އިސްލާމްދީނުގެ މަތިވެރިކަމާއި، މުސްލިމުންގެ ހިތްތަކުގައި ޤުރުއާނަށް އޮންނަ ލޯބި އަދި އިޙްތިރާމް އެއްވެސް މީހަކަށް ނޭނގޭނެއެވެ. ސްވެޑެންގައި ހިމާޔަތް ހޯދައިގެން އުޅޭ އިރާގުގެ ކާފިރު، ސަލްވާން މޮމިކާ އަކީ ޤުރުއާން އެންދުމުގައި މަޝްހޫރުކަން ހޯދާފައިވާ މީހެކެވެ. މީސްމީޑިޔާގައި އޭނާ ވަނީ އެތައް ފަހަރަކު ޤުރުއާން އަންދާ ވީޑިއޯ އާއްމުކޮށްފައެވެ.

އޭނާ ވަނީ އެތައް ފަހަރަކު ޤުރުއާން އަންދާލައި، އިސްލާމްދީނަށް ފުރައްސާރަކޮށް އަދި މުސްލިމުންގެ ޝިއާރުތަކަށް ހުތުރު ބަސްތައް ބުނެފައެވެ. މިކަމުގެ ސަބަބުން ދުނިޔޭގެ އެކި ކަންކޮޅުތަކުގައި ތިބި މުސްލިމުން މީނާއަށް ނަފްރަތުގެ ބަސްތައް ވަނީ އަމާޒުކޮށްފައެވެ.

ސްވެޑެންގައި ހިމާޔަތް ހޯދައިގެން އުޅޭ މޮމިކާ، އޭނާގެ ގޭގައި ހުއްޓާ ބަޑި ޖަހާ މަރާލާފައިވާކަމަށް ބޭރުގެ ރިޕޯޓުތައް ބުނެއެވެ. މަޝްހޫރު އަލް ޖަޒީރާ ނޫހުގައި ބުނެފައިވާ ގޮތުން އޭނާގެ ގަޔަށް ބަޑި ޖަހާފައިވަނީ ލައިވް ވީޑިއޯއެއްގައި އިންދައެވެ. އަދި މަރުވެގެން ވެއްޓޭތަންވެސް ފެންނަކަމަށް ވަނީ ރިޕޯޓުކޮށްފައެވެ. މީގެ އިތުރުން ޕޮލިހުން ގޮސް، ލައިވް ވީޑިއޯ ކަނޑާލާ މަންޒަރުވެސް ފެންނަކަމަށް އާއްމުންނާއި ހަވާލާދީ ރިޕޯޓުކޮށްފައި ވެއެވެ.

މިި ހަމަލާ ދީފައިވަނީ ސީދާ ކޮން ބައެއްކަން ނޭނގުނު ނަމަވެސް މި ހަމަލާގެ ތުހުމަތު، މުސްލިމުންނަށް ދަނީ ކުރަމުންނެވެ. އަޅުގަނޑުމެން މުސްލިމުންގެ ގޮތުގައި ކުރަންޖެހޭ ކަމަކީ، އިސްލާމްދީނުގެ މަތިވެރި އުސޫލުތަކާއި އަޚްލާޤު ދުނިޔެއަށް ދައްކައި، އިސްލާމްދީނަކީ ސުލްޙަވެރި އަދި ރަޙްމަތުގެ ދީނެއްކަން ސާބިތުކޮށްދިނުމެވެ. އަޅުގަނޑުމެން ދީނަށް ފުރައްސާރަކުރާ މީހުންނާ ދޭތެރޭ ޢަމަލުކުރަންވާނީ ޙިކުމަތްތެރިކަމާ އެކުގައެވެ. އަދި އެމީހުންނަށް އިސްލާމްދީނުގެ ރީތި ސިފަތައް ދައްކައި، ހެޔޮ ނަސޭހަތްދީ، އެމީހުންގެ ހިދާޔަތަށް ދުޢާކުރަންވާނެއެވެ.

މޮމިކާގެ މަރުގެ ޚަބަރުން ބައެއް މުސްލިމުން އުފާކުރަމުން ދިޔަ ނަމަވެސް، އަނެއްބަޔަކު ބުނަމުން ދަނީ މިއީ ކޮންމެ ބަޔަކު ކުރި ކަމެއް ނަމަވެސް، މިއީ މުސްލިމުން ބައިވެރިވެގެން ވާނެ ފަދަ ކަމެއް ނޫން ކަމަށެވެ. މުސްލިމުންގެ ހިތަށް އުނދަގޫ އެތައް ކަމެއް ކޮށް، އެތައް އަނިޔާއެއް ދިން ނަމަވެސް އެފަދަ ގޮތަކަށް ބަދަލު ހިފުމަކީ ކޮށްގެން ވާނޭ ކަމެއް ނޫން ކަމަށް ބައެއް މީހުން ދެކެއެވެ. ކޮންމެ އަކަސް، ޤުރުއާނަށް އިހާނެތިކޮށް ހިތާ، އަލިފާން ރޯކޮށް އަންދާ އުޅުނު މީހެއްގެ މަރުގެ ހަބަރަކީ ގިނަ މުސްލިމުންގެ ހިތްތަކަށް ހަމަ ޖެހުމެއް ގެނުވާނެ ކަމެކެވެ.

 

ހަވާލާ: އަލް ޖަޒީރާ ނިއުސް، 2025