އިއްޔެެއެކޭ އެއްފަދައިން މިއަދަކީވެސް ސަނާއަށް އާދައިގެ ދުވަހެކެވެ. އާދައިގެ މަތިން ހެނދުނު ތެދުވެ، ސައި ހަދާ، ސައި ބޮއެގެން ހޮސްޕިޓަލަށް ދިޔައެވެ. ސަނާ އަކީ ކުޑަކުދިންގެ ވާރޑުގައި މަސައްކަތް ކުރާ ނަރުހެކެވެ. ލޯބި ލޯބި ތުއްތު ކުއްޖެއްގެ މަންމައެކެވެ. ކެތްތެރި ހިތްވަރުގަދަ އަނތްބެކެވެ. ޔުނިފޯމު އަޅައިގެން ސަނާ ހޮސްޕިޓަލަށް ދިޔައީ އޭނާގެ ފިރިމީހާއާއި އެކު ސައިކަލުގައެވެ.
ސަނާ ހޮސްޕިޓަލަށް ވަދެގެން ދިޔަ އިރު ހޮސްޕިޓަލުގެ ކޮރިޑޯތެރޭގައި އަވަސް އަވަހަށް ހިނގާފައި ދާ މީހުންގެ ފިޔަވަޅުތަކުގެ އަޑާއި، ބަލިމީހުންގެ އަޑުތަކާއި، މެޝިންތަކުގެ ބީޕް އަޑުތައް އެއްވެގެން ދިޔައެވެ. މި އަޑުތަކުގެ ތެރެއިން ކުއްލިއަކަށް އިވުނު ބިރުވެރި ހަޅޭއްލެވުމަކުން ސަނާގެ ހިތުގެ ވިންދު އަވަސްވެގެން ދިޔައެވެ. އޭނާ ހުރީ ކުޑަކުދިންގެ ވިހެއުމުގެ ބަޔަށް ވަންނަ ދޮރުމަތީގައެވެ.
"އަވަހަށް! އަވަހަށް! ކުއްޖާގެ ހާލު ދަށްވަނީ!" މަތިން އިވުނު އަޑަކާއެކު ސަނާ ވަގުތުން އެތެރެއަށް ވަދެ، އަވަސް އަވަހަށް ހިނގަމުން ދިޔައެވެ.
ވިހެއުމުގެ ކޮޓަރިއަށް ވަދެވުނު އިރު، އެތާ ތިބި ޑޮކްޓަރުންނާއި ނަރުހުން ކުއްޖާއަށް ފަރުވާ ދިނުމުގައި ބިޒީކޮށް އުޅެމުން ދިޔައެވެ. ސަނާ ވަގުތުން އެ މަންޒަރު ދެކެ ސިހުނެވެ. ވިހެއި މަންމަ ރޮމުން ދިޔައިރު، ތުއްތު ކުއްޖާ އޮތީ ހަރަކާތެއް ނެތި، ހަމަހިމޭންކޮށެވެ.
"ހިތުގެ ވިންދެއް ނުލިބުނު. އަވަހަށް ރިސަސިޓޭޝަން ފަށާ!" ޑޮކްޓަރު ގޮވާލި އަޑު އިވުނެވެ.
ސަނާ ވަގުތުން ކުރިއަށް ޖެހި، ކުއްޖާގެ ކައިރިއަށް ދިޔައެވެ. އޭނާގެ އަތްތައް ތުރުތުރު އަޅަމުން ދިޔަ ނަމަވެސް، އޭނާގެ ހިތުގައި ހުރި ފަރުވާތެރިކަމާއި ހިތްވަރު އެއްވެސް ވަރަކަށް ފަނޑުވެގެންނެއް ނުދެއެވެ. ކުއްޖާގެ ގައިގައި އަތްލާ، ސީޕީއާރު ދޭން ފެށިއެވެ.
ސީޕީއާރުގެ ފަރުވާއާއި އެކު މިނެޓުތައް ފާއިތުވަމުން ދިޔައިރުވެސް، ކުއްޖާގެ ހާލަތު ރަނގަޅެއް ނުވިއެވެ. ޑޮކްޓަރުން ނިންމީ ކުއްޖާ ކުޑަކުދިންގެ އައިސީޔޫއަށް ބަދަލުކުރާށެވެ. އަވަސް އަވަހަށް ކުއްޖާ އެތަނަށް ގެންދެވުނެވެ.
އައިސީޔޫގައި، ސަނާ ހުރީ ކުއްޖާގެ އެންމެ ކައިރީގައެވެ. އޭނާ ކުއްޖާގެ ވިންދު މޮނިޓަރ ކުރަމުން ދިޔައިރު، އެކި ބާވަތުގެ ފަރުވާތައް ދެމުން ދިޔައެވެ. ކޮންމެ ފަހަރަކު ކުއްޖާގެ ހާލަތު ދަށްވާ ވަގުތު، ސަނާގެ ހިތުގެ ވިންދުވެސް ހުއްޓުމަކާ ހަމައަށް ދާ ކަހަލައެވެ.
