ދަރިފުޅު އެންމެ ތުއްތުއިރު ދަރިފުޅުގެ ގާތުގައި ބުނެވެއެވެ. ފިރިހެން ކުދިންނެއް ނުރޯނެއެވެ. ފިރިހެން ކުދިން ވަރަށް ހިތްވަރުގަދަވާނެއެވެ. 'ސްޓްރޯންގ' ވާނެއެވެ. އެންމެ ޅަފަތުގައިވެސް މިފަދައިން ބުނެދޭން ފެށުމުން، ރޮވިއްޖެނަމަ ހަޤީޤީ މާނައިގައި ފިރިހެނުންނަށް ނުވާނެކަމަށް ކުދިންނަށް ވިސްނެން ފަށައެވެ. ރޮވުނިއްޔާ ހިތްވަރުގަދަ މީހަކަށް ނުވާނެކަމަށް ޤަބޫލުކުރަން ފަށައެވެ. ޒަމާނުއްސުރެ އެއްޖީލުން އަނެއް ޖީލަށް ފޯރުކުރަމުން އަންނަ މި ވިސްނުމުން އުފަންކުރަނީ އިޙްސާސްތައް އެތެރޭގައި ހިފަހައްޓާ ޒުވާނުންނެވެ. ޖަޒުބާތުތައް ހިތުގައި ފޮރުވައިގެން އުޅުމަށް އާދަވާން މަޖުބޫރުވެފައިވާ ފިރިހެނުންނެވެ. ކިތަންމެ ހިތްދަތިވިޔަސް އަދި ދެރަވިޔަސް ކަރުނަތައް ލޮލު ތެރެއަށް ހިންދާލާ ފިރިހެން ކުދިންނެވެ.
ހުރިހާ ކަމެއްގެ ތެރެއިން އަހަރުމެން ހަނދާން ނެތިފައި މިވަނީ ފިރިހެނުންނަކީވެސް އިންސާނުންކަމެވެ. އެމީހުންގެ ވެސް ހިތެއް އޮވެއެވެ. އެ ހިތުގައި އިޙްސާސްތަކާއި ކެކުޅުންތައް ވެއެވެ. އެ ހަށިގަނޑުގައިވެސް ހިއްސުތައް މަސައްކަތް ކުރެއެވެ. ނުރޮއެ، ކަރުނައެއް ނާޅާ އުޅެން އެއީ ފުރާނަނެތް ބުދުތަކެއް ނޫނެވެ. ދުވަހަކު ކޮޅުން ރޯލިޔަސް އެދެން 'އަންހެން' ވީއެވެ. ނޫނީ ރަނޑުވީއެވެ. ވަރަށް 'ފީ' މީހަކަށް ވީއެވެ. މިއީ މުޖްތަމަޢު މި ކަންތައް ސިފަކުރާ ގޮތްތަކެވެ. ނަމަވެސް ނޭނގެނީ މިކަމުގެ ސަބަބުން ފިރިހެނުންނަށް ކުރާނެ އަސަރާއި ވާނެ ގޮތްތަކެވެ.
އިޙްސާސްތައް ހިއްސާކުރުމާއި ރޮއުމަކީ ފިރިހެންވަންތަކަމެއް ނޫންކަމަށް ވިސްނި، އަބަދުވެ އެންމެ ހިތްވަރުގަދަ މީހާ ގޮތުގައި ހުންނަން މަސައްކަތް ކުރެވެއެވެ. އިޙްސާސްތައް އެތެރޭގައި ހިފަހައްޓާފައި ބެހެއްޓުމުން މީހާގެ ބޯ ހާސްވެ، ގޮތް ހުސްވެއެވެ. މީހެއް ގާތުގައި ބުނެލައިން އުޅުމަށް ވުރެ، މުޖުތަމަޢުގެ ނަޒަރުގައި 'ފިރިހެނެއް' ގެ މުރާދަށް 'ފިޓު' ވުން މާރަނގަޅުކަމަށް ދެކެވެއެވެ. ނަފްސާނީ ބަލިމަޑުކަމެއްގައި އުޅުނަސް މީހެއްގެ ފަރާތުން އެހީއަކަށް އެދެން ފަސްޖެހެއެވެ.
އެގޮތުން، އެމެރިކާ ގައި ހެދުނު ދިރާސާއަކުން ދައްކާ ގޮތުގައި، 2022ވަނަ އަހަރު އެ ޤައުމުގައި އަމިއްލަޔަށް މަރުވި ފިރިހެނުންގެ އަދަދު، އަމިއްލަޔަށް މަރުވި އަންހެނުންނަށް ވުރެ 4ގުނަ އިތުރެވެ. އަމިއްލަ ޙާލަތު ބަޔާންކުރަން ފިރިހެނުން ލަދުގަނެއެވެ. އަމިއްލަ އިޙްސާސްތަކާއި ޙާލަތް ބަޔާންކުރަން ނުކުޅެދެއެވެ. ވާގޮތް މީހަކަށް ބުނެދޭން ނޭނގޭއިރު، ކުރެވެނީ ކޮންކަހަލަ އިޙްސާސްއެއް ކަމެއްވެސް، އެހެން އެވަނީ ކީއްވެ، ކިހިނެއްކަން، އަމިއްލަ މީހާއަށްވެސް ދެނެގަންނަން އުނދަގޫވެއެވެ.
މިކަން މިހާރު ހުއްޓަން ވެއްޖެއެވެ. ރުއިމާއި، އިޙްސާސްތައް ހިއްސާކުރުމަކީ ފިރިހެނުންވެސް ކުރުން 'ނޯމަލް' ކަމެއްކަން ދަންނަން ވެއްޖެއެވެ. އެއީވެސް އިންސާނުންކަން ޤަބޫލުކުރަން ވެއްޖެއެވެ. އެމީހުންގެ އިޙްސާސްތަކަށް ޤަދަރުކޮށް، އަޅާނުލާ ދޫކޮށްލެވިފައިވާ ފިރިހެނުންގެ ނަފުސާނީ ދުޅަޙެޔޮކަމަށްވެސް އަހައްމިއްޔަތުކަން ދޭންޖެހެއެވެ. ރުއިމަކީ ބަލިކަށިވުމެއް ނޫންކަން އިޙްސާސް ކޮށްދޭންޖެހެއެވެ. އެކަންކަމަށް ނަޒަރު ހިންގާ، އިޙްސާސްތަށް ކަފުންކުރުމުގެ ބަދަލުގައި، ހިއްސާކުރުމަށް ބާރުއަޅަންޖެހެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން