ލިޔުމަށްފަހު، ސޫރަތް ބާވައިލެއްވުނު ތަނާއި، ސޫރަތް ބާވައިލެއްވުނު ސަބަބު ހިމެނުމަށްފަހު، ސޫރަތުން ލިބޭ ޢިބުރަތްތަކާއި ފިލާވަޅުތައް ލިޔެވޭނެއެވެ. މީގެ ސަބަބުން، ޤުރުއާނާއި ސޫރަތްތަކާ ގުޅުންހުރި މަޢުލޫމާތު ލިބި، ޢިލްމުގެ ޚަޒާނާ މުއްސަނދިވާނެއެވެ. އަދި ޚާއްސަ ދުޢާތައް ލިޔެ، ޑިޒައިން ކުރުމަށްވެސް ޖާނަލިންގ އަކީ ވަރަށް ރަނގަޅު ޒަރީޢާއެކެވެ. ހަަމައެހެންމެ، ބޭނުންވާ މައުޟޫއެއްގެ ދަށުން ދީނީ ދަރުސްތައް ބެލުމަށްފަހު، އެ މައުޟޫއެއްގެ ދަށުން ދައްކާ މުހިންމު ވާހަކަތައް ނޯޓުކޮށް، ޖާނަލިންގ ހަދާ ފޮތުގައި ނަކަލު ކުރެވޭނެއެވެ. ޖާނަލިންގ އަކީ ވަކި މައުޟޫއަކަށް، ދާއިރާއަކަށް ނުވަތަ ވައްތަރަކަށް ހަނިވެފައި އޮންނަ އެއްޗެއް ނޫނެވެ. އެމީހަކު ބޭނުންވާ ކަމަކާ ގުޅޭގޮތުން ޖާނަލިންގ ފަރުމާކުރެވޭނެއެވެ. ކޮންމެހެން މާނަތަކެއް ދޭހަވާ ލިޔުންތައް ނުލިޔެ، ހަމައެކަނި ސްޓިކާތަކެއް ބޭނުންކޮށްގެން ޑިޒައިން ކޮށްލުމަށްފަހު، އެމީހަކަށް ކަމުދާ ކުރު އިބާރަތްކޮޅެއް އެކަނިވެސް ޖާނަލިންގ ތެރޭގައި ހިމެނޭނެއެވެ.
ކުރުކޮށް ފޮނިކޮށް ބުނާނަމަ ޖާނަލިންގ އަކީ ހިތްހަމަޖައްސާލާ، ސިކުނޑި ހަމަޖައްސާލަން ވަރަށް 'ސަޅި' ކަމެކެވެ. އިޙްސާސްތައް ބޭރުކޮށް، އަމިއްލަ ފަންނުވެރިކަން ނުވަތަ 'ކްރިއޭޓިވިޓީ' ކުރިއެރުވުމަށް އެހީވެދީ، ޢިލްމާއި މަޢުލޫމާތު އިތުރުކުރުމަށް ޝައުގުވެރި ގޮތެކެވެ. އަމިއްލަ ނަފުސު 'މޯޓިވޭޓް' ކުރުމަށް މަސައްކަތްކޮށްދޭ ހިއްސާދާރެކެވެ. މިއީ ހުސްވަގުތުގައި ކުރުން އެއްވަނައިގެ ކަމެކެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން