އާދައިގެ ހިނގުމެއްގައި ސުކޫލާ ދިމާލަށް އެދަނީ ރަށުގެ ޒުވާން ޕްރިންސިޕަލެވެ. ރަސްމީކޮށް ގަޑި ފެށުމުގެ 45 މިނެޓް ކުރިން ސުކޫލަށް ގޮސް، ސުކޫލުގެ އޮފީހާއި އެހެނިހެން އިދާރީ ކޮޓަރިތަކުގެ އިތުރުން ސްޓާޕް ރޫމްތައް ހުޅުވުމަކީ ރަޔާންގެ އާދައެވެ. މާސްޓަރސް ޑިގްރީއަށްފަހު، އަމިއްލަ ރަށަށް ޚިދުމަތް ކުރުމަކީ ރަޔާންއަށް ލިބޭ އެންމެ ބޮޑު އުފަލެވެ. ރަށު ދަރިއެއް، ރަށު ސުކޫލުގެ ޕްރިންސިޕަލަކަށް ހުރުމަކީ ރަށުގެ ރައްޔިތުން ފަޚުރުވެރިވާ ކަމެކެވެ. ޚާއްސަކޮށް ރަޔާންއަކީ ހިންގުންތެރި އަދި މުރާލި، މުވައްޒަފުންގެ ލާބަޔާއި މަންފާ އިސްކޮށް، ދަރިވަރުންގެ ފެންވަރު ރަނގަޅުކުރަން މަސައްކަތްކުރާ ވެރިއަކަށް ވީތީއެވެ.

ރަސްމީ ގަޑި ފެށިގެން ކުރިޔަށްދާތާ ކުޑަ އިރުކޮޅެއް ފަހެވެ. ރަޔާންގެ ކެބިންގައި ޓަކި ދިނީ ލީޑިން ޓީޗަރއެއްގެ މަޤާމުގައި މަސައްކަތްކުރާ ރިޝްމީއެވެ. ކުޑަ އުނދަގުލެއް ވީނަމަވެސް، ކަމެއް ނުވާކަމަށް ގަދަކަމުން މޫނުމަތިން ދައްކާލުމަށްފަހު، އެތެރެއަށް އައުމަށް ރަޔާން ހުއްދަ ދިނެވެ. ކަތި ނަޒަރަކުން ބަލަމުން އައިސް ގޮޑީގައި އިއްތާލިއިރު، ރިޝްމީގެ ތުންފަތްމައްޗަށް ވެރިވެފައިވަނީ ލާނެއް ހިނިތުންވުމެކެވެ. ކުދިންގެ ޔުނިޓް އިމްތިޙާންތަކާއި ގުޅޭގޮތުން މަޝްވަރާ ކުރުމުގެ ނަމުގައި، ރަޔާންގެ ގާތަށް އައި ރިޝްމީގެ ނިޔަތް ރަނގަޅެއް ނޫންކަން ރަޔާންއަށް އެނގުނެވެ. އިމްތިޙާންތަކަށްވުރެ ބޮޑަށް އޭނާ ދައްކަނީ އަމިއްލަ ޒާތީ ވާހަކައެވެ. އޭނާ ޖަހާފައިވާ ސެންޓުގައި މީރުވަސް ދޮވައިތޯއާއި، ޖައްސާފައިވާ ލިޕްސްޓިކްގެ ކުލަ ރީތިތޯއެވެ. "ސަރ އަށް އަޅުގަނޑު އެންމެ ރީތީ ކޮން ކުލައެއްގެ ހެދުމެއް ލީމަތަ؟" ދައްކަމުން އައި ބޭކާރު ސުވާލުތަކަށް ރިޝްމީ އިތުރުކުރި ސުވާލުން، ރަޔާން ގާތަށް އަންނަންފެށީ ރުޅިއެވެ. ނަމަވެސް މަޤާމުގެ ގޮތުންނާއި، ހިފަހައްޓަން ޖެހޭ އިންތަކާއި މިންތަކުން ބަނދެވިފައި ހުރުމުން، މަޑުމައިތިރިކަން އިސްކުރިއެވެ. "މިސް ދައްކަން އައީ ކުދިންގެ ޔުނިޓް ޓެސްޓުގެ ވާހަކަ. ޕަރސަނަލް ވާހަކަތައް ދެއްކުމަށްފަހު ވަގުތު ބޭކާރުކުރުން ރަނގަޅެއް ނޫން. ސަރވެސް އެޓެންޑްވާން ޖެހޭ އީމެއިލްތަކެއް އެބަހުރި. ޔުނިޓް ޓެސްޓްގެ ޕްލޭންތަކާއި ގުޅޭގޮތުން މަޝްވަރާކޮށްލަން މިއަދު ސެޝަން ނިންމާފަ މީޓިންއެއް ބާއްވާނަން. އެގަޑީ މިކަމާ ގުޅޭގޮތުން އިތުރަށް ވާހަކަ ދައްކާނި. މި ވަގުތައް ދެން ނިންމާލީ." މަޑުމައިތިރިކަމާއި އިޙްތިރާމާއެކު ރަޔާން ޖަވާބު ދިނެވެ. ރިޝްމީގެ މޫނުމައްޗަށް ހިތްހަމަ ނުޖެހުމާއި ނުތަނަވަސްކަން ވެރިވިއެވެ. ޖޯޝާއި ފޯރީގައި ވާހަކަދައްކަމުން އައި މީހާގެ އަނގަ ބަންދުވެ، ދެބުމަ ގޮށްޖަހާފައި ނުކުމެގެން ހިނގައްޖެއެވެ.

ރިޝްމީގެ އުޅުމާމެދު ރަޔާން ކަންބޮޑުވެއެވެ. ޕްރޮފެޝަނަލް މައިދާނުގައި ޒާތީ ކަންކަމަށް ޖާގަދޭން ބޭނުން ނުވާތީ ރަޔާން ހުންނަނީއެވެ. ރިޝްމީގެ ޢަމަލުތައް އެފަދައިން ހުރިކަމުގައިވިޔަސް، އެއީ އިތުރު މީހަކު ދަންނަ ކަމެއް ނޫނެވެ. ލީޑިން ޓީޗަރެއްގެ ހައިސިއްޔަތުން އޭނާ އަދާކުރަން ޖެހޭ މަސްއޫލިއްޔަތު އެންމެ ފުރިހަމައަށް އަދާކުރެއެވެ. އެހެންކަމުން ވަޒީފާއިން ވަކިކުރުމަކީ އެންމެ ރަނގަޅު ގޮތް ނޫންކަމަށް ރަޔާން އަމިއްލަ ނަފުސަށް ވިސްނައިދެއެވެ. ރިޝްމީގެ ފަރާތުން އެފަދަ ޢަމަލެއް ފެންނަ ކޮންމެ ފަހަރަކު، ރަޔާންގެ ވިސްނުން ދަތުރުކުރަނީ މާޒީގެ އެ ސަފްޙާއަށެވެ. ގްރޭޑް 12 ގައި ރިޝްމީވަނީ ރަޔާންއަށް ލޯބި ހުށަހަޅާފައެވެ. ނަމަވެސް ރިވެތި ގޮތުގައި އެކަމަށް ރަޔާން ނޫނެކޭ ބުނީ، ރިޝްމީއާ މެދުގައި އެފަދަ ނަޒަރަކުން ނުދެކޭތީއެވެ. އޭނާގެ ހިތުގައި ރިޝްމީއަށްޓަކައި އެފަދަ އިޙްސާސަކާއި މަޤާމެއް ނެތީމައެވެ. ލޯތްބަކީ ގަދަކަމުން ވާއެއްޗެއް ނޫނެވެ. ނަމަވެސް އެކަން އަދިވެސް ރިޝްމީއަށް ޤަބޫލުކުރެވުނު ހެނެއް ހިޔެއް ނުވެއެވެ. ދޭތެރެއަކުން އަދިވެސް ރަޔާންއަށް އަންގަނީ، ރަޔާންއަށް އިންތިޒާރު ކުރާ ވާހަކައެވެ. ރަޔާންގެ ޖަވާބު ބަދަލެއް ނުވެއެވެ. ރަޔާންއާ ގާތްވެ، އެކި ކަހަލަ ޒާތީ ވާހަކަތައް ދައްކާ، ރިޝްމީގެ ޢަމަލުތައް އެފަދައިން ބަހައްޓަނީ ރަޔާން ހާސިލްކުރެވޭތޯކަން އޭނާއަށް އެނގެއެވެ. އެޚިޔާލަށް ގެއްލިފައި އިން ރަޔާން ސިއްސައިގެން ދިޔައީ، ގަޑި ނިމިގެން ބެލް ޖެހި އަޑަށެވެ. މިރެއަށް ހަމަޖެހިފައިވާ ޖަލްސާއަށްވެސް ތައްޔާރުވާން ޖެހޭތީ އެކަމައިގެން ރަޔާން މަޝްއޫލުވިއެވެ.

އިނާމް ދިނުމުގެ ރަސްމިއްޔާތަށް ހުރިހާ ޖަލީސާއިން ސުކޫލަށް ހާޒިރުވީ 20:30 ގައެވެ. ޝަރަފުވެރި މެހެމާނާއި، އެކި މުއައްސަސާތަކުގެ މުވައްޒަފުންގެ އިތުރުން ދަރިވަރުންނާއި ހަންހާރަވެތި ބެލެނިވެރިންނެވެ. ޖަލްސާ ފެށިގެން ކުރިޔަށްގޮސް، ޕްރިންސިޕަލް ރަޔާންގެ ތަޤުރީރު ނިންމާލުމުން އަހަރީ ރިޕޯޓް އެޅުވިއެވެ. އެވަގުތު ރަޔާންގެ ފޯނަށް މެސެޖެއް އައެވެ. "ސަރ، ބެސްޓް އޯލް ރައުންޑަރއަށް ދޭ ޓްރޮފީއެއް ނެތް ސްޓޭޖަށް ގެނެވިފަ. އަޅުގަނޑު މިހުރީ ލީޑިން ޓީޗަރސް ރޫމްގަ. މިތާވެސް ނެތް ޓްރޮފީއެއް. މަރީ މިސްވެސް އެބަ ހުރި އަޅުގަނޑާއެކީ." އެއީ ރިޝްމީގެ މެސެޖެކެވެ. އެ ޓްރޮފީ ނުފެނުނިއްޔާ މިރޭ ކަމަކު ނުދާނެއެވެ. އެންމެންގެ ކުރިމަތީ މުޅި ސުކޫލާއި މެނޭޖްމެންޓުގެ ނަން ބަދުނާމު ވާނެއެވެ. އަމިއްލަ ޒިންމާއެއް ކަމުގައި ދެކިގެން ރަޔާން ދިޔައީ ލީޑިން ޓީޗަރުންގެ ރޫމަށެވެ. އެތާ އިނީ ރިޝްމީ އެކަންޏެވެ. މަރީ މިސްއެއް ނެތެވެ.

ރަޔާން އެތަނަށް ވަނުމާއެކު ރިޝްމީ ގޮސް ދޮރު ތަޅުލިއެވެ. އަދި ބަލާކަށް ނުހުރެ ރަޔާންގެ ގައިގަ ބައްދާލިއެވެ. "ރަޔާން ދެކެ އަހަރެން އޭރުންސުރެން ވަރަށް ލޯބިވޭ. މިހާރު ނުސީދާކޮށްނާއި ސީދަލަށް މިހެން އާދޭސްކޮށްކޮށް އަހަރެން ވަރުބަލި ވެއްޖެ. ދެން މިކަން ޤަބޫލު ކޮށްބަލަ." ރިޝްމީ އެއްނޭވާ މަތިން ކިޔާ ނިންމާލިއެވެ. ރުޅިއައިސް ރަތްވެފައިވާ ރަޔާން އަވަސް އަވަހަށް ރިޝްމީ ދުރުކޮށްލިއެވެ. "އަހަރެންވެސް ސީދާ ސީދަލަށް ބުނެ ބުނެ ވަރުބަލި ވެއްޖެ. ނުލާހިކު ރީތިކޮށް އަހަރެން ރިޝްމީ ގާތު ބުނިން އަހަރެން ލޯތްބެއް ނުވެޔޭ. އަހަރެންގެ ހިތުގައި ނެތް ޖާގައެއް ގަދަކަމުން ނުދެވޭނެ. މިހާރު ތިޔަ ހުރީ ޒިންމާދާރު ވަޒީފާއެއްގަ. ރިޝްމީ 'މިސް' ވެއްޖެ މިހާރު އަހަރެން މިދައްކާ ވާހަކަ ޤަބޫލު ކުރަން." ރަޔާންގެ އެ ޖުމުލަތަކާއެކު ރިޝްމީގެ ބޮލަށް ސަވާރުވީ އަމަށަކު ރުޅިއެއް ނޫނެވެ. ރަޔާންއަށް ވިސްނުމުގެ ފުރުސަތެއްވެސް ނުދީ ރަޔާންގެ ގަމީހުގެ ގޮށްތައް ނައްޓާލިއެވެ. އަމިއްލަ މީހާގެ ބުރުގާ ބާލާ، ހެދުމުގެ އަތްކުރިންނާއި އެކި ތަންތަނުން ވީދާލިއެވެ. ރޮމުން ހަޅޭއް ލަވަމުން ނުކުމެ، އެހުރި ގޮތަށް އެވަނީ ޖަލްސާ ކުރިއަށްދާ މާލަމަށެވެ. އެންމެންގެ ނަޒަރު ހުއްޓުނީ ރިޝްމީއަށެވެ.