ގަޑިއިރުތަކެއް ފާއިތުވެ ދިޔައެވެ. ކުއްޖާއަށް އެތައް ފަރުވާއެއް ދެވި، އެތައް މަސައްކަތެއް ކުރެވުނު ނަމަވެސް، ކުއްޖާގެ ހާލަތު ރަނގަޅެއް ނުވިއެވެ. ސަނާގެ ހިތުގައި އުއްމީދު ކުޑަވަމުން ދިޔަ ނަމަވެސް، އޭނާ ހުރީ ކުއްޖާގެ ކައިރީގައި ހަމަ ހިތްވަރާއެކު ސާބިތުކަންމަތީގައެވެ.
އެހެންނަމަވެސް، އެންމެފަހު ވަގުތު އައިސް ޖެހުނެވެ. ކުއްޖާގެ ހިތުގެ ވިންދު މުޅިން ހުއްޓި، މޮނިޓަރުން އިވެން ފެށީ ދިގު، ހިތާމަވެރި އަޑެކެވެ. ޑޮކްޓަރުންނާއި ނަރުހުން އަދިވެސް ކުއްޖާގެ ފުރާނަ ސަލާމަތްކުރަން މަސައްކަތް ކުރި ނަމަވެސް، އެ މަސައްކަތް ކާމިޔާބެއް ނުވިއެވެ. އެންމެފަހުން، ޑޮކްޓަރު އެ ތުއްތު ކުއްޖާގެ އީސީޖީ އެއް ނަގާ، ބޮލުގައި އަތްލާ ފަހަތަށް ޖެހިލުމަށްފަހު، "ޓައިމް އޮފް ޑެތް..." އޭ ބުނި އަޑު އިވުނެވެ.
އެ ހިނދު، އެތާ ތިބި އެންމެންގެ ލޮލުން ކަރުނަ އައިސް، ހިތާމައިގެ ކަރުނަތައް އޮހެން ފެށުނެވެ. ސަނާ ހުރީ ބަސްމަރުވެފައެވެ. އޭނާގެ ހިތުގައި އުފެދުނު ވޭނާއި ހިތާމަ ބަޔާންކުރަން ޖެހުނު ނަމަ، އެއީ ވަރަށް އުނދަގޫ ކަމަކަށް ވީހެވެ.
ސަނާގެ ސިކުނޑީގައި އެއިރުވެސް އެނބުރެމުން ދިޔައީ އޭނާގެ އަމިއްލަ ތަޖުރިބާއެވެ. އަހަރުތަކެއް ކުރިން، އޭނާވެސް ވިހެއުމުގެ ތެރޭގައި އޭނާގެ ދަރިފުޅުގެ ފުރާނަ ގެއްލުނު ހިނދު އިހުސާސްކުރި ވޭނެވެ. އެ ހަނދާންތައް އާވެ، ސަނާގެ ހިތުގައި އަލުން ފުން ޒަހަމެއް އެޅުނު ފަދައެވެ.
"އަހަރެންނަށްވެސް އެނގޭ މި ވޭނުގެ ބޮޑުކަން. އަހަރެންވެސް މިކަން ތަޖުރިބާކުރިން..." ސަނާ ވިސްނާލަމުން ދިޔައެވެ.
ސަނާ ކުއްޖާގެ މަންމަ ކައިރިއަށް ގޮސް، އޭނާގެ އަތުގައި ހިފައި، "އަޅުގަނޑުމެން ވަރަށް މަސައްކަތް ކުރިން. އެކަމަކު... މާތް ﷲ ރަޙްމަތްފުޅާއެކު، ކުޑަކުއްޖާ މިހާރު ވާނީ ސުވަރުގޭގައި. އެއީ މާ ރީތި، މާ ހިތްފަސޭހަ ތަނެއް..." ހިތްވަރު ދެމުން، މޭލި އަޑަކުން ސަނާ ބުންޏެވެ.
މި ހިތާމަވެރި ހާދިސާއިން ސަނާގެ ހަނދާންތައް އައުކޮށްދިނީ، ދިރުމަކީ ކިހާ އަގުހުރި އެއްޗެއްކަމެވެ. ކޮންމެ ވިންދަކީވެސް ކިހާ މުހިންމު އެއްޗެއްކަމެވެ. އަދި އޭނާގެ މަސައްކަތުގެ މުހިންމުކަމެވެ. އެހެން މީހުންގެ ފުރާނަ ސަލާމަތްކުރުމަށް މަސައްކަތްކުރުމުގެ މާތްކަމެވެ.
އެ ދުވަހުގެ ޝިފްޓް ނިމިގެން ގެއަށް ދިޔައިރު، ސަނާގެ ހިތުގައި އޮތީ ހިތާމައާއި އުއްމީދު އެކުއެކީގައެވެ. އޭނާއަށް އެނގުނީ، ކޮންމެ ދުވަހަކީވެސް އައު ފުރުޞަތެއްކަމެވެ. ކޮންމެ ވިންދަކީވެސް އަގުހުރި އެއްޗެއްކަމެވެ. އަދި އޭނާގެ މަސައްކަތަކީ ހަމައެކަނި ވަޒީފާއެއް ނޫންކަމެވެ. އެއީ އިންސާނިއްޔަތުކަމުގެ ޚިދުމަތެއްކަމެވެ.