ކަރަންޓު ބިލު ބޮޑުވުމަކީ ގިނަ ބަޔަކު ކުރަމުން އަންނަ ޝަކުވާއެކެވެ. ކަރަންޓު ބިލަށް އަންނަ ބަދަލުތަކުގެ ހުރިހާ އިލްޒާމެއް ސްޓެލްކޯގައި އެޅުވުމަކީ ހައްލެއް ނޫނެވެ. ނަމަވެސް އެހެންކަމުން ކަރަންޓު ބިލު ކުޑަކުރުމަށް ފަރުދީގޮތުން ކުރެވެން ހުރި ކަންތައްތައް ކުރުން އެދެވިގެން ވެއެވެ. ކަރަންޓު ބިލު ކުޑަކޮށް، ކަރަންޓު ބޭނުންކުރާ މިންވަރު މަދުކުރެވޭނެ ގޮތްތައް އެބަހުއްޓެވެ.

ލެޑް ބޮކި ބޭނުންކުރުން

ލެޑް ބޮތްކަކީ މަދު މިންވަރެއްގެ ވޮޓްސް ނުވަތަ ކަރަންޓު ބޭނުންކޮށްގެން އާދައިގެ ބޮކިތަކުގައި ހުންނަވަރަށް އަލި ފޯރުކޮށްދޭ ބޮތްކެކެވެ. އާދައިގެ ބޮކިތަކަށްވުރެ 75% މަދުން ލެޑު ބޮކިތަކުން ހަކަތަ ބޭނުންކުރާއިރު، އެންމެ މަދުވެގެން ޖުމުލަ 15،000 ގަޑިއިރުވަންދެން މިފަދަ ބޮކިތަށް ބޭނުން ކުރެވެއެވެ. ހަމައެހެންމެ، އާދައިގެ ބޮކިތަކަށްވުރެ 15 ނުވަތަ 20 ގުނަ އިތުރު މުއްދަތަކަށް ލެޑް ބޮކިތައް ބޭނުން ކުރެވޭ ކަމަށް ކްލީން ބީސީ - ބެޓަރ ހޯމްސް އިން ހާމަކުރެއެވެ. މަދު ހަކަތަ ބޭނުންކޮށްގެން ގިނަ ދުވަހަށް ގެންގުޅެވޭނެހެން ތައްޔާރުކޮށްފައިވާ ލެޑް ބޮކިތަކުން އަހަރުމެންގެ ކަރަންޓު ބިލު ކުޑަ ކޮށްދޭނެއެވެ.

ބޭނުން ނުކުރާ ވަގުތުތަކުގައި ކަރަންޓު ކަނޑާލުން

ކަރަންޓުގެ އެހީގައި ބޭނުންކުރެވޭ ވަސީލަތްތައް އެ ތަކެތީގެ ބޭނުމެއް ނުކުރެވޭ ވަގުތުތަކުގައި ކަނޑާލާފައި ބެހެއްޓުމުން، އެ ސަލާމަތް ކުރެވެނީ ބޭކާރު އެތައް ކަރަންޓެކެވެ. ފަންކާ އަދި ބޮކިފަދަ ތަކެތި ބޭނުން ނުކުރާނަމަ ނިއްވާލަންވީއެވެ. ހަމައެހެންމެ، ވައިފައި ރޫޓަރ ވެސް ގިނައިރުތަކެއް ވަންދެން ބޭނުން ނުކޮށް ހުންނާނެ ފަހަރުތަކުގައި ނިންވާލަންވީއެވެ. ކަރަންޓު ޚަރަދު ކުޑަ ކުރަން ބޭނުންނަމަ، ބޭނުން ނުކުރާ ވަގުތުތަކުގައި ކަރަންޓު ކަނޑާލަން އާދަކުރަން ޖެހެއެވެ.

