ޒަމާނަށް އައި ކުރިއެރުމާއިއެކު ގުޅުންތައްވެސް މިވަނީ ކުރިއަރައިގެން ގޮސްފައެވެ. ތަހުޒީބުވުމުގެ ނަމުގައި ކައިވެނީގެ ބޭރުން ލޯބީގެ ގުޅުންތައް އުފައްދާ، ގާރލްފްރެންޑް ބޯއިފްރެންޑްގެ ވައްޓަފާޅި މިވަނީ ފިސަހަރި ރަނގަޅަށް ފެތުރިފައެވެ. ޢާންމު ބަހުރުވައިން ދަންނަވަނީ ނަމަ 'ބިޓެއް' ހުރީމަ ނޫނީ 'މޮޑާރން' ނުވަތަ 'ޒަމާނީ' ވީކަމަކަށް ނުވެއެވެ. ނޫންނަމަ އެދެން ވަރަށް 'ކަޓު'ވީއެވެ. ނަމަވެސް އެ ގުޅުން ޙަލާލު ގޮތުގައި ކުރިއަށް ގެންދިއުމަށް އިސްލާމްދީނުގައި ކައިވެނި ވަނީ ޝަރުޢު ކުރައްވާފައެވެ. ކައިވެނިން ބޭރުން އުފައްދާ ގުޅުންތަކަށްވުރެ، ކައިވެނީގެ ގުޅުމުގެ ތެރެއިން ލިބޭ ލާބަޔާއި މަންފާ މާ ބޮޑެވެ. އެހެންކަމުން، ގާރލްފްރެންޑަކަށްވުރެ، ޝަރުޢީ ހަމަތަކުގެ މަތިން އަނތްބަކު އިޚްތިޔާރު ކުރުމުގެ މުހިންމުކަމަށް މި ލިޔުމުގައި އަލިއަޅުވާލާނަމެވެ.
1. ރޫޙާނީ އަދި އިސްލާމީ ފުރިހަމަކަން
އިސްލާމް ދީނުގައި ވަނީ ކައިވެނީގެ ގުޅުން ފުރިހަމަކޮށް އެއީ އިންސާނާގެ ޙަޔާތުގެ ބައެއް ކަމުގައި ބަޔާންކޮށްފައެވެ. ލޯބީގެ ބޭނުންތައް ފުއްދާނެ ޙަލާލު މަގު ވަނީ ތަނަވަސް ކޮށްދެއްވާފައެވެ. ﷲ ތަޢާލާ ވަޙީކުރައްވާފައިވާ އާޔަތްތަކުގެ މާނައިގަ ވެއެވެ.
"ތިޔަބައިމީހުންނަށްޓަކައި ހަމަ ތިޔަބައިމީހުންގެ ނަފުސުތަކުން އަނބިން ހެއްދެވިކަމީ، އެކަލާނގެ ކުޅަދުންވަންތަކަމުގެ ހެކިތަކުގެ ތެރެއިންވާ ކަމެކެވެ. އެއީ ތިޔަބައިމީހުން އެކަނބަލުންގެ ފަރާތުން ހަމަހިމޭންކަން ލިބިގަތުމަށްޓަކައެވެ. އަދި އެކަލާނގެ ތިޔަބައިމީހުންގެ މެދުގައި ލޯތްބާއި، އޯގާވެރިކަން ލެއްވިއެވެ. ހަމަކަށަވަރުން، ފިކުރު ހިންގާ ބަޔަކަށް އެކަމުގައި ހެކިތަކެއްވާކަން ކަށަވަރެވެ." {30:21}
"އަދި ތިޔަބައިމީހުންގެ ތެރެއިން މީހުނާ ނުއިނދެތިބޭ މީހުން، ތިޔަބައިމީހުން (މީހުނާ) ދެވާށެވެ! އަދި ތިޔަބައިމީހުންގެ ފިރިހެން އަޅުންނާއި، އަންހެން އަޅުންގެ ތެރެއިން ހެޔޮލަފާ މީހުންވެސްމެއެވެ. އެއުރެންނީ، ފަޤީރުން ކަމުގައިވާނަމަ، އެކަލާނގެ ފަޟުލުވަންތަކަމުން، އެކަލާނގެ އެއުރެން މުއްސަނދިކުރައްވައިފާނެތެވެ. ﷲ އީ، ތަނަވަސްވަންތަ، މޮޅަށް ދެނެވޮޑިގެންވާ ރަސްކަލާނގެއެވެ." {24:32}
