އިންޑިއާގެ ބިހާރު ސްޓޭޓުން ފެންނަން މިއޮތީ އަނބިމީހާއަށްޓަކައި ފިރިއެއްގެ ހިތުގައިވާ ލޯތްބާއި ކުލުނުގެ އިމެއް ނެތް ދާސްތާނެވެ. އަނބިމީހާއަށްޓަކައި ފިރިމީހާގެ ހިތުގައިވާ ޤަދަރާއި އިޙްތިރާމެވެ. ދައްކަން މިއުޅެނީ ފައިސާއާއި ޔާގޫތުގެ ވާރޭ ވެއްސާ ވާހަކައެއް ނޫނެވެ. ރުފިޔާއާއި މުދާވެރިކަމުން އަނބިމީހާ އުފާކޮށްދޭ ވާހަކައެއްވެސް ނޫނެވެ. އިންޑިއާގެ ބިހާރަށް ނިސްބަތްވާ ފަޤީރު ދެމަފިރިއެއްގެ ފަރާތުން ފެންނަ ލޯބީގެ ލާމަސީލު ނަމުނާއެކެވެ.

ބިހާރް ސްޓޭޓަށް ނިސްބަތްވާ މި ފިރިހެން މީހާގެ އަނބިމީހާއަކީ ބަލި އެނދުގައިވާ މީހެކެވެ. ކައިވެންޏަށް 12 އަހަރުވެފައިވާ މި ދެމަފިރިންގެ ޙަޔާތުގައި އަނބިމީހާގެ ބަލިމަޑުކަމުގެ ސަބަބުން ފިރިމީހާ ކޮށްދޭ ޚިދުމަތްވަނީ ގިނަ ބައެއްގެ ސަމާލުކަން އަތުލައިގަނެފައެވެ. ކޮންމެ ދުވަހަކު 3 ފަހަރުމަތިން ފައިމަގުގައި ފިރިމީހާ ދަތުރު ކުރަނީ އަނބިމީހާގެ އޮކްސިޖަން ސިލިންޑަރަށް އޮކްސިޖަން އެޅުމަށެވެ. އެ ބަރު އޮކްސިޖަން ސިލިންޑަރު ކޮނޑަށް ލައިގެން، ޖުމުލަ 30 ކިލޯމީޓަރަށް ކޮންްމެ ދުވަހަކު ހިނގާފައި ދަތުރުކުރެއެވެ. މިއީ ފަސޭހަ ކަމެއް ނޫނެވެ. ކޮންމެ ކޮންމެ މީހަކަށް ކުޅަދާނަ ކަމެއްވެސް ނޫނެވެ. އުޅަނދެއްގެ ބޭނުމެއް ނުކޮށް، ފައިމަގުގައި އެ ސިލިންޑަރު ކޮނޑަށްލައިގެން ކޮންމެ ދުވަހަކު އެހާ ދިގު ރާސްތާއެއް ކަޑައްތު ކުރެވޭނީ ނުހަނު ހިތްވަރު ހުރީމައެވެ. އެ ހިތުގައި އަނބިމީހާއަށްޓަކައި ނުހަނު ލޯތްބާއި ކުލުނު ހުރީތީއެވެ. ފައިސާއާއި މުދާވެރިކަމެއް ނެތް އިރުވެސް، މި ފިރިމީހާގެ ފަރާތުން ދައްކައިދެނީ އަޅާލުމާއި އޯގާތެރިކަން ނުހަނު މުހިންމުކަމެވެ. ލޯތްބާއި، ކުލުނާއި އޯގާތެރިކަމަކީ ފައިސާއިން ގަނެވޭނެ ވަރަށްވުރެވެސް އަގުބޮޑު ތަކެއްޗެވެ.

ތިމާދެކެ ލޯބިވާ، ތިމާއަށް ޤަދަރުކޮށް އިޙްތިރާމު ކުރުމުގެ އިތުރުން، އަޅާލާ އޯގާތެރިވާ ޙަޔާތުގެ ބައިވެރިއެއް ލިބުމަކީ ނުހަނު ބޮޑު ނިޢުމަތެކެވެ. ދަތި އުދަނގޫ ޙާލަތްތަކުގައި ތިމާ އެކަނިހާލަށް ދޫކޮށްނުލާ، ތިމާގެ ކައިރީގައި ހުންނާނެ މީހަކު ލިބުމަކީ ނުހަނު ބޮޑު އުފަލެކެވެ. ވިސްނުންތެރިކަމާއެކު ޙަޔާތުގެ ބައިވެރިއެއް އިޙްތިޔާރު ކުރަންވީ މިހެންވެއެވެ.