ރަމަޟާން މަހަކީ އިސްލާމީ އުންމަތުގެ ހިތްތަކުގައި ޚާއްޞަ މަޤާމެއް ލިބިފައިވާ މައްސަރެކެވެ. މި ބަރަކާތްތެރި މަހުގައި ދިވެހިންގެ ދިރިއުޅުމުގެ ވައްޓަފާޅިއަށް އަންނަ ބަދަލުތަކުގެ ތެރޭގައި، ރޭޑިއޯއާ އޮންނަ ގުޅުން އިތުރުވެ، ގާތްކަން ބަދަހިވެގެން ދިއުމަކީ ފާހަގަކޮށްލެވޭ ކަމެކެވެ. ޒަމާނުއްސުރެ ދިވެހިންނާއި ރޭޑިއޯއާ ދެމެދު އޮތް މި ގާތްކަމަކީ، މިއަދާ ހަމައަށްވެސް ދެމިގެން އައިސްފައިވާ، ބަދަލެއް ނުވާ ލޯތްބަކާއި ގުޅުމެކެވެ.

ރަމަޟާން މަސް އައުމާއެކު، ދިވެހި ގޭގެއިން އިވޭ ރޭޑިއޯގެ އަޑު އިތުރުވެގެންދެއެވެ. ހެނދުނާއި މެންދަމާއި ފަތިސްނަމާދަންމަތިން ފެށިގެން، ރޭގަނޑު ތަރާވީޙް ނަމާދަށްފަހު ނިދަން އޮށޯންނަންދެން، ރޭޑިއޯގެ އަޑަކީ ގިނަ ގެތަކުން އިވޭ އަޑެކެވެ. މިއަދުވެސް ރޭޑިއޯއެއް ނެތި ރޯދަ ފުރިހަމަނުވާ ކިތައްމެ ގެއެއް ދިވެހިރާއްޖޭގައި އެބަހުއްޓެވެ. މިއީ ހަމައެކަނި މާލެއަށް ޚާއްޞަވެގެންވާ ކަމެއް ނޫނެވެ. ރާއްޖެތެރޭގެ އެންމެ ދުރު ރަށްރަށުގައިވެސް، ރަމަޟާން މަހު ރޭޑިއޯގެ އަޑު ގަދަވެގެންދާކަން ފާހަގަކުރެވެއެވެ.

ރަމަޟާން މަހުގައި ރޭޑިއޯއިން ގެނެސްދޭ ޚާއްޞަ ޕްރޮގްރާމުތަކަކީ ދިވެހިންގެ ހިތްތަކުގައި ވަރަށް ބޮޑު ޖާގައެއް ހޯދާފައިވާ ޕްރޮގްރާމުތަކެކެވެ. މީގެ ތެރެއިން ކީރިތި ރަސޫލާގެ ސީޔަރަތަކީ ވަރަށް ގިނަ ބަޔަކު ޝައުޤުވެރިކަމާއެކު އަޑުއަހާ ޕްރޮގްރާމެކެވެ. މި ޕްރޮގްރާމުން ލިބޭ ދީނީ އަދި ތާރީޚީ މަޢުލޫމާތަކީ ރޯދަ މަހުގެ ރޫޙާ ގުޅިލާމެހިފައިވާ މުހިންމު ބައެކެވެ. އަދި ސިޔަރަތުކިޔަމުން އެ ގެންދާ އަޑަކީ އެ އަޑަކަށް ދިވެހިންގެ ހިތްތަށް ލެނބިފައިވާ އަޑަކާއި ރާގެކެވެ. އަދި މީގެ އިތުރުން، ކުރުވާހަކަ މުބާރާތާއި ރޯދަ ކުރުކުރުންފަދަ ޕްރޮގްރާމުތަކަކީވެސް ދިވެހިންގެ މެދުގައި ވަރަށް މަޤްބޫލު ޕްރޮގްރާމުތަކެކެވެ.

ކުރުވާހަކަ މުބާރާތްތަކުން ގެނެސްދޭ ވާހަކަތަކަކީ ގިނަ ބަޔަކު ވަރަށް ބޮޑަށް އިންތިޒާރު ކުރާ ކަމެކެވެ. މި މުބާރާތްތަކުގައި ބައިވެރިވާ ލިޔުންތެރިންގެ ހުނަރުވެރިކަމާއި، އެ ބޭފުޅުން ގެނެސްދޭ ވާހަކަތަކުގެ މޮޅުކަމަކީ، އަޑުއަހާ ފަރާތްތަކަށް ވަރަށް ބޮޑު އުފަލަކާއި މުނިފޫހިފިލުވުމެއް ގެނެސްދޭ ކަމެކެވެ. ހަމައެހެންމެ، ރޯދަ ކުރުކުރުމުގެ ޕްރޮގްރާމުތަކަކީވެސް ވަރަށް ގިނަ ބަޔަކު ޝައުޤުވެރިކަމާއެކު ބައިވެރިވާ ޕްރޮގްރާމުތަކެކެވެ. މި ޕްރޮގްރާމުތަކުން ލިބޭ މަޢުލޫމާތާއި މުނިފޫހިފިލުވުމަކީ ރޯދަ މަހުގެ ދުވަސްތައް ފާއިތުވެގެންދާއިރު، ވަގުތު ހެޔޮގޮތުގައި ހޭދަކުރުމަށް ލިބޭ ރަނގަޅު ފުރުޞަތެކެވެ.