މި އާޔަތްތަކުންވެސް އެނގި ހާމަވެގެންދަނީ ކައިވެނި ކުރުމަށް އިސްލާމްދީނުގައި ބާރުއަޅުއްވާފައިވާ މިންވަރެވެ. އެ ގުޅުން ޙަލާލު ކުރުމަށް އިސްކަންދޭ މިންވަރެވެ. އަދި މިއީ ކައިވެނީގެ ގުޅުމުގެ ބަރަކާތްތެރިކަން ބަޔާންކޮށްދޭ އާޔަތްތަކެކެވެ. އެހެންކަމުން، އިސްވެ ދިޔަ އާޔަތްތަކުން ދަލީލު ލިބޭ ފަދައިން، ޝަރުޢީގޮތުން ހުއްދަ ގުޅުމެއްގައި އުޅުމުގެ ހިތްހަމަޖެހުން ލިބޭނެ ޒަރީޢާއަކަށް ކައިވެނި ވެގެންދެއެވެ. އަދި ކައިވެނީގެ ގާތްކަމަކީ ޢިބާދާތެއްކަމުގެ އިޙްސާސް ކުރެވި، އާއިލާގެ ތެރެއިން ހޯދޭނެ ބަރަކާތްތެރިކަން ތަނަވަސްކޮށްދޭ ވަސީލަތަކަކީ ކައިވެނިކަން ސާފުކޮށް ހާމަވެއެވެ.
2. މުޖުތަމަޢު ބަލައިގަތުމާއި އިޖުތިމާޢީ ޤަދަރުވެރިކަން
އިސްލާމްދީނުގައި އަންގަވާފައި އޮންނަ ގޮތާއި، މުޖުތަމަޢުގެ ރިވެތި އާދަކާދައިގެ މައި މުލާއި ވަނީ ގުޅި ލާމެހިވެފައެވެ. މުޖުތަމަޢުގައި ކައިވެނިކޮށްގެން އުޅޭ މީހުންނަށް ލިބޭ ޤަދަރާއި އިޙްތިރާމު ބޮޑެވެ. އެގޮތުން އިސްލާމީ ޝަރީޢާތާއި ހަމަތަކާއި އެއްގޮތަށް ޒަވާޖީ ޙަޔާތް ބައްޓަން ކުރުމުގެ ސަބަބުން މުޖުތަމަޢުގެ ނަޒަރުގައިވެސް އެމީހަކަށް އިޙްތިރާމާއި ލޯބި ލިބެއެވެ. ޤަދަރާއި އިޙްތިރާމު ލިބެއެވެ. އިއްޒަތާއި ޝަރަފު ލިބެއެވެ. އެއީ ކައިވެނީގެ ސަބަބުން މީހާގެ ޝަޙުސިއްޔަތާއި އުސްލޫބުގައި ހަރުދަނާކަމުގެ ސިފަތައް ދައްކުވައިދޭތީއެވެ. ހަމައެހެންމެ، ކައިވެނީގެ ބޭރުން ލޯބިވެރިން ގެންގުޅުމުގެ ބަދަލުގައި، ޙަލާލު އަނތްބެއްގެ ދަރަޖަ ދީގެން އަނބިމީހާއާއިއެކު އުޅުމަކީ 'ސްޓޭބަލް' މީހެއް ގޮތުގައި ތިމާ މީހާ ބަލައިގަންނަ އެއް ސަބަބެވެ. ދިރިއުޅުމުގައި ހަމަޖެހި، ދިރިއުޅުން ހަމަޔަކަށް އެޅޭކަން ކައިވެނިން ދައްކުވައިދެއެވެ. މީގެއިތުރުން، ދެ ފަރާތުގެ އާއިލާއިންވެސް ދެކޭގޮތް ރަނގަޅުވެގެންދެއެވެ. ލޯބިވެރިންގެ ގޮތުގައި އެތައް މިތަނަށް ދަރިން އެކުއެކީ ގޮސް އުޅޭ އުޅުމަށްވުރެ، ކައިވެނިކޮށްގެން ޙަލާލު ގޮތުގައި އުޅޭތަން ފެނުމަކީ އާއިލާގެ ނަޒަރުގައިވެސް މީހާއަށް އިތުރު ޤަދަރާއި އިޙްތިރާމް ލިބިގެންދާނެ ކަމެކެވެ.
3. ނަފްސާނީ އަދި ޖިސްމާނީ ދުޅަހެޔޮކަން
އަނބިމީހާއާއެކު ދިރިއުޅުމުން ލިބޭ ނަފްސާނީ އަދި ޖިސްމާނީ ފައިދާތައް ވަރަށް ގިނައެވެ. ދިރާސާތަކުން ދައްކާގޮތުގައި، އެހެން މީހުންނަށްވުރެ، ކައިވެނިކޮށްގެން އުޅޭ މީހުންގެ އުމުރު ދިގެވެ. ހަމައެހެންމެ، އެކި ހޯދުންތަކުން ދައްކާ ގޮތުގައި، ކައިވެނިކޮށްގެން އުޅޭ މީހުންނަށް ސްޓްރޯކާއި ހާރޓްއެޓޭކް ޖެހޭ މިންވަރު މަދެވެ. އަދި ނަފްސާނީގޮތުން ހިތްހަމަޖެހުން ލިބޭ މިންވަރު އިތުރުވެފައި، ކަންކަމާއި ހާސްވެ ކަންބޮޑުވުމާއި، ސްޓްރެސްވާ މިންވަރު ކުޑަވެއެވެ.
ޖިންސީ އެދުންތައް ފުއްދުމަށް ކައިވެނީގެ ބޭރުން އެތައް ބަޔަކާއި ގުޅުން ބޭއްވުމުން ދިމާވާ ބަލިތަކުން ސަލާމަތްވުމަށް ކައިވެންޏަށްވުރެ ރަނގަޅު މަގެއް އޮންނާނެ ހެއްޔެވެ؟ ތަފާތު ބަލިމަޑުކަމުން ސަލާމަތްވެ، ނަސްލު އޮޅުންބޮޅުންވެ ދިއުމުން ސަލާމަތްވުމަކީ ކައިވެނީގެ ސަބަބުން ލިބޭ ފައިދާތަކެވެ. މީގެއިތުރުން، ދިރިއުޅުމުގެ ޤަވާއިދުތައް ހަރުދަނާވެ، ދުޅަހެޔޮ އާދަތަކަށް މަގުފަހިވެއެވެ. އެއީ އެކަކު އަނެކެއްގެ ކަންތައްތައް ރަނގަޅު ކުރުމަށް އެއްބާރުލުންދީ، ހިތްވަރުދޭނެ މީހަކު ހުންނާތީއެވެ. ރަނގަޅު ކޮށްލަންވީ ކަންތައްތައްވެސް ރިވެތި ގޮތުގައި ބުނެދޭނެ މީހަކު ހުންނާނެތީއެވެ.
4. އިގްތިޞާދީ ފައިދާތައް
ކައިވެންޏަށްފަހު އަނބިމީހާއަށް ޚަރަދު ކުރުމަކީ ފިރިމީހާގެ ވާޖިބެކެވެ. ޚަރަދުތައްކޮށް، އާމްދަނީ ހޯދަން އަނބިމީހާއަށް މަޖުބޫރެއް ނޫނެވެ. ނަމަވެސް މި ޒަމާނުގައި ވަޒީފާގެ މައިދާނަށްވެސް ކަނބަލުން ފިސަހަރި ކުޅަދާނައެވެ. އެހެންކަމުން އަނބިމީހާއަކާއެކު ދިރިއުޅުމުން ލިބޭ އިޤްތިޞާދީ ފައިދާތަކެއްވެސް އެބަހުއްޓެވެ. އެގޮތުން ދިރިއުޅުމުގެ އެކި ޚަރަދުތައް ކުރުމަށް އަނބިމީހާގެ އާމްދަނީ ބޭނުން ކުރުމުން ދެމީހުންގެ އާމްދަނީއިން އެއް ބަޖެޓެއް ބިނާކުރެވެއެވެ. މީގެއިތުރުން، ގެދޮރާއި ހިފާ ގެންގުޅޭ ސާމާނުފަދަ ބޮޑެތި ހަރުމުދާ ހޯދުމުގައި ބައިވެރިވެވޭއިރު، މަކަރާއި ހީލަތް ހަދާ، ލަނޑެއްދީ އޮޅުވާލާނެކަމުގެ ބިރު ފިލާ، އިތުބާރާއި ޔަޤީންކަމާއެކު އެކަންކަން ކުރިޔަށް ގެންދެވެއެވެ. އަދި ދެމީހުންވެސް ފައިސާ ފަހަށް ރައްކާކޮށް (ސޭވްކޮށް) އިންވެސްޓުވެސް ކުރެވެއެވެ. ލޯބިވެރިޔާއަށް ހޭދަކުރާ ފައިސާއަކީ ގިނަފަހަރު ލިބޭ ފައިދާއެއް ނެތް ޚަރަދުތަކެވެ. ނަމަވެސް އަނބިމީހާއާއެކު ކުރެވޭ ޚަރަދަކީ މުސްތަޤުބަލަށް ކުރެވޭ އިންވެސްޓްމަންޓެކެވެ.
