ދޮންކޭލަކީ އިރުމަތީ ދެކުނު އޭޝިއާއަށް ނިސްބަތްވާ އެއްޗެއް ނަމަވެސް މިހާރު ދުނިޔޭގެ ގިނަ ތަންތަނުގައި މި މޭވާ ހައްދައެވެ. ދޮންކޭލަކީ ދިވެހިންގެ މެދުގައި ވަރަށް މަޤްބޫލު މޭވާއެކެވެ. ރާއްޖޭގައި އާންމުކޮށް ފެންނަ ދޮންކޭލުގެ ބާވަތްތަކުގެ ތެރޭގައި ރަތްކެޔޮ، ހަޑިކެޔޮ، ސަންފާކެޔޮ، މާޅޮސްކެޔޮ، ފުސްކެޔޮ އަދި ބޮޑުކެޔޮ ހިމެނެއެވެ. މި ބާވަތްތަކަކީ ރާއްޖެއިން ފަސޭހައިން ލިބެން ހުންނަ މީރު ދޮންކޭލުގެ ވައްތަރުތަކެވެ.
ދޮންކޭލަކީ ހަށިގަނޑަށް ވަރަށް ފައިދާހުރި މޭވާއެކެވެ. މި މޭވާގައި ވިޓަމިން ސީ، ވިޓަމިން ބީ 6، ޕޮޓޭސިއަމް، ރައިބޯފްލެވިން، ނިއާސިން އަދި ފައިބަރ ފަދަ މުހިންމު މާއްދާތައް ގިނަ މިންވަރަކަށް އެކުލެވިގެންވެއެވެ. އަދި އެކި އެންޓިއޮކްސިޑެންޓްތަކާއި ފައިޓޯނިއުޓްރިއެންޓްސްވެސް އެކުލެވިގެންވެއެވެ. ވީމާ، މިއީ ކޮންމެ ދުވަހަކު ކެއުމަށް ގޯސް އެއްޗެއް ނޫނެވެ. ހަށިގަނޑުގައި ބުންވަރު ރަނގަޅުކުރުމަށްވެސް ގައިމު ޔަގީން އެއްޗެއްކަން ޝައްކެއްނެތެވެ.
ރަހަމީރު މި މޭވާއަކީ ފޮނި ކާއެއްޗެހި ތައްޔާރުކުރުމަށްވެސް ނުހަނު މަގުބޫލު ބާވަތެކެވެ. މިއީ ކޮންމެ ދުވަހެއްގެ ކެއުމުގައި ބޭނުންކުރިޔަސް ގެއްލުން ނުވާނެ ބާވަތެއްވެސް މެއެވެ. އެހެންކަމުން މި ލިޔުމުގައި އަލިއަޅުވާލާފައިވަނީ ދޮންކޭލުން ލިއްބައިދޭ ބައެއް ފައިދާތަކުގެ މައްޗަށެވެ.
ދޮންކޭލަކީ އެއްވެސް ވަރަކަށް ފެޓްސް ނުހިމެނޭ މޭވާއެކެވެ. ސިއްހީ މާހިރުން ބުނާގޮތުގައި ޅަ ކޭލަކީ ހަކުރު ބަލި ނުހުންނަ މީހުންގެ ލޭގައި ހަކުރު ދައުރުވާ މިންވަރު ބެލެންސްކޮށްދިނުމަށް ރަނގަޅު އެއްޗެކެވެ.
ދޮންކޭލަކީ ބަރުދަން ލުއިކުރުމަށް ފަސޭހަ ކާނާއެކެވެ. ދޮންކޭލުގައި ޑައިޓޭރިއަން ފައިބާއާއި ރެސިސްޓެންޓް ސްޓާޗްވެސް އެކުލެވިގެންވާއިރު، މިއީ ގިނައިރު ވަންދެން ބަނޑުހައިހޫނުކަން އިހުސާސްވުން ކުޑަކޮށްދޭ އެއްޗެކެވެ. ނަތީޖާއެއްގެ ގޮތުން މީހާ އެދުވަހު ކާއެއްޗެހި ކާން ބޭނުންވާ މިންވަރު ކުޑަކޮށްދެއެވެ. ފައިބާއިން މުއްސަނދި ދޮންކޭލަކީ ބަނޑުހަރުވުމަށްވެސް ރަނގަޅު ހައްލެކެވެ.
ދޮންކޭލަކީ ޕޮޓޭސިއަމްއިން މުއްސަނދި ބާވަތެކެވެ. ޕޮޓޭސިއަމްއަކީ ލޭގެ ޕްރެޝާ ދުޅަހެޔޮ މިންގަނޑެއްގައި ބެހެއްޓުމަށް އެހީތެރިވާ މާއްދާއެކެވެ. މީގެ އިތުރުން، ދޮންކެޔޮ ކެއުމުން ހަމުގެ ދުޅަހެޔޮކަން ދެމެހެއްޓުމަށާއި، ގޭހުގެ މައްސަލަތައް ކޮންޓްރޯލްކުރުމަށާއި، ބަނޑު ހިންދުމަށްވެސް ކޮންމެވެސް ވަރަކަށް އެހީތެރިވެދެއެވެ.
ދޮންކޭލުގައި އެންޓިއޮކްސިޑަންޓްސް ގިނައިން އެކުލެވިފައިވާތީ، ކެންސަރު ފަދަ ނުރައްކާތެރި ބަލިތަކުން ރައްކާތެރިވުމަށް މަގުފަހިކޮށްދެއެވެ. އަދި ހަކުރުގެ މިންވަރު މަތިވުމާއެކު، ހަށިގަނޑަށް ބޭނުންވާ ހަކަތަ އަވަހަށް ފޯރުކޮށްދެއެވެ.
މާބަނޑު އަންހެނުންނަށް ދޮންކޭލަކީ ޚާއްޞަކޮށް ފައިދާހުރި މޭވާއެކެވެ. ސަބަބަކީ ބަނޑުގައިވާ ކުއްޖާގެ ހެދިބޮޑުވުމަށް ބޭނުންވާ ގިނަ މާއްދާތައް ދޮންކޭލުން ލިބޭތީއެވެ. މީގެ އިތުރުން، ދުޅަހެޔޮ ސިއްޙަތެއްގައި ހެޔޮވަރުގެ ހަށިގަނޑެއް ދެމެހެއްޓުމަށް ދޮންކޭލަކީ އެންމެ ރަނގަޅު އެއް މޭވާއެވެ.
