އަހަރެންނަކީ ރަނގަޅު ތަޢުލީމެއް ހާސިލްކުރުމަށް މާލެ ފޮނުވި އަންހެން ކުއްޖެކެވެ. ފައިސާ ހޯދުމަށް މައިންބަފައިން އެތައް ދަލެއް އޮހޮރުވައިންވެސް އަހަރެން މާލެ ފޮނުވީ، ކިޔަވައިގެން ޤަދަރުވެރި ހަރުދަނާ ޝަހުސިއްޔަތަކަށް ހެދުމަށެވެ. ފެންނަހާ ކުއްޖަކާ އެކުވެރިވެ، ގޯސް މަގުން ނުދިއުމަށް އެތައް ނަސޭހަތެއް ދިނެވެ. އަހަރެންގެވެސް ޢަޒުމަކަށްވީ ފާހަގަކޮށްލެވޭ ނަތީޖާއެއް ނެރެ، ތަޢުލީމުގެ މި ހަރުފަތްވެސް ރިވެތި ގޮތުގައި ނިންމާލުމެވެ. ކުދިން ބަހައްޓާ ގެއެއްގައި ހުރެގެން، އޭލެވެލް ނިންމާލީ ރަނގަޅު ނަތީޖާއަކާއި ރިވެތި އަޚްލާޤެއްގެ މަތީގައެވެ. އެހެންކަމުން މައިންބަފައިން އަހަރެންނަށް ކުރާ އިތުބާރު ބޮޑުވެ، މަތީ ތަޢުލީމު ހާސިލުކުރުމަށްވެސް މާލޭގައި ހުރުމަށް ހުއްދަ ދިނެވެ. 

ކޮލެޖަށް ދާންފެށިތާ ގިނަ ދުވަހެއް ނުވެއެވެ. މުޅި ކެމްޕަސްގައި ނަން މަޝްހޫރު ކުދިންތަކެއް ކުރާ އެކި ކަންކަމަށް އަހަރެންނަށް ދަޢުވަތު ލިބެން ފެށިއެވެ. އެއީ ހަތަރު އަންހެން ކުދިންނާއި ދެ ފިރިހެން ކުދިންގެ ގުރޫޕެކެވެ. އެހެން ގޮތަކަށް ސިފަކުރާނަމަ އެއީ ވަރަށް ކަންކަން 'ހިންގާލާ' ގުރޫޕެކެވެ. އޭގެތެރޭގައި ހިމެނޭ މާނިއުއަކީ އަހަރެންނަށް ކަމުދާ ޒުވާނެކެވެ. ބަލައިލުމަށް ޗާލު ސިފަތަކަކާއި ޖާދުވީ ލޮލެއްގެ ވެރިއެކެވެ. ދޭތެރެއަކުން ފެންނައިރަށް އަހަރެން ވަރަށް ރީތިކަމަށާއި، އަހަރެންނަށް ވަރަށް ގަޔާވާ ކަމަށް ބުނެ ހަދައެވެ. މަޖަލަކަށް ހަދައިން 'ފްލާރޓް' ކުރަން ބުނާ އެއްޗެހިކަންވެސް އެނގެއެވެ. ނަމަވެސް އަހަރެންގެ ހިތުގައި އޭނައަށް ދެވެމުން ދިޔަ މަޤާމު މަތިވަމުން ދިޔައެވެ. މާނިއުއަށްޓަކައި ހިތުގައިވާ އިޙްސާސްތައް ވަރުގަދަވަމުން ދިޔައެވެ. އެކަމަކު އެމީހުންގެ ދަޢުވަތުތަކަށް އަހަރެން އިންކާރު ކުރީމެވެ. އެފަދައިން އެންމެން މަސްހުނިވެ، ބޭކާރު ގޮތުގައި ވަގުތުތައް ދުއްވާލަން އަހަރެން ބޭނުން ނުވާތީއެވެ.

ދުވަސްތައް ފާއިތުވަމުން ގޮސް، އިމްތިޙާނު ދުވަސްތައް ބޯމަތިވެއްޖެއެވެ. އަހަރެންގެ ސިކުނޑި ހާސްވެ، މީހާ ހަމައިން ނެއްޓޭ ވަރަށް ބޯގޮވަން ފަށައިފިއެވެ. މިއީ މީގެކުރިން ވާ ގޮތްތަކެއް ނޫނެވެ. ކޮލެޖުން އަހަރެންނާއި އެންމެ ރަޙުމަތްތެރި އީމާ ގާތު އަހަރެން މިވާހަކަތައް ހިއްސާ ކުރީމެވެ. އޭރު 'ރަމެން ނައިޓް' ގެ ނަމުގައި އޮތް ކަމަކަށް އެއްކަލަ ގުރޫޕުގެ ފަރާތުން ކެމްޕަސްގެ ހުރިހާ ކުދިންނަށް ދައުވަތެއް ލިބިފައިވެއެވެ. އީމާ ޙިޔާލުދިނީ ދެމީހުންވެސް އެތަނަށް ދިއުމަށެވެ. އެއީ ގިނަ ކުދިންތަކެއް ދާން ނިންމާފައިވާތީއާއި، ހާސްވެފައިވާ ސިކުނޑިއަށް ކުޑަ ހަމަޖެހުމަށް ލިބިދާނެ ޒަރީޢާއަކަށް ވެދާނެތީއެވެ. ބޯ ހަމަޖައްސާލުމަށެވެ. އަހަރެންވެސް އެއްބަސްވީމެވެ.

ރަމެން ކެއްކުން އޮތީ އެ ގުރޫޕް މައިހާގެ ގޭގައެވެ. އޭނާގެ ބައްޕައަކީ ވިޔަފާރިވެރިއެއްކަމުން އެވެރިންނަށް ލިބިފައިވަނީ މުއްސަނދި ދިރިއުޅުމެކެވެ. ވިޔަފާރި ދަތުރަކަށް މައިންބަފައިން ރާއްޖެއިން ބޭރަށް ގޮސްފައިވުމުން، އޭނާ ދަޢުވަތުދީގެން ދިޔަ ކުދިން ފިޔަވާ އިތުރު ބަޔަކު އެ ބޮޑު ގޭގައި ނެތެވެ. ނޫޑްލްސް ކައްކާ ނިމުމުން މުޅި މާހައުލުގައި ހުރި އާދައިގެ ބޮކިތައް ނިއްވާ، އެކި ކުލަކުލައިގެ ލައިޓުތައް ދިއްލައިލިއެވެ. ޕާޓީ މެހެފިލަކަށް ހަދާ ލަވަ ޖަހައިފިއެވެ. އެކަން އަހަރެންނަށް ކަމުނުދިއުމުން، ގެއަށް ދާން ބޭނުންވިއެވެ. ނަމަވެސް އެއްވެސް ކުއްޖަކު ނުނިކުންނާތީ އަހަރެންނަށްވެސް ނުކުންނަށް ނުކެރުނީއެވެ. އީމާ ޖޫސްތަށްޓެއް ބަލައިދިޔަ ވަގުތު، އަހަރެން އެއްކަނަކަށް ޖެހިލީމެވެ. ސިއްސައިގެން ދިޔައީ މާނިއުގެ އަޑު އިވުމުންނެވެ.

އަހަރެންގެ ހިތް ތެޅިގަތެވެ. ހިތް ދަމައިގަންނަ ފަދަ ގޮތަކަށް ސްޕައިކް ކޮށްފައިވާ އިސްތަށިގަނޑުން އޭނާގެ ނިއްކުރިއަށް ތިރިވެފައިވާ އިސްތަށިކޮޅަށް ބެލެމުން ދިޔައީ އިޙްތިޔާރަކާ ނުލައެވެ. ކަޅުކަން ގަދަ ކަޅިވެސް އެހާ ކައިރިން ފެނުނީ އަލަށްކަމުން، އެ ސޫރައިގެ ރީތިކަން އިތުރަށް ފުރިހަމަކަމަށް ދައްކައެވެ. އޭނާ ކުރިންވެސް ބުނާކަލަ އިޝްޤީ ޢިބާރާތްތަކުން އަހަރެންގެ ހިތާ ކުޅެމުން ދިޔައެވެ. އޭރު ޖަހާފައިވާ މަސްތީ ލަވައެއްގެ ސަބަބުން މުޅި މާހައުލުވަނީ އިޝްޤީ ކޮށްފައެވެ. މާނިއު އަހަރެންގެ އަތުގައި ހިފައިގެން ކައިރީގައި ހުރި ކޮޓަރިއަކަށް ވަނެވެ. އަތް ފޮޅާލާފައި ދާކަށް އަހަރެންގެ ހިތެއް ނޭދުނެވެ. އެ ބީހިލުމުން ލިބުނު އުފާ ބަޔާން ކޮށްދޭން ދައްޗެވެ. އަހަރެންގެ ދެކޮނޑުގައި ފަރުވާތެރިކަމާއެކު ހިފާލާފައި އޭނާއާ ހަތަރުކަޅި ހަމަކުރުވިއެވެ. އެންމެ ކުރިންވެސް ނުހަނު ލޯބިވާކަމަށާއި، އެއީ މަޖަލަކަށް ދެއްކި ވާހަކައެއް ނޫންކަމަށް ބުނެ އަހަރެންނާ ކައިރިވެލިއެވެ. އެ އިޙްސާސްގައި އަހަރެންގެ ހިތް މުޅިން އޭނާއަށް ލެނބިއްޖެއެވެ. އަމިއްލަ އިޙްތިޔާރުގައި އެއްވެސްކަމެއް ނެތްކަހަލައެވެ. ވާނުވާއެއް އަހަރެންނަށް ރެއަކާވެސް ނުލިއެވެ. އެ މަސްތުގެ އަވާގައި ޖެހި، މާނިއުގެ ކޮންމެ އެދުމަކަށް އަހަރެންނަށް އިޖާބަދެވެމުން ދިޔައެވެ.

އަހަރެންނަށް ހޭވެރިކަމެއް ވީއިރު ވާކަމެއްވެ ނިމިއްޖެއެވެ. ލަދުވެތިކަމުގެ ސާލެއް އަހަރެން ވަށާލިއެވެ. އޭރު ގަޑިން މެންދަމު އަލިވެ 2 ޖެހީއެވެ. ޕާޓީއަށް އައި އެންމެން ގެއަށް ހިނގައްޖެއެވެ. އީމާގެ 3 މިސްކޯލުވެސް ފެނުނީ އެވަގުތެވެ. އަވަސް އަވަހަށް އަހަރެން ގެއަށް ދިޔައީ މާނިއުއަށް ގޮވާލުމެއް ނެތިއެވެ. ގެއަށްގޮސް އަހަރެން ރުއީމެވެ. ކުރެވުނު ފާފައިގެ އިޙްސާސް ކުރެވުނީމައެވެ. މުސައްލަމަތީ އިނދެ، ލަދުވެތިކަމުގެ ކަރުނަތައް އަހަރެން އެޅީމެވެ. އެކަމާ ދެރަވެ ތަޢުބާވީމެވެ. މާތް ކަލާނގެ ހަޟްރަތުގައި މަޢާފަށް އެދުނީމެވެ. އެ ފާފައަށް އިޢުތިރާފުވެ، އެކަމާ ހިތާމަ ކުރީމެވެ. ކޮލެޖަށް ނުގޮސްވެސް އަހަރެން ހަފްތާއެއް ވަންދެން ހުރެފައި ކޮލެޖަށް ދިޔައީ، ނުހަނު ހިތްވަރު ކޮށްފައެވެ. އެވީހާ ދުވަހު ފޯނު ބަލައިވެސް ނުލަމެވެ. އީމާގެ މެސެޖުތަކަށްވެސް ޖަވާބެއް ނުދެމެވެ. 

ކުލާހަށް ވަދެވުމާއެކު އެންމެންގެ ނަޒަރު އަހަރެންނަށް ހުއްޓުނެވެ. ސިއްރު ވާހަކަތައް ދައްކާ، މަލާމާތުގެ ރާގަށް ކުސަތަޅުވަން ފެށިއެވެ. ވާނުވާއެއް އަހަރެންނަށް ފަހުމެއް ނުވިއެވެ. އެވަގުތު އީމާ އައިސް އަހަރެންނަށް ދައްކާލީ އޭނާގެ ފޯނެވެ. ހަށިގަނޑުން ވާގި ދޫވި ކަހަލައެވެ. ލޯމައްޗަށް އަނދިރިވާން އުޅުހެން ހީވިއެވެ. ހުރިހާ ކުދިން ތިބޭ ވައިބަރ ގުރޫޕަށް ލާފައި އެއޮތީ އަހަރެންނާއި މާނިއުގެ ފޮޓޯތަކެވެ. އަހަރެންގެ މޫނު ހަމަ ރަނގަޅަށް ހާމަވެއެވެ. ނަމަވެސް މާނިއުގެ މޫނެއް އެންމެ ފޮޓޯއަކުންވެސް ނުފެނެއެވެ. އެންމެންގެ ކުރިމަތީ ބަދުނާމުވީ އަހަރެން އެކަންޏެވެ. އެއްކަނަކަށް ހެވިފައި، މާނިއު އަހަރެންނާ ދިމާލަށް ބަލަން އިނެވެ. އެއީ ކާކުތޯ އެންމެން ކުރިމަތީ ސުވާލުކުރީވެސް އޭނައެވެ. އަހަރެންނަށް ލިބުނު ހައިރާންކަމާއެކު ކަރުނަތައް ފައިބަން ފެށިއެވެ. އެއީ މާނިއުކަމަށް އަހަރެންނަށް ބުނެވުނީ ތުރުތުރުއަޅަމުން ދިޔަ އަޑަކުންނެވެ. "ހަމަ ބޭނުންހާ ކަމެއް ކޮށްފަ އިލްޒާމު އަޅުވަންވަނީ ފެންނަ އެންމެ ރީތި މީހެއް ބޮލުގަ ދޯ؟ ހީވޭތަ މަ ކަހަލަ މީހަކު ތިޔަ ކަހަލަ އާދައިގެ އަންހެނަކާ ދިމާ ބަލައިވެސް ލާނެހެން؟ ވަރަށް މައުސޫމު ކުދިން ކަލޭމެން ހިތުން. ބޮޑު ހެދުން ލައިގެން ބުރުގާ އަޅައިން އުޅެމުންވެސް ކޮށްލި ކަންތައް ކިހާ ތާހިރު. މާ ދީންވެރިކަމަށް ހެދިގެން އުޅޭނެ އަދި." މާނިއުގެ ކޮންމެ ޖުމުލައެއް ދިޔައީ އަހަރެންގެ ހިތް ކުދިކުދި ކުރަމުންނެވެ. ލޯބީގެ ދަޅަ ދައްކާފައި، އެންމެންގެ ތެރެއަށް އަހަރެން ފަޟީހަތް ކޮށްފިއެވެ. އަހަރެންނާ ދިމާލަށް މަލާމާތްކޮށް، އަހަރެންނަކީ ބޮޑު ފާފަވެރިއެއްކަމަށް އެތާ ތިބި އެންމެން ބުނަމުން ދިޔައެވެ. އީމާ ފިޔަވައެވެ. ގަތްފައިހުރި ލަދުންނާއި ވެފައިވާ ދެރައިން، އެތާ ހުރުމަކީ ކުޅަދާނަކަމަކަށް ނުވިއެވެ. އަވަހަށް ކުލާހުން ނުކުމެގެން އަހަރެން އައީ ގެއަށެވެ.

އީމާވެސް އަހަރެންނާއެކީ އައެވެ. އެތައް އިރަކު އޭނާ ގާތުގައިވެސް ރުއީމެވެ. ކަންވީގޮތް ކިޔައިދީ، އެކަމަށް އެއްބަސްވެސް ވީމެވެ. އިޢުތިރާފުވީމެވެ. ހިކި ފަތްތަކެއްގައި އަލިފާން ރޯވާ ހަލުވި މިނުގައި، އެ ފޮޓޯތަށް އެތައް ބަޔަކަށް ފެނިއްޖެއެވެ. އަހަރެންގެ މަންމައާއި ބައްޕައަށްވެސް މެއެވެ. އަހަރެންނަށް ގުޅާފައި އެތައް އިރަކު އެދެމީހުން ރުޔެވެ. އިސާހިތަކު ނުރުހުންވެފައި، އައިސްފައިވާ ރުޅީގައި ވަރަށް އެއްޗެހި ކިޔެވެ. އަހަރެންނަކީ އެމީހުންގެ ތަރުބިއްޔަތުގައި ހިފި ދަރިއެއް ނޫންކަމާއި، މިފަދަ ދަރިއެއް ލިބުނީތީ ހިތާމަކުރާކަމަށް ބުންޏެވެ. މީގެފަހުން އަހަރެންނަކީ އެމީހުންގެ ދަރިއެއް ނޫންކަމަށާއި، އެއްވެސް ޚަރަދެއް ނުކުރާނެކަމަށް ޢިއުލާން ކޮށްފިއެވެ. އަހަރެންނާ ހެދި މަންމައާއި ބައްޕަ މުޅި ރަށަށް ފަޟީހަތްވެ، މަގެއް މައްޗަށް ނުކުންނަށް އުނދަގޫވާވަރު ކޮށްފިކަމުގެ އިލްޒާމުވެސް އަޅުވައިފިއެވެ. ރުއިމާއި ވޭނީ އާހްގެ އަޑުނޫން އެހެން އަޑެއް އަހަރެންގެ އަރުތެރެއިން ބޭރެއް ނުކުރެވުނެވެ. އެންމެ ކުޑަމިނުން، މައިންބަފައިން ގާތު މަޢާފަށް އެދުމަށްވެސް ނުކުޅެދުނެވެ. ހުރިހާ ވާހަކައެއް އީމާއަށް އަޑު އިވޭނެއެވެ.

އަހަރެން ހުންނަ ގޭގެ ދައްތައަށްވެސް އެކަން އެނގި، އަހަރެން ގެއިން ނެރެލީ، އަހަރެންގެ ސަބަބުން އެހެން ކުދިންގެ އަޚްލާޤަށް ނޭދެވޭ އަސަރު ކޮށްފާނެތީ ކަމަށް ބުނެއެވެ. ހުންނާނެ ތަނެއް އަހަރެންނަށް ދެއްކީވެސް އީމާއެވެ. އޭނާގެ ގޭގައި އަހަރެން ހުރުމަށް އޭނާގެ މައިންބަފައިންވެސް ޤަބޫލެއް ނުވިއެވެ. ކުޑަ ކޮޓަރިއެއް ކުއްޔަށް ހިފާފައި އެތަނަށް ކުލި ދައްކާނެ ފައިސާ އީމާ ކޮންމެ މަހަކު ޖަމާކޮށްދެއެވެ. ކޮލެޖަށް ދިއުން ހުއްޓާލާފައި ވަޒީފާއެއް ހޯދީ، އަމިއްލަ ފައި މައްޗަށް ތެދުވެ، އަމިއްލަ ޚަރަދުތައް އަމިއްލައަށް ކުރުމަށެވެ. އަހަރެންގެ ފާފައަށް ކަނޑައެޅިފައި އޮންނަ އަދަބު، އަހަރެން އަމިއްލައަށް ޢިއުތިރާފުވެ ލިބިގަތީމެވެ. އެންމެން ދަންނަ ބޮޑު ސިއްރެއް އިތުރަށް ފޮރުވަން ނޫޅުނީއެވެ. އަހަރެންގެ ކުށަށް އަހަރެން ތަޢުބާވެ، މާތް ރަސްކަލާނގެ ހަޟްރަތުން ފާފަފުއްސެވުން އެދި ކޮންމެ ނަމާދެއްގެ ފަހުގައި ރޮއެ އާދޭސް ކުރަމެވެ. ސަޖިދައިން ތެދުވާއިރު މުސައްލަ ތެމިފައި އޮންނަނީ ލަދުވެތިކަމާ ބިރުވެރިކަމުގެ ކަރުނައިންނެވެ. ހިތާމަޔާއި ހިތްދަތިކަމުގެ އާޙުންނެވެ. މާތް ﷲއީ އެންމެ ރަޙީމްވަންތަ ރަސްކަލާނގެއެވެ. އެކަލާނގެ ހަޟްރަތުން އުއްމީދު ކަނޑައެއް ނުލަމެވެ. އެކަލާނގެއީ ގިނަގިނައިން ފާފަ ފުއްސަވާ، ޢަފޫކޮށްދެއްވާ ރަސްކަލާނގެއެވެ. އެކަލާނގެ މަޢާފުކުރައްވައެވެ. ނަމަވެސް އިންސާނުން މަޢާފެއް ނުކުރެއެވެ. ފެންނައިރަށް އަހަރެންގެ ހުރި ނުބައިކަމާ ލަދުޙަޔާތް ކުޑަކަމުގެ ވާހަކަ މީހުން އަދިވެސް ދައްކައެވެ. ފާޑުކިޔާ މަލާމާތްކޮށް، ބަދުބަސް ބުނެއެވެ. އެންމެނަށް އެނގެނީ އަހަރެންގެ ކުށެވެ. އަހަރެންވީ ތަޢުބާ ދެނެވޮޑިގެންވަނީ މާތް ﷲއެވެ. ކުށުގެ އަދަބުވެސް ލިބިއްޖެއެވެ. ކުށަށް ތަޢުބާވެ އިޢުތިރާފުވެސް ވެއްޖައީމެވެ. ނަމަވެސް އިންސާނުންގެ ހިތެއް ނުފުރުނެވެ. އަހަރެންގެ ހަމައެކަނި އުއްމީދަކީ އަހަރެންގެ ވެރި ރައްބެވެ. ތާއަބަދު އިންޒިރާތު ކުރެވެނީ އެކަލާނގެއާ ބައްދަލުވާނެ ދުވަހަކަށެވެ. ދުނިޔޭގެ ކެހިވެރިކަމާއި ރަޙުމެއް ނެތް ދުލުން އަބަދުމެ އަބަދަށް މިންޖުވާށެވެ. ކުރެވުނު ޢަމަލަށް ޢިއުތިރާފުވާ ޙާލުގައެވެ.   (ނިމުނީ)