5. އެމޯޝަނަލް ސަޕޯޓް އަދި ހިތްހަމަޖެހުން
ލޯބިވެރިޔާ ނުވަތަ ގާރލްފްރެންޑްގެ ދައުރާއި އަނބިމީހާގެ ދައުރުގެ ބޮޑު ތަފާތަކީ އެމޯޝަނަލް ސަޕޯޓެވެ. ޖަޒުބާތީ ގޮތުން ލިބިދޭ ހިތްވަރެވެ. އެގޮތުން ހުރިހާ އުފަލަކާއި ހިތާމައެއްގައި ސަޕޯޓުކުރާނެ ފަރާތެއް ލިބިގެންދެއެވެ. ދަތި އުނދަގޫ ދުވަސްތަކުގައިވެސް ހިތްވަރުދޭނެ ބައިވެރިޔަކު ލިބެއެވެ. ކަންބޮޑުވުންތައް ހިއްސާކުރެވޭނެ ފަރާތެއް ލިބި، ކަންކަމުގައު ލަފަޔާއި މަޝްވަރާ ހޯދޭނެ 'ޕާރޓްނާ'އެއް ލިބެއެވެ. މީގެއިތުރުން، ބަލިވުމާއި އެހެނިހެން ދަތި ދުވަސްތަކުގައި އަޅާލާ، އޯގާތެރިކަމުން ދުވަސްތައް ފުރާލަދޭނެ ބައިވެރިއަކަށް އަނބިމީހާ ވާނެއެވެ. ތިމާގެ ކުރިއެރުންތަކަށް އުފާކޮށް، ލިބޭ ނާކާމިޔާބީތަކުގައި ހިތްވަރު އެލުވާ ނުލާ 'މޯޓިވޭޓް' ކޮށްދިނުމަށް އެކަމަނާ ސާބިތުވެ ހުންނާނެއެވެ. ޒުވާން ދުވަސްވަރު ފަހަނަ އަޅާގޮސް، މުސްކުޅިވީމާވެސް އެކުގައި އުޅެން ހުންނާނެ މީހަކީ ހަމަ އަނބިމީހާއެވެ. ގާރލްފްރެންޑެއް ނޫނެވެ.