ރަމަޟާން މަހުގެ ރޭޑިއޯ ޕްރޮގްރާމުތަކުގެ މުހިންމުކަން އެހާ ބޮޑުވެފައިވަނީ، އޭގެ ސަބަބުން ގޭގެއަށާއި އާއިލާތަކަށް ލިބޭ ފައިދާތަކުގެ ސަބަބުންނެވެ. މިސާލަކަށް، ރޭޑިއޯ އަޑުއެހުމުގެ ސަބަބުން އާއިލާގެ މެންބަރުން އެއްތަނަކަށް އެއްވެ، އެކުގައި ވަގުތު ހޭދަކުރުމުގެ ފުރުޞަތު ލިބެއެވެ. މީގެ އިތުރުން، ރޭޑިއޯއިން ފޮނުވާ ދީނީ ދަރުސްތަކާއި ވަޢުޟުތަކުން ލިބޭ ޢިލްމީ ފައިދާ ވަރަށް ބޮޑެވެ. މިފަދަ ޕްރޮގްރާމުތަކުން ރަމަޟާން މަހުގެ މާތްކަމާއި، ރޯދައިގެ މަޤްޞަދުތައް އިތުރަށް ދެނެގަތުމަށް މަގުފަހިވެގެންދެއެވެ.

ރޭޑިއޯގެ މި މުހިންމުކަން އެހާ ބޮޑުވެފައިވާތީ، ގިނަ ބަޔަކު ދެކޭގޮތުގައި މިއިން ޕްރޮގްރާމެއްގެ އަޑު ކަންފަތުގައި ނުޖެހޭނަމަ، ހަދާ ހެދިކާއެއްގައި މީރު ރަހައެއްވެސް ނުދޭ ކަހަލައެވެ. މިއީ ރަމަޟާން މަހާއި ރޭޑިއޯ ގުޅިފައިވާ މިންވަރު ދައްކުވައިދޭ ކަމެކެވެ. ރޯދަވީއްލުމުގެ ކުރިން ރޭޑިއޯއިން އިއްވާ ޤުރުއާން ކިޔެވުމުގެ އަޑާއި، ރޯދަވީއްލުމުގެ ދުޢާ އަޑުއިވުމަކީ، ގިނަ ބަޔަކަށް ރަމަޟާން މަހުގެ ރޫޙު އިޙްސާސްކުރެވޭ މުހިންމު ކަންތައްތަކެވެ.

ޒަމާނަށް އަންނަ ބަދަލުތަކާއެކު، ޓީވީއާއި އިންޓަރނެޓްފަދަ ވަސީލަތްތައް ތަޢާރަފުވެ، މީޑިއާގެ ދާއިރާ ތަރައްޤީވެފައިވީ ނަމަވެސް، ރަމަޟާން މަހު ރޭޑިއޯގެ މުހިންމުކަން އެއްވެސް ވަރަކަށް ކުޑަވެފައެއް ނުވެއެވެ. އަދިވެސް ގިނަ ދިވެހިންނަށް ރޭޑިއޯއަކީ ރަމަޟާން މަހުގެ މާޙައުލު ފުރިހަމަކޮށްދޭ އެއް ވަސީލަތެވެ. މިއީ ޖީލުތަކުން ޖީލުތަކަށް ވާރުތަވަމުން އައިސްފައިވާ، ދިވެހިންގެ ސަގާފަތާ ގުޅިލާމެހިފައިވާ ކަމެކެވެ.

ރަމަޟާން މަހާއި ރޭޑިއޯއާ ދެމެދު އޮތް ގުޅުމަކީ ހަމައެކަނި އާދައިގެ ގުޅުމެއް ނޫނެވެ. މިއީ ދިވެހިންގެ ހިތްތަކުގައި އަށަގެންފައިވާ، ޒަމާންތަކެއް ވަންދެން ދެމިގެން އައިސްފައިވާ ލޯތްބަކާއި ގާތްކަމެކެވެ. އޭރުވެސް، މިހާރުވެސް ރޯދައެއް ފުރިހަމަވާނީ ރޭޑިއޯއެއްގެ އަޑު ކަންފަތުގައި ޖެހިގެންނެވެ.