ދުނިޔޭގައި އެންމެ ގިނައިން ބޭނުންކުރާ މޭވާއަކީ އާފަލުކަން އެނގޭ ހެއްޔެވެ؟ އިނގިރޭސި ހަރު ބަސް "އޭން އެޕަލް އަ ޑޭ ކީޕްސް ދަ ޑޮކްޓާ އަވޭ" އަކީ އެއް ބައި ހާލަތްތަކުގައި ތެދެއް ކަމަށް ބައެއް ސިއްހީ މާހިރުން ގަބޫލު ކުރެ އެވެ. އާފަލަކީ ހުޅަނގުގެ ގައުމުތަކުގެ ފޮނި ކާތަކެތި ތައްޔާރުކުރުމުގައި އާންމުކޮށް ބޭނުންކުރާ މޭވާއެކެވެ. އާފަލު އާންމުކޮށް ބޭނުންކުރަނީ ޕައި، ކުކީސް، މަފިން، ޖޭމް، ސެލެޑް، އޯޓްމީލް، ނުވަތަ ސްމޫތީ ފަދަ ރެސިޕީތަކުގަ އެވެ. ހުޅަނގުގެ ގައުމުތަކުގައި އާފަލު އެހާ މަގްބޫލީ ސަބަބަކާއި ނުލާއެއް ނޫނެވެ. ރާއްޖޭގެ ބާޒާރުމަތީގައި ފަސޭހައިން ލިބެން ހުންނަ މި މޭވާއަކީ ދުވާލަކު އެއް ފަހަރު ނަމަވެސް ނުކައި ދޫކޮށްލާވަރު އެއްޗެއް ނޫނެވެ. އާފަލަކީ އޭގެއިން ގިނަ ފައިދާތަކެއް ލިއްބައިދޭ އެއްޗެއް ކަމަށް ގިނަ ދިރާސާތަކުން ދައްކައެވެ.
ބަރުދަން ލުއިވުމަށް އެހީތެރިވެދޭ!
އާފަލަކީ ކެންސަރާއި ހަކުރުބަލި އަދި ހިތުގެ ބަލިތައް ޖެހުމުގެ ފުރުސަތު ކުޑަކޮށްދޭ މޭވާއެއްކަން ބައެއް ސިއްހީ ރިޕޯޓްތަކުގައި ފާހަގަކޮށްފައި ވެއެވެ . ދިރާސާތަކުން ދައްކާ ގޮތުގައި އާފަލުގެ ސަބަބުން ބަރުދަން ލުއިކުރުމުގެ އިތުރުން ގޮހޮރުގެ ދުޅަހޮޔޮކަން ކަށަވަރުކޮށްދެއެވެ. ފެހި އާފަލުގައި ހިމެނޭ ޖޫހުން ބަނޑުގައި ހެދޭ ގޭހުގެ އުނދަގޫތަކުންވެސް ދުރުހެލިކޮށްދެއެވެ.
އާފަލުގައި ފައިބާއާއި ފެން ގިނައިން ހުރެ އެވެ. އެހެންކަމުން އާފަލު ބޭނުންކުރުމުން ފަސޭހައިން ބަނޑު ފުރެން މަގުފަހިކޮށްދެ އެވެ. މިއީ ޑައިޓް ކުރަން ބޭނުންކުރަން ރަނގަޅު މޭވާއެއްކަން އޭގެއިން ދޭހަ ވެއެވެ.
އެކި ބަލިތަކުން ދުރުހެލިކޮށްދޭ
އާފަލު ކެއުމުން ޓައިޕް 2 ހަކުރުބަލީގެ ފުރުސަތު ކުޑަވެދާނެ ކަމަށް ސިއްހީ މާހިރުން ލަފާކުރެ އެވެ. ދިރާސާތައް އެކުލަވާލާފައިވާ ގޮތުގައި އާފަލާއި ޕެއާސް ކެއުމަކީ ޓައިޕް 2 ހަކުރުބަލީގެ ނުރައްކާ 18 އިންސައްތައިން ދަށް ކޮށްދޭ ކަމެކެވެ. ހަފްތާއަކު އެންމެ ފަހަރަކު އާފަލު ކައިގެން ޓައިޕް 2 ހަކުރު ބަލީގެ ނުރައްކާ 3 އިންސައްތައިން ކުޑަކޮށްދެ އެވެ.
އާފަލު ކައިގެން ލިބޭ އިތުރު ފައިދާތަކަށް ބަލާލާއިރު، ނޭވާ ހިއްލުމާއި ސައިނަސްގެ ސަބަބުން މޭގައި އުފެދޭ ދަވަތައް ކޮންމެވެސް ވަރަކަށް ސާފުކޮށްދިނުމުގައި އާފަލުން އެހީތެރިވާ ކަމަށް އެއް ދިރާސާއިން ދައްކާފައި ވެއެވެ. އެހެން ނަމަވެސް، މިކަމަށް ބާރުދޭ އިތުރު ދިރާސާތައް ހަދަން ޖެހޭ ކަމަށް ރިޕޯޓްތައް ބުނެ އެވެ.
މީގެ އިތުރަށްވެސް، އާފަލުގައި ހިމެނޭ ފައިބާގެ ސަބަބުން ހަޖަމްކުރުމުގެ ނިޒާމަށް ލުއިފަސޭހަތަކެއް ލިބިގެން ދެއެވެ. ގަވާއިދުން އާފަލު ބޭނުންކުރާނަމަ ބަނޑުހަރުވުމުން ދުރުކޮށްދޭ ކަމަށް ސިއްހީ މާހިރުން ލަފާކުރެ އެވެ.
