ހިއްސުތަކަކީ، މަތިވެރި އިލާހީ ނިޢުމަތެކެވެ.

މާތްﷲ އިންސާނުންނަށް ހިއްސުތަކުގެ ނިޢުމަތް ދެއްވާފައިވަނީ ވަރަށް މަތިވެރި ހިކުމަތަކަށްޓަކައިކަން، އެކަމާމެދު ކުޑަކޮށްވެސް ވިސްނާލައިފި މީހަކަށް އެނގޭނެ އެވެ. ހެޔޮނުބައި ވަކިކުރުމުގެ ބާރު ކަމުގައިވާ ބުއްދީގެ ނިޢުމަތް އެކަލާނގެވަނީ، އިންސާނުންނަށް ދެއްވާފައެވެ. ކަންކަމާމެދު ވިސްނޭނީ، އަދި ހެޔޮނުބައި ވަކިކުރެވޭނީ، އެކިކަންކަމާ ބެހޭ ފުރިހަމަ މަޢުލޫމާތު ލިބިގެންނެވެ. ހިއްސުތަކަކީ، އިންސާނުންގެ ސިކުނޑިއަށް މަޢުލޫމާތު ގެނެސްދޭ ވަސީލަތްތަކެކެވެ.

ފެންނަ ކޮންމެ އެއްޗަކީ، އަދި އިވޭ ކޮންމެ އަޑަކީ، އެއިން ކޮންމެވެސް އެއްޗެއް އެނގޭ، ނުވަތަ ކޮންމެވެސް މަޢުލޫމާތެއް ލިބޭ އެއްޗެކެވެ. ފެނުމާއި އިވުން ފިޔަވައި ދެން ހުރި ހިއްސުތަކަކީވެސް، ކޮންމެވެސް އެނގުންތަކެއް ސިކުނޑިއަށް ގެންގޮސްދޭ މެދުވެރިއެކެވެ. ދީނުގައި އަންގަވާފައިވާ އެންގެވުންތައްވެސް، އަދި އެ ނޫން ކަންތައްތައްވެސް، އިންސާނާގެ ސިކުނޑިއާ ހަމައަށް ވާސިލުވާނީ، އޭނާގެ ހިއްސުތަކުގެ ތެރެއިންލާފައެވެ. އެހެންކަމުން، އެކިކަން ކަމާ ބެހޭގޮތުން ހަރުދަނާ ވިސްނުމެއް ގެންގުޅުމުގައި އެންމެ މުހިންމު ބައެއް އަދާކުރާ ކަމަކީ، މި މަތިވެރި ނިޢުމަތުގެ ބޭނުން ފުރިހަމައަށް ހިފުން ކަމަށް ބުނެވިދާނެ އެވެ.

އިސްލާމްދީން ފާޅުކުރެއްވުމުގެ ކުރިން އިސްވެދިޔަ ޤައުމުތަކުގެ އަހުލުވެރިން ކޮށްފައިވާ ނުބައި އަމަލުތަކާއި، އެކަންކަމުގެ ނަތީޖާ އެމީހުން ދެކެފައިވާ ގޮތަށް އިޝާރަތް ކުރައްވައި، މާތްﷲ ވަހީކުރެއްވިއެވެ. " إِنَّ فِى ذَٰلِكَ لَذِكْرَىٰ لِمَن كَانَ لَهُۥ قَلْبٌ أَوْ أَلْقَى ٱلسَّمْعَ وَهُوَ شَهِيدٌۭ " (ގާފް: 37) މާނައީ: "ހަމަކަށަވަރުން ހިތެއްވާ މީހަކަށް، ނުވަތަ ހާޟިރުވެހުރެ ކަނުލައި އަހާ މީހަކަށް އެކަމުގައި ނަސޭހަތާއި އިބްރަތްވާކަން ކަށަވަރެވެ."

މި އާޔަތުން އެނގޭގޮތުގައި، ބޮޑެތި ހާދިސާތަކުން ލިބެންޖެހޭ ރޫހާނީ ފިލާވަޅުތަކާއި އިބްރަތްތައް ލިބިގަނެވޭނީ، ހަމައެކަނި ސަލާމަތް ބުއްދިއެއްހުރި، އަދި އެމީހަކަށް އިވޭ އިވުންތަކާމެދު ފުންކޮށް ވިސްނައިފި މީހަކަށެވެ. ޤުރުއާންގެ އިބާރާތުންނަމަ، އެކަމަކަށް ހެކިވާންޖެހޭ މީހަކުފަދައިން، ކަންކަމުގެ ހަޤީޤަތް ބަލައި ހޯދައިފި މީހަކަށެވެ. 

("ހިއްސުތަކަކީ، މަތިވެރި އިލާހީ ނިޢުމަތެކެވެ." – އަލްއުސްތާޛު މައުމޫން ޢަބްދުލް ގައްޔޫމް – ދީނުގެމަގު، އަހަރު 16، އަދަދު 20، ޞަފްހާ 1، 28 ޑިސެންބަރު 2001)