ނަމާދު އޭގެ ވަގުތުގައި އަދާކުރަން ބޭނުންވާ ނަމަވެސް އެކަމަށް ފަރުވާ ކުޑަކުރެވޭ ފަހަރުތައް އާދެއެވެ. އެންމެ ފަހުވަގުތުގައި ނަމާދުތައް ކުރަން ބެހެއްޓެއެވެ. އެކަން އިސްލާޙުކޮށް، އެކަން ރަނގަޅު ކުރުމަށް އެޅިދާނެ ފިޔަވަޅުތަކާ މެދުގައި ވިސްނާ ފިކުރު ކުރުމުންވެސް ދޭހަކޮށްދެނީ މީހާގެ ހިތުގައި ނަމާދަށާއި އިސްލާމްދީނަށް އޮންނަ ލޯތްބެވެ. އެއީ އެ ހިތުގައި އީމާންކަމުގެ ވިންދު ޖަހާކަމުގެ ނިޝާނެކެވެ. ނަމާދުތައް އޭގެ ވަގުތުގައި އަދާކުރުމަށްޓަކައި ކުރެވިދާނެ ބައެއް ކަންތައްތައް ތިރީގައި ހިމަނާލާނަމެވެ.
ނިޔަތް ގަތުން
ކޮންމެ ކަމެއްވެސް ބިނާވާނީ ނިޔަތުގެ މައްޗަށޭ ބުނާ އަޑު ވަރަށް ގިނައިން އިވެއެވެ. އެބީދައިން، ނަމާދު ވަގުތު ވަނުމުން، ހަމަ އެ ވަގުތުގައި ނަމާދު ޤާއިމްކުރަން ބޭނުންވާ ކަމަށް ހިތު ނިޔަތް ގަތުމުން އެކަން ކުރުމަށް އިތުރަށް ހިތްވަރު ލިބޭނެއެވެ.
އެލާމްކުރުން
ނަމާދަށް ބަންގި ގޮވުމުގެ 5 މިނެޓް ނުވަތަ 10 މިނެޓްގެ ކުރިޔަށް އެލާމެއް ކޮށްފައި ބޭންދިދާނެއެވެ. ނަމާދު ވަގުތު ކައިރިވީކަން އަމިއްލަ ނަފުސަށް ހަނދާންކޮށްދީ، ހިތާއި ސިކުނޑިން، ނަމާދަށް އެރުމަށް ތައްޔާރު ވުމަށް މިއީ ވަރަށް އެދެވިގެންވާ ކަމެކެވެ.
ބަންގި ނިމުމުގެ ކުރިން ނަމާދަށް ތައްޔާރުވުން
ނަމާދަށް ބަންގި ގޮވަން ފެށުމުގެ ކުރިޔަށް ބަހައްޓާފައިވާ އެލާމަށްފަހު، ބަންގި ގޮވާ ނިމެންވާއިރަށް ފާޚާނާއަށް ވަދެ، ވުޟޫކޮށްގެން ނަމާދަށް ތައްޔާރު ވެވޭނެއެވެ. ފިރިހެނުންނަމަ ގައިގަ ހުވަނދުލާ، މިސްކިތަށް ދާން ތައްޔާރުވާންވީއެވެ. އަންހެނުންނަމަ ވުޟޫކޮށްގެން، ޒީނަތްތެރިވެލައިން ނަމާދު ދޮޅިއަޅާ، މުސައްލަމަތީ އިނދެ ބަންގި ނިމެންދެން އިންތިޒާރު ކުރެވޭނެއެވެ. އޭރުން ބަންގިގޮވާ ނިމުމުން، ނަމާދަށް ހަށަމްބަނުމަށް ގިނައިރުތަކެއް ނުނަގާނެއެވެ.
މީހާގެ ސަމާލުކަން ދަމައިގަންނަ ކަންތައްތަކުންނާއި ތަކެތިން ދުރުވުން
ފޯނުފަދަ އަހަރުމެންގެ ވަގުތުތައް ބޭކާރު ކޮށްލާ، އެ އެއްޗެއްގައި ގިނަ ވަގުތު ހޭދަ ކުރުމަށް އާދަވެފައިވާ ތަކެތިން ދުރުވި މިންވަރަކަށް، ނަމާދަށް ސަމާލުކަންދެވޭ މިންވަރު އިތުރު ކުރެވޭނެއެވެ. ބަންގީގެ ކުރިންވާ އެލާމު އަޑުއިވޭ ހިސާބުން، ފޯނު ނުވަތަ އެހެނިހެން ވަސީލަތްތަކާއި މަސައްކަތްތަކުން ދުރުވުން ބުއްދިވެރިއެވެ.
ނަމާދަކީ މާތް ﷲއާ ދެމެދު އޮންނަ ބައްދަލުވުމެއްކަން ހަނދާންކުރުން
ކޮންމެ ދުވަހެއްގެ ފަރުޟު 5 ނަމާދަކީ މާތް ﷲއާ އަޅާއާ މެދުގައި އޮންނަ ބައްދަލުވުމެއްކަން ނަފުސަށް ހަނދާންކޮށްދޭން ވާނެއެވެ. ނަމާދަކީ އަހަރުމެންގެ ވެރި ރަސްކަލާނގެއާ އަހަރުމެން ކައިރިކޮށްދީ، އެގުޅުން ވަރުގަދަ ކުރުމަށް އޮންނަ ޒަރީޢާއެއްކަން ވަޒަންކުރެވުމުން ނަމާދަށް ފަރުވާތެރިވެވޭނެއެވެ.
މިއީ ނަމާދު އޭގެ ވަގުތުގައި އަދާކުރުމަށް ކުރެވިދާނެ ބައެއް ކަންތައްތަކެވެ.
ލިޔުންކޮޅެއްގައި މިފަދައިން ވާތީ ދުށީމެވެ. 'ތިބާގެ ދުޢާތައް އިޖާބަކުރެއްވުމާއި، ރިޒުޤުފަދަ ކަންތައްތައް ލަސްވާނަމަ، ނަމާދާމެދު ތިބާ ޢަމަލުކުރަނީ ކިހިނެއްތޯ ބަލާށެވެ. ނަމާދަށް ފަރުވާކުޑަކުރެވޭނަމަ، އެހެން ކަންތައްތައް އަހަރުމެން ބޭނުންހާ އަވަހަކަށް ވުމަށް އެދެވޭނެ ހެއްޔެވެ؟ ފުރަތަމަ ނަމާދެވެ. ނަމާދު ވަގުތުގައި އަދާކުރުމަށް ރައްކާތެރިވެ، އެކަމަށް މަސައްކަތް ކުރަންވާނެއެވެ. ބޭނުންވަނީ ކުޑަ ހިތްވަރަކާއި ވަރުގަދަ ޢަޒުމެކެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން