އެހެން މާއްދާއަކުން ހަވާލުކުރެވޭ ފިލާވަޅަކަށް ރުހުމުގެ ލޮލުން އަހަރެން ބަލައިނުލިޔަސް، އެކައުންޓުން ފިލާވަޅެއް ދީފިނަމަ ޖާނާއި މާލުން ޤުރުބާންވެގެންވެސް އެ ނިންމޭތޯ އަހަރެން ބަލަމެވެ. އެކައުންޓު އަހަރެން ކިޔަވާ ހިތްވެއެވެ. އެއިން ކާއްޓެއް ކުރޮޅިއެއް، ވާއެއް ނުވާއެއް ނޭނގުމަކީ އަދި އެހެން ކަމެކެވެ.

އެއީވެސް އެކައުންޓުން ފިލާވަޅެއް ދެވުނު ދުވަހެކެވެ. ގެއަށް އައިގޮތަށް އަހަރެން އުޅުނީ އެކަމެއްގައެވެ. ހަވާލުކޮށްފައި މިވަނީ ބެލެންސް ޝީޓަކޯލައެވެ. ނިމޭއިރަށް ދެފަޅިއަށް އަންނަ އަދަދު އެއްވަރުވާން ޖެހެއެވެ. އަހަރެން ދެވަރުން އެއްވަރުވީއިރުވެސް އެ ބުނާ އަދަދެއް އެއްވަރެއް ނުވިއެވެ. ގޫގުލްއާއި ޔޫޓިއުބު ކައިރި އަހާލައިން، އަހަރެން ކިރިޔާ ރަތަށް ނާރާ ހުއްޓާ މިއޮއް ބެލެންސްވީއެވެ. ދެން ފަހެ ހައްޓަކު ހެޔެއް ނެތެވެ. ވީ އުފަލުން ފުޓުބޯޅަ ދަނޑަށް ގޮސް ހުރިހާ ކުދިން ކައިރީ ފޮނި ކަނޑާލީމެވެ. އެވީ އުފަލުގައި، ގޯލު ކީޕަރަށް ހުރެމެ، އިދިކޮޅު ޓީމަށް ގޯލު ޖަހަން ގަސްތުގައި ފުރުސަތު ދިނީ އަހަރެންގެ ފަރާތުން ޑިސްކައުންޓެއް ގޮތުގައެވެ. ޓީމު ކުދިން ހެއްދެވި ނުހެއްދެވިއެއް ގޮވީމާވެސް ކަހަރުވަކެކޭވެސް ހިތަށް ނާރައެވެ.

ޖެހިގެން އައި ދުވަހު ސުކޫލަށް ގޮހެވެ. އެކައުންޓު ސުވާލު ބެލެންސްވިކަން ނުދަންނަ ކުއްޖެއް މިހާރު ކުލާހުގައި ކީއްކުރަން، މުޅި ސުކޫލުގައިވެސް ނެތެވެ. އެހެން ކަމުން، އެކައުންޓު ހެދި ހިސާބު ދައްކާލަން  ކުލާސް ކުއްޖެއް އެދުނެވެ. އަހަރެންގެ ދެލޯ ބޮޑުވިއެވެ. އަހަރެން ވިސްނައިން ހުރީ އެކައުންޓު މުދައްރިސް އައުމުން، އެންމެ ފުރަތަމަވެސް އަހަރެން ފިލާވަޅު ނިންމި ވާހަކަ ބުނުމަށެވެ. މިވީ ގޮތާމެދު އަހަރެންނަށް ރޮއެވޭ ގޮތްވިއެވެ. އެކައުންޓު ގަޑި ޖެހެން އޭރު އިނީ އެންމެ 10 މިނެޓެވެ. އަވަސް އަވަހަށް ފޮތް ބޮނޑި ނަގާފައި، އަތު ޖެހުނު ގަލަމަކުން ފޮތުގައި ލިޔަން ފެށީމެވެ. ގަނަތެޅިގެން އެކަން ނިންމާލެވުނީ ގަޑި ޖެހެން 3 މިނެޓަށް އިންދައެވެ. ފެންކަޅިވެފައި އިން ދެލޮލުގެ ފެންކޮޅު ހިނދި، ކިނބުލެއްހެން އެއް ކަނަކަށް ހިނިތުންވެވުނެވެ. އެކައުންޓާ ބެހޭގޮތުން ސުވާލު ކުރި ކުއްޖާއަށް ދައްކާލާފައި ބުނީމެވެ. ހިސާބު ފޮތުގައި އެކައުންޓު ފިލާވަޅު މިއޮތީ ހަދާފައެވެ. ކުރިންވެސް އެކަން އެނގުން ނަމަ ދެ މަސައްކަތް ކުރަން ނުޖެހުނީހެވެ. 

ކައިރީ އިން ކުއްޖާ ކަޅި ޖަހާ ނުލާ ބަލަނީއެވެ. އިރުކޮޅަކުން ނިއްކުރި މަތީ އަތް އަޅާފައި ބުނެފިއެވެ. 'އަހަރެން ބުނީ އެކައުންޓު ފިލާވަޅު ހަދާފައި އޮތީ ކޮށް ހިސާބަކަށްތޯ ބަލައިލަން ދައްކާށޭ. ހިސާބު ފޮތުގައި އަލުން ބަލުން ތިޔަ މަސައްކަތް ކުރާށެކޭ ނޫނޭ.' އަޅެފަހެ މީހަކު މޮޔައެއް ނުވާނެ ހެއްޔެވެ؟ އަހަރެންނަށް ވެފައި ހުރި އުފަލަކުން، އޭނާ ކީނުކީ އެއްޗެއް ސާފުވެސް ނުވީއެވެ. އެކައުންޓު މަސައްކަތް ކުރަން ޖެހެނީ ހިސާބު ފޮތުގައި ކަމަށް ހީކޮށް، ލޮލުން ފެން ބާލަމުން މިކުރެވުނީ ބޭކާރު މަސައްކަތެކެވެ. ހޭބަލިވެފައި ހުންނަންޏާވެސް ވާނީ މިކަހަލަ ގޮތެކެވެ.