ބަރަކާތްތެރި ރޯދަ މަހުގައި މުސްލިމުންގެ ސުފުރާ މަތިން ކަދުރު ނުފެނި ދިއުމަކީ އެއީ ނާދިރު ކަމެކެވެ. މާތްވެގެންވާ ކީރިތި ނަބިއްޔާ މުހައްމަދު (ޞ.އ.ވ)ގެ ސުންނަތުގައިވެސް ކަދުރަކީ ވަރަށް މުހިންމު މަގާމެއް ދެވިފައިވާ ކާނާއެކެވެ. އެހެން ނަމަވެސް، ކަދުރުން ލިއްބައިދޭ ފައިދާތައް އެނގެނީ ކިތައް މީހުންނަށްބާއެވެ؟
ކަދުރުގައި ފައިބާއާއި އެންޓިއޮކްސިޑެންޓްސް ގިނައިން ހުރެއެވެ. އޭގައި ހިމެނޭ ފައިދާތަކުގެ ސަބަބުން ސިކުނޑި ދުޅަހެޔޮކޮށްދެއެވެ. އަދި ބައެއް ބަލިތަކުން ހަށިގަނޑު ދިފާއުކުރުމަށްވެސް ކަދުރުގައި ހިމެނޭ މާއްދާތައް ނުހަނު ރަނގަޅެވެ.
ކަދުރުގައި ފޮސްފަރަސް، ކެލްސިއަމް، އަދި މެގްނީޒިއަމް ފަދަ ބައެއް މާއްދާތައް ހިމެނެއެވެ. މި ހުރިހާ މާއްދާތައްވެސް ވަނީ އޮސްޓިއޯޕޮރޮސިސް ފަދަ ކަށިތަކާ ގުޅުން ހުރި ބަލިތަކުން ރައްކާތެރިވުމަށް ރަނގަޅު އެއްޗެއް ކަމަށް ދިރާސާކުރެވިފައެވެ.
ފައިބާއަކީ ބަނޑުހަރުވުމަށް ރަނގަޅު ހައްލެކެވެ. އެއް ދިރާސާއެއްގައި 21 ދުވަސް ވަންދެން ދުވާލަކު 7 ކަދުރު ބޭނުންކުރި 21 މީހުންގެ ބަނޑުހަރުވުމުގެ މައްސަލައަށް ލުއެއް ލިބިފައިވާ ކަމަށް ފާހަގަކޮށްފައި ވެއެވެ.
މީގެ އިތުރުން ކަދުރުގައި ހިމެނޭ ފައިބަރަކީ ލޭގައި ހުންނަ ހަކުރު ކޮންޓްރޯލް ކުރުމަށް ފައިދާހުރި އެއްޗަކަށް ވެދާނެއެވެ. ފައިބަރުގެ ސަބަބުން ހަޖަމުކުރުން ލަސްވެ، ކެއުމަށްފަހު ލޭގައި ހަކުރުގެ މިންވަރު މާ މައްޗަށް ނުދިއުމަށް އެހީތެރިވެދެއެވެ. ކަދުރުން ރޯދަވީއްލުމަކީ ރަނގަޅު އާދައެއް ކަމަށް ސިއްހީ މާހިރުންވެސް ލަފާކޮށްފައި ވެއެވެ. ރޯދަ މަހުގައި ހަކުރުގެ ބަދަލުގައި ކަދުރު ފެން ބޭނުންކުރުމަށް ބައެއް ނިއުޓްރިޝަނިސްޓުން ނަސޭހަތްތެރި ވެއެވެ.
ކަދުރުގެ އިތުރު ފައިދާއަކަށް ބަލާއިރު ކަދުރަކީ ކެރެޓީނޮއިޑްސްއާއި ފީނޮލިކް އެސިޑުން މުއްސަނދި އެއްޗެކެވެ. ކެރޮޓީނޮއިޑްސްއަކީ ހިތުގެ ސިއްހަތު ރަނގަޅުކޮށްދޭ އެއްޗެއްކަމަށް ސާބިތުވެފައިވާއިރު، މެކިއުލަރ ޑިޖެނެރޭޝަން ފަދަ ލޮލާއި ގުޅުންހުރި ބަލިތައް ޖެހުމުގެ ފުރުސަތުވެސް ކުޑަކޮށްދޭ ކަމަށް ވެއެވެ.