6. ދަރިންގެ ނިޢުމަތް
ކައިވެނިކޮށްގެން ދިރިއުޅުމުން ލިބޭ އެންމެ ބޮޑު ނިޢުމަތްތަކުގެ ތެރޭގައި ދަރިން ހިމެނެއެވެ. އެއީ ދެލޮލުގެ ނޫރުކަމުގައިވާނެ ޚުދު ތިމާގެ ދަރިންނެވެ. ކައިވެނީގެ ބޭރުން ދަރިން ހޯދުމުން އެ ދަރިންގެ ބޮލުގައި އުމުރު ދުވަހަށް އެޅިގެންދަނީ 'ނަހަލާލު' ކުއްޖަކަށް ވުމުގެ ޓެގެވެ. މުޅި ދުނިޔެ އެކުދިންނާ ދޭތެރޭ ދެކެނީ ދަށު ދަރަޖައިގެ ނަޒަރުންނެވެ. އެހެންކަމުން، ޤާނޫނީގޮތުން ޤަބޫލުކުރެވޭ އާއިލާއެއް ބިނާކުރުމުގެ ނިޢުމަތް ފަހިވަނީ ކައިވެނީގެ ތެރެއިންނެވެ. ހަމައެހެންމެ ދަރިންގެ ފަރާތުން ލިބޭ އުފާވެރިކަމާއި ހިތްހަމަޖެހުމަކީ އަގު ނުކުރެވޭ ބޮޑު ނިޢުމަތެކެވެ. މުސްކުޅިވުމުން ތިމާ ބަލާނެ ދަރިންތަކެއް ލިބި، ދުނިޔެއާއި އާޚިރަތަށް ދެމިގެންދާ ޞަދަޤާތުލް ޖާރިޔާއެއް ގޮތުގައި އެ ކުދިން ވެގެން ދާނެއެވެ. އަދި އަލް-ފުރުޤާން ސޫރަތުގެ 74 ވަނަ އާޔަތުން ފަހުމުވަނީ، އާއިލާގެ ތެރެއިން ހޯދޭ ބަރަކާތްތެރިކަމާއި ހިތްހަމަޖެހުމުގެ އިޙްސާސެވެ. އެއާޔަތުގެ މާނާގައިވަނީ މިފަދައިންނެވެ.
"އަދި އެއީ ބުނާމީހުންނެވެ. އަޅަމެންގެ ވެރިރަސްކަލާނކޮ! އަޅަމެންގެ އަނބިންގެ ކިބައިންނާއި، އަޅަމެންގެ ދަރިންގެ ކިބައިން، ލޮލަށް ފިނިކަން ލިބުމެއް އަޅަމެންނަށް ދެއްވާނދޭވެ! އަދި ތަޤުވާވެރިންނަށް އިމާމުންކަމުގައި އަޅަމެން ލައްވާނދޭވެ!"
7. އިތުބާރާއި ސަލާމަތްތެރިކަން
ދިގު މުއްދަތަކަށް އެއް ފަރާތަކާއެކު އުޅުމުން ލިބޭ ސަލާމަތްތެރިކަމާއި އިތުބާރު ބޮޑެވެ. ކައިވެންޏެއްގެ ތެރޭގައި، އެ މާތް ގުޅުމުގައި ބަނދެވިފައި ތިބޭ ދެމަފިރިންގެ މެދުގައި އޮންނާނެ އިތުބާރާއި ޔަޤީންކަން އިތުރެވެ. ލޯބީގެ ސަބަބުން އެކަކު އަނެކަކަށް ކުރާ އިތުބާރާއި ޔަޤީންކަމުން އުފެދޭ ސަލާމަތްތެރިކަމުގެ އިޙްސާސްގެ އިތުރުން، ޤާނޫނީ ގޮތުން ލިބޭ ރައްކާތެރިކަންވެސް ކަށަވަރުވަނީ ކައިވެނީގެ ސަބަބުންނެވެ. ބިރުވެރިކަމާއި ކަންބޮޑުވުންތައް ކުޑަވެ، ދެފަރާތުގެ ދެމެދުގައި އޮންނަ ލޯބީގެ އިޙްސާސްގެ ސަބަބުން ހިތްހަމަޖެހުން ލިބެއެވެ. އަދި ދާއިމީ ޕާރޓްނާއަކާއި އެކުގައި އުޅުމުގެ ޔަޤީންކަން ބޮޑުވެއެވެ.
