ހޮސްޕިޓަލުން ނުކުމެ، ކައިރީ ހުރި ކޮފީ ވިއްކާ ސޮރެއް އަތުން ކޮފީ ތައްޓެއް ގަނެގެން އަވަސް އަވަހަށް ތުންޖަހާ ބޯންފެށިއެވެ. އޭގެ ހޫނުކަން އިހްސާސް ނުވާކަހަލައެވެ. މާހައުލަށް ވެރިވެފައިވާ ފިނިކަމާއެކުވެސް، ހިލްމީ ބޮމުން އެދިޔަ ކޮފީތަށިން ހޫނު އާވި އަރައަރައި ހުއްޓެވެ. އެހެންނަމަވެސް، ވެފައި ހުރި ހާސްކަމާއެކު ކޮފީތަށި ހުސްކޮށްލީ ފެންތައްޓެއް ބޯލާހައި އަވަހަށެވެ.

ތަނަކީ އިންޑިޔާގެ ބެންގަލޫރެވެ. ދިވެހިންގެ މެދުގައި މަޝްހޫރު އެޕޯލޯ ހޮސްޕިޓަލުގެ ބޭރެވެ. ދުވަސްވަރަކީ އިންޑިޔާއަށް އެންމެ ފިނި ދުވަސްވަރުކަމުން މުޅި މާހައުލަށް އޮތީ ދުންފިނީގެ އަސަރުކޮށްފައެވެ. ހިނގާފައި މަދު މީހެއް ނޫނީ ނޫޅެއެވެ. މޫސުން ރަނގަޅު ދުވަސްވަރެއްގައި މަގުގެ ދެފަރާތުގައި އެއްޗެހި ވިއްކަން ތިބޭ މީހުންވެސް ފެންނާކަށްނެތެވެ. 

ހިލްމީއަކީ، މާލޭގެ މުއްސަނދި އާއިލާއެއްގެ ހުރި ހަމައެކަނި ދަރިފުޅެވެ. މަޖީދިއްޔާ ސުކޫލުން އޭލެވެލް ހަމަ ނިމުމާއެކު، ހިލްމީގެ މައިންބަފައިން ބޭނުންވެގެން އިނގިރޭސިވިލާތަށް ކިޔަވަން ދިޔައީ މަޖުބޫރުންނެވެ. ހިލްމީ ބޭނުންވީ އިތުރަށް ނުކިޔަވާ ބައްޕަގެ ވިޔަފާރީގައި ބައިވެރިވާށެވެ. އެހެންނަމަވެސް، ހިލްމީގެ ބައްޕަ ހައްސާނަށް އެގޮތް ކަމު ނުދިޔައީއެވެ. ހައްސާން ބޭނުންވީ ހައްސާން ނެތް ދުނިޔެއެއްގައި އޭނާގެ ވިޔަފާރިއާއި މިލްކިއްޔާތު ބަލަހައްޓަން ހިލްމީ ކިޔަވައިގެން ތައްޔާރުވާށެވެ. ހިލްމީ އިނގިރޭސިވިލާތަށް ކިޔަވަން ފޮނުވަމުންވެސް، ހައްސާން އެއްވާހަކައެއް ތަކުރާރުކުރިއެވެ. ކިޔަވާ ނިމި، ރަނގަޅަށް މަސައްކަތަށް ނުވަދެވެނީސް ލޯބީގެ ގުޅުމެއް ނުހިންގުމަށެވެ. ހިލްމީ އެކަމަށް އާނބަސްބުނީ، މިހާތަނަށްވެސް ހިލްމީއަކީ ލޯބީގެ އެއްވެސް ރަހައެއް ތަޖުރިބާ ކޮށްފައި ނުވާ މީހަކަށްވާތީއެވެ.

ހިލްމީ އިނގިރޭސި ވިލާތަށް ބަދަލުވެ ދުވަސްތައް ގުނަމުންދިޔައީ ހީވެސް ނުކުރާ އަވަހަށެވެ. ތަނަށް ރޯފިލައި، އެ ގައުމުގެ އެކި ތަންތަން ބަލައިލުމަށް ދަތުރުކުރުމަކީ ހިލްމީއަށް ލިބޭ އުފަލެކެވެ. ބައްޕަގެ ތަނަވަސްކަމުގެ ސަބަބުން ކިޔަވަން ގޮސް ތިބި އެހެން ކުދިންނަށްވުރެ ހިލްމީ އުޅެމުންދިޔައީ ފޯރުންތެރި ދިރިއުޅުމެކެވެ. ކިޔެވުމަށް ބުރޫ ނާރާ ގޮތަށް ހިލްމީގެ ތާވަލު ރާވާލައިގެން ކުރިޔަށް ގެންދިޔައީ ވަރަށްވެސް ތަރުތީބު ކޮށެވެ.

އާދައިގެ މަތިން ކަސްރަތުކޮށްލަން ނުކުމެ އުޅުނު ދުވަހެކެވެ. ހިލްމީގެ ވަކި މިސްރާބެއްނެތި މަޑު ދުވެއްޔެއްގައި ދުވަމުންދިޔައީ ކަންފަތަށް ޖަހާފައިވާ ހެޑްސެޓުން ނަލަ އިނގިރޭސި ލަވައެއް އަޑުއަހަމުންނެވެ. ކުއްލިއަކަށް ހިލްމީގެ ލޯ އަމާޒުވީ، މަގުގެ އެއް ފަރާތުގައި ހުރި ގޮނޑިއެއްގައި އެކަނިމާއެކަނި އިން އަންހެން ކުއްޖަކަށެވެ. ސްނޯއިން ސަލާމަތްވުމަށް ބޯހެދުމެއް ލައިގެން އިނެއްކަމަކު، އިސް އުފުލާ ބަލައިލުމުން އެއީ އެ ގައުމުގެ ކުއްޖެއް ނޫންކަން އެނގެއެވެ. ހިލްމީ މަޑުކޮށްލާ އެ ކުއްޖާކުރެން ހާލު އަހައިލިއެވެ. ކަންދިމާކުރި ގޮތުން އެ ކުއްޖާވީ ދިވެއްސަކަށެވެ. އެ ކުއްޖާއަށް ހިލްމީ އެނގެއެވެ. ކުރިން ފެނިދެނިވެ އުޅޭތީއެވެ. ކޮލެޖުން ފެންނާތީއެވެ. ކޮންމެއަކަސް ދެމީހުން ދެމީހުނަށް ތައާރަފްވެ، އެ އަންހެން ކުއްޖާގެ ހާލަތު ހިލްމީއަށް ކިޔައިދިނެވެ.

ސާރާއަކީ ހިންގުމުގެ ދާއިރާއިން މަތީ ތައުލީމް ހާސިލުކުރުމަށް އިނގިރޭސިވިލާތަށް އައިސްހުރި ކުއްޖެކެވެ. ހިލްމީއާ އަށްވުރެ ދެ އަހަރު ހަގެވެ. ސާރާ ކިޔަވަން އައިސްހުރީ ދިވެހި ސަރުކާރުގެ ސްކޮލަޝިޕެއްގައިކަމަށާއި، ސަރުކާރުން ފޮނުވަންޖެހޭ ރުފިޔާ ގަވާއިދުން ފޮނުވަމުން ނުދާތީ ދިރިއުޅެމުން އައި ތަނުން ނުކުންނަން ޖެހިފައިވާ ވާހަކަ ހިލްމީއަށް ކިޔައިދިނެވެ. އަލަށް ދިމާވިޔަސް، ހާލަތު ނިޔާކުރި ގޮތުން ކޮންމެވެސް މީހެއްގެ މަދަދު އިންތިހާއަށް ބޭނުންވެފައިވާތީ، ހިލްމީއާ އެވާހަކަ ހިއްސާ ކުރެވުނީއެވެ.

ހިލްމީއަކީ އެންމެ ކުޑައިރުންސުރެ، މީހުންނަށް ވަރަށް ކަމޭހިތާ އަދި އޯގާތެރި ހިތެއްގެވެރިއަކަށްވީތީ، ސާރާގެ އެ ހާލަށް ދޫކޮށްލާކަށް ހިލްމީގެ ހިތެއް ނޭދުނެވެ. ހިލްމީ ދިރިއުޅޭ އެޕާޓްމަންޓަށް ސާރާ ގެންދިޔައެވެ. އަދި ހިލްމީގެ މައިންބަފައިން އައިސް ތިބުމަށް ހާއްސަ ކުރެވިފައިވާ ކޮޓަރި ސާރާ ހުރުމަށް ހަމަޖެއްސިއެވެ. ހިލްމީގެ މި އިހްސާންތެރިކަމަށް ސާރާ ނުހަނު އުފާކުރިއެވެ. އަދި އެކަމުގެ ބަދަލު ދޭނޭ ގޮތެއްވެސް ނުވިސްނޭކަމަށް ސާރާ ބުނަމުންދިޔައެވެ. ހިލްމީ މިހުރިހާކަމެއް ކުރިއިރުވެސް، ރާއްޖޭގައި ތިބި ހިލްމީގެ މައިންބަފައިންނަކަށް ހިލަމެއްވެސް ނުވެއެވެ.

ދުވަސްތައް އޭގެ ހަލުވިމިނުގައި މާޒީވަމުން ދެއެވެ. ހިލްމީއާއި ސާރާގެ ގުޅުންވެސް، އެކުވެރިކަމުން ލޯތްބަށް ބަދަލުވެ، ލޯބީގެ ދުވަސްތައް ގުނަމުންދިޔައެވެ. ކެއިންބުއިން އެކުގައެވެ. ނިދަނީ އެއް ތަންމަތީގައެވެ. ކިޔަވަންދަނީ އެކުގައެވެ. ސާރާގެ އެއްވެސް ކަމަކަށް ދަތިވިޔަ ނުދީ ހުރިހާކަމެއް ހިލްމީ ދިޔައީ ބަލަހައްޓަމުންނެވެ. ކިޔެވުމުގެ ފަހު އަހަރުކަމުން ކިޔަވާ ނިމިގެން ރާއްޖެ ގޮސް ކައިވެނިކުރާނެ ތާރީޚާއި، ޕާޓީ ބާއްވާނެ ތަނާއި، ތީމް ކުލައަށް ދާންދެން ވަނީ ނިންމާފައެވެ. 

ހިލްމީގެ ބައްޕަ ހައްސާންއާއި މަންމަ ހަފްސާ ތިބީ އެއަރޕޯޓުގެ އެރައިވަލް ޓާމިނަލު ބޭރުގައެވެ. ކެތްތެރިކަމެއްނެތި ދެކޮޅަށް ހިނގާލަ ހިނގާލަ އެ ތިބީ އެދެމަފިރިންގެ ދަރިފުޅު ހިލްމީ ކިޔަވާ ނިމިގެން އަންނާތީ ދެކިލަން ކެތްމަދުވެފައެވެ. ކިޔެވި ކޯސް ވަރަށް ފުރިހަމައަށް ނިންމާ އެނބުރި ރާއްޖެ އަންނާތީއެވެ. ހައްސާންގެ ހުވަފެން ހަގީގަތަކަށްވާތީއެވެ.

