ކުރިޔަށް މިއޮތީ ރަމަޟާން މަހާއެކު، ސުކޫލު ކުދިންގެ ޗުއްޓީ ދުވަސްކޮޅެވެ. 2024 ވަނަ އަހަރުގެ ދިރާސީ އަހަރު ނިމި 2025 ވަނަ އަހަރުގެ ދިރާސީ އައު އަހަރާ ބައްދަލުވުމުގެ ކުރިން ދަރިވަރުންނަށް ލިބޭ ބޮޑު ޗުއްޓީ ދުވަސްވަރެވެ. ކޮންމެ ޗުއްޓީއަކާއެކު ދަރިވަރުންނަށް ލިބެނީ އުފާވެރިކަމެވެ. ކިޔެވުމާއި ގުޅުންހުރި ކަންކަމުން ވީއްލި، އެކުދިން ހިތްއުފާ ކޮށްލުމަށް ގިނަ ވަގުތު ލިބިގެންދާތީއެވެ. އެހެންނަމަވެސް، ބެލެނިވެރިއެއްގެ ހައިސިއްޔަތުން، ކޮންމެ ޗުއްޓީއަކާއެކު ދަރިންނާ މެދު ވިސްނާލަންޖެހޭ މުހިންމު ކަންތައްތަކެއް ވާކަން ޔަޤީނެވެ.

ދަރިފުޅަށް ޗުއްޓީވުމުން ގިނަ ވަގުތު ހޭދަކުރާނީ ގޭގައެވެ. އެހެންނަމަވެސް، ކަންކަން ރަނގަޅަށް ތަރުތީބު ނުކޮށްލެވިއްޖެނަމަ، ޗުއްޓީ ބޭކާރު ވެގެން ހިނގައިދާނެއެވެ. އެގޮތުން އެންމެ މުހިންމު ސަމާލުކަމެއް ދޭންޖެހޭނެ އެއްކަމަކީ، ދަރިންގެ ދުވަހުގެ ތާވަލު ވަކި ގޮތަކަށް ތަރުތީބު ކޮށްލުމެވެ. މިހެން ތާވަލު ހަދާއިރު، ކޮންމެވެސް ވަގުތުކޮޅެއް ކިޔެވުމަށް ހާއްސަކުރެވި، އެކަން ދަރިފުޅަށްވެސް ބުނެދޭން ޖެހެއެވެ. އެހެން ނޫންނަމަ، ޗުއްޓީ ނިންމާފައި ދެން ސުކޫލަށް ދާއިރު، ކިޔެވުން މަތިން ކުޑަކޮށް ފޫހިވުމާއި، ގަބުވުން ކަހަލަ ކަންކަން ވެދާނެއެވެ.

ދެވަނަ ކަމަކީ، ޗުއްޓީ ދުވަސްވަރު އިހުނަށްވުރެ ގިނަ ވަގުތު ދަރިފުޅަށް ދޭން ސަމާލުކަން ދޭންޖެހޭނެއެވެ. ސުކޫލު ކިޔެވުމުގެ ދުވަސްވަރު، ސުކޫލަށް ދިޔުމާއި، އިތުރު ހަރަކާތްތަކުގައި ބައިވެރިވުމާއި، ޤުރުއާން ކުލާހަށް ދިޔުމާއި، ޓިއުޝަނަށް ދިޔުމުގައި ދަރިން އުޅޭނީ އަވަދިނެތިއެވެ. އަދި އެ ތާވަލުގެ ތެރެއަށް މައިންބަފައިންގެ ވަޒީފާގެ ވަގުތު ލުމުން، ދަރިންނާއި މައިންބަފައިން ދިމާވަނީ ވަރަށް މަދުންނެވެ. އެހެންކަމުން، ޗުއްޓީ ދުވަސްވަރު، ދަރިފުޅަށް ދެވޭނެ އެންމެ ގިނަ ވަގުތުދީ، އެ ދަރިފުޅު އެންމެ އެދޭ ކަންކަން ކޮށްދެވޭތޯ ބެލުމަކީ މުހިންމުކަމެކެވެ. ކޮންމެ ކަމަކީ ފައިސާއިން ވާން ޖެހޭނެކަމެއްނޫނެވެ. ދުއްވާލަން ދިޔުމާއި، މޫދަށް ދިޔުމާއި، ކުޅިވަރެއް ކުޅުމާއި، ގޭތެރޭގައި ކުދިން ބައިވެރިކޮށްގެން ކޮންމެވެސް ކަމެއްގައި ޝާމިލުވެވިދާނެއެވެ.

ޗުއްޓީއާއެކު، ތަންމިނަށް ދަރިފުޅު ދޫކޮށްލެވިއްޖެނަމަ، ދަރިފުޅަށް އެ ދެވެނީ ނުބައި މެސެޖެކެވެ. އަބަދު ޓެބްލެޓް ނުވަތަ ފޯނު ހިފައިގެން އެހެން އެއްވެސް ކަމެއްގައި ނޫޅެ، އަބަދު ގޭމު ކުޅުމުގައި މުޅި ދުވަސް ހޭދަ ކުރަން ދޫކޮށްލައިފިނަމަ، އެ ދަރިފުޅަށް އެތައް ގޮތަކުން ގެއްލުން ލިބޭނެއެވެ. ލޮލަށް ގެއްލުން ލިބުމާއި، އެހެން މީހުންނާ އޮންނަ ގުޅުން ހީނަރުވުމާއި، ކެއުމުގެ ތާވަލަށް ބަދަލުއައުން ކަހަލަ ކަންކަން ދިމާވުމަކީ ގާތްކަމެކެވެ. އޭގެ ބަދަލުގައި ތާވަލެއް ހަދައި، ހުރިހާކަމެއް ހަމަހަމަ އުޞޫލެއްގެ ދަށުން ގެންދިޔުމަކީ އެންމެ އެދެވިގެންވާ ގޮތެވެ.