ކޮލެޖުން ނުކުންނަމުން ރީމާ ސުޙާއަށް ހަނާ އަޅާލިއެވެ. އެއީ އެންމެ ކުޑައިރުއްސުރެ އެކީގައި އުޅެ ބޮޑުވި ދެކުދިންނެވެ. ސުކޫލު ދައުރުވެސް އެކީގައި ނިންމުމަށް ފަހު، މަތީ ތަޢުލީމު ހާސިލުކުރަން މާލެ އައީވެސް އެކުއެކީގައެވެ. ސުޙާއަކީ ރީމާގެ ހުރިހާ އުފަލަކާއި ހިތާމައެއްގެ ބައިވެރިޔާއެވެ. ދެ ރަޙުމަތްތެރިންގެ އެއްވެސް ކަމެއް އެކަކު އަނެކަކަށް ސިއްރެއް ނޫނެވެ. ކޮލުޖުން ދިމާވި ރަށްފުށުގެ ޒުވާން ފުރައިގެ ޒިލާން، ރީމާއަށް ކަމުދާކަންވެސް އެންމެ ފުރަތަމަ ބުނީ ސުޙާ ގާތުގައެވެ. މިހާރު ސުޙާގެ އެންމެ ބޮޑު މަޤުސަދަކީ އެކަން ޒިލާންއަށް އެންގުމެވެ. އެންމެ ގާތް ރަޙުމަތްތެރިޔާގެ ޙަޔާތަށް ލޯބީގެ ބަހާރު މޫސުން ގެނައުމެވެ.

ޖެހިގެން އައި ދުވަހު އެކަންތަކުގެ ވާހަކަ ސުޙާ ނުހަނު ރަނގަޅަށް ޒިލާންގެ ގާތުގައި ބުނެފިއެވެ. ޒިލާންގެ ހިތުގައިވެސް ރީމާއަށްޓަކައި އުފެދިފައިވާ އިޙްސާސްތަކަށް އޭނާވެސް އިޢުތިރާފުވެ، ދެ މީހުންގެ މެދުގައި ލޯބީގެ ގުޅުން އެދުވަހު ފެށުނީ ސުޙާގެ ކެރޭކަމުންނެވެ. ދުވަސްތައް ފާއިތުވަމުން ދިޔައީ ހީވެސް ނުކުރާހާ ހަލުވި މިނުގައެވެ. މަތީ ތަޢުލީމުގެ އަހަރުތައްވެސް ނިމެން ނުހަނު ގާތްވީއެވެ. މި އަހަރުތަކުގެ ތެރޭގައި ރީމާއާއި ޒިލާންގެ ގުޅުންވެސް ހަރުދަނާވަމުން ދިޔައެވެ. ޒިލާން އާއި ސުޙާވެސް ގާތް ރަޙުމަތްތެރިންނަށް ވެއްޖެއެވެ. ރީމާއާއި ޒިލާންގެ މެދުގައި ކުޑަކުޑަ މައްސަލައެއް ޖެހުނަސް، އެކަން ރީމާ އެންމެ ފުރަތަމަ ހިއްސާކުރަނީ ސުޙާ ގާތުގައެވެ. ކަންކުރަންވީ ގޮތުގެ ލަފަޔާއި އިރުޝާދު ދީ، އެ މައްސަލަތައް ހައްލުކުރަން އަބަދުވެސް އެހީތެރިވުމުގައި ސުޙާ ދެމިހުއްޓެވެ. އެފަދަ ރަޙުމަތްތެރިއަކަށް ރީމާ ތާއަބަދު ޝުކުރުވެރިވެއެވެ.