އެދެވޭ ގޮތުގައި ފުރިޖް ނުވަތަ އައިސް އަލަމާރި ބޭނުން ކުރުން

ފުރިޖަކީ 24 ގަޑިއިރު ބޭނުން ކުރެވޭ ވަސީލަތެކެވެ. އޭގެ ބޭނުންވެސް އެންމެ އެދެވޭ ގޮތުގައި ހިފަން ޖެހެއެވެ. އެގޮތުން އެފް.ޑީ.އޭ (ޔުނައިޓެޑް ސްޓޭޓްސް ފުޑް އެންޑް ޑްރަގް އެޑްމިނިސްޓްރޭޝަން) ގެ ނަޒަރުގައި ރެފްރިޖަރޭޓަރގެ އެންމެ ރަނގަޅު ޓެމްޕަރޭޗަރއަކީ 4 ޑިގްރީ ސެލްސިއަސްއަށް ނުވަތަ އެޔަށްވުރެ ދަށެވެ. ކޮންމެ ދުވަހަކު ބޭނުންކުރާއިރު ރެފްރިޖަރޭޓަރގެ ފިނިހޫނުމިން ހުރުމަށް އެންމެ އެދެވިގެންވަނީ 1.7 - 3.3 ޑިގްރީ ސެލްސިއަސް އާ ދެމެދުގައެވެ. މީގެއިތުރުން، ފުރިޖުގެ ދޮރު ހުރީ ފިނި ބޭރު ނުވާނޭހެން ރަނގަޅަށް ލެއްޕިފައިތޯ ޔަޤީން ކުރަން ޖެހެއެވެ. އިތުރު ފުރިޖެއް ނުވަތަ ފްރީޒަރ އެއް ހުރި ނަމަ އެ ބޭނުން ކުރުން ބުއްދިވެރީ ކޮންމެހެން ބޭނުންޖެހޭ ހާލަތެއްގައި އެކަންޏެވެ.

އަވަނުގެ ބަދަލުގައި މައިކްރޮވޭވް ބޭނުން ކުރުން

މައިކްރޮވޭވް އިން ބޭނުންކުރަނީ އަވަނުން ބޭނުން ކުރާ މިންވަރަށް ވުރެ 80% މަދު ހަކަތައެވެ. މައިކްރޮވޭވްއިން 600 އާއި 1000 އާ ދެމެދުގެ ވޮޓްސް ބޭނުން ކުރާއިރު، އަވަނުން ބޭނުންކުރާ ވޮޓްސްގެ މިންވަރު 2000 އާއި 5000 އާ ދެމެދުގައި ހިމެނުން އެކަށީގެންވެއެވެ. އަވަނުގެ ބަދަލުގައި މައިކްރޮވޭވް ބޭނުން ކުރުމުންވެސް އެތައް ކަރަންޓެއް ސަލާމަތް ކުރެވެއެވެ.  

އެދެވޭ ގޮތުގައި އޭސީ އަދި ހީޓަރ ބޭނުން ކުރުން

ހޫނު މޫސުމުގައި އެންމެ ފުރަތަމަވެސް އޭސީ ޖެއްސުމުގެ ބަދަލުގައި ފަންކާ ހިޔާރު ކުރުމަށް، ކަރަންޓު ބިލު ކުޑަކުރަން ބޭނުންވާ ގިނަ ބަޔަކު ތާޢީދު ކުރެއެވެ. އެއީ އޭސީއަކުން ގަޑިއިރަކު ގާތްގަނޑަކަށް 1200 ވޮޓްސްގެ ކަރަންޓު ބޭނުންކުރާއިރު، ސީލިންގ ފަންކާއަކުން ގަޑިއިރަކު ބޭނުން ކުރަނީ ހަމައެކަނި 60 ވޮޓްސް ކަމަށް ވާތީއެވެ. ހަމައެހެންމެ، ފިނި މޫސުމުގައި ހީޓަރ ބޭނުންް ކުރުމުގެ ކުރިން، ބޯ ރަޖާފަދަ ތަކެތި ބޭނުންކޮށްގެން ފިނިވާ މިންވަރު ކުޑަ ކުރެވޭތޯ ބެލުމުންވެސް ހީޓަރަށް އަރާ ކަރަންޓުގެ މިންވަރު މަދުކުރެވޭނެއެވެ.

މިއީ ކަރަންޓު ޚަރަދު ކުޑަކުރަން ކުރެވިދާނެ ބައެއް ކަންތައްތަކެވެ. އެމީހެއްގެ އަމިއްލަ ދިރިއުޅުމުގައި ކަންތައްތައް ހުންނަ އުސްލޫބު ދެނެގަނެ، އެކަަންކަމާއި އެންމެ އެކަށޭނެ ގޮތްތަކަށް ކަރަންޓު ބޭނުން ކުރުމުން ކަރަންޓު ބިލަށް ހެޔޮ ބަދަލުތަކެއް އައުމަކީ ދުރުގައިވާ ކަމެއް ނޫނެވެ.