ބްރިޓިޝް އެއާރވޭސްއިން އައި ދަތުރުވެރިން ނުކުންނަމުން ދިޔައެވެ. ހައްސާންއަށް ހިލްމީ ހަމަ ފެނުމާއެކު ދަރިފުޅާއޭ ކިޔާ ގޮވާލިއެވެ. އަދި ހިނގައިގަތެވެ. ނަމަވެސް، ހައްސާންގެ ހިނގުމަށް ހުއްޓުންއެރީ ހިލްމީއާއެކު އަންހެން ކުއްޖެއް އަންނާތީއެވެ. ހިލްމީއައިސް، ހައްސާން އާއި ހަފްސާގެ ގައިގައި ބައްދާލިއެވެ. އޭރުވެސް ސާރާ ކައިރީގައި އިސްދަށަށް ޖަހައިގެން ހުއްޓެވެ. ހިލްމީ ސާރާއަކީ ކާކުކަން ކިޔައިދިނެވެ. ހަފްސާ ހިނިތުންވުމާއެކު ސާރާއާ ސަލާމްކުރި ނަމަވެސް، ހައްސާންގެ މޫނުމަތިން ފެންނަމުންދިޔައީ ނުތަނަވަސްކަމެވެ. އަވަހަށް ގެޔަށްދާން ބުނެފައި ކާރާ ދިމާލަށް ހިނގައިގަތީ ސާރާއަށް ބަލައިވެސް ނުލައެވެ.

ގެޔަށް ދެވުމާއެކު، ހައްސާންގެ ހިތުގައި ފޮރުވާފައި ބެހެއްޓި ހުރިހާ އިހްސާސެއް ބޭރުކޮށްލިއެވެ. ހިލްމީއާ ސާރާ އެކަށީގެން ނުވާކަމަށާއި، ހިލްމީގެ ކައިވެނި އޮތީ މާކުރިން ހަމަޖެހިފައިކަމަށް ހައްސާން ބުނުމުން ހިލްމީ ވަރަށް ދެރަވިއެވެ. އަދި އެކަމާ ކިތަންމެ ދެކޮޅު ހަދަން ބޭނުންވި ނަމަވެސް، މަންމަގެ އެދުމުގެ މަތިން ބައްޕައާ ދެކޮޅަށް އެއްވެސް ބަހެއް ނުބުނެ ހަނުހުރީއެވެ.

ހިލްމީ ކިޔަވައިގެން އައިތާ މާ ގިނަ ދުވަސްތަކެއް ނުވަނީސް ހިލްމީގެ މަންމަ ހަފްސާ ވަރަށް ބޮޑަށް ބަލިވެއްޖެއެވެ. ރާއްޖެއިން އެކަމަށް ފަރުވާއެއްނެތެވެ. ބައްޔަކީ ކިޑްނީ ބައްޔެވެ. ވަގުތުން އިންޑިޔާއަށް ފުރަން ޖެހިއްޖެއެވެ. ހިލްމީވެސް ގޮވައިގެންނެވެ. މިވީ ދުވަސްތަކުގައި ވިޔަފާރީގައި މާބުރަކޮށް އުޅެން ހަދައިގެންނާއި ސާރާގެ ކަންތައް ވީ ގޮތުން ހިލްމީވެސް ހުރީ އެހެން މާހައުލެއް ތަޖުރިބާ ކޮށްލަންވެސް ބޭނުންވެފައެވެ.

ޑޮކްޓަރުން ބެއްލެވުމަށްފަހު، ދެ ކިޑްނީ ފެއިލްވެފައިވާކަމަށް އެންގިއެވެ. އަދި ވަރަށް އަވަހަށް ކިޑްނީއެއް ނުލިބިއްޖެނަމަ، ފުރާނައަށް ނުރައްކާވެދާނެކަންވެސް އެންގިއެވެ. ކިތަންމެ ފައިސާއެއް އަތުގައި ހުއްޓަސް، ކިޑްނީއެއް ހޯދުމަކީ ދަތި ކަމެއްކަން ހައްސާންއަށް ވިސްނެއެވެ. އެކި ގޮތްގޮތުން ބޮޑެތި އަގުތައް ހުށަހަޅައިގެން ކިޑްނީ ހަދިޔާ ކުރަން އެއްބަސްވެގެން އަންނަ މީހުންވެސް ފޮނުވާލަން ޖެހެނީ ދިމާނުވެގެންނެވެ. މި ގިލަންވެރިކަމުގައި ހައްސާން ގޮތް ހުސްވެއްޖެއެވެ. ދުވަހެއް ދުވަހަކަށް ހަފްސާގެ ހާލުދަނީ ގޯސްވަމުންނެވެ. އެ މަންޒަރު ބަލާކަށް ހިލްމީއަކަށް ކުޅަދާނައެއް ނުވިއެވެ. އޭނާގެ މާގިނަ އެކުވެރިން ނުތިބޭތީ، އެ ވާހަކަ ސާރާއާ ހިއްސާ ކުރިއެވެ.