ކޮލެޖުގެ ފަހު އަހަރު ނިމެން ގާތްވި ވަރަކަށް ޒިލާންގެ އުޅުމަށް ބަދަލު އަންނަން ފެށިކަން ރީމާއަށް ފާހަގަވިއެވެ. ދިމާވާ ވަގުތުތަކުގައި އަބަދުވެސް އިންނަނީ ފޯނުގައެވެ. ރީމާއާ ވާހަކަ ދައްކަނީ މަދު ފަހަރަކުއެވެ. އަވަހަށް ރުޅި ގަދަވެ، ހިތު ހުރިހާ އެއްޗެއް ރީމާ ދިމާލަށް ގޮވަން ފަށައެވެ. ފޯނުން މެސެޖެއް ކުރިޔަސް ޖަވާބެއް އަންނަނީ އެހާ ލަހުންނެވެ. ގުޅާލިޔަސް ހުންނަނީ ބޮޑު ކަމަކަށް ވެފައެވެ. ބިޒީ ވެފައެވެ. ރީމާ މިކަމާ ގުޅޭގޮތުން ވާހަކަ ދައްކާ ކޮންމެ ފަހަރަކުވެސް ޒިލާން ދައްކާ އުޛުރަކީ ކިޔެވުމުގައި ބިޒީވެގެން ބޯ ގޮވުމެވެ. އެކަމާ ހާސްވެ، ބުރަބޮޑުވެގެން ވާ ގޮތެއް ކަމަށް ބުނެ، މަޢާފަށް އެދިފައި ނިންމާލައެވެ. ރީމާ މަސައްކަތް ކުރީ މިކަންތައް އަމިއްލަ ނަފުސަށް ވިސްނައިދީ، ހަޤީޤަތުގައިވެސް ޒިލާން ބިޒީކަމުގައި ޤަބޫލުކުރާށެވެ. ނަމަވެސް އެކަމާ ދެރަވެ، ހިތުގެ އުދާސްތައް އެތައް ފަހަރަކު ސުޙާގެ ގާތުގައި ހިއްސާކުރެއެވެ. ރީމާގެ ޙާލަށް ހަމްދަރުދީވެ، ސުޙާވެސް ޒިލާން ގާތުގައި އެވާހަކަ ދެއްކިއެވެ. ލިބުނީ ހަމަ އެއް ޖަވާބެވެ. ދެއްކީ އެއް އުޛުރެވެ.

ދުވަސްތައް މިހެން ފާއިތުވަމުންގޮސް، ރީމާއާއި ޒިލާންގެ ކުލާސް ކުއްޖެއްގެ ކައިވެނީގެ ޙަފުލާއަށް ދަޢުވަތު ލިބުނެވެ. ޒިލާންއާ އެކީ ޕާޓީއަށް ދިއުމަށް ރީމާ ނުހަނު ބޭނުންވުމުން، އެކަމަށް އެދުނެވެ. ލޯބީގެ ގޮތުން އެ ދެ ޒުވާނުން ގުޅިގެން އުޅޭކަން ނޭނގޭ ކުލާސް ކުއްޖެއް ނުހުންނާނެއެވެ. އެއީ ސިއްރެއް ނޫނެވެ. ނަމަވެސް ހަފުލާއަށް ދިއުމަށް ޒިލާން އެއްބަހެއް ނުވިއެވެ. އެސައިމެންޓެއް އޮތީކަމަށް ބުނެ، ރީމާ ކުރި އާދޭހުގައި އޭނާ ޖެހީ ކޮޅުފައިންނެވެ. "ކީއްވެތަ އަންޑަރސްޓޭންޑް ނުވަނީ؟ ދެވޭ ނަމަ ދިޔައީސްކަން ރީމާއަށް އެނގޭނެ. ކުދި ކުދި ކަންކަމާ މާ އަވަހަށް ނުރޮއެ ބަލަ. ކިހާ ބޮޑު ކަމެއްތަ އަޅެ ދެން ތިޔައީ. އަހަރެންގެ ކަންކަން ނުވިސްނެންޏާ، ރީމާ ކަހަލަ މާ އިމޯޝަނަލް އިންސާނަކާ އެކީ މަށަކަށް ނޫޅެވޭނެ. ދޭބަލަ ސުޙާއާއެކީ ފާޓީއަށް." ޒިލާންގެ ޖުމުލަތައް ތޫނު