އޯލެވެލް ނިންމުމަށްފަހު މަތީ ތަޢުލީމު ހާސިލްކުރުމާއި އޭލެވެލް ކިޔެވުމާ ދެމެދުން ގޮތެއް ނިންމަން ގިނަ ކުދިންނަށް އުނދަގޫވެއެވެ. ކޮންމެ ފައިސާ ފޮއްޗެއްގައިވެސް ދެފުއް އޮންނަ ބީދައިން، އޭލެވެލް ކިޔެވުމުން ލިބޭނެ ފައިދާތަކާއި ގެއްލުންތައް އޭގެ ޒާތުގައި ހުންނާނެކަމީ ޝައްކެއް އޮތްކަމެއް ނޫނެވެ.

އޭލެވެލް ކިޔެވުމުން ލިބޭނެ އެންމެ ބޮޑު އެއް ފައިދާއަކީ މަތީ ތަޢުލީމަށް ދާން ފަސޭހަވުމެވެ. އޭލެވެލްގެ ސެޓްފިކެޓަކީ ދުނިޔޭގެ ފެންވަރުގައި ކޮންމެ ޔުނިވަރސިޓީއަކުންވެސް ބަލައިގަންނަ ސެޓްފިކެޓެކެވެ. ޝަރުތަކަށް އޮންނާނީ ކިޔަވާ މާއްދާތަކުން ރަނގަޅު ނަތީޖާއެއް ނެރުމެވެ. މީގެއިތުރުން، މަތީ ތަޢުލީމުގެ ދަތުރުގައި އަވަހަށް ޑިގްރީއަށް ފެށުމުގެ ޔަޤީންކަންވެސް އޭލެވެލް ކިޔަވާ ކުދިންނަށް އޮވެއެވެ. ހަމައެހެންމެ، އޭލެވެލް އިން ހޯދާ ނަތީޖާ ރަނގަޅުވެއްޖެ ނަމަ، އޭލެވެލްގެ ސެޓްފިކެޓަކީ ވަޒީފާގެ މައިދާނަށްވެސް ނުހަނު މުހިންމު ހަތިޔާރެކެވެ. ބޭނުންތެރި ޢިލްމެއް ހުރި ނުވަތަ ކިޔަވައިގެން ހުރި މީހެއްކަން ސާބިތުކޮށްދޭނެއެވެ. އަމިއްލަ ފައިމައްޗަށް ތެދުވެވޭ، އަމިއްލަ ނިންމުންތައް ނިންމުމުގެ ޤާބިލުކަން ލިބިފައިވާ، އަމިއްލަ މަސައްކަތްތައް ކުރުމަށް އަމިއްލައަށް ބާރުއަޅާނެ ހުނަރު، ދަރިވަރުގެ ކިބައިގައި ހުންނާނެކަން އޭލެވެލްގެ ސަނަދުތަކުން، ވަޒީފާގެ ފުރުސަތުދޭ މީހާއަށް އަންގައިދޭނެއެވެ.

ފައިދާތަކަށް ނަޒަރު ހިންގާއިރު، މިކަމުގެ ދެވަނަ ފުއްވެސް ބަލައިލަން ފެނެއެވެ. އޭލެވެލް ކިޔަވަން ވީތޯ ނުވަތަ ނޫންތޯ ކަނޑައަޅަން ގިނަ ކުދިންނަށް އުނދަގޫވަނީ، ކުރިޔަށްދާނެ ދާއިރާއެއް ކަނޑައަޅާފައި ނުވާތީއެވެ. ނަތީޖާއެއްގެ ގޮތުން، އޭލެވެލް ކިޔެވެން އޮތީތީ ގިނަކުދިން އޭލެވެލް ކިޔަވަނީއެވެ. ނުވަތަ މަންމަމެން ބުނީތީ އެކަން ކުރަނީއެވެ. އޮތް ސްޓްރީމެއް އޮތް ގޮތަކަށް ކިޔަވާ ނިންމާލާއިރު، އާޚިރުގައި ކުރިޔަށްދާން ބޭނުންވާ ދާއިރާއަކާ، އޭލެވެލްގައި ކިޔެވި އެއްޗަކާ ދިމަލެއް ނުވެއެވެ. ނަރސިން ހަދަން ބަލާއިރު އޭލެވެލްގައި ކިޔެވިފައި އޮންނަނީ ބިޒްނަސް ސްޓްރީމެވެ. ސިއްޙީ ދާއިރާއަށް ނުކުންނަށް ބަލާއިރު ކިޔެވިފައި މިއޮތީ ބީ-ޓެކް ސްޓްރީމެވެ. ކިޔެވި އެއްޗަކާއި، ފަހުން އިޚްތިޔާރު ކުރާ ދާއިރާއާ މުޅިން ނުބައްދަލުމުން، އޭލެވެލްގައި ހޭދަކުރެވިފައި އޮންނަނީ ބޭކާރު 2 އަހަރު ނޫން ހެއްޔެވެ؟

މީގެއިތުރުން، އޭލެވެލްވެސް މައިގަނޑު ގޮތެއްގައި ބިނާވެފައި އޮންނަނީ ޓާރމް ނިމޭއިރު ކޮންމެ މާއްދާއަކުން ނަގާ އިމްތިޙާންތަކުގެ މައްޗަށެވެ. މީގެ ސަބަބުން، ކުދިންނާއި މުދައްރިސުންގެ މައިގަނޑު ލަނޑުދަނޑިއަށް ވެފައި އޮންނަނީ ރަނގަޅު ނަތީޖާއެއް ނެރުމެވެ. ލެޔާއި ދައު އޮހޮރަނީ ރިޒަލްޓް ރަނގަޅު ކުރުމަށެވެ. ކުދިންވެސް ބަލަނީ ތަކުރާރުކޮށް އެއްޗެހި ކިޔައިގެން، ހިތުދަސްކުރުމަށްފަހު ގޮސް އިމްތިޙާނު ހެދުމަށެވެ. ވިސްނައިން، ވާނުވާ އޮޅުން ފިލުވައިން ކަންކަން ކުރުމުގެ ގޮތް ގެންގުޅެނީ ނިސްބަތުން މަދު ކުއްޖެކެވެ. ގިނަ ކުދިން ކިޔަވަނީވެސް އިމްތިޙާނު ހެދުމަށް ކަމަށްވާއިރު، ދިރިއުޅުމަށް ބޭނުންވާ ތަޖުރިބާއާއި ހުނަރުތައް ކުދިންގެ ކިބައިގައި އަށަގެންނެވުން ފަސޭހަކަމަށް ނުވެއެވެ.

އޭލެވެލްއިން ފައިދާތަކެއްވާއިރު، ގެއްލުންތަކެއްވެސް ވެއެވެ. އޭލެވެލް ކިޔެވުމަކީ ދެމިޔަލީ ކަނޑިއެކޭ ބުނެވެނީވެސް މިހެންވެއެވެ.