ހުޅުމާލެ ފޭސް 2 ގައި ހުރި ކަރަންޓު ޓްރާންސްފޯމަރަކުން ވައްކަން ކުރަން އުޅުނު ފަރާތްތައް ހުއްޓުވުމަށް މަސައްކަތްކުރި ސްޓެލްކޯގެ މުވައްޒަފުންނަށް، އެ ކުންފުނިން މިއަދު ޝަރަފުގެ މެޑަލާއި ހަނދާނީ ލިޔުން ހަވާލުކޮށްފިއެވެ.

އިއްޔެ ރޭ 9:30 ހާއިރު، ކަރަންޓު ޓްރާންސްފޯމަރެއްގެ ތެރެއަށް ވަދެ ވައްކަން ކުރަމުންދާކަން ފާހަގަކުރެވުނީ، ޓްރާންސްފޯމަރުގެ ކޭބަލް ބުރިކޮށްލުމާ ގުޅިގެން އެމްޕީއެލް ފްލެޓްތަކުން ކަރަންޓު ކެނޑުމުންނެވެ. ސްޓެލްކޯގެ މެނޭޖިންގ ޑިރެކްޓަރު ހުސެއިން ފަހުމީ ވިދާޅުވި ގޮތުގައި، އެ ސަރަހައްދުގައި ހުރި ސްޓެލްކޯގެ މުވައްޒަފަކު އެތަނަށް ދިޔައިރު ވައްކަން ކުރަން ދެ މީހަކު އެތަނުގައި ތިއްބެވެ.

އެ މީހުން ހުއްޓުވަން މުވައްޒަފު މަސައްކަތް ކުރުމުން، އެ ފަރާތްތަކުގެ އަތުގައި އޮތް ރެންޗަކުން ޖަހައި، މާރާމާރީ ހިންގިއެވެ. މި ހާދިސާގައި މުވައްޒަފުގެ ބޮލާއި އަނގަމަތި ފަޅައިގެން ގޮސްފައިވެއެވެ.

ސްޓެލްކޯއިން މިއަދު ހާމަކުރި ގޮތުގައި، ޓްރާންސްފޯމަރުން ވައްކަން ކުރަން އުޅުނު ފަރާތްތައް ހުއްޓުވަން މަސައްކަތް ކުރި މުވައްޒަފުން ދެއްކި ކެރުންތެރިކަމާއި ހިތްވަރު ފާހަގަކޮށް، އެ މުވައްޒަފުންގެ އަގު ވަޒަންކޮށްފައިވެއެވެ. މިގޮތުން، އެއް މުވައްޒަފަކަށް އެ ކުންފުނީގެ "މެޑަލް އޮފް ބްރޭވަރީ" ދިނުމުގެ އިތުރުން އެހެން މުވައްޒަފަކަށް ހަނދާނީ ލިޔުން ދީފައިވެއެވެ. "މެޑަލް އޮފް ބްރޭވަރީ" ދީފައިވަނީ ޒަޚަމްވި މުވައްޒަފަށެވެ.

ސްޓެލްކޯއިން އިތުރަށް ބުނެފައިވަނީ، މިފަދަ މައްސަލަތަކަކީ ވަރަށް ސީރިއަސް މައްސަލަތަކެއްގެ ގޮތުގައި ބަލައި، އެކަށީގެންވާ ފިޔަވަޅުތައް އަޅަމުން ގެންދާނެ ކަމަށެވެ. މި މައްސަލާގައި ވައްކަން ކުރުމުގައި ބައިވެރިވި ފަރާތެއް ފުލުހުން މިއަދު ވަނީ ހައްޔަރުކޮށްފައެވެ.