އިސްރާއީލުގެ ސިފައިން ހައްޔަރު ކުރާ މީހުންގެ ތެރޭގައި ހިމެނޭ އެއްބަޔަކީ ޢާޒާގެ ސިއްޙީ ދާއިރާގައި މަސައްކަތްކުރާ ފަރާތްތަކެވެ. ޑަކްޓަރުންނާއި މެޑިކަލް ސްޓާފުންނެވެ. ހައްޔަރު ކުރަނީ ކުށެއް ކޮށްގެނެއް ނޫނެވެ. ލާއިންސާނީ ޢަމަލުތަކުން ހައްދުފަހަނައަޅާފައިވާ ޖަރީމާތަކުގެތެރެއިން، އެއީވެސް ޞިޙްޔޫނީން ކުރާ ކަމެކެވެ. އެގޮތުން ޑރ. ޙުއްސާމްއަކީ އެމީހުން ހައްޔަރުކުރި މީހުންގެ ތެރޭގައި ހިމެނޭ އެއް ފަރާތެއެވެ. ޑރ. ޙުއްސާމް ދޫކޮށްލުމަށް އެތައް ބަޔަކު ގޮވާލިއެވެ. ނަމަވެސް ޞިޙްޔޫނީން ކަންތައް ކުރަނީ އެމީހުން ބޭނުންވާ ގޮތަކަށެވެ.

ޑރ. ޙުއްސާމްއާއެކީ ހައްޔަރު ކުރެވުނު ޒުވާން މެޑިކަލް ސްޓާފެއްވަނީ އެކަމާ ގުޅޭ ގޮތުން މަޢުލޫމާތު ހިއްސާކޮށްފައެވެ. ޢާޒާގެ ނޫސްވެރިއަކަށް މަޢުލޫމާތު ދެމުން އެ ޒުވާނާ ކިޔައިދިން ގޮތުގައި، ހައްޔަރު ކުރެވިފައިވާ މީހުންގެ ތެރެއިންވެސް ޚާއްސަކޮށް ޑރ. ޙުއްސާމްއާއި އެ ޒުވާނާ ފަދަ ސިއްޙީ ދާއިރާގައި މަސައްކަތްކުރާ މީހުންގެ ގައިގައި ތަޅާ އަނިޔާކޮށް، ބަދުބަސް ބުނެ، ބަނޑުހައިހޫނުކަންމަތީ ބަހައްޓާފައިވެއެވެ. އަދި ޑރ. ޙުއްސާމްގެ ގައިގައި ތަޅާ، "ތިޔައީ ޑަކްޓަރު ތަ؟ އާދެ މިކޮޅަށް!" މިފަދައިން ބުނެ، އަނިޔާ ކޮށްފައިވާކަމަށްވެސް އެ ޒުވާނާ ހާމަކުރިއެވެ. 'އެކްސްޗޭންޖް ޑީލް'ގެ ދަށުން ދޫކޮށްލެވުނު މީހުންގެ ތެރޭގައި ހިމެނުނު މި ޒުވާނާއަށް ހީވެފައި އޮތީ، ޑރ.ޙުއްސާމްވެސް ދޫކޮށްލިކަމަށެވެ. ނަމަވެސް ސެންޓަރަލް ޢާޒާގައި ހުންނަ ޔޫރޮޕިއަން ހޮސްޕިޓަލަށް ދެވުނުއިރު ޑރ. ޙުއްސާމް އަދިވެސް ދޫކޮށްނުލާކަން އެނގުމުން، އެ ޒުވާނާއަށް ލިބިފައިވަނީ ހައިރާންކަމެކެވެ. 

އަދި ޑރ. ޙުއްސާމްއަކީ ނޯތް ޢާޒާ ސްޓްރިޕްގެ ސިއްޙީ ދާއިރާގެ މައި ތަނބުކަމަށް، އެ މެޑިކަލް ސްޓާފްވަނީ ހާމަކޮށްފައެވެ. އެތަން ދޫކޮށް ދިއުމަށް ދެކޮޅު ހަދާ، ފަރުވާ ދެވޭނެ ގޮތްތައް ނެތިފައި ނުވަތަ އެތައް ގޮންޖެހުންތަކެއް ކުރިމަތިވީ ދަނޑިވަޅުގައިވެސް ޑރ.ޙުއްސާމް އެކަމުގައި ސާބިތުވެ ހުރިކަމަށްވެސް ވަނީ ފާހަގަކޮށްފައެވެ. ހުރިހާ މެޑިކަލް ސްޓާފުން ޒަޙަމްވެފައިވީ ޙާލަތުގައިވެސް ޑރ.ޙުއްސާމް ސާބިތުވެ ހުރިކަމަށް އެފަރާތުން ކިޔައިދިނެވެ.  

ހައްޔަރު ކޮށްގެން ގެންދެވުނު ތަނުގައި 'ނަރަކަ'(ހެލް)އާއި ގުޅުވައިން ނަން ދެވިފައިވާ ތަންތަން ހުންނަކަމަށްވެސް ވަނީ ބަޔާންކޮށްފައެވެ.

އެއްވެސް ކުށަކާނުލާވެސް އެ ޑަކްޓަރުންނާއި، ސިއްޙީ ދާއިރާގައި މަސައްކަތްކުރާ ފަރާތްތަކުގެ އިތުރުން، ޢާއްމު ރައްޔިތުންވެސް ހައްޔަރުކޮށް، ލާއިންސާނީ އެތައް އަނިޔާއެއް އިސްރާއީލުން އަންނަނީ ކުރަމުންނެވެ. ހައްޔަރުން ދޫކޮށްލެވޭ ރައްޔިތުންގެ ފަރާތުން ފެންނަނީ ހިތްދަތި ޙާލަތްތަކެވެ. ތަސައްވަރުކޮށްލަންވެސް އުނދަގޫ އަނިޔާތަކާއި ޒަޙަމްތަކެވެ. ޞިޙްޔޫނީންގެ އަނިޔާވެރިކަމުގެ ހެއްކާއި ޤަރީނާއެވެ.