ދަރިވަރުންގެ އެކި އިމްތިޙާނުތަކުގެ ނަތީޖާ އަންނަމުންދާ ދުވަސްވަރެކެވެ. އޭލެލެވްގެ ނަތީޖާއާއި އޭ.އެސް ލެވެލް އިމްތިޙާނުތަކުގެ ނަތީޖާއެވެ. އެއްބައެއްގެ ލޮލުން އުފާވެރިކަމުގެ ކަރުނަ ނީރާލިއިރު، ބައެއް މޫނުތައްވަނީ މިލާ މޯޅިވެފައެވެ. ނެރެވުނު ނަތީޖާއާމެދު އެތައް ބަޔަކު އިންސާފުކުރަމުންދަނީއެވެ. އެންމެންހެން ސަމާލުކަންދެނީ ނަތީޖާއަށެވެ. އެންމެންގެ ނަޒަރުވެސް ހުއްޓިފައި އޮތީ 'ރިޒަލްޓް' އަށެވެ. ކުދިން ކުރި ބުރަ މަސައްކަތަށް ކަޅިއެއް އެއްލާނެ މީހަކު ހަމަ ނެތީބާއެވެ؟

ކޮންމެ ފަހަރަކު ބޭނުންވާ ނަތީޖާ ނުލިބިދާނެއެވެ. ދަރިވަރުންނަށް އޮންނަނީ މަސައްކަތްކުރުމެވެ. އެ މަސައްކަތް އެކުދިން ކުރެއެވެ. ހުރިހާ ކުދިން ނުކުރިޔަސް، ގިނަކުދިން ނުހަނު ބުރަކޮށް ކިޔެވުމުގައި މަޝްއޫލުވެ އުޅެއެވެ. އެތައް ވަގުތެއް ހޭދަކުރަނީ ފޮތްތަކުގެ ތެރޭގައެވެ. އާއިލާއާއި ރައްޓެހިންނާއެކު ހޭދަކުރެވެން އޮތް ކިތަށްމެ ވަގުތެއް ޤުރުބާންކުރަނީ ފިލާވަޅު ދަސްކޮށްލުމަށެވެ. މުތާލިޢާކޮށް 'ރިވިޝަން' ފުރިހަމަ ކުރުމަށެވެ. ރަނގަޅަށް ފިލާވަޅު ހިތުގައި އެޅޭތޯ، އެލާމުކޮށްގެން ދަންވަރު ހޭލައެވެ. ފަތިހަށްވެސް ތެދުވެއެވެ. ނިދިތަކެއް ނަގާލާފައިވެސް ފިލާވަޅު ދަސްކުރެވޭތޯ ބަލައެވެ. މީގެއިތުރުން، އެއް ސުވާލެއް އެތަށް ފަހަރަކު ތަކުރާރުކޮށް ހަދައެވެ. ހިތުގައި އެޅެންދެން، އެއް ފޯމިއުލާއެއް ލައްކަފަހަރު ލިޔެއެވެ. ޕާސްޓްޕޭޕަރ ތައްވެސް ހެދެނީ ކިތަށް ފަހަރުކަމެއް ނޭނގެއެވެ. އިތުރު ގަޑިތަކަށްވެސް ބަރާބަރަށް ސަމާލުވެއެވެ.

ކުރެވޭ އެންމެ ރަނގަޅަށް މަސައްކަތް ކުރިޔަސް ނަތިޖާ އެންމެ ރަނގަޅު ނުވުމަކީ ވެދާނެކަމެކެވެ. ނަމަވެސް ކުއްޖާ ކުރި މަސައްކަތް ބަލައިގަތުން މުހިންމެވެ. އެކިފަހަރު ކުރިމަތިވާނީ އެކި ޙާލަތްތަކެވެ. ދަސްކުރި އެއްޗެއްވެސް އިމްތިޙާނުގައި އައިސް އޮންނަ ގޮތުން އުނދަގޫވެދާނެއެވެ. ހިތުދަސްކޮށްފައި އޮތް އެއްޗެއް، އިމްތިޙާނު ހަދަމުންދާ ވަގުތު ހަނދާން ނުވެދާނެއެވެ. ހިތްބިރުގަތްފައި ހުރުމުގެ ސަބަބުން ސުވާލުތައް ފަހުމު ނުވެދާނެއެވެ. މިނޫންވެސް އެތައް ސަބަބުތަކާހުރެ އެންމެ މަތިން ނަތީޖާ ނުނެރެވުމަކީ އެކަށީގެންވާ ކަމެކެވެ. ދެން އޭގެ މާނައަކީ ކުއްޖާ މަސައްކަތް ނުކުރިއްޔޭ ހެއްޔެވެ؟ ނޫނެކެވެ. މަސައްކަތް ކުރިއެވެ. އެންމެ ހިމަނާރުން، ނެތް ހިތްވަރުވެސް ނެރެގެން މަސައްކަތްކުރިއެވެ. އަހަރުމެންވީ އެކަން ބަލައިގަންނާށެވެ. ހަމައެކަނި ލިބުނު ނަތީޖާ ފާހަކޮށް، އެކަމުން ކުއްޖާގެ ޤާބިލިއްޔަތު މިންކުރުމުގެ ބަދަލުގައި، ކުއްޖާ ކުރި މަސައްކަތް ބަލައިގަންނަކަން އެކުދިންނަށް އިޙްސާސް ކޮށްދޭންވީއެވެ. ނުހަނު ހިތްވަރާއެކު ކުރި މަސައްކަތް ތިމަންނަމެން ދަންނަކަން، ކުއްޖާއަށް ބުނެދޭންވީއެވެ. އެކަންވެސް ފާހަގަކުރަންވީއެވެ. ދިރިއުޅުމުގައި ކުރިޔަށް ދިއުމަށް އިތުރު ހިތްވަރެއް އޭރުން ލިބޭނެއެވެ. މިލިބޭ ނަތީޖާއަކުން އަދި ދިރިއުޅުމުގައި ސިއްކަ ޖެހުނީއެއް ނޫނެވެ. މުސްތަޤުބަލަށްޓަކައި ހިތްވަރާއެކު މަސައްކަތްކުރުމުގެ ޢަޒުމް ވަރުގަދަވާނީ، ކުއްޖާ ކުރާ މަސައްކަތްތައްވެސް ފާހަގަކޮށް، ބަލައިގަންނަ ނަމައެވެ.