ޣާޒާގެ ޙާލަތު ފެނިފައި ލޮލުން ކަރުނަ ހިލެއެވެ. އެ އަޚުންނާއި އުޚުތުން ތަޙައްމަލު ކުރާ ވޭނާއި ހިތްދަތިކަން ތަސައްވަރު ކޮށްލުމަކީ ކުޅަދާނަކަމެއް ނޫނެވެ. ވަށައިގެންވަނީ ފުނޑުވެފައިވާ އިމާރާތްތަކެވެ. ބިރުވެރިކަމުން ފުރިފައިވާ ލޯތަކާއި، ޝަހީދުވެފައިވާ ފުރާނަތަކަށް އޮހެމުންދާ ކަރުނަތަކެވެ. ބަނޑުހައިހޫނުކަމާއި ކަރުހިއްކުމެވެ. އަމިއްލަ ވަތަނުގައި ރެފިއުޖީންނަށް ވެފައިވާ، ހުރިހާ އުމުރެއްގެ ރައްޔިތުންނެވެ. ރައްކާތެރިކަމެއް އަދި ބޯހިޔާވަހިކަމެއް ނެތެވެ. ލިބޭ އަނިޔާތަކާއި ޒަޙަމްތަކަށް އެކަށޭނެ ފަރުވާ ނުލިބޭ ޙާލުގައި، ޞަޙްޔޫނީންގެ ޙަމަލާތައް އަމާޒުވާ ހޮސްޕިޓަލްތަކެވެ. ނަމަވެސް ފަލަސްޠީނުގެ މުސްލިމު އަޚުންނާއި އުޚުތުން ދައްކަމުން ދަނީ ހިތްވަރުގަދަކަމާއި އީމާންތެރިކަމުގެ ލާމަސީލު ނަމޫނާއެވެ. ހިތްވަރާއި ކެރޭކަމެވެ. ދީނާއި ވަތަން ޙިމާޔަތްކުރަން ތައްޔާރަށް ތިބިކަމެވެ. މިއީވެސް އޭގެތެރެއިން ލޮލުގައި އަޅައިގަތް ހިނިތުންވުމެކެވެ. ތުއްތު ދެކުދިންގެ މައުސޫމު، ޗާލު ހިނިތުންވުމެކެވެ. 

އެއީ ޣާޒާގެ ޙާލަތު، އޭނާ ނަގާ ފޮޓޯތަކުން ކިޔައިދޭ، ހަނީން ސާލިމްގެ އިންސްޓަގްރާމް ޕޯސްޓެކެވެ. ކެޕްޝަންގައި ލިޔެފައިވެއެވެ.

               

"ޓެންޓުތަކާއި، ފުނޑުވެފައިވާ ގެތަކަށް އަހަރެންގެ ކެމެރާގެ ލެންސު ނަޒަރު ހިންގަމުން، އަނިޔާވެރި ޞަޙްޔޫނީންގެ ލާއިންސާނީ ޖަރީމާތައް ޑޮކިއުމެންޓު ކުރަމުން ދިޔަ ވަތުގު ލޮލުގައި އަޅައިގަތް މަންޒަރެކެވެ. ހަނގުރާމައިގެ އަތުން ނުފޫޒު ނުފޯރުވިފައި އޮތް އެއްޗެކެވެ. އެއީ އެހެން ދުނިޔެއެއްގެ މަންޒަރެއް ފަދައެވެ. ކުޑަކުޑަ ދެކުދިން، ކުޑަ ގަސްތަކެއްގެ ތެރޭގައި ތިބެ، ރީނދޫ ކުލައިގެ މައުތަކެއް އުފުރަނީއެވެ. އެކުދިން ހެމުން ހިނިތުންވަމުން ދިޔައެވެ. މިއީ، ވީރާނާވެ، ހަލާކުވެފައިވާ މި ބިމުން ފެންނަންހުރި ހަމައެކަނި ކުލައެވެ. (ނުވަތަ ހަމައެކަނި އުފާވެރިކަމުގެ ކުލަވަރެވެ.)

ހަނގުރާމައަކުން ޤަތުލު ކުރެވިފައިވާ (މަރާލެވިފައިވާ) ބިމެއްގައި އުފާވެރިކަން ފޮޅޭނީ ކިހިނެއް ހެއްޔެވެ؟ އެއްވެސް އެއްޗެއް ނެތް ހިތެއްގައި، ބަހާރު މޫސުން އުފެދޭނީ ކިހިނެއް ހެއްޔެވެ؟ 'އުއްމީދު' ޤަދަރާ ދެކޮޅު ހަދަނީ ހެއްޔެވެ؟ ނުވަތަ އޭގެ ބަރުދަނަށް ބޯލަނބާ ކިޔަމަންވަނީ ހެއްޔެވެ؟ އަމިއްލަ ދުނިޔެ ވީރާނާ ވެފައިވާ ޙާލުވެސް، މީހެއްގެ ރޫޙު ހަލާކު ނުވެ ހުރެދާނެ ހެއްޔެވެ؟ މިކަންތައް އަހަރެންނަށް ހަނދާންކޮށްދެނީ ނީޗަރގެ ބަސްކޮޅެކެވެ: ދިރިއުޅެންވީ ސަބަބު އެނގޭ މީހަކަަށް، ކޮންމެ ގޮތަކަށްވެސް އެކަން ތަޙައްމަލު ކުރަން، ނުވަތަ ދިރިއުޅޭންވީ ގޮތްތައް އެނގޭނެއެވެ." 

ތެދެކެވެ. ވޭނީ އާޙުން ފުރިފައިވާ ބިމުން އަދިވެސް އެ ފެންނަނީ ހިތްވަރުގަދަ ހިނިތުންވުމެވެ. ދިރިއުޅުމަށް ކުރެވޭ އުއްމީދެވެ. ފާގަތި މުސްތަޤުބަލަކަށް ދެކޭ ހުވަފެނެވެ. އެންމެ ކުދި ކަންތައްތަކުންވެސް އުފާވެރިކަން ހާސިލް ކުރަން ދަންނަ ކަމުގެ ހެއްކާއި ޤަރީނާއެވެ. އެއީ ފަލަސްޠީނެވެ. އެތައް ޤަރުނަކުންވެސް ބަލިކަށި ނުކޮށްލެވުނު ބަޠަލުންގެ ބިމެވެ. ﷲ ތަޢާލާގެ ޙެޔޮ ރަޙުމަތްފުޅާއި އިރާދަފުޅުން، އަދި އެބިމަށް ބަހާރު މޫސުން އަންނާނެވެ. މުސްލިމުންނަށް ނަޞްރު ލިބޭނެއެވެ.