"ރަ..ރަ..ރަޔާން ސަރ.. ރަޔާން ސަރ ކުރި ކަމެއް! އަޅުގަނޑު ގާތު ލީޑިން ޓީޗަރސް ރޫމަށް އަންނަން ބުނެފަ ކުރި ކަންތައް މިއީ. އަ.. އަޅުގަނޑުގެ އިއްފަތްތެރިކަން ފޭރިގަންނަން އުޅުނީ.. ކި.. ކިރިޔާ މި އާދެވުނީ.. ދޭބަލަ އަޅެ ލީޑިން ޓީޗަރސް ރޫމަށް. ސަރ ހުންނާނެ އެތާ." ހަޤީޤަތެއް ނެތް ކަރުނަތަކާއެކު ރޯ ބުހުތާނު ދޮގެއް ހަދާލަން ރިޝްމީއަށް ހާދަ ފަސޭހައެވެ. ރަޔާން ކަހަލަ އިޙްތިރާމާއި ޤަދަރު ލިބިގެންވާ އަޚްލާޤް ރަނގަޅު ޒުވާނެއްގެ ބޮލުގައި އެ އެޅުވީ ހާދަހާ ބޮޑު އިލްޒާމެކެވެ. މާލަމަށް އެއްވެ ތިބި އެންމެންގެ ކުރިމަތީ ރަޔާންގެ އަޚްލާޤާ މެދު ސުވާލު އުފައްދާ، އޭނާ ނުވެސް ކުރާ މުޑުދާރު ޢަމަލެއްގެ ތުހުމަތު އަޅުވައިފިއެވެ. އެންމެންގެ ކުރިމަތީ ރަޔާންގެ އަބުރު ކަތިލައިފިއެވެ. ސުކޫލުގެ މުވައްޒަފުންނާއި ޖަލްސާއަށް ދުރުވި އިއްޒަތްތެރިންވެސް މިހާރު އެތިބީ ލީޑީން ޓީޗަރސް ރޫމުގައެވެ. ރަޔާން ހުރީ ރިޝްމީ ސިފަކުރި ހެނެވެ. ގަމީހުގެ ގޮށްތައްވަނީ ނައްޓާލެވިފައެވެ. ރަޔާން ހުރީ ގަބުވެފައެވެ. މީހާ ފިނިވެ، ހުއްޓުން އަރާފައެވެ. އޭނާގެ ކުރިމަތީ ރިޝްމީ ކަންތައް ކުރިގޮތުން، ހަދާނެ ގޮތެއް އަދި ކުރާނެ ކަމެއް ނޭނގިފައެވެ. "ސަރ. ސަރ ތިޔަ ކަހަލަ ކަމެއް ކުރާނެ ކަމަކަށް ދުވަހަކުވެސް ހިތަކަށް ނާރާ." ރަޔާންއަށް ހޭވެރިކަމެއްވީ ނުރުހުންތެރިކަމާއެކު ޓީޗަރެއް ބުނި ޖުމުލައަކުންނެވެ.

ކަންވީގޮތް ރަޔާންއަށް އެނގިއްޖެއެވެ. އެތާ ތިބި އެންމެން ގާތު ރަޔާން ތަކުރާރު ކުރަމުން ދިޔައީ އެއްވާހަކައެވެ. އެއީ އޭނާ ކުރިކަމެއް ނޫންކަމަށާއި، ރިޝްމީ އަމިއްލަޔަށް ކުރިކަމެއް ކަމަށެވެ. އެތަނަށް އަންނަން މެސެޖްކުރީ ރިޝްމީކަމަށްވެސް ރަޔާން ބުނެދެމުން ދިޔައެވެ. ނަމަވެސް އެ މެސެޖު ދައްކަން ޓެލެގްރާމް ހުޅުވިއިރު މެސެޖްވަނީ ޑިލިޓް ކޮށްލާފައެވެ. އެކަންވެސް ރަޔާންއަށް ސާބިތު ކޮށްދެވުމުގެ ކުރިން ރިޝްމީގެ މަކަރުވެރިކަން ކާމިޔާބު ވެއްޖެއެވެ. އެންމެންގެ ނަޒަރުގައި ރަޔާން ކުއްވެރި ވެއްޖެއެވެ. ސުކޫލާއި މެނޭޖުމެންޓުގެ ނަން ބަދުނާމު ވެދާނެތީ ރިޝްމީގެ މެސެޖަށް އިޖާބަދިން ރަޔާންގެ އަމިއްލަ ނަފުސު، އެންމެން ކުރިމަތީ ބަދުނާމު ވެއްޖެއެވެ. ކުރިން އިޙްތިރާމާއި ޤަދަރުން ފުރިފައިވި ލޯތައް މިއަދު ރަޔާންއަށް ބަލަނީ ނުރުހުންތެރިކަމުގެ ނަޒަރުންނެވެ. މިފަދަ ގޮތެއް ނެތް މީހަކު ޕްރިންސިޕަލެއްގެ މަޤާމުގައި ހުރެގެން ނުވާނެކަމަށް ބެލެނިވެރިން ބުނަން ފަށައިފިއެވެ. "އެއްވެސް އަންހެނަކު އަމިއްލަޔަށް ހެދުމުގެ ތަންތަން ވީދައިން، ބުރުގާ ބާލައިން އެންމެން ތިބޭ ތަނަކަށް ގޮސް ރޯނެތަ؟" ބެލެނިވެރިއަކު ބުނި އަޑު އިވުނެވެ. ރިޝްމީ ކަންތައް ކުރީހަމަ އެހެނެވެ. ގަދަބާރުން ހާސިލް ނުކުރެވުނު ލޯބީގެ ބަދަލު އޭނާ ހިފީ އެފަދައިންނެވެ. ރަޔާންގެ ވާހަކަ ޤަބޫލުކުރުމަށް އެދި އޭނާ ކުރި އާދޭސް އަޑުއަހާނެ އެކަކުވެސް ނެތެވެ. ރިޝްމީގެ ޙާލަތާއި އޭނާގެ ބުނިހާ އެއްޗެއް އަޑު އަހާފައި އެންމެންވެސް އެކަން ޤަބޫލުކޮށްފިއެވެ. ރަޔާންގެ ބޮލުގައި އެޅުވި އިލްޒާމް ތެދަކަށް ހަދައިފިއެވެ.

ރަށުގެ ކައުންސިލާއި އެހެނިހެން މުއައްސަސާތަކުގެ އެދުމުގެ މަތިން ރަޔާން ވަޒީފާއިން ވަކިކުރެވުނީ އޭގެ ހަފްތާއެއް ފަހުންނެވެ. ރަޔާންގެ މުޅި ދިރިއުޅުމަށް ރިޝްމީގެ ކަޅު ހިޔަނި އެޅުނީއެވެ. މިކަންތައް ޕޮލިހަށް ހުށަހަޅަން ބޭނުން ނުވާކަމަށް ރިޝްމީ ބުނީ އިތުރަށް މީހުންގެ ހަމްދަރުދީ ހޯދުމަށެވެ. އޭނާގެ ބޭނުމަކަށްވީ، އެންމެންގެ ކުރިމަތީ ރަޔާން ފަޟީހަތްކޮށް ބަދުނާމު ކުރުމެވެ. އެކަން ވަރަށް ރަނގަޅަށް ކާމިޔާބުވީމާ، ޕޮލިހަށް ރިޕޯޓް ކޮށްގެން އިތުރަށް ކަމެއް ނުކުރީއެވެ. އެ ޙާލަތުގައި ރަޔާން ދެއްކި ވާހަކަ ޤަބޫލުކުރީ ހަމައެކަނި އޭނާގެ މަންމައާއި ބައްޕައެވެ. އާއިލާއާއި ގާތްތިމާގެ އެހެން މީހުންވެސް ބަދުބަސް ބުނެ، ފާޑު ކިޔަނީއެވެ. މުޅި ރަށަށް ރަޔާން ގިނަވި ކަހަލައެވެ. އުމުރު ދުވަހުން ބިނާ ކުރި އިތުބާރާ، އަމިއްލަ މަސައްކަތުން ހޯދި ޤަދަރާއި އިޙްތިރާމް މިއަދު އެއްވެސް އެއްޗަކަށް ނުވިއެވެ. އަމިއްލަ ވަތަނުގައި އޭނާގެ ހަޤީޤަތް ޤަބޫލުކުރާނެ މީހަކު ނެތެވެ. އުޅެ ބޮޑުވި ރަށުގައި އޭނާއަށް އިތުބާރު ކުރާނެ ފަރުދެއް ނެތެވެ. މަންމައާއި ބައްޕަ ގޮވައިގެން ރާއްޖެއިން ބޭރަށް ރަޔާން ބަދަލުވީ، އެ އިލްޒާމުތަކުގައި އުޅެން ބޭނުން ނުވާތީއެވެ. އޭނާގެ އަޚްލާޤާއި އަބުރަށް ހުތުރުވާ ތުހުމަތުތައް ދޫކޮށްލުމަށެވެ. އަލުން އައު ދިރިއުޅުމެއް މުޅިން އައު ޤައުމެއްގައި ފެށުމަށެވެ.

ފިރިހެނަކަށްވީތީ އޭނާ ދެއްކި ވާހަކަ ޤަބޫލުކުރާނެ މީހަކު ނުވިއެވެ. ރިޝްމީ ކުޅުނު ޑްރާމާ އެންމެން ޤަބޫލުކުރީ އަންހެނަކަށްވީތީއެވެ. އަންހެނަކަށް ވީތީ އޭނާ ހަދާނީ ތެދު ނޫން ހެއްޔެވެ؟ މިއީ އަދު މުޖުތަމަޢުގެ ޙާލަތެވެ. ފިރިހެނުންގެ ބޮލުގައި ދޮގު އިލްޒާމް އަޅުވާ، އެމީހުން ބަދުނާމުކުރާ އަންހެންވެރިން މަދުން ނަމަވެސް އެބައުޅެއެވެ. ފިރިހެނުންގެ އަތްތަކުން އެތައް އަންހެނެއްގެ އިއްފަތްތެރިކަން ފޭރިގަތްފައި އެބަހުރިކަން ރަޔާން ޤަބޫލުކުރެއެވެ. އުމުރު ދުވަހު ނުފިލާނެ ޒަޙަމްތައް އެކަނބަލުން ތަހައްމަލު ކުރާކަންވެސް އެނގެއެވެ. ނަމަވެސް ހުރިހާ ފިރިހެނުން އެއްގޮތެއް ނުވާނެއެވެ. ރަނގަޅު ތަރުބިއްޔަތެއްގައި ހިފާ، އަންހެނުންނަށް އިޙްތިރާމްކުރާ ފިރިހެނުންވެސް އުޅެއެވެ. މީހުން ބުނެ އުޅެނީ ތެދެކެވެ. ތުހުމަތު ކުރެވޭ ހިސާބުން ފިރިހެނާއަކީ ކުއްވެރިއެކެވެ. ކުއް ސާބިތު ނުވިޔަސް އެއީ ކުއްވެރިއެކެވެ. އެކަމުން ބަރީއަ ވެވެނީ ކުށެއް ނުކުރާކަމަށް ސާބިތުވާ ހިސާބުންނެވެ. ރަޔާންގެ ކުށަކައްވެސް ވީ ފިރިހެނަކަށްވުމެވެ. ދޮގު ހުފަވެންތަކެއް ނުދައްކާ، އޭނާ ނުވާ ލޯތްބެއްގެ ވާހަކަ، ތެދަށް ރިޝްމީ ގާތު ބުނުމެވެ. ރަޔާންގެ އަޚްލާޤާއި ޝަހުސިއްޔަތާމެދު ސުވާލު އުފައްދަން، އެހާ ކުޑަ ވަގުތުކޮޅެއް ނެގީ، ރަޔާންއަކީ ފިރިހެނަކަށްވީމައެވެ.