ހަންޖަރަކަށްވުރެވެސް ރަނގަޅަށް ރީމާގެ ހިތް ކަތިލައިފިއެވެ. އެ ދަނޑިވަޅުގައިވެސް ރީމާގެ ކަރުނަތައް އޮއްސާލީ ސުޙާގެ އުނގަށެވެ. ސުޙާގެ އުނގުގައި ބޯއަޅައިގެން އޮވެ، އެތައް އިރަކު ރީމާ ރުޔެވެ. ސުޙާގެ ގާތަށް އައި ރުޅީގައި ޒިލާންއަށް ގުޅާފައި އެއްޗެހި ގޮވާލިއެވެ. ބޭނުންހާ ގޮތެއް ހަދަން ރިމާއަކީ ކުޅޭ ކުޅޭ ބުދެއް ނޫންކަމަށް ބުންޏެވެ. ރީމާ ދިފާއުކޮށްފައި ސުޙާ ވާހަކަ ދެއްކުމުން ރީމާއަށް ލުޔެއް ލިބުނެވެ. ހަމަޖެހުމެއް ލިބުނެވެ. އެކަމަކު ސުޙާ އާދޭސް މަތިން އާދޭސް ކުރުމުންވެސް، ފާޓީއަށް ދިއުމަށް ރީމާ އިންކާރު ކުރިއެވެ. އެންމެ ފަހުން ފާޓީއަށް ދިޔައީ ސުޙާ އެކަންޏެވެ. ޕާޓީ ފެށުނުތާ 15 މިނެޓު ނުވަނީސް، ރީމާގެ ކޮއްކޮ އައިސް ގޮވިއެވެ. ކައިވެނި ކުރެވުނު ދެ ޒުވާނުންގެ ތެރެއިން އަންހެން ކުއްޖާއަކީ، ރީމާގެ ކޮއްކޮ ރަމްޝާގެ އެންމެ ގާތް ރަހުމަތްތެރިޔާގެ ދައްތައެކެވެ. ކުލާހެއް ނިންމާފައި ދާން ޖެހުމުން ހަފުލާއަށް ދިއުމަށް ލަސްވެ، އެކުގައި ދާނެ ކުއްޖެއް ނެތުމުން، ރަމްޝާއާއި އެކީ ދިއުމަށް އެދި އާދޭސް ކުރިއެވެ. ހިތާ ދެކޮޅަށްވެސް ރީމާ އެއްބަސްވުމަށްފަހު ކޮއްކޮއާއެކީ ދިޔައީ ރަމްޝާ ގޮތްދޫނުކުރީމައެވެ.

ހަފްލާ އޮތް މާލަމަށް ވަދެވުމާއެކު ރީމާގެ ގައިން ހީބިހި ނަގައިގަތެވެ. ހުއްޓުން އަރާފައި ބަލަހައްޓައިން އެ ހުރެވުނީ ދެލޯ ތަންމިނަށް ހުޅުވައިންނެވެ. މާލަމުގެ އެއްކަނެއްގައި އެތިބީ އޭނާ ފުރާނައަށްވުރެ ލޯބިވީ ޒިލާންއާއި، އަމިއްލަ ނަފުސަށްވުރެ ބޮޑަށް އިތުބާރު ކުރި ސުޙާއެވެ. ރީތިކޮށް ތިބީއެއް ނޫނެވެ. ޒިލާންގެ އަތްވަނީ ސުޙާގެ އުނަގަނޑުގައި ލޯބިން ވަށާލެވިފައެވެ. ސުޙާގެ ނިއްކުރިއަށް ޒިލާން ބޮސްދެމުން، ދެ މީހުން ހުއްޓި އެތިބީ ފޮޓޯއަކަށެވެ. ފޮޓޯ ނަގަން އެހުރީ ޒިލާންގެ އެންމެ ގާތް ރަޙުމަތްތެރިޔާއެވެ. ތިން މީހުންވެސް ހީސަމާސާކޮށް ސަކަރާތް ޖަހަމުން ދިޔައެވެ. ރީމާގެ ލޮލަށް ކަރުނަތައް ޖަމާވާން ނެގީ ފަޅި ސިކުންތެކެވެ. ނޭވާލާން އުނދަގުވާން ފެށިއެވެ. އެމީހުން މަލާމާތްކޮށް ހެމުން އެދަނީ ރީމާ ދިމާލަށްކަމަށް ސިފަވާން ފެށިއެވެ. ހަފުލާއަށް ނާދެވޭނޭ ކިޔާފައި ޒިލާން ހެދީ ދޮގެވެ. ސުޙާ ދެއްކީ ހަޤީގަތެއް ނެތް ކުލުނެވެ. ވަރަށް ހިތްވަރު ކޮށްފައި ރީމާ އެ މީހުންނާ ތަންކޮޅެއް ކައިރިވިއެވެ. ބަހައްޓާފައިވާ މައު ހަރެއްގެ ނިވަލުގައި ހުރިއިރު އެމީހުންގެ ވާހަކަތައް އަޑުއިވެއެވެ. "އެނގޭތަ؟ އޭނަ އައިސް ޖަހާ ރޮއެ ނެގި އިރު، އަހަރެން ވަރަށް ރުޅިއައިސް ކަމަށް ހަދާފަ ބުނިން ޒިލާންއަށް ގުޅަނީއޭ. ފޯނު އަތަށް ނަގާފަ އެއްވެސް ނަމްބަރަކަށް ޑައިލް ނުކޮށް ވަރަށް އިމޯޝަނަލް ވާހަކަ ދައްކާފަ، ޒިލާން ދިމާލަށް އެއްޗެހި ކީއިރު އޭނައަށް ހީވާނެ މަ ގުޅައިގެން ހަމަ އެއްޗެހިކީއޭ. މަ ދެން ބޭކާރު މީހަކަށްޓަކައި ނުގުޅާނެ ދޯ އަހަރެންގެ ޒީ ދިމާލަށް އެއްޗެހި ކިޔާކަށް. އެހެން ނޫނަސް، އަހަރެން އޭނައާއެކީ މިހުރިހާ ދުވަހު މި އުޅެނީ އަހަރެން ބޭނުން އެއްޗެއް ވިއްޔާ އޭނަ ހޯދައިދޭތި ވީމަ. އޭނަ ހިތުން ޒިލާން މިރޭ ހަމަ ހޭވައްޓާލާފަ އެސައިމެންޓު ހަދަނީ." ހެމުން ހެމުން ސުޙާ ބުނި ޖުމުލަތަށް ހީވީ ރީމާގެ ހިތް ފަޅާލިހެންނެވެ. އަނގަމަތީ އަތްއަޅާފައި ރޮވެން ފެށުނެވެ.

"އާނއެކޭ. އޭނަ ހިތުން މަށާ އޭނައާ ދޭތެރޭ ޖެހޭ މައްސަލަތައް ޝެއަރ ކުރަނީ ސުޙާ ގާތު. ސުޙާ މަށަށް ވިސްނައިދޭ ކަމަށް. އޭނައަށް ކިހިނެއް އެނގޭނި، އެ ވަގުތުތަކުގައި އަހަރެމެން ދެމީހުން އެކަމާ ހީހީފަ އޭނައަށް މަލާމާތް ކުރާކަމެއް. އޭނަގެ ގަމާރު ކަމުން. އަހަރެމެންގެ ގުޅުމަށް މިހާރު 2 އަހަރުވަނީ. އޭނަގެ ފަރާތުން ނުލިބޭ މަށަކަށް އުފަލެއް. ކައިވެންޏަށްފަހު ނޫނީ ގައިގަ އަތްލަން ކަމަކު ނުދޭ. އެ އުފާވެސް އެތައް ރެޔަކު މަށަށް ދިނީ ހަމަ ސުޙާ. އެއިން އެއްކަމެއްވެސް އޭނައަކަށް ރެޔަކާ ނުލާ." ސުޙާގެ އަތް ތިލައަށް ބޮސްދެމުން ޒިލާން ބުންޏެވެ. ތީރަކަށްފަހު ތީރެއް ރީމާގެ ހިތަށް ހެރެމުން ދިޔައެވެ. ހީވީ ހަމަ ލޯމައްޗަށް އަނދިރިވެގެން ވެއްޓެން އުޅުނު ހެނެވެ. ނަމަވެސް ވަރަށް ހިތްވަރު ކޮށްފައި، އެ ހުރިތަނުން ނުކުމެ އެމީހުންގެ ކުރިމައްޗަށް ރީމާ އެރިއެވެ. ޒިލާންއާއި ސުޙާ ގަނޑުވި ކަހަލައެވެ. ދެންމެ ހީހީފައި، ދުލެއް އޮތީތީ ހުސްނުވާ ވަރަށް ވާހަކަދެއްކި ދެމީހުންގެ އަނގަ ބަންދުވެއްޖެއެވެ. "ރީ..ރީ.. ރީ މިތާތާ؟" ތުރުތުރު އަޅާ އަޑަކުން ސުޙާ ސުވާލު ކުރިއެވެ. "އާނ. އަހަރެން ފެނުނީނަމަ އުފަލެއް ނުވިތަ؟ ލައްކަ އާދެސް ކުރީމެންނު ހަފުލާއަށް އަންނާށޭ ކިޔައިން. އަހަރެން ނުދަންޏާ ނުވެސް ދާނަމޭ ކިޔައިން ވަރަށް ޑްރާމާ ކުޅެފައެއްނު ތިއައީ." ކުރަކިވެފައިވާ އަޑަކުން ރީމާ އަމާޒު ކުރިއެވެ. "ނޫނޭ. ރީ ނައިސްގެން އެކަމާ ދެރަވެގެން އެ ވާހަކަ މި ދައްކަނީވެސް. ޒިލާންވެސް ގަދަކަމުން ގެނައީ މިހިރަ މޯޑު." ރޯ ބުހުތާނު ދޮގެއް ހަދާލީ، ސުޙާގެ އަސްލު ސޫރަ ރީމާއަށް އަދިވެސް ވަންހަނާ ކަމަށެވެ. "ލަދެއް ނުގަނޭތަ ބޮޑެތި ދޮގު ހަދާކަށް؟ އުހުން.. އަހަރެންގެ ބެސްޓްފްރެންޑަށްވެ ހުރެ، އަހަރެންގެ ލޯބިވެރިޔާ އާއެކީ ލޯބީގެ ގޮތުން ގުޅިގެން އުޅެން ލަދު ނުގަތް މީހަކު، ދޮގެއް ހަދަން ކޮން ލަދެއް ގަންނާނި. ބޭކާރު އެކްޓު ކުރާނެ ކަމެއް ނެތް. ކަލޭމެން ޖެއްސިހާ ވައްތަރެއް އަހަރެންގެ ދެލޮލުން ދެކެފިން. ދެއްކިހާ ވާހަކައެއްވެސް އަޑުއިވިއްޖެ. އިތުރަށް ތަފުސީލެއްވެސް ބޭނުން ނުވާ މިންވަރަށް ކަންކަން ސާފު ވެއްޖެ. މި ކަންކަން އެހެން މީހަކު އަހަރެން ގާތު ބުނި ނަމަ ދުވަހަކުވެސް ޤަބޫލެއް ނުކުރާނަން. އެންމެ ކުޑައިރުއްސުރެ އަހަރެން އެންމެ އިތުބާރު ކުރީ ސުޙާއަށް. އަހަރެން ދެކުނީ ތިޔައީ އަހަރެންގެ ޙަޔާތަށް ހުރި ރަޙުމަތެއް ގޮތުގަ. މި ދުނިޔެމަތީ ކޮންމެ މީހަކު ކޮންމެ ގޮތެއް ހެދިޔަސް، ސުޙާ އަހަރެންނަށް ދެރަގޮތެއް ނުހަދާނެ ކަމަށް އަހަރެން ޔަޤީން ކުރިން. އަހަރެންގެ ލޮލުން ކަރުނަ ފާއްދާލާ ކޮންމެ ފަހަރަކު، ތިޔަ ދެއަތުން ކަރުނަތަށް ފޮހެދޭނަކަމަށް އަހަރެން އުއްމީދު ކުރިން. ސުޙާގެ އުނގަކީ އަހަރެން މާޔޫސްވާ ކޮންމެ ފަހަރަކު، އެންމެ ލުއިކަން ގެނެސްދޭ ތަންކަމުގައި އަބަދުވެސް ޤަބޫލު ކުރިން. ހެރުނު ހަންޖަރުގެ ވޭނަށްވުރެ، އެންމެ ފުން އަސަރެއް ކުރީ މި ހަންޖަރު ހެރި މީހަކީ ސުޙާއަށް ވީމަ." ރީމާގެ އަޑު ކުރަކިވަމުން ގޮސް އެކީގައި ރޮވިއްޖެއެވެ.

"އެއް އަތް ޖެހިއަކަސް އަޑެއް ނުކިޔާނެ. ޒިލާންވެސް މިކަމުގައި ބައިވެރިވީ އެއްވަރަށް. އަހަރެން ލޯބިވީ އިންތިހާއަށް. އަބަދުވެސް ޒިލާންގެ ސައިޑު އަންޑަރސްޓޭންޑް ވާން މަސައްކަތް ކުރިން. އިތުރު މީހަކާ ދިމާ އިސްއުފުލާ ލޯބީގެ ނަޒަރުން ބަލައިވެސް ނުލަން. އެހާ ބޮޑަށް އިތުބާރު ކުރިން. އެކަމަކު އަހަރެންނަށް ދޯކާ ދިނީވެސް އަހަރެންގެ އެންމެ ގާތް ރަޙުމަތްތެރިޔާ އާއެކީ. ފިސާރި ކެރިއްޖެ އެއްނު. އަހަރެންގެ ފަރާތުން ނުލިބުނޭ ތިޔަ ބުނާ ކަހަލަ ލޯބި ތިފަދަ ގޮތަކަށް ހޯދަން ކެރިއްޖެ އެއްނު. އަހަރެންނަށް މިހާ ބޮޑު ލަނޑެއް ދިންއިރު، ހިތަކަށް ނާރާތަ ތިޔަ ދެމީހުންވެސް އެހެން މީހަކަށްޓަކައި އެކަކު އަނެކަކަށް ދޯކާ ދީފާނެޔޭ؟ އަހަރެންގެ ބެސްޓްފްރެންޑަށްވެ ހުރެ، ޒިލާންއާއެކީ ސުޙާ އުފެއްދި ކަހަލަ ގުޅުމެއް، ޒިލާންއާ އެކީ އުޅެމުން އެހެން މީހަކާ އެކީ ނުބާއްވާނެ ކަމުގެ ޔަޤީންކަން ޒިލާންއަށް އެބައޮތްތަ؟ އަހަރެންގެ ލޯބިވެރިޔާއަށްވެ ހުރެ، އަހަރެންގެ އެންމެ ގާތް ރަޙުމަތްތެރިޔާއާ ލޯބީގެ ގޮތުން ގުޅުނު މީހަކު، ތިމާއަށް ވަފާތެރިވާނެހެން ސުޙާއަށް ވަކި ހީވޭތަ؟ ގަމާރީ އަހަރެންތަ ނޫނީ ކަލޭމެން ދެމީހުންތަ؟" އިސްދަށަށް ޖަހާލުން ނޫން އިތުރުކަމެއް ޒިލާންއާއި ސުޙާއަކަށް ނުކުރެވުނެވެ. އެތަނުގައި ހުރުމުން ރީމާގެ ނޭވާ ހާސްވަމުން ދިޔަ ކަހަލައެވެ. ފުން ނޭވާތަކެއްލަމުން، އެ ޖާދުވީ މާލަމުން ރީމާ ނުކުމެ ދުއްވައިގަތީ، އެ ދެމީހުންނާ ދެމެދު އޮތް ގުޅުން ނިމުނީ ކަމަށް އިޢުލާން ކޮށްފައެވެ. މިއަދު އެންމެ ބޮޑު ހިތްދަތިކަމެއް އެލިބުނީ އެންމެ އިތުބާރު ކުރި ދެ މީހުންގެ ފަރާތުންނެވެ. ހިތުން ފައިބަމުން ދިޔަ ލެޔަށްވުރެ ބޮޑު ވޭނެއް އެޅީ، އެ ލޭތަށް އޮހޮރުވާނެ ހަންޖަރު ހެރި ދެމީހުން ފެނުނީމައެވެ. ހަންޖަރު ހަރާ މުޅި ހިތް ޒަޙަމްކޮށްލީ، ހިތުގައި އެންމެ ފުރިހަމައަށް ޖާގަދެވިފައިވާ ދެމީހުންނެވެ.