ހިލްމީގެ ހިމޭންކަން ގެއްލުވާލީ ހައްސާން އައިސް ހިލްމީގެ ކޮނޑުގައި އަތް ބާއްވާލުމުންނެވެ. އަދި ދުރު ބަލަހައްޓައިގެންހުރެ، ލޮލުން ކަރުނަ އަންނަ ހާލުގައި ހައްސާން ބުނަމުންދިޔައެވެ. " ދަރިފުޅާ! ދަރިފުޅު މިއަދު ތިޔަވީ ޤުރުބާނީގެ އަގަކީ ތިޔަ ދެކުދިންގެ ކައިވެނި ކަމުގައި ވަނީނަމަ، އެކަންވެސް ބައްޕަ މިހުރީ ކޮށްދޭން ތައްޔާރަށް"

"ތިޔަހެން ނުބުނުއްވާ ބައްޕާ! އެއީ އިންސާނިއްޔަތަށްޓަކައި ސާރާ ވީ ޤުރުބާނީއެއް. ސާރާގެ މައިންބަފައިންނެއް މި ދުނިޔެއަކު ނެތް. ހާލުގައި ޖެހުނު ދުވަހު އެހީވީ އަހަރެން. ބައްޕަގެ ފައިސާއިން." ހިލްމީގެ އަޑުގައިވީ ކުރަކި ކަމެކެވެ. ހިލްމީ ކިޔަވަން އުޅުނު ދުވަސްވަރު، ސާރާއަށް ދިމާވި ގޮތުގެ ވާހަކައާއި ކަންކަން ހިނގާދިޔަ ގޮތް ކިޔައިދިނެވެ.

އެވާހަކަތައް ކިޔައިދެމުން ދިޔަ އިރު، ހައްސާނަށް ދިޔައީ ގިސްލެވެމުންނެވެ. ސާރާއާމެދު ކަންތައް ކުރެވުނު ގޮތުންނެވެ. އެއްވެސް ގޮތެއް ނެތުނު ދުވަހު، ފައިސާއިންވެސް ނުވިކަމެއް ސާރާ އެއްވެސް އަގެއް ނެތި ކޮށްދިނުމުންނެވެ. އަދި ހިލްމީ ގެނެސް ގަޔާ ކައިރި ކޮށްލާފައި ބުނަމުންދިޔައެވެ. " ދަރިފުޅާ! ބައްޕައަށް މަޢާފުކުރޭ! ސާރާ އާއި މަންމަ ގަދަވެގެން ހޮސްޕިޓަލުން ނުކުތުމުން ބައްޕަ އެންމެ ފުރަތަމަވެސް ކުރާނެ އެއްކަމަކީ، ތިޔަ ދެކުދިންގެ ކައިވެނި."

ހިލްމީއަށް ބުނާނެ އެއްޗެއްވެސް ނޭނގި ބަސް ހުއްޓިފައި ހުރެވުނީއެވެ. ދެކެމުން އައި ހުވަފެނެއް ބިލާހަކަށްވެފައިވަނިކޮށް އަނެއްކާ ކުލަ ޖެހެން އުޅޭތީއެވެ. ސާރާ ވީ ޤުރުބާނީގެ ސަބަބުންނެވެ.