ލޯބީގެ މަލަމަތީގައި ހިތްތައް ގުޅޭ ހިނދު، އެ ފުރާނަތަކުގެ ވެރިންނަށް ހީވަނީ އެއީ ދުނިޔޭގެ އެންމެ ފުރިހަމަ ގުޅުން ކަމުގައެވެ. އެ ދެ މީހުންގެ ދުލުން އޮހޮރެނީ ފޮނި ބަސްތަކެކެވެ. ހިތުގެ އަޑިން އިވެނީ ލޯތްބާއި އޯގާތެރިކަމުގެ އަޑުތަކެކެވެ. މުސްތަޤުބަލާ މެދު ދެކެވޭ ވާހަކަތަކަކީ ފޮނި ހުވަފެންތަކެކެވެ. މި ހުރިހާ ކަމެއްގެ ނަތީޖާއަކަށް ވަނީ ކައިވެނީގެ ގުޅުމުން ގުޅިލާމެހިވުމެވެ. މިއިން ކޮންމެ ބަހަކުން ރަމްޒުކޮށްދެނީ އެ ވެވޭ ލޯބީގެ ވަރުގަދަ ކަމެވެ. އޭގެ އެއް އިބާރާތަކީ، "ފައިވާނު ވަދު އެ ކެނޑުނަސް، ނުކެނޑޭނެ މިގުޅުމެއް!" މިއެވެ.
ނަމަވެސް، ކައިވެނީގެ ދުވަހު އަރާ ފައިވާނުގެ ވަދުގައި ފައި ނުޖެހި އުޅެނިކޮށް، އެ ދެ މީހުންގެ ދެމެދުގައި އޮތް ގުޅުމަށް ބުރޫ އަރައެވެ. ދުވަސްކޮޅެއް ނުވެ ކައިވެނިތައް ރޫޅި ދެއެވެ. މިއީ ހިތި ނަމަވެސް ގަބޫލުކުރަން ޖެހޭ ޙަޤީޤަތެކެވެ. އަދި ހަމައެހެންމެ، މިއީ ފުންކޮށް ވިސްނަންޖެހޭ ކަމެކެވެ.
ލޯބީގެ ފޮނި ޝުޢޫރުތަކާއި، ރީތި ބަސްތަކާއި، މީރު ހުވަފެންތައް އެކަނި ފުދޭތޯއެވެ؟ ކައިވެނީގެ ގުޅުމަކީ ހަމައެކަނި އިޝްގީ ގުޅުމެއް ނޫނެވެ. އެއީ ދެ މީހުންގެ ދެމެދުގައި އޮންނަ އިޖްތިމާޢީ، އިޤްތިޞާދީ އަދި ރޫޙާނީ ގުޅުމެކެވެ. މި ގުޅުން ދެމެހެއްޓުމަށް ބޭނުންވަނީ ކެތްތެރިކަމާއި، އެކަކު އަނެކަކަށް ޓަކައި ޤުރުބާންވުމާއި، އޯގާތެރިކަމާއި، އަދި އެއްބައިވަންތަކަމެވެ. ފޮނި ވާހަކަ ތަކާއި ސަޅިބައިސާތަކެއް ނޫނެވެ.
ކައިވެނީގެ ކުރިން ދައްކާ ފޮނި ވާހަކަތަކަކީ ހަމައެކަނި ތަޞައްވުރުތަކެކެވެ. ނަމަވެސް ކައިވެނި ކުރުމަށްފަހު ދިމާވާ ޙަޤީޤަތްތަކަކީ ދުލުކުރިން ބުނެލާ ލަފުޒަކުން ހައްލުވާހާ ފަސޭހަ ކަންކަމެއް ނޫނެވެ. ދިރިއުޅުމުގެ ޒިންމާތަކާއި، މާލީ ގޮންޖެހުންތަކާއި، އާއިލީ މައްސަލަތަކާ ކުރިމަތިލާން ޖެހެއެވެ. މި ހުރިހާ ކަމަކާ ކުރިމަތިލުމުގައި ދެ މީހުން އެއްބައިވެ، އެކަކު އަނެކަކަށް ބާރުލިބިދޭން ޖެހެއެވެ.
އަޅުގަނޑުމެން ވިސްނަންވީ ކައިވެންޏަކީ ހަމައެކަނި ރަސްމިއްޔާތެއް ނޫން ކަމެވެ. ހަފްލާއެއް ނޫންކަމެވެ. އެއީ ދެ މީހުންގެ ދެމެދުގައި އޮންނަ ޢަހުދެކެވެ. އެ ޢަހުދުގެ މައްޗަށް ބިނާވެފައި އޮންނަ ގުޅުމެކެވެ. މި ގުޅުން ވަރުގަދަ ކުރުމަށް ޓަކައި ދެ މީހުންވެސް މަސައްކަތް ކުރަން ޖެހެއެވެ. އޭރުން، ފައިވާނުގެ ވަދު ކެނޑުނު ނަމަވެސް، އެ ދެ މީހުންގެ ދެމެދުގައި އޮންނަ ގުޅުމެއް ނުކެނޑޭނެއެވެ. އަނގައިން ކަނޑާ މިފަދަ ފޮނިތަކުގައި ރާހަތެއް ހުންނާނީ ހަގީގަތާ ކުރިމަތިލާ އާޖުފާޖުދަނެގެން ކެތްތެރިކަމާއި ހިކުމަތްތެރިކަމާއެކު މަސައްކަތްކޮށްގެންނެވެ.
ކައިވެންޏަކީ ކުޅިވަރެއް ނޫނެވެ. އެއީ ޒިންމާދާރު ކަމެކެވެ. އެހެންކަމުން، ކައިވެނި ކުރުމުގެ ކުރިން ރަނގަޅަށް ވިސްނައި، ތައްޔާރުވާން ޖެހެއެވެ. ދައްކާ ފޮނި ވާހަކަ އަކަށް، ކަނޑާހާ ސަޅިބައިސާއަކަށް ތިބާގެ ހިތް ދޫކޮށްނުލާށެވެ. ހަގީގަތަށް އަބަދުވެސް ތަބާވާށެވެ. އޭރުން ފައިވާނު ވަދު ނުކެނޑެނީސް ކެނޑޭ ގުޅުންތައް މަދުވެ، ފައިވާނު ވަދު ކެނޑުނަސް ނުކެނޑޭނެފަދަ ގުޅުންތަކެއް އުފެދި ފައްކާ ކުރެވޭނެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން