"ތިޔަ ދެލޮލުން ކަރުނަ ނާޅާށެވެ. އަހަރެންނަށް ހަމަޖެހުމެއް ނުލިބޭނެއެވެ. އަހަރެން މަންމައާއި ބައްޕަދެކެ ނުހަނު ލޯބިވެއެވެ. އަހަރެންނަށް ތިޔަ މައިންބަފައިން ދީފައިވަނީ އެންމެ ރަނގަޅު ތަރުބިއްޔަތެވެ. އައުރަ ނިވާކޮށް، އިތްފަތްތެރިކަން ރައްކާތެރި ކުރުމަށް އެންމެ ކުޑައިރުން ފެށިގެން އަހަރެން ހޭނުވިއެވެ. އެކަންތައް އަހަރެން ކުރަމުން އައީ ކުރާ ހިތުންނެވެ. އާއިލީ ގުޅުންތައް ބަދަހިކޮށް، ރަޙިމުގެ ގުޅުންތައް ދެމެހެއްޓުމަށް ބައްޕަމެން ދެއްކީ ނަމޫނާއެވެ. އެއީވެސް ވަރަށް މުހިންމު ކަމެއް ގޮތުގައި ދެކިގެން، އަހަރެން އެކަންތައް ކުރަމުން އައީމެވެ. ބޮޑުބޭބެއާއި ބޮޑުދައިތަމެންގެ ގެއަށް ޒިޔާރަތް ކުރަނީވެސް އެހެންވެއެވެ. ބޮޑުބޭބެ އަބަދުވެސް އަހަރެން ދެކެ ވަރަށް ލޯބިވާނެއެވެ. ހަދިޔާދީ، ކުޅޭ އެއްޗެހިވެސް ގަނެދޭނެއެވެ. ދެން އަހަރެންނަށް ލިބުނީ ޖަވާހިރެއް ކަހަލަ ބޮޑުދައިތައެކެވެ. ކޮއްކޮ ވިހައިގެން މަންމަ ގަދަވަންދެން އަހަރެން ބެލީވެސް ބޮޑުދައިތައެވެ. ކާފައާއި މާމަވެސް ފިސަހަރި ހެވެއެވެ. އެންމެނަށްޓަކައިވެސް އަހަރެންގެ ހިތުގައިވަނީ ލޯތްބާއި އާއިލީ ކުލުނެވެ.

މަންމަމެން ހަނދާން އެބަހުރި ހެއްޔެވެ؟ އަހަރެން މާމައާއި ހަވާލުކޮށްފައި، އާއިލާ ބައެއްގެ ކައިވެނި ހަފްލާއަށް މަންމަމެން ކައިރި ރަށަކަށް ދިއުމުން އަހަރެން ގޭގައި އުޅުނީ އެކަންޏެވެ. އެއީ މީގެ 3 މަސް ކުރިންނެވެ. ސުކޫލުން އައިސް މެންދުރު ފެންވަރަން އަހަރެންވަނީމެވެ. ފާޚާނަ ބޭރުގައި މީހަކު އުޅޭ ކަހަލަ ހިލަމެއް ވިހެން ހީވިއެވެ. ޖާލިގަނޑު ކައިރިން އެއްޗެއް ހުރަސްކެނޑިހެންވެސް ހީވިއެވެ. އެކަމާ މާބޮޑަށް އަޅައެއްވެސް ނުލަމެވެ. މާމަގެ ގެއިން މެންދުރު ކައިގެން އަނެއްކާވެސް ދިޔައީ އިތުރު ގަޑިތަކަށް ސުކޫލަށެވެ.

އޭގެ 3 ދުވަސް ފަހެވެ. އަހަރެންގެ ވައިބަރއަށް ނުދަންނަ ނަމްބަރަކުން އައި މެސެޖެކެވެ. ހަށިގަނޑު ރޫރޫ އަޅައިގަނެގެން އަތުން ފޯނު ދޫވީ މުށިތައް މައްޗަށެވެ. އިޙްތިޔާރެއް ނެތި ލޮލުން ކަރުނަތައް އޮހިގަތެވެ. އެއޮތީ އަހަރެން ފެންވަރަށް އުޅުނު ވަގުތުގެ ވީޑިއޯއެކެވެ. ވީހާވެސް ބޮޑަށް އައުރަނިވާކޮށް، ހިލޭ ފިރިހެނުންނަށް ފޮރުވިގެން އުޅުމަށް އަހަރެން ކުރަމުން އައި މަސައްކަތް އެކީ ބަރުބާދު ކޮށްލީއެވެ. އެ ވީޑިއޯގެ ދަށުގައި ލިޔެފައިވެއެވެ. 'މީހެއްގެ ކައިރި ބުނަން ހިތަށް އެރިޔަސް ކުޅި ދައްކާލާނަމެވެ. އަންހެން ކޮއްކޮ ނުހާގެ އިއްފަތްތެރިކަމަށް ހިޔަނި އެޅެން ބޭނުން ނެތްނަމަ، އަނގަ ބަންދު ކޮށްގެން ހުންނާށެވެ.' މަންމަ ގާތު ކިތަންމެ ބުނަން ބޭނުން ވިޔަސް، އެ އިންޒާރު އަހަރެންގެ ދުލުގައި ތަޅު އެޅުވިއެވެ. 

އެކަމާ ވިސްނާ ވިސްނާ އަހަރެންގެ ބޯ ގޮވައިފިއެވެ. ކިޔެވުމަށް ސަމާލުކަމެއް ނުދެވެއެވެ. ކާހިތެއްވެސް ނުވެއެވެ. މީހުން ތެރެއަށް ނުކުމެ އުޅުމަށް ފޫހިވެ، ބިރު ގަންނަން ފެށިއެވެ. އަމިއްލަ ކޮޓަރީގެ ހަތަރު ފާރު ތެރޭގައިވާ ކަނު އަނދިރީގައި އަމިއްލަ ނަފުސު ގައިދު ކުރީމެވެ. އަބަދުމެ ވިސްނެނީ އެއީ ކާކުތޯއެވެ. އެކަން ކުރުމުގެ މަޤުސަދަކީ ކޮބައިތޯއެވެ. އަހަރެން ހީކުރީ ރުފިޔާ ހޯދުން ފަދަ ކަމެއްގައި އަހަރެންނަށް ބިރު ދައްކާނެ ކަމަށެވެ. ނަމަވެސް އެފަދަ ކަމެއް ނުވެއެވެ. ދޭތެރެއަކުން 'ކޮބާ ކަނބުލޯ ކިހިނެއް؟' ފަދަ އިބާރާތްތަކުން މެސެޖު އާދެއެވެ. އެކަންތައް އަހަރެންނަށް ހަނދާންކޮށްދެއެވެ. އެއްކަމެއް ނުވިޔަސް އަހަރެންނަށް ނަފުސާނީ ގޮތުން ނުހަނު އުނދަގޫ ވެއްޖެއެވެ. ދުވާލުދާ ހަތަރުދަމު އެ ޙިޔާލެއްގައެވެ. އަހަރެންނަށް އައި ބަދަލުތައް އެންމެނަށް ފާހަގަވެއެވެ. ސުވާލުވެސް ކުރެއެވެ. ނަމަވެސް ޖަވާބަކަށް އަހަރެންގެ ދޫވަނީ ނުކުޅެދިފައެވެ. މަންމައާއި ބައްޕަވެސް ވީގޮތެއް ވަރަށް އެހީމެއް ނޫން ހެއްޔެވެ؟ ސަބަބު މި ބުނެދެވުނީ އަދި ކިރިޔާއެވެ.

މަންމަ ވަރަށް އާދޭސްކޮށްގެން އާއިލާ އެންމެން ހިމެނޭ މާހެފުމަކަށް އަހަރެން ދިޔައީ އިއްޔެއެވެ. އެ ދިޔަ ވަގުތު އަހަރެންނަށް ވައިބަރއިން އެއްކަލަ މީހާގެ މެސެޖެއް އައެވެ. 'ދުވަސްތަކެއް ކޮށްލާފަ ބޭރަށް ނުކުމެލީ ދޯ؟' އަހަރެން ދިޔައީ ސިއްސައިގެންނެވެ. އެވަގުތު ބޮޑުބޭބެ އައިސް އަހަރެންގެ ބޮލުގައި އަތް ޖައްސާލިއެވެ. އެހާ ހާސްވެފައި ހުރީ ކީއްވެތޯ ސުވާލު ކޮށްލިއެވެ. ކަމެއް ނުވާކަމަށް ބުނެފައި ގަދަކަމުން ހިނިތުން ވެލުމަށްފަހު އަހަރެން ދިޔައީ މަންމަ ކައިރިއަށެވެ. ކުއްލިއަކަށް އަހަރެންގެ ހިތަށް އެރިއެވެ. މި ވަގުތު މެސެޖެއް ކުރިއްޔާ އެމީހެއްގެ ފޯނަށް މެސެޖް ދާ އަޑު އިވިދާނެއެވެ. އަހަރެން ހުރިތަނެއް އޭނައަށް އެނގުނީ، އޭނާވެސް މިތާ ކައިރީ އުޅޭތީއެވެ. ތިޔައީ ކާކުހޭ ކިޔާފައި, އަހަރެން ކުރި މެސެޖުގެ ނޮޓިފިކޭޝަނުގެ އަޑު އައީ ނުހަނު ކައިރިންނެވެ. ވަށައިގެން ބަލައިލީމެވެ. އިތުރު މެސެޖެއްވެސް ކޮށްލީމެވެ. މެސެޖް އަންނަ ފޯނު އޮތީ ޖޫސްފުޅިތައް ހުރި މޭޒު މަތީގައެވެ. އަހަރެންގެ ހިތް ތެޅިގަތެވެ. މިކަމެއް މި ކުރަނީ އަހަރެންގެ އާއިލާ މީހެއް ހެއްޔޭ އަހަރެންގެ ހިތައް އެރިއެވެ. އަވަސް އަވަހަށް ގޮސް ފޯނު ހުޅުވި އިރު، އަހަރެން ފޮނުވި މެސެޖު އެ ފޯނަށް އައިސްފައި އެބައިނެވެ. ކާކު އެއްޗެއް ކަމެއް ނޭނގުނެވެ. ކުރިން ނުވެސް ދެކޭ ފޯނެކެވެ.

އިރުކޮޅަކު ވިސްނާލާފައި، ފޯނުގެ މައްޗަށް ޖޫސް ފުޅިއެއް ވެރުނު ކަމަށް ހެދުމަށްފަހު އެންމެނަށް ބާރަށް އަޑުއިވޭ ވަރަށް އަހާލީމެވެ. "މިއީ ކާކު ފޯނެއް؟ މިއޮށް ވެރުނީ ޖޫސް ފުޅި." އަހަރެންގެ އަޑަށް ނުހަނު އަވަސް ޖަވާބެއް ލިބުނެވެ. "ދަރިފުޅާ ތިޔަ އަހަރެންގެ ފޯނު. އަވަހަށް ގެނޭ. ވަރަށް މުހިންމު އެއްޗެހި ހުންނާނެ." ކަންފަތުގައި ޖެހުނު އަޑާއެކު އަހަރެންގެ ގައިން ހީބިހި ނަގައިގެން ދިޔައެވެ. އެއީ އިތުރު މީހެއް ނޫނެވެ. އަހަރެންގެ ބޮޑުދައިތައެވެ. ޖަވާހިރަކާ އަހަރެން އެއްފަދަ ކުރި، ދެވަނަ މަންމައެއް ކަހަލަ ބޮޑު ދައިތައެވެ. އަންހެނަކަށް ވެހުރެމެ، އަހަރެންގެ ޢިއްފަތްތެރިކަމާ އެކުޅެނީ ކޮން މަޤުސަދެއްގައި ހެއްޔެވެ؟ އަހަރެންގެ އޮތީ ކޮން ކުށެއް ހެއްޔެވެ؟ ބޮޑުދައިތަގެވެސް އަންހެން ދަރިއެއް ހުރެއެވެ. އަންހެނަކާއި އަންހެން ދަރިންގެ ޢިއްފަތްތެރިކަމާއި ކަރާމާތަކީ ކޮން އެއްޗެއްކަން ބޮޑުދައިތައަށް ރަނގަޅަށް ވަޒަން ކުރެވޭނެއެވެ. ދެން އެއްބަނޑު ބޭބެއެއްގެ އަންހެން ދަރިފުޅުގެ ޢިއްފަތާއި އައުރައަށް ކަޅި އަޅަން އެއީ ކާކު ހެއްޔެވެ؟

ތަށި ދޮންނަށް މޫދު ކައިރިއަށް ބޮޑުދައިތަ ދިޔަ ވަގުތު ބަލާފައި، އަހަރެން ގޮސް ސީދާ ސުވާލު ކުރީމެވެ. ހިތްހެޔޮކަމާއި ލޯބީގެ ފަރުދާއިން މޫނު ނިވާކޮށްގެން ހުރި އެ އަންހެނާގެ މޫނަށް ރޫޖެހި، ދެލޯ އަޅާލިއެވެ. ރުޅިއައިސްގެން ހުރެ ބުންޏެވެ. "ކަލޭ ހީކުރީ ކަލޭއަށް އެންމެންގެ ލޯބި ލިބޭނެ ކަމަށްތަ؟ މާމަ ދަރިން ތެރެއިންވެސް އެމީހުން އެންމެ ލޯބިވަނީ ކަލޭ ދެކެ. މަގޭ ދަރިން ނުވޭ ބަޔަކަށް. ބޮޑުބޭބެ ތި ކިޔާ މީހާވެސް އިރުކޮޅަކާ ހަދިޔާ ދެނީ ކަލެޔަށް. މަގޭ ކެތްތެރިކަން ކޮޅުންލީ ސުކޫލުންވެސް ހުރިހާ ކާމިޔާބެއް ކަލެޔަށް ލިބެން ފެށީމަ. އެކަމާ ހުރެ އާއިލާ އެންމެން ކަލޭ ރަންކޮށްގެން، ލޯބިދޭ މިންވަރު ވީ އިތުރު. ރަންވަނައެއް ނުލިބޭ މުބާރާތެއް، ބައިވެރި ނުވާ ހަރަކާތެއް ނޯވެ. މަތިން މާރކްސް ނުގެންނަ އެންމެ އިމްތިޙާނެއް ނޯވެ. އެހެންވެ ކަލޭ ކިޔެވުން ހަލާކު ކޮށްލަން ކުރިކަމެއް އެއީ. މިހާރު އެކަމާ ބޯގޮއްވަން ހަދައިން ކަލެޔަކަށް ނުއެއް ކިޔެވެއެއްނު. އެއީ އަހަރެން ބޭނުންވި ގޮތް. މިހާރު މަގޭ ދަރި އާސިމާ ގެނޭ ހުރިހާ ވަނައެއް. ކަލޭ އުޅުނުއިރު އެ މަންޖެއަށް ލިބެނީ ދެވަނަ. މި ރޭހުގައި ކަލޭ ފަހަތަށް ޖައްސާ، ދިރިއުޅުމުގެ ރޭހުންވެސް ކަލޭ ބަލިކަށިކޮށް މާޔޫސް ކޮށްލުމަށް ކުރިކަމެއް އެއީ. މިވާހަކަ އިތުރު މީހެއްގާތު ބުނިއްޔާ އެ ވީޑީއޯ މުޅި ރަށަށް ފަތުރާލާނަން. ކަލޭގެ މަންމައާއި ބައްޕައަށްވެސް އޭރުން ހަޑިދޯ ދެން. މިހާރުވެސް ހުރިހެން ހިމޭނުން ހުރިއްޔާ އެއްކަމެއްވެސް ނުކުރާނަން." ބޮޑުދައިތަގެ ވާހަކަތައް އަހާފައި އަހަރެންނަށް ހަމަ ރޮއެވުނެވެ. އެހާ ރުޅިވެރިކަމާއި ނަފުރަތު، އެ ހިތުގައި ވާކަމެއް އަހަރެން ނުދެނަ ހުރީމެވެ. 

ދެނެއް ކެތެއް ނުވާނެއެވެ. މިއޮއް ހުރިހާ ދުވަހުވެސް ހުރީ ވަރަށް ހިތްވަރު ކޮށްގެނެވެ. އެ ވީޑިއޯ ފަތުރާލާނެ ކަމުގެ ބިރުގައި މުޅި އުމުރު މި އަނދަވަޅުގައި ހޭދަކޮށް، ދިރިހުރި މައްޔިތަކަށް ވާކަށް ބޭނުމެއް ނޫނެވެ. ވިސްނާ ވިސްނާ ބޯ ހާސް ވެއްޖެއެވެ. އަހަރެންގެ ސަބަބުން މަންމައާއި ބައްޕަގެ ނަން ހަޑިވާކަށް ބޭނުމެއް ނޫނެވެ. ކޮންމެ ގޮތަކަށް ކަންތައް ވިޔަސް މީހުން އިލްޒާމު އަޅުވާނީވެސް، ގޯސް ކުރާނީވެސް އަހަރެންނެވެ. އެކަން އެފަދައިން ވެ، މަންމައާއި ބައްޕަގެ އިއްޒަތް ކަތިލެވޭކަށް އަހަރެން ނޭދެމެވެ. މި ވާހަކަ ބުނެވޭކަށްވެސް ނެތެވެ. ބުނިއްޔާ ނުހާ ކޮއްކޮއަށްވެސް މިވަރު ކޮށްލާނެއެވެ. މަޢާފު ކުރާށެވެ. މަންމަގެ މި ދަރިފުޅުގެ ކިބައިގައި އިތުރު ހިތްވަރެއް ދެނެއް ނެތެވެ. ބައްޕަގެ ދޮންކަމަނަގެ ހަށިން ހަކަތަ ހުސްވެ، ސިކުނޑި ސުމަކަށް ގޮސްފިއެވެ. އަހަރެންނާ މެދު ހިތް ހެޔޮ ކުރައްޗެވެ. ހެޔޮ ދުޢާ ކޮށްދޭށެވެ. އަބަދުވެސް ވަރަށް ލޯބިވެއެވެ."

ކަރަށް މަހާލި ވައުގަނޑާއި އެކު، އެ ފަންކަލުގައި އެލިފައިވާ ފުރާނަ ނެތް މަސްގަނޑު ކަފުން ކޮށްފިއެވެ. ޖަނާޒާގެ ކަންތައް ނިންމާފައި ގެއަށް އައިސް، ނާސިޙާގެ ކޮޓަރިއަށް ވަތް އޭނާގެ މަންމައާއި ބައްޕައަށް ފެނުނު ސިޓީ ކިޔާ ނިމުމުއިރު ނާސިޙާގެ މަންމަ ސައީދާއަށް އަޑުގެ ނެތްތަނަށް ރޮވިއްޖެއެވެ. ނާސިޙާގެ ބައްޕަ މުޙައްމަދުގެ ހިތަށް ކުރި އަސަރާއެކުވެސް، އަނބިމީހާ މަސަލަސް ކުރެވޭތޯ މަސައްކަތް ކުރިއެވެ. ބޮޑުދައިތަކަމަށް ހެދިގެން އުޅޭ މުނީރާ މިއަދުވެސް ވާ ދެއްކީ އެކްޓެއްތާއެވެ. އަޑުގެ ނެތްތަނަށް ރުއިއިރު ހީވަނީ މީހާ ދެފަޅިވެދާނެހެނެވެ. އައިސްފައިވާ ރުޅިން، އާއިލާ އެންމެން އެއްކުރުމަށްފަހު މުނީރާގެ ހަޑިމުޑުދާރު ސޫރަ އެންމެނަށް ކިޔައިދީ،  އެ ސިޓީވެސް އެންމެން ކުރިމަތީގައި މުޙައްމަދު ކިޔައިފިއެވެ. އެންމެންގެ ހިތުގައި މުނީރާއަށް އޮތް ލޯބި ކިލަނބުވެ، ނަފުރަތުގެ ސާލު ދެމިގެންދިޔައެވެ. ފުލުހުންނާ މުނީރާ ހަވާލުކުރަން މުޙައްމަދު ފަހަތަކަށް ނުޖެހެއެވެ. އެދެމަފިރިންގެ ލޮލުގެ ފިނިކަންކަމުގައިވާ އަންހެން ދަރިފުޅު ދުނިޔެ ދޫކުރުމުގެ ފަހަތުގައިވަނީ ހަމަ އެ ގޮތެއްނެތް ޖާހިލު ބޮޑުދައިތައެވެ. މުނީރާގެ ރުއިމާއި މަޢާފަކަށް އިޖާބަ ދޭނެ ހަމަ އެކަކުވެސް ނެތެވެ. އެއީ ހަސަދައިގެ އަލިފާނުގައި އޭނާ އަމިއްލައަށް ލިބިގަތް ކަމެކެވެ. އަމިއްލައަށް ދުއްވާލާ ކޮންމެ ފުރާނައެއްގެވެސް ކުއްވެރިއެއް ވެއެވެ. އެއީ ކުފުރެކެވެ. ނަމަވެސް އެ ފިޔަވަޅު އަޅަން މަޖުބޫރުވާ ހިސާބަށް މީހާ ގެންދާ ޤާތިލެއް ހުރެއެވެ. މުނީރާއަކީ ނާސިޙާގެ ކުއްވެރިއެވެ. އެ މައުސޫމު ފުރާނައިގެ ޤާތިލެވެ. (ނިމުނީ)