8. ލޯބިވެރިޔާއަށްވުރެ އަނބިމީހާގެ ފަރާތުން ލިބޭ ޚާއްޞަ ލޯބި
އަނބިމީހާއާއެކު އޮންނާނީ ތިމާ ކޮންމެހެން އަދާކުރަން ޖެހޭ ވާޖިބުތަކާއި އަނބިމީހާއަށް ލިބިދޭން ޖެހޭ ހައްޤުތަކެވެ. ތިމާއަށް އަނބިމީހާގެ ފަރާތުން ލިބެންޖެހޭ ހައްޤުތަކާއި އަނބިމީހާގެ ވާޖިބުތަކެވެ. ދީނީ ގޮތުންނާއި ޤާނޫނީ ގޮތުންނެވެ. ލޯބިވެރިޔާއަށްވުރެ އަނތްބެއްގެ ދަރަޖަ އެފަދަ ކިތަށްމެ ގޮތުން މައްޗެވެ. އަނބިމީހާއާއެކުގައި ހޭދަވާ އަހަރުތަކުގެ ތެރެއިން ޤާއިމުވާ ގުޅުން ފުންވެ، ލޯބި ވަރުގަދަވެ ގާތްކަން އިތުރުވެއެވެ. އަނެކާގެ އާދަތަކާއި ވިސްނުންތައް ރަނގަޅަށް އެނގި، ރިވެތި ގޮތުގައި ދިރިއުޅުން ބައްޓަން ކުރަން އެނގިގެންދެއެވެ. ކަންތައް ބުނެދޭން ނުކުޅެދޭ އެތައް ވަގުތެއްގައި، ކުޑަކުޑަ އިޝާރާތަކުން ވެސް ބޭނުންތައް ދެނެގަނެވުމުގެ ޤާބިލުކަން އެ ދުވަސްތަކުގެ ތެރޭގައި ދެފަރާތަށް ލިބެއެވެ. ކޮންމެ ކަމަކުންވެސް ހެކިދެނީ އެ ލިބޭ ޚާއްސަ ލޯތްބާއި ކުލުނެވެ. އޯގާތެރިކަމާއި އަޅާލުމެވެ.
ދިގު މުއްދަތަކަށް އެއް ފަރާތަކާއި އެކީ އުޅުމުގެ ސިއްރުތައް:
ތިރީގައި މި ހިމަނާލަނީ ކައިވެނީގެ ގުޅުން ދެމެހެއްޓުމަށް މުހިންމު ބައެއް ޓިޕްސްތަކެވެ.
ކޮމިއުނިކޭޝަން ނުވަތަ ރަނގަޅަށް މުޢާމަލާތްކުރުން: ތިމާއަށް އިޙްސާސްވާ ގޮތްތަކާއި ބޭނުންތައް ހިއްސާކުރުން މުހިންމެވެ. ހިތްހަމަނުޖެހޭ ކަމެއް ނުވަތަ ސިފައެއް ފެނުމުން ރިވެތި ގޮތުގައި އެކަން މުޢާމަލާތްކުރުމުން ހައްލު ގެންނަން ފަސޭހަވާނެއެވެ. ކޮންމެ ކަމަކީ ނުބުނެ ހުއްޓަސް އެނގޭނެ ކަންތައްތައް ކަމަށް ބެހެއްޓުމުން، ގުޅުމަށް ބުރުއަރަން ފަށާފާނެއެވެ.
ޤަދަރުކުރުން: އަނެކާގެ ހުނަރާއި ޝަޚްޞިއްޔަތަށް ޤަދަރުކޮށް އަގުވަޒަންކުރަންވާނެއެވެ. ވަކި ކަމަކީ ފެންވަރުދަށް ކަމެއް ގޮތުގައި ކަނޑައަޅާ، ތިމާގެ ބައިވެރިޔާގެ ހުނަރާއި، އަދާކުރާ ވަޒީފާ ނުވަތަ ކުރާ މަސައްކަތް ދަށްކޮށްލާ، ހިތްވަރުއެލޭ ބީދައިން ފާޑު ކިޔުމުން މައްސަލަތައް ޖެހުން ވަރަށް ގާތެވެ.
ލޯބިވާކަން ހާމަކުރުން: ގަވާއިދުން ލޯބި ފާޅުކޮށް ދެއްކުން މުހިންމެވެ. ލޯބިވާކަން ޢަމަލާއި ބަހުން ތިމާގެ ބައިވެރިޔާއަށް ދައްކުވައިދިނުމުން ގުޅުން އިތުރަށް ބަދަހިވެ، ވަރުގަދަވާނެއެވެ.
ކެތްތެރިވުން: ގޮންޖެހުންތަކާ ކުރިމަތިލުމުގައި ކެތްތެރިކަން އިސްކުރަންވާނެއެވެ. ހިތް ނޭދޭ ކަންތައްތައް ފެންނަ ވަގުތުތަކާއި، މައްސަލަތައް ޖެހޭ ޙާލަތްތަކުގައި ކެތްތެރިކަމާއެކު ކަންކަން ހައްލު ކުރުމަށް ސަމާލުކަން ދޭންވާނެއެވެ.
