ޖުމްހޫރީ މޭވާ ނުވަތަ ޕެޝަން ފުރުޓަކީ ސައިޒުން ކުޑަ ނަމަވެސް ވިޓަމިންތަކުން މުއްސަނދި މޭވާއެކެވެ. ރާއްޖޭގައިވެސް ހައްދާ އުޅޭ މި މޭވާއަކީ ސިއްޙަތަށް ބަލައިގެން އުޅޭ މީހުންގެ މެދުގައި މަޤުބޫލު މޭވާއެކެވެ. މިއީ ދުނިޔޭގެ ގިނަ ޤައުމުތަކުގައި ހައްދާ އުޅޭ އާންމު މޭވާއެކެވެ. ޖޫސް ގިރުމަށާއި ފޮނިކާތަކެތި ހެދުމަށް ޕެޝަން ފުރުޓް ބޭނުންކުރެއެވެ.
ނިއުޓްރިއެންޓްސް
ޖުމްހޫރީ މޭވާގައި ފައިބަރ، ވިޓަމިން ސީ އަދި ވިޓަމިން އޭ އިން މުއްސަނދި މޭވާއެކެވެ. ދަނބުކުލައިގެ އެންމެ ޕެޝަން ފުރުޓެއްގައި 17 ކެލޮރީ ހުރެއެވެ. އެންމެ ޕެޝަން ފުރުޓަކުން މީހަކަށް ދުވާލަކަށް ބޭނުންވާ ވިޓަމިން ސީގެ 9% އަދި ވިޓަމިން އޭގެ 8% ލިބެއެވެ. މީގެ އިތުރުން، އެއް ދުވަހަށް ބޭނުންވާ އަޔަން، ދަގަނޑު އަދި ޕޮޓޭސިއަމްގެ 2% އެންމެ ޕެޝަން ފުރުޓަކުން ލިބޭއިރު 2 ގްރާމް ފައިބަރވެސް މި މޭވާގައި އެކުލެވިގެންވެއެވެ.
ފައިދާތައް:
1. ހަޖަމުކުރުމުގެ ނިޒާމު ހަރުދަނާކުރުން: ޖުމްހޫރީ މޭވާއަކީ ފައިބަރއިން މުއްސަނދި މޭވާއެކެވެ. ފައިބަރއަކީ ހަޖަމުކުރުމުގެ ނިޒާމު ހަރުދަނާކޮށް ގޮހޮރު ދުޅަހެޔޮކޮށްދޭ މާއްދާއެކެވެ.
2. ކޮލެސްޓްރޯލް ދަށްކުރުން: އެމެރިކަން ހާޓް އެސޯސިއޭޝަނުން ހާމަކުރި ގޮތުގައި ފައިބަރއަކީ ކޮލެސްޓްރޯލް ދަށްކޮށްދީ ހިތް ދުޅަހެޔޮކޮށްދޭ މާއްދާއެކެވެ.
3. ލޭގައި ހަކުރުގެ މިންވަރު ބެލެހެއްޓުން: ޖުމްހޫރީ މޭވާގެ ސަބަބުން ހަޖަމުކުރުން ރަނގަޅުކޮށްދޭއިރު ލޭގައި ހަކުރު އެކުލެވޭ މިންވަރު މައްޗަށް ދިއުމުން ދުރުކޮށްދެއެވެ.
4. ދިފާޢީ ނިޒާމު ވަރުގަދަކުރުން: ވިޓަމިން ސީ އިން މުއްސަނދި ޕެޝަން ފުރުޓަކީ ހަށިގަނޑުގެ ދިފާޢީ ނިޒާމު ވަރުގަދަކޮށްދޭ މޭވާއެކެވެ. މީގެ ސަބަބުން ބަލިތަކާ ދެކޮޅަށް ހަށިގަނޑު ކުރާ މަސައްކަތް ވަރުގަދަވެ ހަރުދަނާވެއެވެ.
5. ހިތުގެ ދުޅަހެޔޮކަން: ޖުމްހޫރީ މޭވާއަކީ ހިތަށް ފައިދާ ހުރި ޕޮޓޭސިއަމް ހިމެނޭ، ސޯޑިއަމް މަދު މޭވާއެކެވެ. މީގެ އޮށްތަކުގައިވެސް ކޮލެސްޓްރޯލްގެ މިންވަރު ދަށްކޮށްދޭ މާއްދާތައް ހިމެނެއެވެ. ސޯޑިއަމް ދަށްވެ ޕޮޓޭސިއަމް މުއްސަނދިވުމަކީ ލޭގެ ޕްރެޝަރ ދަށްކޮށްދޭ ކަމެކެަމެކެވެ.
6. ހަކުރުބަލިން ރައްކާތެރިވުން: ޖުމްހޫރީ މޭވާއަކީ ހަކުރުބަލިން ދުރުކޮށްދިނުމަށް އެހީތެރިވެދޭ މޭވާއެކެވެ. ރޯދައަށް ހުންނައިރު ހަކުރު އަޅާފައި ހުންނަ ފަނިބުއިމަކީ އެހާ އެދެވިގެންވާ ކަމެއް ނޫން ކަމަށް ސިއްހީ މާހިރުން ލަފާދެއެވެ. ވީމާ، ރޯދަ ވީއްލުމަށް ހަކުރު ނާޅާ ހުންނަ ޕެޝަން ފްރުޓުން ފަނިގިރުމަކީ ރަނގަޅު އޮޕްޝަނެކެވެ. ހަކުރު ނާޅާވެސް ޕެޝަން ފްރުޓަކީ އޭގެ ޒާތުގައި ފޮނި ރަހަ ހެޔޮވަރު މޭވާއެކެވެ.
ރާއްޖޭގައިވެސް ހައްދާ އުޅޭ މި މޭވާއަކީ ޖޫސް ގިރުމަށާއި ޑެޒަޓްސް ހެދުމަށް ބޭނުންކުރެވޭ މަޤުބޫލު މޭވާއެކެވެ. ސިއްޙަތަށް ބަލައިގެން އުޅޭ މީހުންގެ މެދުގައި މި މޭވާ މަޝްހޫރުވެފައިވަނީ މީގެ ފައިދާތަކުގެ ސަބަބުންނެވެ. ޚާއްޞަކޮށް ހަކުރުބައްޔާއި ހިތުގެ ބަލިތަކުން ރައްކާތެރިވުމަށް މި މޭވާ ބޭނުންކުރުމަކީ ފައިދާ ހުރި ކަމެކެވެ.
