ފަލަސްޠީނުގެ ޣައްޒާ ސަރަޙައްދުގައި ހިނގަމުންދާ ހަނގުރާމަ ހުއްޓާލުމަށް އިސްރާއީލާއި ހަމާސްއާ ދެމެދު އެއްބަސްވުމަކަށް އާދެވިފައިވާކަމުގެ ޚަބަރު މީޑިއާތަކުން ގެނެސްދިންތާ ދުވަހެއް، ދެދުވަހެއް ވެއްޖެއެވެ. ނަމަވެސް، މި އެއްބަސްވުމަކީ އިސްރާއީލުގެ ހެޔޮ ނިޔަތަކުން ކުރެވިފައިވާ ކަމެއްތޯ އަދި މި އެއްބަސްވުމުގެ ސަބަބުން ދާއިމީ ސުލްޙައެއް ޤާއިމުވެދާނެތޯ އަޅުގަނޑުމެން ވިސްނާލަން ޖެހެއެވެ.

އެންމެ ފުރަތަމަ ކަމަކަށް، އަޅުގަނޑުމެން ދެނެގަންނަން ޖެހެނީ މި ހަނގުރާމައިގެ އަސްލު ސަބަބުތަކެވެ. ފަލަސްޠީނުގެ ބިމާއި ވަސީލަތްތައް އިސްރާއީލުން ގަދަކަމުން އަތުލައިގަތުމާއި، ފަލަސްޠީނު ރައްޔިތުންގެ އަސާސީ ޙައްޤުތައް ނިގުޅައިގަތުމަކީ މި ހަނގުރާމައިގެ މައިގަނޑު ސަބަބުތަކެވެ. މިފަދަ އަނިޔާވެރި ޢަމަލުތަކުގެ ސަބަބުން ފަލަސްޠީނު ރައްޔިތުން ދިފާޢުވުމަށް ތެދުވުމަކީ އެއްވެސް މީހަކަށް ކުށްވެރި ނުކުރެވޭނެ ކަމެކެވެ.

ދެވަނަ ކަމަކަށް، އަޅުގަނޑުމެން ވިސްނާލަންޖެހެނީ މި އެއްބަސްވުމުގެ ޝަރުޠުތަކަށެވެ. ގިނަ ފަހަރަށް މިފަދަ އެއްބަސްވުންތަކުގައި އިސްރާއީލަށް ފައިދާވާ ގޮތަށް ޝަރުޠުތައް ކަނޑައެޅިފައި ހުރެއެވެ. މިސާލަކަށް، ހަމައެކަނި ވަގުތީ ހުއްޓުމެއް ގެނައުމަށް ނުވަތަ ހަމައެކަނި ވަކި ސަރަޙައްދުތަކެއްގައި ހަނގުރާމަ ހުއްޓާލުމަށް އެއްބަސްވުން ފަދަ ކަންކަން ފާހަގަ ކުރެވެއެވެ. މިފަދަ އެއްބަސްވުންތަކުން ދާއިމީ ޙައްލެއް ނުލިބޭނެކަން ކަށަވަރެވެ.

ތިންވަނަ ކަމަކަށް، އަޅުގަނޑުމެން ބަލާލަންޖެހެނީ އިސްރާއީލުގެ ކުރީގެ ޢަމަލުތަކަށެވެ. ވޭތުވެދިޔަ އަހަރުތަކުގައި އިސްރާއީލުން ވަނީ ގިނަ ފަހަރު މަތިން އެއްބަސްވުންތަކާއި ހިލާފުވެ، ފަލަސްޠީނު ރައްޔިތުންނަށް އިތުރު އަނިޔާތައް ކޮށްފައެވެ. މިކަމުން ދޭހަވަނީ އިސްރާއީލުގެ ބަހަށް އިތުބާރު ކުރަން ދަތިކަމެވެ. މިފަހަރުވެސް، ހަނގުރާމަ ހުއްޓާލުމަށް އެއްބަސްވުމަށް ފަހުގައިވެސް، އިސްރާއީލުން ވަނީ ފަލަސްޠީނަށް ހަމާލާދީ ބަޔަކު ޝަހީދުކޮށްލާފައެވެ.

ހަތަރުވަނަ ކަމަކަށް، އަޅުގަނޑުމެން ވިސްނާލަންޖެހެނީ ބައިނަލްއަޤްވާމީ މުޖުތަމަޢުގެ ދައުރަށެވެ. ގިނަ ފަހަރަށް ބައިނަލްއަޤްވާމީ މުޖުތަމަޢުން އިސްރާއީލުގެ އަނިޔާވެރި ޢަމަލުތަކާ ދެކޮޅަށް އެކަށީގެންވާ ފިޔަވަޅުތަކެއް ނާޅައެވެ. މިކަމުގެ ސަބަބުން އިސްރާއީލަށް ލިބެނީ އިތުރު ހިތްވަރެކެވެ. ހަނގުރާމައިގެ ބައިނަލްއަގުވާމީ ގަވާއިދުތަކާއި ހިލާފުވަމުން ދާއިރު، އަހުދުތަކަށް ފާޅުގައި ގޮންޖަހަމުން ދާއިރުވެސް، އިސްރާއީލާއި ދެކޮޅަށް ބައިނަލްއަގުވާމީ އެއްވެސް ޖަމާއަތަކުން ފިޔަވަޅެއް ނާޅައެވެ. މަތި އޮމާން ކުރަން ފޮނި ވާހަކަތަކެއް ނޫނީ ނުދައްކައެވެ.

މާޒީގައި ކަންހިނގައިފާވާ ގޮތުންނާއި، ބައިނަލްއަގުވާމީ ދުނިޔޭގައި އިސްރާއީލުގެ މައުސޫމުކަން ބޮޑުކަމުންނާއި، ފަލަސްޠީނުގެ ރައްޔިތުންނަށް އިންސާނީ ހައްގުވެސް ނުލިބޭ މި ކެހިވެރި ދުނިޔޭގައި، އިސްރާއީލުން ވަގުތީގޮތުން ހަނގުރާމަ ހުއްޓާލަން މި އެއްބަސްވި އެއްބަސްވުމުގައި އެެއްވެސް އިހުލާސްތެރި ނިޔަތެއް ނެތްކަން މުޅި ދުނިޔެ ހެކިވާނެއެވެ. ހަނގުރާމަ ހުއްޓާލުމަށް ވެވުނު އެއްބަސްވުމާއި އެކު އިސްލާމީ އުންމަތުގެ ގިނަބަޔަކު ދަނީ އުފާ ފާޅުކުރަމުންނެވެ. ހަމަ އެ ނޭވާގައި އިސްރާއީލުގެ ނިޔަތާމެދު ސުވާލު އުފައްދާ އެތައް ބަޔަކުވެސް އުޅެއެވެ.