މިނިވަންކަން: އިސްލާމީ ހުދޫދުން ބޭރުނުވާ އަދި އިސްލާމްދީން މަނާ ނުކުރާ ކަންކަމުގައި ބައިވެރިޔާއަށް އަމިއްލަ މިނިވަންކަން ދިނުމަކީ މުހިންމުކަމެކެވެ.
ޙެޔޮ ނިޔަތް: އަނެކާގެ ނިޔަތާމެދު ހެޔޮގޮތުގައި ވިސްނާ، އެފަރާތުން ނިންމާ ނިންމުންތަކުގައި ކޮންމެވެސް މަޤުސަދެއް ވާނެކަން ޤަބޫލު ކުރުމުން އިތުބާރާއި ޔަޤީންކަން އިތުރުވާނެއެވެ.
ޓީމްވޯކް: ކޮންމެ ކަމަކީވެސް ޓީމްވޯކަކަށް ހެދުމުން ދިރިއުޅުމުގެ ކަންކަން ފަސޭހަވާނެއެވެ. ގޭތެރޭގެ ކަންކަމާއި، ދަރިންގެ ކަންކަމުން ގޮސް، ދިރިއުޅުމުގެ މުހިންމު ނިންމުންތައް ކަނޑައެޅުމުގައި ދެފަރާތުގެ ހިއްސާ އޮތުން ބުއްދިވެރިއެވެ.
ޢާއިލީ ވަގުތު: ޚާއްޞަ ޢާއިލީ ވަގުތު ކަނޑައަޅާ، ހަމައެކަނި އާއިލާއާއެކު ހޭދަކުރާ ވަގުތަކަށް އެ ވަގުތުތައް ހެދުމުން އާއިލީ ލޯބި އިތުރުވެ، ހަރުދަނާ ވާނެއެވެ. ފޯނުފަދަ 'ޑިސްޓްރެކްޝަން'ތަކުން ދުރުވެ، ހަމައެކަނި އާއިލާއަށް ހުސްވުމުން ލިބިގެންދާނީ ތަފާތު އުފަލަކާއި ހިތްހަމަޖެހުމެކެވެ.
ލޯބިވެރިޔަކަށްވުރެ އަނތްބެއް އިޙްތިޔާރު ކުރުމުގެ ފައިދާތައް ނުހަނު ގިނައެވެ. ކައިވެނީގެ ދިގު ދުވަސްތަކުގައި އެކުގައި އުޅެ، އަނެކާގެ އުފަލާއި ހިތާމައިގައި ބައިވެރިވެ، ލޯބި ދެއްކުމުގެ ނަތީޖާއަކީ ދުނިޔެއާއި އާޚިރަތުގެ ހެޔޮކަމެވެ. ދުނިޔެއާއި އާޚިރަތުގެ އުފަލެވެ. މަތިވެރި ލޯބި ލިބެނީ ދުވަސްތަކާއެކު އެ ލޯބީގެ ބަގީޗާއަށް ފެންދީ ބަލެހެއްޓުމުގެ ތެރެއިންނެވެ. އަދި ކައިވެނީގެ ބޭރުން ހިންގޭ ގުޅުންތަކަށް ނޫނެކޭ ބުނެ، އަނތްބެއް އިޙްތިޔާރު ކުރުމުގެ މުހިންމުކަމަކީ ހަމައެކަނި ދުނިޔަވީ ލާބަޔާއި މަންފާއަށްވުރެ ބޮޑަށް، އުޚްރަވީ ދަރުމައާއި ހެޔޮ ޖަޒާ ހޯދުމަށް ކޮށޭ މަގެކެވެ. އެހެންކަމުން، ދިގު މުއްދަތަކަށް އެއް ފަރާތަކާއެކު ދިރިއުޅުމަށްޓަކައި، ލޯބިވެރިއެއްގެ ބަދަލުގައި އަނތްބަކު އިހްތިޔާރުކުރުމަކީ ޙަޔާތުގައި ކާމިޔާބު ހޯދުމުގެ ތަޅުދަނޑިއެކެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން